26 NETAN
Ọle Da Re Adia Nin Ojie
JEHOVA da je Netan nin akhasẹ nin ọle dọ re adia nin Devid ranmhude emhin ebe nọn kaka nin ọle lu. Ọmọẹ Devid, ọle Netan khin. Ẹghe nin Netan rẹ ha khian ẹgua ọsi Devid nin Ojie, ọle sabọ ha riale, ‘Be okpia nọn mhẹn sẹriọ ha rẹ sabọ lu emhin nọn kaka sẹriọ yẹ?’ Ọkuẹsẹ ọne ẹghe nan, Jehova ka je Netan bu Devid, nin ọle dọ taman ọlẹn emhin esili ne ha sunu je ọle bhi ẹghe odalo, ghe, Mezaya dẹ na bhi ulin-uwa nọnsọle vae! (2 Sam. 7:4, 12, 13) Bhi ejayenan nian, Devid lu emhin ebe nọn manman kaka. Ọnan zẹle nin Jehova da je Netan nin ọle dọ re adia nanlẹn.
Devid da ha riale ghe ọria soso bha daghe emhin ebe nin ọle lu. Ọkpakinọn, Jehova daghe ọle. Jehova da taman Netan emhin ebe nin Devid lu. Be Devid bhọ lu yẹ? Bhi ọsemuan ọkpa, Devid da ha khian bhi okhun uwa nọnsọle. Ọle da na bhi enin daghe okhuo ọkpa nọn ha khọ a. Ọne okhuo nan wo manman mhọnse. Bhiriọ, ọle da je nan re ọle re. Batshiba a tie ọne okhuo. Devid wo lẹn ghe, okhuo Uraya nin obhi Hẹt, nọn yi ọkpa bhi eyokhọnlẹn nesọle ọne okhuo nan khin. Ọrẹyiriọ, Devid da sẹyẹ ne ọne okhuo nowẹ. Akizẹbue, Batshiba da taman Devid ghe ọle hanmhan. Devid bha guanọ nin ọria soso lẹn ebi ọle lu. Bhiriọ, ọle da taman Uraya nin ọle sibhi okhọnlẹn re, nin ọle ha khian uwa dọ ne okhuo ọle nowẹ. (Fẹ 1 Samuel 21:5 ghe.) Ọkpakinọn, ranmhude ọyokhọnlẹn nọn mhọn asun-rẹkhan Uraya khin, ọle da yọle ghe, ọle i da sabọ zẹ okhọnlẹn nọnsi Jehova obọ ha khian uwa dọ le ebale yẹ ne okhuo ọle nowẹ. Bhiriọ, Devid da mhanmhanlẹn nan re Uraya fi ọbhi eji okhọnlẹn da manman nyọn beji a da kẹ gbe ọle a. Ọne emhanmhan ọbe nọnsọle nan da wo gene wẹnna. Uraya ki yu fo, Devid da re Batshiba bhi amhẹn.
Baibo da ji mhan lẹn ghe, ebi Devid lu bha ti Jehova bhọ hiehie. Osẹnobulua da je Netan nin ọle dọ re adia nin Devid, yẹ ji ọle lẹn ghe ebi ọle lu i zẹwẹ mhẹn hiehie. Ẹghe nin Netan rẹ ha bu Devid, asabọmiẹn ofẹn wo ha mun ọlẹn, ranmhude, ọle bha lẹn ebi Devid ha rẹ lu emhin yẹ. Ọle lẹnmhin ghe, Devid gbe Uraya a. Bhiriọ, Netan sabọ ha riale ghe, ahamiẹn ọne ojie sabọ gbe Uraya a, ọle dẹ yẹ sabọ lu iriọ da ọle, sade ọle ta olukhọ nin ọle lu dagbare yẹ re adia nanlẹn. Netan da ha guanọ nin ọta nin ọle ha ta sẹ Devid bhi ọkhọle, sẹyẹ, nin ọle lẹn ghe emhin nin ọle lu bha zẹwẹ gba. Edandan i ribhọ ghe, Netan nin akhasẹ wo nan erọnmhọn ọbhi ọne ẹmhọn nan. Ọle da ria ẹmhọn ijiẹmhin nin ọle ha noo beji ọne ojie ha da lẹn emhin ebe nin ọle lu. Ọle ki lu ọnan fo, ọle da bu ọne ojie.
Netan da taman Devid ẹmhọn ikpia eva ne ha nyẹnlẹn bhi agbaẹbho ọkpa. Ọkpa bhọ da wo manman fe. Ọle da ha mhọn ihuan bi ẹmena ne bunbun. Obhioguele ọnọnkẹle khin. Ohuan ọkpa ọle mhọn. Ọle wo manman hoẹmhọn ọne ohuan rẹ sẹbhọ ghe, ọle bha riale ghe ọle dẹ gbe ọne ohuan an, la le ọle. Ẹdọkpa, erumhunyẹn da dọ tuẹ one okpia nọn manman fe. Ọle bha rẹ ha mhọnlẹn bhi ọkhọle ghe ọria dẹ dọ tuẹ ọle. Ọle da ha guanọ ohuan nin ọle ha gbe a rẹ nyẹn ebale nin ọne erumhunyẹn. Ọle bha mun ọkpa bhi ihuan nesọle. Sokpan, ọle da dọ mun ọsi ọne obhioguele, yẹ gbe ọle a re ọle nyẹn ebale nin ọne erumhunyẹn. Netan ki gbe ọne okha nan fo, ohu da wo manman re Devid. Ọle da yọle: “Beji a miẹn Jehova nyẹnlẹnmhin, ọkhẹke nin ọne okpia nọn lu ọne emhin nan yu!” Ẹkẹ da wo manman ha khọ Devid, ranmhude, ọne okpia nọn manman fe bha re ẹkẹ-ẹjẹjẹ man.
Ọ da khẹke nin Netan re adia nin ojie nin ọle hoẹmhọnlẹn, nin ọle yẹ mun ekpẹn nan
Ijiẹmhin nin Netan noo wo de ọbhọ. Ọsun-ohuan Devid ka ha khin. Sẹyẹ, ọ i zẹwẹ ti ọle bhọ hiehie sade a denyẹnyẹn ẹbho. Netan ki da taman ọlẹn yọle: “Uwẹ hi ọne okpia nin!” Ọnan da wo re egbe lọ Devid. Netan da taman Devid ghe, Jehova daghe emhin rebhe nin ọle lu. Ọle da taman ọlẹn ebi Jehova ha lu ọle le. Ọle da yẹ yọle ghe okhọn bi ọkakale dẹ ha ribhi azagba-uwa nọnsi Devid rẹ na bhi ikpe ne bunbun. Be Devid ki rẹ lu emhin yẹ?
Devid da yọle: “Mẹn rahiẹ Jehova.” Devid da wo manman kiọya ọbhi ebi ọle lu, yẹ fidenọ. Netan da re eghọnghọn taman Devid ghe, Jehova dẹ mhọn itohan da ọle. Ọle da yọle: “Jehova yẹ rẹhunmhan olukhọ nọnsẹ. Uwẹ i da yu.” Ọrẹyiriọ, Devid da wo manman loya bhi emhin ebe nin ọle lu, nin ọle rẹ ne Batshiba nowẹ. Ọmọn nin Batshiba biẹ nin Devid da yu. Rẹ na bhi ikpe ne bunbun, okhọnlẹn, ugbele, bi ọkakale da wo ha ribhi azagba-uwa nọnsi Devid.
Ene ọkakale nan rebhe rẹ ha sunu, Devid da sẹyẹ sun rẹkhan Jehova. Ọle da gbẹn illo nọn tẹmhọn ebi Jehova rẹ rẹhunman ọria yẹ nọn kiọya ọbhi olukhọ nọnsọle, yẹ fidenọ. (Psalms 32 bi 51) Devid nin ojie da kie deba Jehova ha mhọn ikolu nọn ziẹnlẹn. Ọle da sẹyẹ wo ha ka Netan nin akhasẹ ehọ rẹ na bhi ẹdagbọn iẹnlẹn nọnsọle rebhe. Sẹyẹ, ọle wo sun rẹkhan Jehova, rẹ dọ sẹbhi ukpẹdẹ nin ọle yu. (1 Ki. 9:4) Edandan i ribhọ ghe, Netan wo ha ghọnghọn nin ọle rẹ sabọ re izebhudu re adia nin Devid nọn lu ebe bha gba.
Tie ọne okha bhi Baibo:
2 Samuel 11:1–12:18
Inọnta:
Uwedẹ nela Netan rẹ re izebhudu man?
Manman Guanọ Otọle
1. Ọkpa bhi ene gbẹn Baibo Netan khin. Ọkpakinọn, mhan bha lẹn ene biẹ ọle la ebi iẹnlẹn nọnsọle diayẹ. Be ọnan rẹman rẹji ọle? (w12 2/15 25 ¶2-3)
2. Obhi Hẹt Uraya khin. Ọkpakinọn, bezẹle nin ọle da deba bhi eyokhọnlẹn nesi Devid? (w24.04 31)
3. Netan nin akhasẹ da tẹmhọn ọkakale ne ha sunu ji azagba-uwa nọnsi Devid. Be ọ rẹ munsẹ yẹ? (it “Devid” ¶29)
4. Be Netan rẹ re izebhudu man yẹ bhi ẹghe nin Devid nin ojie ki rẹ dọmanlẹn? (w12 2/15 25 ¶1) 1
Ifoto 1
Ria Eria Nyan Emhin Nin Uwẹ Luẹle
Be ijiẹmhin ọsi Netan man mhan le rẹji ebi mhan ha rẹ sabọ rẹkpa ọmọẹ mhan yẹ nọn lu emhin ebe nọn kaka?
Be imhan ha rẹ sabọ re egbe khọkhọ Netan yẹ sade mhan guanọ nin ebi mhan ha ta sẹ ọkhọle ọsi ọria? 2
Ifoto 2
Uwedẹ ebhebhe nela uwẹ ha rẹ sabọ re egbe khọkhọ Netan bhi izebhudu nin ọle rẹman?
Ria Ẹmhọn Jehova Bi Iho Nọnsọle
Be ọne okha nan man mẹn le rẹji Jehova?
Be ọne okha nan rẹ diẹn mun iho nọnsi Jehova yẹ?
Be mẹn ha nọọn Netan le sade a riọ ọle kpanọ bhi uu?
Sẹyẹ Fẹ Ene Emhin Nan Ghe
Be emhin nin Devid lu rẹ rẹso ọle, imọẹ ọle, azagba-uwa nọnsọle, bi Jehova yẹ?
Yere Ebi Ahoẹmhọn-egbe Rẹ Lu Emhin Yẹ—Ọ Ikhu Ọsi Egbe Ọle Ọkpa (1:14)
Luẹ ebezẹle nin adia nin Netan re nin Devid da sabọ wẹnna.
“Ha Re Idegbere Miẹn Adia Ọbhi Egbe” (Usun Uhọnmhọn-ọta Ne Ribhi Itanẹt “Ebe Nan Rẹ Luẹ Baibo”)