50 SỌL NỌN NA BHI TASỌS VAE
Ọle Da Fi Ọkhọle Denọ
SỌL a tie ọne okpia nan tẹmhọnlẹn bhi uhọnmhọn-ọta nọnzi 48, nọn ha ribhi eji a da gbe Stivin an.a Agbaẹbho ọsi Tasọs ọle na vae. Sọl wo rẹọbhọ ghe emhin esili nọn nan rẹ gbe Stivin a. Rẹji ọle, oga ọsi ibhokhan Ju ọkpa hi oga ẹmhọanta. Ọnan bhọ zẹle nin Baibo da yọle ghe, Sọl da ha “guanọ nin ọle gbono edibo nesi Jesu a” ne ribhi Jeruaslẹm. Ọle da muno ẹbho ne bunbun ne rẹkhan Jesu ọbhi ighan. Ahamiẹn a guẹzọ ọsi ene Kristiẹn, Sọl ki re obọ ọbhọ nan gbono ele a. Ranmhude uwedẹ nan rẹ manman ha kpokpo ene Krisitiẹn bhi Jerusalẹm, ene bunbun da nẹgbe sibhi ọne agbaẹbho re. Ọrẹyiriọ, Sọl da sẹyẹ ha guanọ nin ọle dọ kpokpo Kristiẹn ne ribhi agbaẹbho ebhebhe. Bhiriọ, ọle da bu ojohẹn dọ taman ọlẹn ghe, nin ọle re isẹhoa nanlẹn beji ọle ha da ha khian Damaskọs, dọ muno ene Kristiẹn ne ribhi enin ọbhi ighan.
A ki re ọne isẹhoa nin Sọl fo, ọle bi ẹbho eso da rẹ gbodẹ ha khian Damaskọs. Bhi ọne ẹghe nan, Sọl bha lẹn ghe Jesu riọ kpanọ, sẹyẹ, okhun ọle ki ye. Jehova bi Jesu wo lẹn emhin ne i mhẹn nin Sọl lu. Ọrẹyiriọ, ele daghe emhin nọn mhẹn bhi egbọle. Beji ele rẹ ha sikẹ Damaskọs, “Ẹfua nọn bhaa gbera ovuẹn” da wo re osukpa bhaa nyan ele. Bhiriọ, Sọl da de ọbhi otọ, ọle bha yẹ daghe emhin soso.
Sọl da họn ukpuru nọn na bhi okhun sotie ọle yọle, “Sọl, Sọl, bezẹle nin uwẹ da kpokpo imẹn? Egbe ẹ uwẹ gheghe kuan nin uwẹ rẹ ha ne imẹn suan.” Sọl da yọle: “Họla uwẹ khin Ebeanlẹn imẹn?” Jesu da wanniẹn Sọl yọle: “Imẹn hi Jesu, ọne uwẹ kpokpo.” Ebi Jesu tale da wo re egbe lọ ọle. Jesu ki da taman Sọl nin ọle kpanọ mundia. Ọle da ji Sọl lẹn ghe, ẹsọn kpataki ribhọ nin ọle ha nanlẹn miẹn. Sọl dẹ ha yi ọsali ọsi Jesu. Ọle dẹ ji ẹbho lẹn ghe, emhin rebhe nin Jesu man ẹbho le, ẹmhọanta nọn. Sẹyẹ, ọle dẹ rẹkpa ẹbho ne bunbun rẹ sibhi ebiuki re.
Be re okpia ọkpa nọn ka rẹ ha kpokpo Kristiẹn fi ọkhọle denọ, yẹ kiẹn ọkpa bhi edibo nesi Jesu?
Ene ọta nin Jesu taman Sọl da wo re ọle degbere. Ranmhude ọle i yẹ daghe, a da re ọle obọ ha khian Damaskọs. Enin ọle ki ha ye ọkuẹsẹ Kristiẹn ọkpa bu ọle re. Sọl da fi azinmhin na bhi ikpẹdẹ ea. Asabọmiẹn ọle lu ọnan nin ọle rẹ rẹman ghe ọle fidenọ bhi emhin rebhe nin ọle lu. Edandan i ribhọ ghe ọle wo manman nan erọnmhọn ji Jehova. Ọ da wo dọ khia bhi ẹlo ọsi Sọl ghe, Jesu nin ọmọn nọnsi Osẹnobulua ọle wo ha kpokpo. Jesu da je okpia ọkpa natiọle Ananayas bu Sọl. Arẹmiẹn ofẹn ka ha mun Ananayas rẹ bu ọle, ọle da sẹyẹ ha khian. Ọle ki sẹbhi enin, ọle da ne obọ nyan Sọl. Bhi ọne ẹghe nin, “ebe diabe ihianmhẹn ehẹn da de sibhi ẹlo ọsi Sọl re.” Ọle da kie munhẹn ha daghe! Sọl da wo fidenọ, yẹ ha mhọn idegbere. Ọle da dọ ha mhọn ẹwanlẹn gbera ọnikhẹ. Bhi ọne ẹghe nan, “ọle da kpanọ mundia, yẹ dọ mianmẹn.”
Sọl ki mianmẹn fo, ọle da munhẹn ha lu iwẹnna itẹmhọn Osẹnobulua. Ọle bha fikie ha khian Jerusalẹm. Ọle da lu emhin ọbhebhe nọn bha lẹkhẹ nanlẹn. Ọle da ha khian sinagọg nọn ribhi Damaskọs. Asabọmiẹn ẹbho ne ribhi enin wo lẹn ọlẹn ọbhi ọria nọn kpokpo Kristiẹn. Edandan i ribhọ ghe ọle bhii Osẹnobulua nọn re izebhudu nanlẹn. Ria ebi ọ ha rẹ han ene ẹbho ilo yẹ bhi ẹghe nin Sọl rẹ ji ele lẹn ghe, emhin nọn bha gba ọle wo ha lu rẹ na otọ ha de, ghe, odibo nọnsi Jesu ọle ki khin nian. Sọl bha wo gheghe taman ene ẹbho ghe ọle fidenọ. Ọle da yẹ ha guanọ nin ọle rẹkpa ele rẹ fidenọ. Baibo da yọle: “Sọl da wo manman ha lu re alo bhi oga. Ọle da wo re ẹwanlẹn ha rẹman ghe, Jesu, ọle hi Kristi. Ọnan da wo re ilo han ibhokhan Ju ne ha nyẹnlẹn bhi Damaskọs.”
Ẹghe ribhọ nin Sọl rẹ na bhi Damaskọs ha khian agbaẹbho ọsi Arebia, asabọmiẹn ugbẹnẹbubu nọn ribhi Siria ọle diọ i. Bhi ọne ẹghe nin, agbaẹbho ọsi Arebia, ọle Siria ha ye. Baibo bha taman mhan ebezẹle nin ọle da diọbhi enin. Ọkpakinọn, asabọmiẹn ọle da ha guanọ nin ọle ọkpa ha ribhi ọsọle, beji ọle ha da sabọ nan erọnmhọn ji Jehova, yẹ ria eria nyan ebi Jesu taman ọlẹn, bi ẹsọn kpataki nin Jesu mun nanlẹn. Bhi ẹdagbọn iẹnlẹn ọsi Sọl rebhe, ọle bha zobọ bhọ rẹ ha luẹ Baibo, yẹ ria eria nyan ọlẹn. Ọle da wo gene dọ fi ọkhọle denọ sẹsẹsẹ. Akizẹbue, ọle da taman ene Kristiẹn ne ha ribhi Rom ghe, nin ele yẹ ha fi ọkhọle denọ.—Rom 12:2.
Sọl bha ye ene emhin ebe a nin ọle lu bhi ẹghe nọn gbera. Arẹmiẹn ikpe ne bunbun ki gbera nin ọle fidenọ, ọle da yẹ yọle: “Ọria oya mẹn rẹ ha khin. Mẹn da wo ha re unun ji Osẹnobulua yẹ kpokpo edibo nesi Kristi.” (1 Tim. 1:13) Ọle da yẹ manman kiọya ọbhi ebi ọle lu, nin ọle rẹ re obọ ọbhi uyumhin ọsi Stivin. (Iwẹn. 22:19-21) Ọrẹyiriọ, Sọl lẹnmhin ghe Jehova bi Jesu wo rẹhunmhan ọlẹn. Ele da sẹyẹ wo ha rẹkpa Sọl.
Ebe sẹbhi ikpe ea Sọl gbe bhi Damaskọs. Ọkpakinọn, ẹghe nin ibhokhan Ju rẹ ha guanọ nin ele gbe ọle a, ọle da nẹgbe sibhi ọne agbaẹbho re. Edibo ne ha ribhi enin rẹkpa ọle rẹ nẹgbe. Ele da mun ọlẹn ọbhi ẹkẹ okhuale, yẹ mun ọlẹn huẹnre bhi ogbe ọsi ọne agbaẹbho. Ọle ki dagbare, ọle da ha khian Jerusalẹm. Ọkpakinọn, ẹsọn ne bunbun nin ọle ha miẹn sẹyẹ wo khẹ ọle bhi odalo.
Tie ọne okha bhi Baibo:
Inọnta:
Uwedẹ nela Sọl nọn na bhi Tasọs vae rẹ re izebhudu man bhi ọne okha nan?
Manman Guanọ Otọle
1. Bezẹle nin Sọl da yọle ghe Tasọs nin agbaẹbho nin ọle na vae, “agbaẹbho nan manman lẹn nọn”? (Iwẹn. 21:39; w99 5/15 30 ¶1) 1
Todd Bolen/BiblePlaces.com
Ifoto 1: Agbaẹbho ọsi Tasọs bhi ẹghe ẹdẹlẹ nọn dunmhun an kẹre khọnan
2. Bezẹle nin mhan ha da sabọ yọle ghe Sọl wo lẹn ebi ibhokhan Ju, Grik, bi Rom rẹ lu emhin yẹ? (bt 62, ẹkpẹti ¶1-3)
3. Be Sọl ha temhọnlẹn ẹghe nin ọle rẹ yọle ghe Jesu zegbere man ọlẹn “bọsi ọmọn nọn bha sẹ uki a kuẹ biẹ ọle”? (1 Kọr. 15:8; w22.09 27)
4. Be rẹman ghe ebi Luk gbẹn ọbhi Iwẹnna 9:11, 24, 25, ẹmhọanta nọn? (g03 2/8 24-26) 2
Photo by ROLOC Color Slides
Ifoto 2: Geti natiọle Bab-Sharqi bhi Damaskọs khọnan. Enan uwedẹ natiọle Ukpọwala sẹ
Ria Eria Nyan Emhin Nin Uwẹ Luẹle
Sọl da re idegbere miẹn urẹkpa ọsi Ananayas bi Kristiẹn nekẹle ọbhi egbe. (Iwẹn. 9:17, 18; Kol. 4:10, 11) Idia nela ọ da khẹke nin mhan miẹn urẹkpa ọsi ibhio mhan ọbhi egbe?
Sọl bha ji isiku nin ọle manman yo, la emhin ebe nin lu bhi ẹghe nọn gbera re ọle miẹn ghe, ọle bha yẹ ha ga Jehova. (Fil. 3:4-8; 1 Tim. 1:12-16) Be imhan ha rẹ sabọ re egbe khọkhọ ọle yẹ? 3
Ifoto 3
Uwedẹ ebhebhe nela uwẹ ha rẹ sabọ re egbe khọkhọ Sọl bhi izebhudu nin ọle rẹman nan tẹmhọnlẹn bhi ọne okha nan?
Ria Ẹmhọn Jehova Bi Iho Nọnsọle
Be ọne okha nan man mẹn le rẹji Jehova?
Be ọne okha nan rẹ diẹn mun iho nọnsi Jehova yẹ?
Be uwẹ miẹn luẹ bhi ọne okha nan rẹji Sọl, nọn re ọle ti uwẹ bhọ ghe Sọl dẹ deba Jesu gbẹloghe bhi okhun?
Sẹyẹ Fẹ Ene Emhin Nan Ghe
Bhi ọne ividio nan, fẹ ebi okpia ọkpa nọn ka rẹ ha kpokpo Kristiẹn bii Sọl rẹ fi ọkhọle denọ yẹ.
Oyẹẹ Rẹkpa “Sọl Nọn Na Bhi Sado Vae” Rẹ Fi Ọkhọle Denọ (5:50)
Be imhan ha sabọ miẹn luẹ bhi obọ Sọl rẹji nan rẹ ha luẹ Baibo ẹghe rebhe, re oyẹẹ man ẹbho rebhe, yẹ mhọn idegbere?
“Re Egbe Khọkhọ Pọl Beji Uwẹ Ha Da Ha Lu Re Alo Bhi Oga” (w08 5/15 21-25)
a Akizẹbue, a da ha tie Sọl, Pọl. Sokpan, bhi ọne uhọnmhọn-ọta nan, a dẹ tiọle Sọl.