Ọle Da Re Ẹmhọn I Nọnsẹn

ABIGẸ da ke egbọle re bhi idia nọn bha lẹkhẹ, ranmhude ikpia eva ne ha khọẹkẹ egbe. Ọkpa bhi ene ikpia nan hi Neba. Ọdọ Abigẹ ọle khin. Ọria nọn i mhọn ẹwanlẹn, nọn lu emhin ebe, nọn yẹ to bhi egbe, ọle Neba ha khin. Devid hi okpia nọnkẹle. Okpia nọn mhẹn nọn ga Jehova ọle khin. Ọle dẹ yẹ ha yi ojie ọsi Izrẹl bhi ẹghe odalo. Ọkpakinọn, Neba da re ẹkẹ khọ Devid. Ejayenan nian, ọbe bu azagba-uwa ọsi Abigẹ vade. Okhuo nọn wo mhọnse nọn yẹ mhọn ẹwanlẹn, ọle Abigẹ ha khin. Ọkpakinọn, ejela ọle ha da miẹn ọne izebhudu nin ọle rẹ re ọne ẹmhọn nan ọ i nọnsẹn beji a da miẹn ghe ọria soso bha yu?

Ọguọmhandia ọkpa da dọ taman Abigẹ emhin ebe nin Neba lu Devid le. Ọle da yẹ taman ọlẹn ghe, Devid bi ikpia nesọle ne bun sẹbhi 400 ne ne emhin okhọnlẹn mhọn vade bhi uwa nọnsọle. Ele wo muegbe nin ele rẹ dọ gbe Neba bi ọrebhe ne ribhi uwa nọnsọle a. Bezẹle? Ọkuẹsẹ ọne ẹghe nan, ẹghe nin Devid rẹ nẹgbe ranmhude Sọl guanọ nin ọle gbe ọle a, ọle da sẹyẹ wo ha gbega ibhokhan Izrẹl rebhe, rẹ dọ sẹbhi azagba-uwa ọsi Neba bi ọrebhe ne ribhi uwa nọnsọle. Ọle da yẹ ha gbega ihuan nesi Neba. Ẹdọkpa, Devid da je ikpia nesọle bu Neba, nin ele dọ taman ọlẹn nin ọle ne ebale nin ele. Ọkpakinọn, Neba bha ka. Ọle da ha ghunmhun ene ikpia yẹ ne ele talọ sakan-sakan. Ọle da yọle ghe, ọkpa bhi eguọmhandia ne nẹgbe sibhi uwa ọsi ebeanlẹn ele re, ọle Devid khin!

Ọguọmhandia ọsi Neba lẹn ghe ọle ha dọ taman Neba ghe ọbe bu ọle vade, ọle i da fi ehọ ọle bhọ. Ọle da taman Abigẹ yọle: “Ọria oya ọle khin. Ọria i sabọ ne ọle talọ.” Ọkpakinọn, ọne ọguọmhandia da rẹọbhọ ghe Abigẹ dẹ ka ọle ehọ, sẹyẹ, ọle dẹ re ẹwanlẹn lu emhin nọn gbale. Be Abigẹ ha ki lu yẹ nian?

Ọle bha ha kpokpo egbe. Ọkpakinọn, ọ da khẹke nin ọle re ẹjẹje lu emhin. Ọle da mhanmhan ebale nin ọle ha mun ji Devid bi ikpia nesọle. Ọle da ne ele ọbhi uke jaki, yẹ taman eguọmhandia nesọle nin ele muno ene ebale ha khian. Ọle da yẹ rẹkhan ele. Ọle bha taman Neba emhin soso, ranmhude ọle lẹnmhin ghe ọle ha taman Neba, ọle i da ji ọle da yo.

Ẹghe nin Abigẹ ki rẹ ha khian bhi uwedẹ, ọle da miẹn Devid bi ikpia nesọle. Ọle da re ẹjẹje huẹnre bu Devid nọn ha re ohu. Ọle da diguẹ bhi odalo Devid, yẹ ha bhii ọle nin ọle re isẹhoa nanlẹn rẹ talọ. Idegbere nọnsi Abigẹ da wo re ọkhọle ọsi Devid lọre.

Abigẹ da bhii Devid ranmhude emhin uuki nin Neba lu ọle le. Ọle da yẹ ji Devid lẹn ghe ọ i yi emhin ebe ọle lu nin ọle rẹ ji ẹkẹ ha khọ ọle. Ọle da rẹkpa Devid rẹ ye emhin rebhe re nin ọle sẹ lu nin Jehova bi emhin rebhe nin Jehova lu nanlẹn. Ọle da yẹ ji Devid lẹn ghe Jehova i da ha ghọnghọn sade ọle dọ gbono ẹbho ne bha lẹn-ọkpa lẹn-eva a, yẹ dọ ha kiẹgbe sade akizẹbue. Ọle da yẹ taman Devid ghe, Jehova dẹ wo ha zẹ ọria bhi ulin-uwa nọnsọle nọn ha yi ojie ọsi Izrẹl. Ọle da yẹ ji ọle lẹn ghe Jehova dẹ hinmhin ọlẹn bhi obọ eghian nesọle. Ọ khia bhi ẹlo a ghe, Abigẹ lẹnmhin ghe Jehova zẹ Devid nọn da ha yi ojie ọsi Izrẹl.

Ranmhude uwedẹ nin Abigẹ rẹ talọ, ọkhọle ọsi Devid da wo lọre. Ọle da yọle: “Ogẹn hi ọsi Jehova nin Osẹnobulua ọsi Izrẹl, nọn je uwẹ bu mẹn re ẹlẹnan!” Ọle da gẹn Abigẹ bhi uwedẹ nin ọle rẹ re ẹwanlẹn lu emhin. Ọle da yẹ re idegbere miẹn adia nin Abigẹ re nanlẹn ọbhi egbe. Ọle da yọle: “Ghọle, mẹn họn ebi uwẹ ta.”

Neba bha lẹn ẹghe nin ene emhin nan rebhe rẹ ha sunu. Bhi ọne ukpasọn nin, ọle da lu iluemhin nọn khua yẹ da anyọn bubu a. Abigẹ rẹ ha guanọ nin ọle nin Neba talọ, sokpan, ranmhude anyọn nọn ha mun Neba, ọle da mundia nin ẹdẹ we ọle kuẹ ne Neba talọ. Arẹmiẹn anyọn i yẹ mun Neba, ọle da sẹyẹ wo ha fi bhi ẹlo. Ọrẹyiriọ, Abigẹ da sẹyẹ taman ọlẹn emhin rebhe ne sunu. Asabọmiẹn Abigẹ da ha riale ghe Neba dẹ so ọle bhi uhọnmhọn yẹ fi ọle emhin, ranmhude ohu nọn ha re ọle. Ọkpakinọn, emhin nọn dia iriọ bha sunu. Bezẹle? Ranmhude, Baibo da ji mhan lẹn ghe: “Neba ki họn ọnan, udu da wa ọle. Ọle bha yẹ sabọ lueghe egbe, ọle da zeze a bii udo.” Ebe sẹbhi ikpẹdẹ igbe ki gbera, “Jehova da gbehẹ Neba, ọle da yu.” Osẹnobulua da re oya nin Neba ranmhude uwedẹ nọn i mhẹn nin ọle rẹ nin Devid lu emhin—ọria nin Ọle zẹle nọn ha yi ojie ọsi Izrẹl. Ebi Jehova lu da re isẹhoa nin Abigẹ rẹ sibhi ibọdọ bi ireokhuo nọn i mhẹn nọnsọle re.

Emhin esili ebhebhe yẹ ribhọ nin Jehova lu nin Abigẹ. Ẹghe nin Devid rẹ lẹn ghe Neba yu, ọle da taman Abigẹ nin ọle dọ kiẹn okhuo ọle. Abigẹ da wo ka nanlẹn. Devid da gene dọ kiẹn ojie. Otọ Juda ọle ka ha gbẹloghe, ọkuẹsẹ ọle munhẹn ha gbẹloghe otọ Izrẹl rebhe. Abigẹ da biẹ ọmokpia nanlẹn. Ẹghe ọkpa ribhọ nin eghian nesi Osẹnobulua rẹ do Abigẹ mun. Sokpan, ọ bha bue gbe, ọdọ ọle nin Devid nọn manman hoẹmhọn ọlẹn da re izebhudu dọ miẹn ọlẹnfan.

Tie ọne okha bhi Baibo:

• 1 Samuel 25:​1-43; 30:​1-6, 16-20

Inọnta:

Uwedẹ nela Abigẹ rẹ re izebhudu man?

1. 3. Bezẹle nọn da rẹ khẹke nin Neba khuẹnmhẹn eyokhọnlẹn ọsi Devid? (ia 77-78 ¶9-10) 2

   Ewanniẹn nọnsẹ

   

   Hanan Isachar/Alamy Stock Photo

2. 4. Be Abigẹ ha tẹmhọnlẹn ẹghe nin ọle rẹ taman Devid yọle: “Jehova ki gbega iẹnlẹn nọnsi ebeanlẹn mẹn bọsi ukpoko nan gbanọ re ya bhi ẹkẹ ẹkpa”? (1 Sam. 25:29; it “Iẹnlẹn” ¶45)

   Ewanniẹn nọnsẹ

Ria Eria Nyan Emhin Nin Uwẹ Luẹle

• Be ene ọdọ ha miẹn luẹ bhi ijiẹmhin ọsi Devid bhi uwedẹ nin ọle rẹ miẹn adia ọsi Abigẹ ọbhi egbe? 3

  Ewanniẹn nọnsẹ

  

• Be ibhio mhan nin ikhuo nin ọdọ ele i ga Jehova ha sabọ miẹn luẹ bhi obọ Abigẹ?

  Ewanniẹn nọnsẹ

• Be uwẹ ha rẹ sabọ re egbe khọkhọ Abigẹ yẹ bhi uwedẹ nin ọle rẹ re izebhudu man?

  Ewanniẹn nọnsẹ

Ria Ẹmhọn Jehova Bi Iho Nọnsọle

• Be ọne okha nan man mẹn le rẹji Jehova?

  Ewanniẹn nọnsẹ

• Be ọne okha nan rẹ diẹn mun iho nọnsi Jehova yẹ?

  Ewanniẹn nọnsẹ

• Be mẹn ha nọọn Abigẹ le sade a riọ ọle kpanọ bhi uu?

  Ewanniẹn nọnsẹ

Sẹyẹ Fẹ Ene Emhin Nan Ghe

Be Kristiẹn nin ọdọ ọle la okhuo ọle i ga Jehova ha sabọ lu rẹ ziẹn ibọdọ bi ireokhuo nọnsọle?

Osẹnobulua Guanọ Nin Okhuo bi Ọdọ Ko Ha Ribhọ Rẹ Sẹbhi Ighegheghe (4:30)

Abigẹ da rẹkpa Devid rẹ lọ ohu nọn ha re ọle. Be uwẹ ha rẹ sabọ ha mun egbe ọbhi ibẹẹ yẹ sade ọria lu emhin nọn khọ ẹ bhi ẹkẹ?

“Ẹkẹ I Kẹ Khọ Ọria Nọn Mhọn Ilẹn-otọ-emhin” (w14 12/1 12-13)