23 DEVID
Ọle Da Khọn Eguanlan Miotọ
DEVID da daghe okpia ọkpa nọn mundia bhi obọ nọnkẹle bhi iyala ọsi Ilah. Elin ọsi ọne okpia nan hi Golayat. Eguanlan Golayat khin. Ọle tan sẹbhi ibata isinlin bi ukhiọnmhẹn (9.5ft), iriọ ọle yẹ rẹ wo mhọn ahu. Ọyokhọnlẹn nọn rẹkpa Golayat mun emhin okhọnlẹn nọnsọle mhọn wo dia khere bhi eji ọle ye. Ranmhude uwedẹ nin Golayat rẹ ha gboriri, ẹbho ha daghe ọle, ofẹn ki wo ha mun ele. Ọkpakinọn, ẹghe nin Devid rẹ daghe Golayat, ofẹn bha ha mun ọlẹn hiehie. Emhin ribhọ nọn wo re ọle ha mhọn izebhudu.
Ọkuẹsẹ ọne ẹghe nan, Samuẹl nin akhasẹ bhọ ki ka zẹ Devid nọn ha yi ojie ọsi Izrẹl. Rẹ na bhi ẹghe nan rẹ zẹ Devid, ẹlinmhin nọn khiale nọnsi Jehova da wo ha rẹkpa Devid bhi uwedẹ kẹkẹ. Ranmhude ọnan, ẹbho da ha tie Devid ọria nọn “mhọn izebhudu, ọkakulo nọn khua,” arẹmiẹn obhokhan nọn gheghe ha re ihuan kọn ọle khin. Ẹdọkpa, Jesi nin aba Devid da je Devid bu ibhio ọle bhi eji ele da khọnlẹn, nin ọle dọ fẹghe ebi emhin ki rẹ khian yẹ bhi enin. Eyokhọnlẹn ene ibhio ọle nan khin. Asabọmiẹn Devid bha sẹ sẹbhi ikpe 20 bhi ọne ẹghe nin.
Ẹghe nin Devid ki rẹ sẹbhi Iyala ọsi Ilah, ọle da kere ghe eyokhọnlẹn ọsi Izrẹl mundia bhi obọkpa bhi ọne Iyala, sẹyẹ, eyokhọnlẹn ọsi Filistia da mundia bhi obọ nọnkẹle. Ofẹn Golayat nọn ha mun ibhokhan Izrẹl bha ji ele da mun okhọnlẹn bu ibhokhan Filistia. Bhiriọ, ibhokhan Filistia bi ibhokhan Izrẹl bha nin egbe khọnlẹn. Iriọ ele rẹ ha ghe egbe ẹlo-ẹlo rẹ na bhi uzana ne bunbun. Ẹghe nin Devid ki rẹ sẹbhi enin, ọle da kere ghe Golayat wo ghunmhun ibhokhan Izrẹl. Ọnan bha zẹwẹ yẹẹ Devid hiehie, ọ da wo re ẹkẹ ha khọ ọle. Ọne obhokhan Filistia nan nọn ga ẹbọ da wo ha re unun ji Jehova. Devid da nọọn eyokhọnlẹn ọsi Izrẹl nin ele taman ọlẹn ẹmhọn Golayat. Ọle da yẹ ha guanọ nin ele taman ọlẹn ebi Sọl nin ojie ha lu nin ọne ọria nọn ha sabọ gbe Golayat a. Obhio Devid nin odiọn natiọle Ẹlaiyab da ha riale ghe Devid wo gheghe vae dọ ghe ebi ele rẹ khọnlẹn yẹ. Bhiriọ, ọle da ha nanlẹn van. Ọrẹyiriọ, Devid da sẹyẹ wo ha re izebhudu nin ene eyokhọnlẹn beji ele ha da sabọ khọn Golayat miotọ.
Sọl nin Ojie da họn ebi Devid tale. Bhiriọ, ọle da je nan re ọle re. Devid da dọnmhegbe nin ọle rẹ re izebhudu nin ọne ojie. Ọle da yẹ taman ọlẹn ghe nin ọria soso hẹi yẹ ji ofẹn ha mun ọlẹn ranmhude Golayat. Ọle da zẹ nin ọle rẹ tobọle “ha khian dọ ne ọne Filistia nan khọnlẹn.” Bhi ọsi ọhẹnhẹn, Sọl bha ka nin Devid rẹ ha khian, ranmhude, ọle da ha riale ghe a dẹ gbe Devid a. Ọkpakinọn, Devid da taman Sọl ebi Jehova sẹ rẹ rẹkpa ọle yẹ rẹ sabọ gbe oduman bi elanmhẹn natiọle biẹ a, ne rẹ ha guanọ ne gbe ihuan nesi aba ọle a. Bhi ọkike ọle, Sọl da ka nin Devid rẹ dọ ne Golayat khọnlẹn. Ọle da ne emhin okhọnlẹn nesọle nanlẹn rẹ dọ sẹbhi agbada nọnsọle. Ọkpakinọn, Devid bha lẹn ebi a rẹ noo ene emhin nan yẹ, sẹyẹ, ele bhọ da ha khua ọle bhi egbe, bhiriọ, ọle da ne ele kua. Ọle da re ukpokpo nan rẹ re ihuan kọn bi uri nin ọle rẹ fi udo ha khian ọne okhọnlẹn.
Beji Devid ki rẹ ha khian bu Golayat, ọle da ne ikpido isẹn ne riẹ-riẹ bhi egbe ẹdẹ. Ẹghe nin Golayat ki rẹ daghe Devid nin obhokhan bu ọle vade, ọle da ha jiẹ ọle yẹ zuọzuọ ọle, nin ọle rẹ daghe ọle ghe ọle re ukpokpo bu ọle vade. Asabọmiẹn ọne ukpokpo nan Devid rẹ re ihuan kọn. A sabọ yẹ miẹn Golayat bha daghe ọne uri nan rẹ fi udo nin Devid re mhọnlẹn. Ọne uri Devid noo rẹ gbe Golayat a. Golayat da “re elin osẹ nesele ha ghunmhun Devid.” Ọle da yẹ yọle ghe ọle dẹ mun ekuegbe nọnsọle nin ene afianmhẹn bi elanmhẹn le.
Ẹghe nin Devid rẹ ha ribhi usẹn, ọle da ne eguanlan nọn ha ghunmhun Jehova khọnlẹn
Devid da wanniẹn ọne Filistia yọle: “Uwẹ re agbada, akpede bi ọkuọ bu mẹn vade, ọkpakinọn, elin nọnsi Jehova nin ọdiọn ọyokhọnlẹn, Osẹnobulua ọsi eyokhọnlẹn nọnsi Izrẹl nin uwẹ zuọzuọ, ọle mẹn rẹ bu uwẹ vade.” Ọnan zẹle nin Devid da ha mhọn izebhudu. Ọle bha re Golayat rẹ khọkhọ egbe ọle. Ọle da re Golayat rẹ khọkhọ Jehova nin Osẹnobulua! Devid da wo rẹọbhọ ghe ọle dẹ sabọ gbe Golayat nin eguanlan a, sẹyẹ, ele dẹ sabọ khọn ibhokhan Filistia miotọ.
Devid da runẹ bu Golayat. Ọle da re udo nọn ribhi ẹkẹ ẹkpa nọnsọle ọbhi uri nin ọle rẹ fi udo, yẹ ha fi ọne uri nẹga. Ahamiẹn ọne ẹghe nan Golayat rẹ daghe uri nin Devid re mhọnlẹn, ọ rẹman ghe ọsọle fo! Devid da re ahu rebhe rẹ fi ọne udo. Ọne ukpudo da ha Golayat bhi ukẹhae, ọle “da de sẹ ẹlo ru bhi otọ.” Devid da runẹ diọbhi eji Golayat ye. Ọle da mun agbada ọsi Golayat rẹ hian ọle uhọnmhọn an. Ọne ebe sunu nan da wo re izebhudu nin eyokhọnlẹn ọsi Izrẹl. Ene ibhokhan Izrẹl da reso yẹ munhẹn ha ne ibhokhan Filistia khọnlẹn. Ẹbho nesi Osẹnobulua da khọn miotọ bhi ọne ukpẹdẹ nin. Ebi Devid lu da wo re izebhudu nin ibhokhan Izrẹl rebhe. Ọ yẹ wo re izebhudu nin mhan ẹlẹnan.
Tie ọne okha bhi Baibo:
1 Samuel 16:13, 18, 19; 17:1-54
Inọnta:
Uwedẹ nela Devid rẹ re izebhudu man?
Manman Guanọ Otọle
1. Ọria ọbhebhe nela re izebhudu man nọn na bhi ulin-uwa ọsi Devid vae? (Mat. 1:5, 6; Luk 3:31-38; w12 10/1 24 ¶3)
2. Emhin nela rẹman ghe ọne okha nan bhi Baibo gene sunu? (wp16.5 13) 1
Collection the Israel Antiquities Authority. Photo © The Israel Museum, by Meidad Suchowolski
Ifoto 1: Ẹmhọn na gbẹn ọbhi udo nọn tẹmhọn “Uwa ọsi Devid.” Ebe sẹbhi ikpe 2800 ọ ki ye nian nan gbẹn ọlẹn
3. Be iẹnlẹn ọsi Devid diayẹ ẹghe nin ọle rẹ ha yi ọsun-ohuan? (w11 9/1 27 ¶1–28 ¶1) 2
Todd Bolen/BiblePlaces.com
Ifoto 2
4. Be mhan rẹ lẹn yẹ ghe, ẹghe-ẹghe ẹbho rẹ ha re ẹlo gbe Devid a? (w21.03 3 ¶6; it “Ẹlaiyab” Nọnzi 4 ¶1)
Ria Eria Nyan Emhin Nin Uwẹ Luẹle
Be ijiẹmhin ọsi Devid ha rẹ rẹkpa uwẹ yẹ . . .
sade ofẹn mun uwẹ? 3
Ifoto 3
rẹ khọn ọkhọle nan rẹ lu emhin nọn i mhẹn?
Ahamiẹn uwẹ re izebhudu man, be ijiẹmhin nọnsẹ ha rẹ sabọ rẹkpa eria ebhebhe yẹ? (1 Sam. 17:50-53)
Uwedẹ ebhebhe nela uwẹ ha rẹ sabọ re egbe khọkhọ Devid bhi izebhudu nin ọle rẹman nan tẹmhọnlẹn bhi ọne okha nan?
Ria Ẹmhọn Jehova Bi Iho Nọnsọle
Be ọne okha nan man mẹn le rẹji Jehova?
Be ọne okha nan rẹ diẹn mun iho nọnsi Jehova yẹ?
Be mẹn ha nọọn Devid le sade a riọ ọle kpanọ bhi uu?
Sẹyẹ Fẹ Ene Emhin Nan Ghe
Bhi ọne illo ọsi ibhokhan nan, luẹ ebe rẹkpa Devid rẹ ha mhọn izebhudu.
Bii Devid, be ibhio mhan nin ikpia ha lu ahamiẹn ele guanọ nin ẹbho ha mun ekpẹn nin ele?
“Ene Usẹn Ikpia—Be Ibha Ha Lu Nin Ẹbho Da Sabọ Gbaẹkẹ Ibha?” (w21.03 2-5 ¶1-11)