6 REBEKKA
Hún flutti til fjarlægs lands
REBEKKA gengur í átt að brunninum með stórt vatnsker á öxlinni. Það er komið undir kvöld og hún er að sækja vatn handa heimilisfólkinu. Hún er eflaust vön erfiðisvinnu af þessu tagi. En í þetta sinn sér hún hóp aðkomumanna við brunninn ásamt úlföldum. Hún heldur samt áfram að brunninum og fyllir vatnskerið.
Hún leggur af stað heim á leið með þunga byrðina. Roskinn maður í hópnum flýtir sér þá til hennar og segir: „Gefðu mér smá vatnssopa úr keri þínu.“ Þótt Rebekka þekkti ekki mennina var hún hugulsöm og sagði: „Drekktu, herra minn.“ Hún tók kerið niður af öxlinni og gaf honum að drekka, eins mikið og hann vildi.
En hún lét ekki þar við sitja heldur bauðst til að sækja vatn í brunninn handa úlföldunum tíu sem ókunnu mennirnir höfðu riðið. Maðurinn horfði agndofa á þessa fallegu ungu konu hlaupa fram og til baka til að fylla vatnsþróna aftur og aftur þar til þessar stóru skepnur höfðu drukkið nægju sína. Maðurinn spurði hvers dóttir hún væri og hvort fjölskyldan gæti hýst hópinn um nóttina. Rebekka hikaði ekki. Hún bauð þeim öllum að gista og bauðst til að fóðra úlfaldana.
Rebekka vissi ekki þá að Jehóva átti hlut að máli. Gamli maðurinn, sennilega Elíeser, var langt að kominn. Hann var dyggur þjónn Abrahams og hafði nokkrum vikum áður fengið það verkefni að ferðast hundruð kílómetra til að finna eiginkonu handa Ísak, syni hans og erfingja. Abraham lagði mikla áherslu á að konan sem hann veldi væri úr fjölskyldu sem tilbæði Jehóva. Elíeser hafði því beðið Jehóva um að hjálpa sér. Hann bað hann að gefa sér tákn um það hverja hann hefði valið handa Ísak. Hún átti að sýna þeim hugulsemi og gestrisni á sérstakan hátt – einmitt eins og Rebekka hafði gert.
Nú á dögum myndu margar konur hika við að gefa sig á tal við hóp ókunnugra manna því að margir eru „grimmir“ og „elska ekki hið góða“. (2. Tím. 3:1, 3) Samfélagið var eflaust ekki eins hættulegt á þessum tíma en Rebekka sýndi engu að síður mikið hugrekki með því að sinna þessum ókunnugu mönnum og sýna þeim gestrisni. En þetta var ekki í síðasta sinn sem hún sýndi hugrekki.
Rebekka uppgötvaði fljótlega hvers vegna mennirnir höfðu lagt á sig þetta langa ferðalag. Betúel faðir hennar og Laban bróðir hennar buðu Elíeser að fá sér að borða. En þessi aldraði þjónn vildi ekki setjast að borði fyrr en hann hafði sagt þeim í hvaða erindagjörðum hann væri kominn. Hann lýsti hvernig Jehóva hefði blessað hann og vísað honum á Rebekku. Faðir hennar og bróðir áttuðu sig á hvernig málum var háttað og sögðu: „Þetta er komið frá Jehóva.“
Rebekka var hugrökk kona. En var hún tilbúin til að gera eins og Guð vildi, flytja langt að heiman og giftast manni sem hún hafði aldrei séð?
Hvernig brást Rebekka við? Abraham hafði gert sér grein fyrir að það væri ekki víst að konan vildi fara með Elíeser til Kanaans. Átti hún um eitthvað að velja? Morguninn eftir spurði Elíeser hvort hann mætti leggja strax af stað heimleiðis með Rebekku. Fjölskylda hennar ákvað að spyrja hana sjálfa hvort hún vildi fara með honum. Rebekka svaraði ósköp einfaldlega: „Já, það vil ég.“ Hún var fús til að yfirgefa heimili sitt og fjölskyldu og flytja langt í burtu. Kannski sæi hún þau aldrei framar. Hvað bjó að baki þessu hugrekki? Hún virðist líka hafa áttað sig á að þetta var vilji Jehóva.
Eftir nokkurra vikna ferðalag á baki úlfalda nálgast hópurinn tjaldbúðir Abrahams í Kanaan. Í rökkrinu sér Rebekka mann á gangi í nokkurri fjarlægð. Hann virðist djúpt sokkinn í hugsanir sínar. Þegar henni var sagt að þetta væri Ísak huldi hún sig með blæju til merkis um að hún liti á hann sem tilvonandi eiginmann sinn. Ísak, sem var þá um fertugt, var íhugull og tilfinninganæmur maður. Hann syrgði enn Söru móður sína sem hafði dáið þrem árum áður. Bjó Rebekka yfir því hugrekki sem þurfti til að taka að sér það hlutverk sem Guð hafði falið henni? Yrði hún ástrík eiginkona sem styddi Ísak og hjálpaði honum að þjóna Jehóva sem höfuð fjölskyldunnar? Af Biblíunni má sjá að hún gerði það. Lýsingin á hjónabandi þeirra hefst með þessum einföldu og fallegu orðum: „Hann varð ástfanginn af henni og fékk huggun eftir móðurmissinn.“
Lestu frásögn Biblíunnar:
Til umræðu:
Hvernig sýndi Rebekka hugrekki?
Kafaðu dýpra
1. Hvaða áhrif hafði það á stöðu Elíesers að Abraham eignaðist börn en hvað sýnir að honum gramdist það ekki? (1. Mós. 15:2–4; 24:12; w97 1.1. 30 gr. 2 – wcgr)
2. Af hverju vildi Abraham að Rebekka flytti til Kanaans frekar en að Ísak flytti til heimabæjar hennar? (w97 1.1. 30 gr. 3 – wcgr)
3. Hvaða þýðingu höfðu gjafirnar sem Elíeser færði Rebekku og fjölskyldu hennar? (it „Rebekka“ gr. 4 – wcgr)
4. Lýstu ferð Rebekku frá Haran til Negeb þar sem Ísak bjó. (wp16.3 15 gr. 1) A
www.LifeintheHolyLand.com
Mynd A: Forðum daga bjuggu margir í Negeb og þar var gott beitiland fyrir búpening Abrahams.
Hugleiddu og heimfærðu
Hvað getum við lært af Abraham, Rebekku og Ísak um að velja okkur maka? (1. Mós. 24:2, 3; 27:46–28:1)
Rebekka var dugleg, örlát og sýndi öðrum virðingu. Hvernig geta systur líkt eftir henni? B
Mynd B
Hvernig geturðu sýnt hugrekki eins og Rebekka?
Horfðu á heildarmyndina
Hvað lærir þú um Jehóva af þessari frásögu?
Hvernig tengist þessi frásaga fyrirætlun Jehóva?
Um hvað langar þig að spyrja Rebekku þegar hún rís upp?
Skoðaðu meira
Hvernig hélt Rebekka áfram að sýna hugrekki eftir að hún varð eiginkona og móðir?
Hvað geta börn lært af Rebekku?