4 ABRAHAM
Fyrsti maðurinn sem háði réttlátt stríð
JEHÓVA gaf Abraham vini sínum einstakt loforð sem breytti gangi sögunnar: „Ég geri þig að mikilli þjóð.“ Hann sýndi líka Abraham landið þar sem þessi tilvonandi þjóð átti eftir að búa. Þetta var fallegt land. (1. Mós. 12:2; 13:14, 15) En Satan var ákveðinn í að ráðast á Abraham til að koma í veg fyrir að þessi þjóð yrði nokkurn tíma til. Satan vissi að fyrirheitni ‚afkomandinn‘ átti að koma af þessari þjóð, afkomandinn sem myndi útrýma illri stjórn hans og að lokum honum sjálfum. – 1. Mós. 3:15.
Satan beindi spjótum sínum að Abraham og fjölskyldu hans. Lot bróðursonur Abrahams var einn þeirra sem varð fyrir barðinu á honum. Abraham hafði í góðvild sinni boðið Lot að velja hvar hann vildi búa í fyrirheitna landinu og Lot hafði valið besta og frjósamasta svæðið. Það var í grennd við Sódómu en íbúar hennar voru „illir og syndguðu gróflega gegn Jehóva“. (1. Mós. 13:8–13) Konungurinn í Sódómu var í bandalagi við fjóra aðra kanverska konunga og þeir voru orðnir leiðir á að greiða konunginum í Elam skatt. Þeir gerðu því uppreisn. Konungurinn í Elam tók því ekki vel. Hann var í bandalagi við þrjá aðra konunga frá fjarlægum svæðum og þeir komu nú úr norðri og sigruðu konungana í Kanaan. Sigurvegararnir héldu síðan heim á leið með mikið herfang en Lot og fjölskylda hans voru meðal fanganna sem þeir tóku.
Abraham lagði til atlögu við sameinaðan her fjögurra öflugra konunga með 318 manna liði sínu.
Hvað átti Abraham að gera? Hann hefði getað hugsað sem svo að Lot gæti sjálfum sér um kennt fyrst hann hefði valið að búa á þessu svæði. Hann hefði líka getað gert sér áhyggjur af því að ef hann reyndi að bjarga Lot yrði hann að berjast gegn þessum konungum, og að minnsta kosti einn þeirra réð ríkjum í Sínear. Abraham var hirðingi en ekki hermaður. Hvernig átti hann að geta sigrað sameinaðan her fjögurra öflugra konunga? Auk þess var Abraham sjálfur frá Sínear. Einhver annar hefði getað óttast að stríð við þessa konunga myndi útiloka að hann gæti nokkurn tíma snúið aftur til þægindanna í Úr. En Abraham hugsaði ekki þannig. Hann vissi hvað Jehóva vildi að hann gerði.
Þegar hér var komið sögu var heimilisfólk Abrahams kannski orðið þúsund manns eða meira. Hann safnaði saman þjálfuðum mönnum sínum, 318 talsins, og bjó þá undir að halda í stríð. Þeir lögðu síðan af stað ásamt fáeinum bandamönnum. Þeir fóru langa leið norður á bóginn og náðu óvinunum á svæði Dans. Abraham skipti liðinu og réðst síðan á þá að næturlagi. Þótt hann væri mun fáliðaðri lögðu óvinirnir á flótta. Abraham elti konungana fjóra og menn þeirra í norðurátt og gjörsigraði þá að lokum fyrir norðan Damaskus. Hann tók af þeim allt herfangið sem þeir höfðu tekið í Kanaan og frelsaði Lot og fjölskyldu hans.
Hvað fannst Jehóva um hugrekki og trú Abrahams? Það sýndi sig þegar Abraham var á leið fram hjá borginni Salem. Melkísedek, sem var konungur þar, var líka prestur Jehóva. Hann kom út úr borginni til að hitta Abraham og veita honum blessun Jehóva. Abraham gaf Melkísedek tíund af besta herfanginu. Þannig viðurkenndi hann í auðmýkt að sigurinn væri Jehóva að þakka.
Það er greinilegt að Abraham háði ekki þetta stríð sjálfs sín vegna eða í eigin krafti heldur fyrir Jehóva og með hjálp hans. Í Biblíunni er minnst á ‚bókina um bardaga Jehóva‘. (4. Mós. 21:14) Vel má vera að bardagi Abrahams hafi verið fyrsti bardaginn sem skráður var í bókina. Öldum síðar börðust afkomendur Abrahams við hina illu Kanverja sem bjuggu í fyrirheitna landinu og Jehóva gaf þeim þá hvern sigurinn á fætur öðrum.
Þjóð Jehóva missti hins vegar vernd hans þegar hún sneri baki við honum. Hann hafnaði þjóðinni að lokum þegar hún hafnaði syni hans, Messíasi. Hann hætti að blessa þessa bókstaflegu Ísraelsþjóð og blessaði í staðinn andlega þjóð. Jesús fór með forystu fyrir henni en hann bannaði þegnum sínum að heyja bókstafleg stríð. (Matt. 26:52) Hann kenndi þeim hins vegar að heyja andlegt stríð. Hann sýndi með fordæmi sínu að slíkur hernaður kostar ekki minna hugrekki en að berjast í bókstaflegu stríði.
Lestu frásögn Biblíunnar:
Til umræðu:
Hvernig sýndi Abraham hugrekki við þessar aðstæður?
Kafaðu dýpra
1. Hvernig styður fornleifafræðin þessa frásögu? (w89 1.11. 5 gr. 4–6 gr. 1)
2. Hvernig styður landafræðin lýsingu Biblíunnar á Sódómu og Gómorru? (it „Saltisjór“ gr. 6 – wcgr) A
BestTravelPhotography/iStock via Getty Images Plus
Mynd A: Enn þann dag í dag dafna döðlupálmar og annar gróður á svæðinu þar sem Sódóma hefur sennilega staðið.
3. Melkísedek var konungur og prestur í Salem. Hvar var Salem? (it „Salem“ – wcgr)
4. Hvernig var Melkísedek spádómleg fyrirmynd um Jesú? (it „Æðstiprestur“ gr. 27, 28 – wcgr) B
Mynd B
Hugleiddu og heimfærðu
Abraham leyfði Lot að velja besta landsvæðið. Hvernig getum við líkt eftir Abraham í samskiptum okkar við fjölskyldu, trúsystkini og aðra? C
Mynd C
Hvað lærum við af því að Abraham skyldi leggja sig í hættu til að bjarga bróðursyni sínum?
Á hvaða aðra vegu getur þú líkt eftir hugrekki Abrahams miðað við þessa frásögu?
Horfðu á heildarmyndina
Hvað lærir þú um Jehóva af þessari frásögu?
Hvernig tengist þessi frásaga fyrirætlun Jehóva?
Um hvað langar þig að spyrja Abraham eða Lot þegar þeir rísa upp?
Skoðaðu meira
Veltu fyrir þér hvernig Abraham lærði að treysta Jehóva í einu og öllu.
Hvernig sýndi Abraham hugrekki áður en hann fór frá Úr?