Tib Neeg Siv Phom Sib Tua Thoob Ntiaj Teb—Phau Vajlugkub Hais Li Cas?

Nyob rau lub 7 Hli xyoo 2022, muaj neeg siv phom tua tuag coob leej ntau tus thoob ntiaj teb:

• “Teb chaws Nyiv Pooj tus nom uas muaj koob nto npe tshaj [yav tas los yog tus coj tag nrho lub teb chaws, uas hu ua Shinzo Abe] tau raug tua tuag. Qhov no ua rau lub teb chaws xav tsis thoob li. Kuj ua rau lwm lub teb chaws xav tsis thoob li thiab, vim teb chaws Nyiv Pooj tsis muaj sib ntaus sib tua ntau, thiab lub teb chaws txoj cai ua nyuaj heev rau tib neeg yuav phom.”—Lub 7 Hli tim 10 xyoo 2022, The Japan Times.

• “Teb chaws Denmark [Deemaj] xav tsis thoob thaum ib tug neeg tua tuag peb tug hauv ib lub khw hauv lub nroog loj Copenhagen [Khaupeehenkees].”—Lub 7 Hli tim 4 xyoo 2022, Reuters.

• “Teb chaws Afikas Qab Teb: Muaj ib pab neeg tua tuag 15 leeg hauv ib lub tsev haus dej haus cawv hauv thaj tsam Soweto [Xauvethaus].”—Lub 7 Hli tim 10 xyoo 2022, The Guardian.

• “Muaj tshaj li 220 leej raug phom tua tuag hauv teb chaws U.S.A. rau peb hnub uas ua lub koob tsheej July 4.”—Lub 7 Hli tim 5 xyoo 2022, CBS News.

Puas yuav muaj ib hnub uas tsis muaj kev ua nruj ua tsiv lawd? Phau Vajlugkub hais li cas?

Thaum Tsis Muaj Kev Ua Nruj Ua Tsiv

Phau Vajlugkub qhia tias peb nyob rau “tiam kawg” uas yog lub caij tib neeg yuav ua neeg tsivtsaim, tsis khuv xim txoj sia, thiab ua nruj ua tsiv. (2 Timaute 3:1, 3) Vim muaj tej kev phem zoo li no, coob tus thiaj ua neej ntshai tshee hnyo. (Lukas 21:11) Tiam sis phau Vajlugkub cog lus tias muaj ib hnub yuav tsis muaj tej kev phem li niaj hnub nim no lawm. Tib neeg “yuav nyob kaj siab lug rau hauv lub tsev uas tso siab plhuav thiab so hauv lub chaw tus yees.” (Yaxaya 32:18) Yuav ua li cas thiaj muaj tau li no?

Vajtswv yuav muab cov neeg phem tshem tawm thiab yuav muab tej cuab yeej sib ntaus sib tua ua kom puas tsuaj.

• “Vajtswv yuav muab tej neeg siab phem tshem tawm hauv lub [ntiaj teb] mus.”—Pajlug 2:22.

• “[Vajtswv] ua rau tej kev tsov kev rog hauv ntiajteb no tiaj tus, nws lov ntho tej qhaub hneevnti, nws muab tej hmuv dam pes daws, thiab muab tej thaiv hniav ntaj coj mus pov hlawv huv tibsi.”—Phau Ntawv Nkauj 46:9.

Vajtswv yuav qhia kom tib neeg nyob sib haum xeeb ua ke, lawv thiaj tsis ua nruj ua tsiv.

• “Yuav tsis muaj kev txhawj kev ntshai lossis kev phem kev qias. Tej neeg thoob ntiajteb yuav paub [Yehauvas] ib yam li dej puv nkaus hiavtxwv.”—Yaxayas 11:9.

• Tam sim no Vajtswv twb qhia tib neeg thoob ntiaj teb kom tsis txhob sib ntaus sib tua. Lawv “yuav muab lawv tej ntaj ntaus ua khais thiab yuav muab lawv tej hmuv ntaus ua liag.”—Mikhas 4:3.

Yog xav paub ntxiv txog phau Vajlugkub tej lus cog tseg txog ib lub qab ntuj tshiab uas yuav tsis muaj kev txhawj kev ntshai lawd, mus nyeem zaj “Freedom From Fear—Is It Possible?”

Yog xav paub ntxiv seb yuav ua li cas thiaj tsis muaj kev ua nruj ua tsiv, mus nyeem zaj “Peace on Earth at Last!”