Lub Ntiaj Teb Puas Tsuaj Tas—Phau Vajlugkub Hais Li Cas?

“Lub ntiaj teb puas tsuaj sai heev. Tej nroog loj yuav raug dej nyab. Huab cua yuav kub zuj zus. Yuav muaj nag xob nag cua loj dua qub. Dej yuav qhuav zuj zus. Txhiab txhiab vam vam hom xyoob ntoo thiab tsiaj txhu yuav tuag tu noob. Tej no tsis yog dab neeg los sis lus ya xwb. Yog tsis hloov tej kev cai kom txuag tau lub ntiaj teb ces raws li tej neeg tshawb txuj ci pom, yuav muaj raws li no tiag.” Athauni-au Nkutiles (António Guterres) uas yog tus sawv cev rau lub koom haum ntiaj teb UN tau hais cov lus no txog zaj lus tshaj tawm ntsig txog lub ntiaj teb huab cua hloov (Intergovernmental Panel on Climate Change) uas tawm rau lub 4 Hlis tim 4 xyoo 2022.

“Tej neeg tshawb txuj ci tshaj tawm tias yuav tau ceev faj vim tsis muaj pes tsawg xyoo xwb 423 qhov chaw zoo zoo nkauj uas tib neeg kheev mus xyuas [hauv teb chaws U.S.A.] yuav raug puas tsuaj vim huab cua kub zuj zus tuaj lawm. Tej uas yuav los raug tej chaw ntawd phem cuag li tej lus foom hauv phau vajlugkub: hluav taws yuav kub, dej yuav nyab, dej nkoog yuav yaj, hiav txwv yuav phwj, thiab huab cua yuav kub.” Phau ntawv xov xwm The New York Times tau tshaj tawm li no thaum lub 6 Hli tim 15 xyoo 2022 hauv tsab ntawv “Flooding Chaos in Yellowstone, a Sign of Crises to Come.”

Puas yuav kho tau lub ntiaj teb kom rov zoo? Yog kho tau, leej twg thiaj kho tau xwb? Nyeem mus seb phau Vajlugkub teb li cas.

Lub ntiaj teb yuav puas tas

Phau Vajlugkub hais tias Vajtswv “yuav rhuav cov neeg uas ua rau lub ntiajteb no puastsuaj kom lawv puastsuaj mus!” (Tshwmsim 11:18) Nqe Vajlugkub no qhia tias yuav muaj li cas:

1. 1. Tej uas tib neeg ua yuav ua rau lub ntiaj teb no puas tsuaj.

2. 2. Lub ntiaj teb yeej yuav tsis raug puas tsuaj mus li.

3. 3. Vajtswv yuav yog tus kho lub ntiaj teb no, tsis yog tib neeg.

Lub ntiaj teb yeej yuav nyob khov kho

Phau Vajlugkub hais tias “lub ntiajteb nyob ruaj mus ib txhis.” (Laj Lim Tswvyim 1:4) Yeej yuav muaj tib neeg nyob hauv lub ntiaj teb no mus ib txhis li.

• “Cov ncaj ncees yuav tau lub [ntiaj teb] ua lawv teej lawv tug, thiab tau nyob rau hauv mus ib txhis.”—Ntawv Nkauj 37:29.

Lub ntiaj teb yuav muab kho kom rov zoo li qub.

• “Tiaj suabpuam thiab lub tebchaws uas qhuav nkig nkuav yuav zoo siab heev, thiab yuav muaj paj tawg ntsa iab rau saum tej av qhuav.”—Yaxayas 35:1.