Kev Sib Tua Hauv Tsev Kawm Ntawv—Phau Vajlugkub Hais Li Cas?

Nyob rau lub 5 Hlis tim 24 xyoo 2022, lub nroog Uvalde xeev Thexav (Texas) teb chaws U.S.A. tau ntsib kev txom nyem nyuaj siab. Phau ntawv xov xwm The New York Times tau tshaj tawm tias “ib tug txiv neej tua tuag 19 tug me nyuam thiab 2 tug xib hwb qhia ntawv . . . hauv lub tsev kawm ntawv Robb Elementary School.”

Tu siab kawg uas tsuas muaj tej kev phem zoo li no heev zuj zus lawm xwb. Phau ntawv xov xwm USA Today tau tshaj tawm tias tsaib no nyob rau hauv teb chaws U.S.A. nkaus xwb “muaj kev sib tua hauv tsev kawm ntawv 249 zaug, tsis tau pom npaum li no txij xyoo 1970 los.”

Vim li cas thiaj muaj tej kev phem no? Yuav ua li cas peb thiaj thev taus tej kev nyuaj siab no? Puas muaj ib hnub tej kev ua nruj ua tsiv no yuav ploj mus? Phau Vajlugkub teb tau cov lus nug no.

Vim li cas thiaj muaj kev phem ua luaj li?

• Phau Vajlugkub qhia tias tiam peb nyob no yog “tiam kawm” lawm. Tiam neeg no “yuav ua neeg ntxeev siab” thiab yuav ua “neeg tsivtsaim.” Vim li no lawv thiaj ua tau tej yam phem kawg nkaus. Cov uas ua phem li no “tseem yuav ua phem heev zuj zus” tuaj xwb. (2 Timautes 3:1-5, 13) Kawm ntxiv txog qhov no hauv zaj “Did the Bible Predict the Way People Think and Act Today?”

Coob tus xav tias ‘Vim li cas Vajtswv ho tsis txwv kiag kom txhob muaj kev sib ntaus sib tua zoo li peb pom muaj hauv tej tsev kawm ntawv?’ Mus saib seb phau Vajlugkub teb li cas hauv zaj “Bad Things Happen to Good People—Why?”

Yuav ua li cas peb thiaj thev taus tej kev phem no?

• “Rau qhov Vajtswv txojlus uas thaum ub luag muab sau tseg rau hauv ntawv twb yog sau qhia rau peb. Vajtswv txojlus ua rau peb muaj kev cia siab, ua siab ntev thiab muab siab rau ntseeg ntxiv.”—Loos 15:4.

Phau Vajlugkub tej hauv paus ntsiab lus yuav pab tau koj thev tej kev ua nruj ua tsiv no. Yog xav paub ntxiv mus saib phau Tsim Dheev! zaj “Will Violence Ever End?”

Cov ua niam ua txiv yeej xav pab lawv cov me nyuam ib yam. Mus nyeem zaj “Disturbing News Reports and Your Children” seb muaj tej tswv yim zoo li cas pab cov niam txiv xwv lawv thiaj paub nplig tej me nyuam thaum hnov xov xwm phem.

Puas muaj ib hnub tej kev ua nruj ua tsiv no yuav ploj mus?

• “Nws cawm lawv dim ntawm cov neeg tsimtxom thiab cov neeg limhiam.”—Phau Ntawv Nkauj 72:14.

•  “Lawv yuav muab lawv tej ntaj ntaus ua khais thiab yuav muab lawv tej hmuv ntaus ua liag. Txhua haivneeg yuav tseg tsis ua rog thiab tsis npaj sib tua ntxiv lawm.”—Mikhas 4:3.

Vajtswv muaj peev xwm ua tej uas tib neeg ua tsis tau. Nws lub Nceeg Vaj los sis lub tseem fwv saum ntuj yuav muab txhua yam cuab yeej sib ntaus sib tua thiab kev ua nruj ua tsiv tshem tawm mus. Yog koj xav kawm ntxiv txog tej uas Vajtswv lub Nceeg Vaj yuav ua, mus nyeem zaj “‘Kev Siab Tus Muaj Nplua Mias’ Hauv Vajtswv Lub Nceeg Vaj.”