Ua Tib Zoo Mloog

1-2. (1) Yehauvas cob qhia peb li cas niaj hnub no? (Phau Ntawv Nkauj 23:1, 2, 5) (2) Peb yuav mus tham li cas txog peb cov kev sib txoos?

NIAJ hnub no, Yehauvas muab ntau tsav ntau yam los qhia rau peb. Peb yeej xav tib yam li Daviv zaj nkauj uas nws sau. Nws hais li no tias: “[Yehauvas] yog tus tsomkwm kuv, kuv muaj txhua yam txaus.”​—Nyeem Phau Ntawv Nkauj 23:1, 2, 5.

² Ib txoj ke uas Yehauvas cob qhia peb yog los ntawm peb cov kev sib txoos. Ntau zaus tej uas peb hnov twb yog tej uas peb tau kawm yav tas los lawm. Txawm tias peb twb hnov thiab “muab siab rau ua raws li Vajtswv txojlus lawm los,” yeej zoo rau peb rov hnov dua. (2 Petus 1:12) Thaum peb mus kev sib txoos es peb hnov ib lub ntsiab lus uas peb twb tau kawm ntau zaus lawm, puas nyuaj rau peb ua tib zoo mloog? Hauv zaj kawm no, peb yuav mus tham seb vim li cas tseem ceeb rau peb ua zoo mloog tom tej kev sib txoos. Ces peb mam mus tham tias cov uas cev lus qhuab qhia yuav cev li cas, thiaj pab tau cov uas mloog. Tom qab ntawd, peb mam kawm seb dab tsi pab tau peb ua tib zoo cuab pob ntseg mloog. Tiam sis ua ntej no, cia peb kawm seb leej twg yog tus hais lus rau peb.

NCO NTSOOV TIAS YEHAUVAS YOG TUS HAIS LUS RAU PEB

3. Yehauvas txuas lus nrog peb li cas, thiab nws cov neeg siv phau Vajlugkub los qhia li cas?

³ Thaum peb nyeem phau Vajlugkub ces twb yog Yehauvas hais lus rau peb ntag. (2 Timautes 3:16, 17) Yexus yeej paub li no. Nws txawj siv Vajtswv Txoj Lus los qhia heev thiaj ua rau cov uas mloog nws nug li no tias: “Ua li cas tus yawg no ho paub Vajtswv Txoj Lus ua luaj, nws twb tsis tau mus kawm qhov twg li sad?” (Yauhas 7:15) Cov uas txo hwj chim thiab xav paub Yehauvas, zoo siab heev thaum lawv hnov Yexus muab Vajtswv Txoj Lus los qhia rau lawv. Cov Khixatias uas nyob thawj ib puas xyoo, xws li Povlauj thiab Apaulaus, yeej muab tej nqe hauv phau Vajlugkub los piav qhia rau tib neeg tias Yehauvas xav kom lawv ua dab tsi. (Tes Hauj Lwm 17:2, 3; 18:24, 28) Peb uas yog Yehauvas Cov Tim Khawv, paub meej tias peb tej ntaub ntawv, Yehauvas Cov Tim Khawv Tshooj TV, tej lus qhuab qhia, thiab tej yeeb yaj kiab yeej yog rho hauv phau Vajlugkub los qhia xwb. Muaj coob tus uas tuaj koom peb thawj zaug, qhuas tias peb yeej ib sij nthuav phau Vajlugkub los nyeem thiab los qhia. Cov uas muaj ib feem los cev lus qhia nyob hauv lub koom txoos, lawv yeej muab Vajtswv Txoj Lus los qhia. Lawv tsis yog nyeem rau peb mloog xwb, tiam sis lawv pab kom peb to taub tias, peb yuav muab tej uas peb kawm coj los siv hauv peb lub neej li cas.​—Lukas 24:32.

4. Lo lus “hnov” thiab “mloog” hauv phau Vajlugkub yog txhais li cas tiag?

⁴ Lo lus “hnov” thiab “mloog” uas hais nyob hauv phau Vajlugkub, feem ntau cov neeg yav thaud to taub tias yog mloog lus. Yog li, thaum peb nyeem phau Vajlugkub tom peb kev sib txoos, ces zoo tam li Yehauvas hais lus rau peb, thiab thaum peb to taub lawm peb yuav mloog nws lus. Thiab Yehauvas yuav txaus siab heev rau peb, yog tias peb mloog nws lus thiab coj raws li tej uas peb tau kawm. Peb paub tias Yehauvas zoo siab heev thaum peb mloog nws lus thiab coj raws li tej uas peb tau hnov.​—Pajlug 27:11.

UA TIB ZOO MLOOG TOM TEJ KEV SIB TXOOS

5. Qhov uas peb hlub Yehauvas yuav pab kom peb ua dab tsi? (Yauhas 4:23, 24; 1 Yauhas 5:3)

⁵ Peb ua tib zoo mloog tom kev sib txoos vim peb hlub Yehauvas. (Mathais 22:37) Yog peb yim kawm txog Yehauvas ces peb yim hlub nws xwb. Peb txoj kev hlub rau Yehauvas yuav ua rau peb xav mloog nws lus, ua raws li nws hais, thiab teev tiam nws raws li twb hais tseg nyob hauv nws Txoj Lus lawm.​—Nyeem Yauhas 4:23, 24; 1 Yauhas 5:3.

6. Tom peb tej kev sib txoos, peb kawm kom txawj pab tib neeg li cas?

⁶ Peb ua tib zoo mloog tom kev sib txoos vim peb hlub tib neeg. (Mathais 22:39) Tom tej kev sib txoos Yehauvas cob qhia peb kom peb paub pab cov kwv tij nkauj muam thiab cov uas tseem tsis tau los paub nws. Xws li phau ntawv Hlub Tib Neeg​—Coj Lawv Los Ntseeg tau pab peb xyaum kom muaj cov yam ntxwv zoo thaum peb mus tshaj tawm. Puas nyuaj rau koj pib nrog tib neeg tham? Yog nyuaj, ces thaum ib tug kwv tij nkauj muam ua qauv txog lub ntsiab no nyob hauv peb txoj kev sib txoos 1, koj yuav tau ua tib zoo mloog koj thiaj xyaum tau.

7. Vim li cas tseem ceeb peb yuav tau mloog Yehauvas lus?

⁷ Peb ua tib zoo mloog tom kev sib txoos vim peb xav tau lub neej zoo. Qhov uas peb mloog Vajtswv tej lus yuav cawm tau peb txoj sia, zoo tib yam li cov uas mloog nws lus yav thaum ub. (2 Kevcai 32:44-47) Yog peb ua tib zoo mloog tom tej kev sib txoos, yuav txhawb tau peb lub zog, kom peb ua tau lub siab ntev thev mus txog lub ntiaj teb tshiab. (Loos 8:25) Tseem ceeb heev uas peb yuav tau mloog Yehauvas lus tam sim no, vim peb nyob rau tiam kawg lawm, peb yuav tau ceev faj zov tos.​—Mathais 24:42-44; Tshwmsim 1:3.

YUAV UA LI CAS THIAJ PAB TAU COV UAS MLOOG

8. Vim li cas cov kwv tij uas qhia saum sam thiaj yuav tau xyaum kom txawj qhia?

⁸ Cov kwv tij uas qhia saum sam thiaj, tshwj xeeb tshaj yog cov uas cev lus qhuab qhia, yuav tau siv zog xyaum kom txawj qhia. Yog tias tus kwv tij ua tib zoo npaj nws zaj lus qhia thiab ua tib zoo saib kom tej uas nws qhia yeej yog los hauv phau Vajlugkub los, ces yuav pab tau cov uas tuaj mloog tshiab kawm tau qhov tseeb hauv phau Vajlugkub, thiab yuav pab tau cov kwv tij nkauj muam coj lub neej raws li qhov uas lawv tau hnov. Tsis tas li ntawd, cov uas muaj feem qhia nyob hauv kev sib txoos, tej zaum nej twb tsis nco ras txog tias tej lus nej qhia muaj peev xwm txhawb tau cov uas mloog. Yog li peb yuav mus tham txog ib co ntsiab lus uas yuav pab tau nej thaum nej muaj ib feem qhia tom kev sib txoos. Txawm hais tias cov ntsiab lus no yog hais tsi ntsees rau cov kwv tij uas cev ib zaj lus qhuab qhia, los yeej pab tau txhua tus uas muaj feem cev lus qhia nyob hauv lub koom txoos.​—2 Timautes 4:2; Titus 1:9.

9. Vim li cas tseem ceeb koj yuav tau qhia kom yooj yim to taub?

⁹ Qhia kom muaj chaw txawb chaw rau. Thaum koj cev zaj lus qhuab qhia hais tej lus kom yooj yim to taub. Tsis txhob qhia txog ntau lub ntsiab ua ke, yog koj tham ib lub ntsiab tag lawm, nres me ntsis mam mus tham txog lwm lub. Yog koj ua li no, cov uas mloog thiaj to taub thiab khaws tau tej uas koj qhia. Yuav ua li cas koj thiaj txawj qhia? Koj ua tau li no: (1) Thaum pib cev zaj lus qhuab qhia, qhia tias cov ntsiab lus koj yuav mus tham yog dab tsi. (2) Qhia txog ib lub ntsiab lus zuj zus. (3) Thaum xaus zaj lus qhuab qhia, rov mus hais txog cov ntsiab lus ib qho zuj zus.

10. Vim li cas tseem ceeb koj yuav tau qhia muaj siab zim?

¹⁰ Qhia muaj siab zim. Yog koj nyiam tej uas koj qhia, yuav ua rau koj muaj siab zim qhia. (Pajlug 2:4, 5; Tes Hauj Lwm 4:20) Yuav kom koj nyiam tej uas koj qhia, koj yuav tau muab cov nqe Vajlugkub thiab cov ntsiab lus rau zaj lus qhuab qhia coj los ua tib zoo xav. Muaj ib tug kwv tij nyob Yunaithim Xatej (United States) uas twb muaj 70 tawm xyoo lawm, tau hnov ib zaj lus qhuab qhia puag thaum nws tseem yog tub hluas. Nws hais li no: “Kuv tseem nco tau tus kwv tij txhawb kom thaum peb nyeem Vajtswv Txoj Lus, peb yuav tau muab coj los ua tib zoo xav. Nws ua tib zoo piav qhia tias peb yuav tsum ua li cas, thiab yus yeej pom tias, qhov uas nws qhia ntawd yeej tseem ceeb rau nws. Zaj lus qhuab qhia ntawd hloov hlo kuv lub neej, pab tau kuv heev rau kuv txoj kev nyeem phau Vajlugkub, thiab pab tau kuv yim huab muaj kev sib raug zoo nrog Yehauvas.”

11. Vim li cas zoo rau koj qhia tsi ntsees kom luag thiaj khaws tau koj tej lus qhuab qhia? (1 Timautes 4:13-16)

¹¹ Xav seb cov uas mloog cheem tsum dab tsi, thiab qhia kom lawv ua raws li lawv kawm. Tsis txhob cia li hais xwb, koj yuav tau muab cov nqe Vajlugkub los qhia los txhawb tsi ntsees rau yam uas cov tuaj mloog cheem tsum, thiaj yuav pab tau lawv coj raws li tej uas lawv tau hnov. Tib yam li tus tub txib Povlauj tau txhawb Timautes. Nws qhia tsi ntsees tias Timautes yuav tsum ua li cas nws thiaj nyob ze Yehauvas, rau lub sij hawm uas Timautes siv zog ua hauj lwm pab cov kwv tij nkauj muam nyob hauv Efexaus. (Nyeem 1 Timautes 4:13-16.) Ua zoo xav seb dab tsi pab tau cov uas tuaj mloog, thiab koj yuav txhawb kom lawv pom tias lawv yuav tau coj raws li tej uas lawv hnov thiaj yuav pab tau lawv lub neej.

12. Vim li cas zoo rau koj qhia tawm hauv nruab siab tuaj?

¹² Thaum xyaum koj zaj lus qhuab qhia, hais nrov nrov es thiaj zoo li koj qhia hauv nruab siab tuaj. Yog thaum koj cev zaj lus qhuab qhia li koj hais lus, koj thiaj yuav qhia tau tawm hauv nruab siab tuaj, es thiaj li tsis zoo li koj nyeem ntawv ib lo rau ib lo. Yog koj qhia li no yuav pab tau cov uas mloog khaws tau koj tej lus qhuab qhia. Phau ntawv Xyaum Kom Txawj Nyeem Txawj Qhia hais tias: “Qhia hauv nruab siab tuaj luag thiaj pom tias koj ntseeg tej uas koj hais, thiab paub tias koj xav pab lawv tiag.” Yog koj qhia tawm hauv nruab siab tuaj, cov uas mloog thiaj xav mloog thiab yuav pab tau lawv khaws tau koj tej lus coj mus siv hauv lawv lub neej.

13. Vim li cas cov kwv tij uas cev lus qhuab qhia yuav tau nug ib tug uas txawj qhuab qhia pab? (Saib daim duab.)

¹³ Nug ib tug uas txawj cev lus qhuab qhia pab koj. Koj ua li no li cas? Muab koj zaj lus qhuab qhia uas koj npaj tau lawd rau nws saib, yog tias nws muaj tswv yim dab tsi pab koj, ces koj mam muab kho rau hauv koj zaj lus qhuab qhia. Ntxiv ntawd, qhia rau nws paub tias thaum nws mloog koj xyaum cev koj zaj lus qhuab qhia, kom nws ua zoo mloog es pab koj seb koj yuav ua li cas koj thiaj txawj qhia. (Pajlug 1:5) Peb txhua tus yeej tsis paub tias thaum peb cev ib zaj lus qhuab qhia, xyov peb qhia puas meej puas tshab kom lwm tus thiaj khaws tau lub ntsiab. Peb yeej xav xyaum kom peb txawj qhia, kom thiaj pab tau cov uas mloog khaws tau tej lus nyiaj lus kub uas nyob hauv Vajtswv Txoj Lus.a

DAB TSI PAB TAU PEB UA TIB ZOO MLOOG

14. Vim li cas peb yuav tau muaj tus cwj pwm zoo tib yam li tus sau Phau Ntawv Nkauj 119? (Phau Ntawv Nkauj 119:24, 111, 167)

¹⁴ Yog peb ris txiaj ntsig rau Yehauvas tej lus qhuab qhia yuav pab tau peb ua tib zoo mloog. Nyob rau tiam kawg no peb yuav tsum tau hnov Vajtswv tej lus qhuab qhia tas zog kom peb thiaj tiv dhau “kev kub ntxhov.” (2 Timautes 3:1) Yog tias tej lub sij hawm peb rov hnov tej zaj lus qhuab qhia uas peb twb tau hnov dua los lawm, yuav kom pab tau peb ua tib zoo mloog, peb yuav tau muaj tus cwj pwm zoo tib yam li tus uas sau Phau Ntawv Nkauj 119.​—Nyeem Phau Ntawv Nkauj 119:24, 111, 167.

15. Yuav ua li cas peb thiaj ris txiaj ntsig rau tej lus qhuab qhia uas peb hnov tom tej kev sib txoos?

¹⁵ Peb yuav tau xav mus rau qhov zoo thiab ris txiaj ntsig tias tej lus qhuab qhia uas peb hnov tom tej kev sib txoos twb yog Yehauvas ua tus pub rau peb. Peb yuav tau nco ntsoov tias tau muaj li cas rau cov Ixayees thaum Yehauvas pub cov manas rau lawv noj tom roob moj sab qhua. (Khiav Dim 16:15, 31) Thaum xub thawj lawv yeej ris txiaj ntsig rau cov manas. Rau qhov Yehauvas yog tus pub rau lawv noj, yeej qab thiab cawm tau lawv txoj sia. Tiam sis ntev zuj zus mus, muaj tej txhia dhuav tsis xav noj cov manas lawm. (Teev Npe 21:5) Peb kawm tau li cas? Peb kawm tau tias peb yuav tsum tsis txhob xav tias tej lus qhuab qhia uas peb hnov tom tej kev sib txoos, tsuas yog tej qub lus xwb thiab tsis muaj nuj nqis. Peb yuav tau nco ntsoov tias tej lus qhuab qhia ntawd twb yog los ntawm Yehauvas los. Thiab lub koom haum twb ua tib zoo npaj zoo zoo ua ntej lawm, lawv mam muab rau cov kwv tij qhia hauv tej kev sib txoos. Tej lus qhuab qhia ntawd pab tau peb muaj tswv yim kom peb txawj txiav txim siab zoo, peb thiaj yuav tau txoj sia nyob mus ib txhis tsis kawg.​—Pajlug 3:13, 16-18; Yauhas 17:3.

16. Dab tsi pab tau ib co uas teev tiam Yehauvas ntev lawm kom lawv ua tib zoo mloog tom tej kev sib txoos? (Saib lub ntsiab me “Tej Yam Uas Pab Tau Koj Ua Tib Zoo Mloog.”)

¹⁶ Yog peb ua raws li cov hais nram qab no yuav pab tau peb ua tib zoo mloog. Dab tsi pab tau ib txhia uas teev tiam Yehauvas tau ntev lawm kom ua tib zoo mloog tom kev sib txoos. Cia peb saib seb lawv hais li cas. A-selim (Ashley) teev tiam Yehauvas tau 30 tawm xyoo lawm, nws hais tias: “Kuv pom tias yog yus npaj rau tej kev sib txoos pab tau yus ua tib zoo mloog. Yog kuv tsis npaj ua ntej kuv tsis paub yuav teb li cas ces kuv cia li pib mus xav lwm yam lawm.” Yausem (József) teev tiam Yehauvas tau 52 lub xyoos hais tias: “Kuv tsis xav li cas txawm kuv rov hnov tej lub ntsiab lus uas kuv twb tau kawm yav tas los lawm, vim tias kuv yeej kawm tau tej yam tshiab tas li. Txawm yog tias ib tug kwv tij tsis tshua txawj cev lus qhuab qhia los kuv tsis xav txog qhov ntawd, kuv ua tib zoo mloog cov ntsiab lus uas nws muab Vajtswv Txoj Lus los qhia xwb.”

17. Dab tsi pab tau koj ua tib zoo mloog tom kev sib txoos? (Saib daim duab.)

¹⁷ Puas muaj tej yam uas hais nram qab no pab tau kom ua tib zoo mloog? (1) Yog koj noj mov ua ntej tuaj kev sib txoos txhob noj tsau tsau. (2) Tuaj kom ntxov thiab nrhiav rooj zaum ua ntej kev sib txoos pib. (3) Muab tej twj ntawm tes kaw suab kom thiaj li tsis tab kaum koj. (4) Xav ua ntej seb tus kwv tij yuav qhia txog dabtsi. (5) Ntsia ntsoov tus kwv tij uas cev zaj lus qhuab qhia. (6) Muab tej yam uas koj nyiam sau cia los sis kos duab txog ib lub ntsiab uas koj xav kom koj nco tau. (7) Ua zoo mloog cov nqe Vajlugkub thiab xav seb lawv qhia sib dhos li cas. (8) Nug koj tus kheej li no, ‘Kuv yuav muab tej uas kuv kawm no mus pab lwm tus hauv lub koom txoos los sis hauv kuv thaj tsam li cas?’ (9) Thaum txog cov rooj sib txoos, saib cov ntsiab lus rau txhua hnub thiab cov ntsiab lus rau cov lus qhia, thiab nyeem cov nqe Vajlugkub seb hais li cas. (10) Ua ntej lub rooj sib txoos pib, mus zaum thiab npaj koj lub siab mloog cov suab nkauj thiab yeeb yaj kiab.

UA TIB ZOO MLOOG YEHAUVAS

18. Vim li cas peb yuav tau ua tib zoo mloog tom kev sib txoos?

¹⁸ Peb yuav tsum ua tib zoo mloog tom tej kev sib txoos, yog peb ua li ntawd ces twb yog peb cia Yehauvas “coj [peb] taug txojkev ncaj ncees.” (Phau Ntawv Nkauj 23:3; 31:3) Peb yuav tau mloog tej lus qhuab qhia kom peb thiaj tsis nrug ntawm Yehauvas mus, peb thiaj tsis zoo li lub nkoj uas thaum muaj cua ntsawj ces mus deb zuj zus lawm. Yog li, “ua tib zoo mloog” thiab coj raws li tej uas peb kawm tom kev sib txoos. (Lukas 8:18) Cov uas ua tib zoo mloog Yehauvas yuav muaj kev zoo siab tam sim no thiab yuav tau txoj sia ntev dhawv mus ib txhis rau yav tom ntej.​—Phau Ntawv Nkauj 119:2, 14.