Pawg Mus Tshaj Tawm Pab Tau Peb

1-2. Muaj coob tus xav li cas txog lawv pawg mus tshaj tawm?

KOJ nco puas tau thawj zaug koj ua tau ib tug mus tshaj tawm? Hnub ntawd yog ib hnub uas zoo heev, rau qhov koj koom nrog ib pawg coob coob uas teev tiam Yehauvas qhuas nws lub npe. (Phau Ntawv Nkauj 148:1, 2, 12, 13) Tsis tas li ntawd, koj kuj koom nrog ib pawg uas tsis tshua muaj neeg coob pes tsawg mus tshaj tawm. Pawg mus tshaj tawm pab peb ua tau raws li Yexus cov lus sam hwm, kom mus qhia txoj xov zoo txog lub Nceeg Vaj kom “thoob plaws lub ntiaj teb.”​—Mathais 24:14.

² Koj xav li cas txog pawg uas koj nrog mus tshaj tawm? Muaj ib tug muam hu ua Yaj Mima hais tias: “Kuv pawg mus tshaj tawm pab tau kuv rau ntau txoj ke. Kuv kawm tau tej yam tshiab los ntawm tej tug kom haj yam txawj qhia thiab txawj tshaj tawm ntxiv. Lawv pab kuv muaj hom phiaj ntawm sab kev ntseeg thiab pab kom kuv ncav cuag tej hom phiaj ntawd, thiab kuv cog tau kev phooj ywg uas kav kuv ib sim neej.” Ib tug kwv tij hu ua Lij (Rich) hais li no: “Kuv pom tias tes hauj lwm ua ib tug saib xyuas pawg mus tshaj tawm tseem ceeb heev. Txawm tej tug tshaj tawm pab tau ib tug los ua kev cai raus dej, los tus uas saib xyuas pawg mus tshaj tawm, yuav tau siv zog pab tus ntawd kom muaj kev sib raug zoo nrog Yehauvas thiab kom nws haj yam txawj qhia Vajlugkub mus li.” Hos ib tug muam hu ua Dainas (Dinah) hais tias: “Kuv zoo siab tias kuv nyob hauv ib pawg mus tshaj tawm! Kuv pom tias lawv zoo tam li kuv tsev neeg.”

3. Peb yuav mus tham txog dab tsi hauv zaj no?

³ Hauv zaj kawm no, peb yuav xub mus tham txog tus kwv tij uas saib xyuas ib pawg mus tshaj tawm thiab tus kwv tij uas pab nws, seb nkawd pab tau nkawd pawg li cas. Ces peb yuav mus tham tias peb pab tau peb pawg mus tshaj tawm li cas. Tom qab ntawd, peb mam li tham seb peb pawg mus tshaj tawm ho pab tau peb li cas.

TUS SAIB XYUAS PAWG MUS TSHAJ TAWM THIAB TUS UAS PAB NWS

4. (1) Tus kwv tij uas saib xyuas ib pawg mus tshaj tawm tes hauj lwm yog li cas? (2) Nws saib xyuas nws pawg li cas? (Saib lub ntsiab “Kev Pab Rau Tus Saib Xyuas Pawg Mus Tshaj Tawm.”)

⁴ Tus saib xyuas ib pawg mus tshaj tawm yog ib tug txwj lausb uas yog tsa los ntawm pab txwj laus. Nws saib xyuas thiab pab cov kwv tij nkauj muam uas nyob hauv nws pawg, kom lawv nyob ze Yehauvas thiab txawj mus tshaj tawm. Nws pab tau nws pawg li cas? Thawj yam, nws yuav tau paub txog txhua tus uas nyob hauv nws pawg. (Pajlug 27:23) Nws yuav tau mob siab txog lawv txhua tus, nrog lawv tham kom thiaj paub tias lawv noj nyob li cas, nws thiaj paub txhawb lawv txoj kev ntseeg, txhawb lawv thaum muaj kev nyuaj siab ntxhov plawv thiab txhawb rau lwm yam. (Pajlug 12:25; Yaxayas 32:2; Yakaunpaus 2:15-17) Yam ob, nws txhawb txhua tus kom mus tshaj tawm tsis tu ncua. Nws yuav tau ntaus thawj hlo kub siab lug mus tshaj tawm, tshwj xeeb tshaj yog nyob rau ob hnub so. Nws yuav tau ib sij nrog ib tug kwv tij nkauj muam mus tshaj tawm ua ke, kom thiaj txhawb tau lawv thiab cob qhia tau lawv kom txawj mus qhia Vajlugkub. Yog qee lub sij hawm nws mus tshaj tawm tsis tau, nws hais kom tus kwv tij uas pab nws, los sis lwm tus pab ua tus coj pawg mus tshaj tawm. Yam peb, nws pab cob qhia cov kwv tij uas twb ua kev cai raus dej lawm kom los tuav tau hauj lwm ntxiv hauv lub koom txoos. (1 Timautes 3:1) Thaum ib tug kwv tij ua tau zoo nws yuav tau qhuas tawm hauv nruab siab tuaj, thiab nws muab Vajtswv Txoj Lus los ntuas, los cob qhia cov kwv tij kom lawv thiaj los ua tau ib tug tub leg num, los sis ib tug txwj laus. Tes hauj lwm saib xyuas ib pawg mus tshaj tawm tseem ceeb heev. Yog li, pab txwj laus yuav tau xaiv ib tug kwv tij uas yuav muaj peev xwm los tuav tau tes hauj lwm no.

5. Ib txhia uas saib xyuas ib pawg mus tshaj tawm ntsib tej yam twg?

⁵ Tej zaum yuav muaj tej yam ua nyuaj rau tus saib xyuas ib pawg mus tshaj tawm ua tau nws tes hauj lwm kom zoo, los mus saib xyuas txhua tus kwv tij nkauj muam nyob hauv nws pawg. Ib tug kwv tij nyob teb chaws Ntsaws Mes Nis (Germany) hu ua Yoj (Jörg), nws yog tus txwj laus uas saib xyuas ib pawg mus tshaj tawm. Nws muaj ntau txoj hauj lwm ua nyob hauv lub koom txoos. Nws hais li no: “Thaum yus yog tus saib xyuas ib pawg mus tshaj tawm thiab tseem yuav tau ua lwm yam hauj lwm hauv lub koom txoos, mas tsis yooj yim. Txhua lub lim tiam kuv yeej hu tsis cuag ncua mus nug seb cov kwv tij nkauj muam uas nyob hauv kuv pawg nyob li cas lawm.” Ib tug kwv tij hu ua Enpaum (Abel), nws muaj 70 xyoo nyob teb chaws Yunkadas (Uganda) hais tias: “Hauv peb lub koom txoos tsis muaj cov tub leg num thiab cov txwj laus coob. Ib pawg mus tshaj tawm, mas muaj coob tus kwv tij nkaum muam. Yog li, txawm kuv xav nrog ib tug zuj zus mus tshaj tawm ua ke kom thiaj txhawb tau lawv los kuv ua tsis tau li lub siab xav.” Hos tus txwj laus hu ua Aunpes (Obed) nyob teb chaws Xawlina (Suriname) hais tias: “Kuv nyiam cob qhia lwm tus heev. Tiam sis kev cob qhia yuav tau siv dag siv zog thiab siv sij hawm, thiab yus tsis pom yus tes hauj lwm cob qhia lwm tus tawg paj txi txiv tam sid. Ces twb vim yog li no, kuv thiaj tsis tshua nquag cob qhia lwm tus.” Dab tsi yuav pab tau cov txwj laus uas saib xyuas ib pawg mus tshaj tawm yog tias lawv ntsib tej yam zoo li no?

6. Yog pawg mus tshaj tawm muaj neeg tsawg zog, yuav pab tau tus txwj laus saib xyuas nws pawg kom zoo dua li cas?

⁶ Yog ua tau tsis txhob cia muaj neeg coob dhau nyob hauv ib pawg mus tshaj tawm. Ua li no tus kwv tij uas saib xyuas, thiaj pab tau cov kwv tij nkauj muam thiab txhawb tau kom lawv nyob ze Yehauvas. Yuav ua li cas yog lub koom txoos tsis muaj cov txwj laus coob? Txawm li los tsis txhob cia coob dhau. Yog muaj neeg coob dhau lawd, yuav nyuaj rau tus kwv tij saib xyuas ua tau nws tes hauj lwm zoo. Tej zaum zoo rau pab txwj laus xaiv ib tug tub leg num los pab saib xyuas pawg mus tshaj tawm ib ntus. Yog pawg mus tshaj tawm muaj neeg tsawg zog, ces tus txwj laus uas saib xyuas nws pawg, thiaj ua tau nws tes hauj lwm zoo, txhawb cov kwv tij nkauj muam txoj kev ntseeg thiab pab tau lawv nyiaj taus tej kev nyuaj siab.

7. Hauv cov koom txoos uas tsis muaj cov txwj laus coob, tus txwj laus uas saib xyuas ib pawg mus tshaj tawm yuav ua li cas thiaj pab tau txhua tus hauv nws pawg? (1 Petus 5:2) (Saib daim duab.)

⁷ Yog hauv lub koom txoos tsis muaj cov txwj laus coob es koj yog ib tug txwj laus uas saib xyuas ib pawg mus tshaj tawm, zoo rau koj cob qhia tus uas pab koj, kom nws thiaj pab tau koj saib xyuas cov kwv tij nkauj muam uas nyob hauv neb pawg. (Nyeem 1 Petus 5:2.) Faib hauj lwm rau nws ua. Xws li tej lub sij hawm txib kom nws pab ua tus coj pawg mus tshaj tawm. Nrog nws tuav tswv yim tias neb yuav ua li cas thiaj pab tau cov kwv tij nkauj muam kub siab lug mus tshaj tawm. Koj yuav tau nquag coj tus kwv tij uas pab koj, nrog koj mus xyuas thiab txhawb cov kwv tij nkauj muam. Ua ntej neb mus, qhia rau nws paub tias neb yuav txhawb cov kwv tij nkauj muam li cas, thiab tom qab ntawd, qhia rau nws paub tias nws ua tau yam twg zoo thiab nws yuav tau xyaum yam twg ntxiv. Yog koj cob qhia nws li no, nws yuav ua tau ib tug uas saib xyuas ib pawg thiab. (2 Timautes 2:2) Ntxiv ntawd, koj kuj hais kom cov uas txawj qhia Vajlugkub pab cob qhia cov kwv tij nkauj muam nyob hauv koj pawg. Cov tho kev thiab cov uas txawj qhia Vajlugkub kuj pab cob qhia cov uas nyuam qhuav pib mus tshaj tawm, los sis cov uas tseem xyaum kom txawj mus tshaj tawm. Cov uas txawj qhia Vajlugkub kuj pab tau cov kwv tij nkauj muam kom lawv paub tias yuav hais li cas thaum nrog tib neeg tham, thaum rov mus xyuas cov uas lawv ntsib, los sis yuav qhia Vajlugkub li cas rau tus uas kawm. Cia peb mus tham txog peb yam uas peb txhua tus ua tau los pab peb pawg mus tshaj tawm.

KOJ YUAV PAB TXHAWB PAWG MUS TSHAJ TAWM LI CAS

8. Peb yuav txhawb peb pawg mus tshaj tawm li cas? (Loos 1:12)

⁸ Mus koom nrog koj pawg mus tshaj tawm. Yog koj mus koom nrog cov kwv tij nkauj muam mus tshaj tawm ua ke, nej ib leeg yuav txhawb tau ib leeg lub zog. (Nyeem Loos 1:12.) Thiab thaum koj nrog neeg tham los koj tsis tshua ntshai, thiab koj yuav tau luag dua. Yog koj txoj hauj lwm khwv noj khwv haus cuam tshuam koj lub sij hawm mus tshaj tawm, koj thov puas tau kom koj tus los pav hloov koj lub sij hawm? Tej zaud nws kuj kam hloov thiab. (Nehemis 2:4-6) Hos yog tias koj muaj mob muaj nkeeg, los sis koj laus lawm es tsis yooj yim rau koj mus tshaj tawm, nrog tus txwj laus uas saib xyuas koj pawg tham. Nws yuav pab tau koj koom nrog cov tshaj tawm nyob saum huab saum cua, nej kuj sau tau ntawv los sis hu xov tooj tshaj tawm. Yog koj tseem hluas thiab noj qab nyob zoo tiam sis nyuaj rau koj mus tshaj tawm tsis tu ncua ne? Yog muaj li no, zoo rau koj teem sij hawm mus nrog ib co kwv tij nkauj muam hauv koj pawg mus tshaj tawm txhua lub lim tiam. Tej zaud, koj yuav tau ua tib zoo saib seb, yam twg tseem ceeb dua thiab paub luj koj lub sij hawm kom zoo. (Loos 12:11; Kaulauxis 4:5) Yog koj ua npaum li koj ua tau mus koom koj pawg mus tshaj tawm, yuav txhawb tau sawv daws lub zog. Koj yuav tau thov Yehauvas pab koj thiab. Yehauvas yuav pub kom koj “muaj lub siab kub lug thiab muaj zog npho ua raws li nws siab nyiam.”​—Filipis 2:13.

9. Peb yuav ua qhia tias peb hlub peb pawg mus tshaj tawm li cas? (Loos 12:13)

⁹ Zoo siab hlo tos txais pawg mus tshaj tawm. Koj ua qhia rau cov kwv tij nkauj muam hauv koj pawg, tias koj hlub tshua txog lawv yog koj “nrhiav nrhw kev los txais qhua.” (Nyeem Loos 12:13.) Koj qhib puas tau koj lub tsev rau cov kwv tij nkauj muam tuaj sib ntsib mus tshaj tawm? Nyob rau tej lub koom txoos, thaum muaj ib tug kwv tij tuaj cev ib zaj lus qhia, ces ib pawg tshaj tawm coj mus noj mov ces lwm zaus lwm pawg mam coj lwm tus kwv tij uas tuaj cev zaj lus qhuab qhia mus noj mov. Yog tias tus kwv tij ntawd mus tsis tau los, tej txhia kwv tij nkauj muam uas nyob hauv pawg uas coj nws mus noj mov, yeej tseem tuaj noj mov ua ke sib txhawb zog. Ib tug muam hu ua Xalas (Sarah), nws yog ib tug tho kev tshwj xeeb, nws hais tias: “Thaum hais txog tos txais qhua kuv muaj ntsis txhawj. Txawm li los, kuv tsuas tau hau ntsoov nrog cov kwv tij nkauj muam tham, kom kuv paub lawv thiab nrog lawv sib raug zoo, thiaj tsis ua rau kuv txhawj tias tsam kuv cov zaub mov tsis qab.” Yog peb tos txais peb pawg mus tshaj tawm zoo tam li peb tsev neeg, ces peb ib leeg yuav hlub ib leeg thiab ib leeg yuav nyob ze ib leeg, thiab nyob ze Yehauvas.​—Nehemis 8:10; Tes Hauj Lwm 20:35.

10. Peb yuav ua li cas yog peb xav kom peb txawj qhia thiab txawj tshaj tawm ntxiv? (Pajlug 1:5; 27:17) (Saib daim duab.)

¹⁰ Nug kom lwm tus pab koj. Yog peb yim huab txawj qhia thiab txawj tshaj tawm ces peb yuav nyiam nrog pawg mus tshaj tawm dua. Puas muaj tej yam koj xav xyaum kom koj txawj qhia thiab txawj tshaj tawm ntxiv? Yog muaj, ces koj nug tau ib tug tho kev los sis ib tug uas txawj qhia Vajlugkub hauv koj pawg pab koj. (Nyeem Pajlug 1:5; 27:17.) Qhia rau tus txwj laus ua saib xyuas koj pawg paub txog koj lub hom phiaj. Tej zaum nws yuav pab tau koj ncav cuag koj lub hom phiaj. Koj kuj thov tau lwm tus kwv tij nkauj muam pab koj thiab. Muaj ib tug muam hu ua Hasntaws (Heather), nws yog ib tug neeg txaj txaj muag, nws hais li no: “Kuv thov ib tug viv ncaus uas yog ib tug tho kev nrog kuv rov mus xyuas cov uas kuv ntsib. Nws muaj kev hlub tshua thiab siab zoo kawg li, nws yeej teem caij nrog kuv mus tshaj tawm tas li. Nws pab kuv kawg li, ib tug uas kuv rov mus xyuas thiaj pib kawm Vajlugkub nrog kuv lawm. Kuv zoo siab heev kuv thov kev pab los ntawm lwm tus, nim no kuv nyiam mus tshaj tawm kawg lawm.” Muaj ntau yam uas peb ua tau los txhawb peb pawg mus tshaj tawm.

KOOM NROG PAWG TSHAJ TAWM PAB TAU KOJ

11-12. Koom nrog ib pawg mus tshaj tawm pab tau koj li cas? Piav ib qho uas pab tau koj.

¹¹ Txhawb tau koj txoj kev ntseeg. Yeej txhawb tau peb txhua tus txoj kev ntseeg yog tias peb mus koom nrog peb pawg mus tshaj tawm. Tus txwj laus uas saib xyuas pawg mus tshaj tawm thiaj li saib xyuas thiab pab tau cov poj ntsuam, cov me nyuam ntsuag, thiab cov laus uas Yehauvas hlub tshua heev. (1 Thexalaunikas 2:8; Yakaunpaus 1:27) Ntxiv ntawd, koj yuav tau kev cob qhia ntau yam kom txawj mus tshaj tawm thiab mus qhia lwm tus. Hos cov kwv tij uas twb ua kev cai raus dej lawd, kuj yuav tau kev cob qhia kom lawv thiaj tuav tau hauj lwm ntxiv hauv lub koom txoos.​—1 Timautes 3:10.

¹² Tus muam Yaj Mim uas hais tas los no hais tias, qhov uas koom nrog ib pawg mus tshaj tawm pab tau nws kawg li. Nws hais li no: “Kuv txiv tawm tsam kuv niam wb txoj kev ntseeg Yehauvas kawg li, ces nyuaj rau kuv niam mus koom nrog nws pawg mus tshaj tawm rau ob hnub so. Tiam sis kuv txiv tsis txwv kuv ces kuv mus koom tau. Muaj ib tug viv ncaus uas yog ib tug tho kev hlub kuv kawg, nws pab kuv kom kuv txawj qhia thaum mus tshaj tawm thiab txawj qhia hauv lub koom txoos. Kuv yeej tseem nco tau tias, tus txwj laus uas saib xyuas kuv pawg mus tshaj tawm tau muab ntau nqe Vajlugkub los txhawb kuv mas yeej pab tau kuv los txog niaj hnub nim no.”

13. Peb pawg tshaj tawm txhawb tau peb li cas? (Saib daim duab.)

¹³ Pab tau koj thaum nyuaj siab. Thaum koj nrog cov kwv tij nkauj muam hauv koj pawg mus tshaj tawm, ces nej “ib leeg txhawb ib leeg” thiab ib leeg nyob ze ib leeg. (Filipis 1:27) Yog pawg mus tshaj tawm tsis muaj neeg coob, ces yuav pab tau cov uas txaj txaj muag kom ntaus tau phooj ywg. (2 Kauleethaus 6:13) Cov kwv tij nkauj muam nyob hauv koj pawg yuav pab txhawb tau koj thaum koj tsis xis neej, thaum nyuaj siab, los sis thaum muaj ib tug uas koj hlub tau tas sim neej. (1 Thexalaunikas 5:14) Yav tom hauv ntej, koj yim huab yuav cheem tsum cov phooj ywg zoo. (Mathais 24:21) Tej zaum koj tej teeb meem yuav tsis ploj mus, tiam sis yog koj muaj cov kwv tij nkauj muam hlub koj thiab txhawb koj, ces yuav pab tau koj thev taus.​—Pajlug 17:17.

14. Peb tau kev pab li cas thaum muaj teeb meem ceev?

¹⁴ Tej uas pab tau koj. Thaum muaj kab mob kis, muaj cua daj cua dub, muaj mob muaj nkeeg ceev, muaj kev tsim txom, thiab txom nyem nyiaj txiag, tus txwj laus uas saib xyuas pawg mus tshaj tawm, yuav pab tau koj raws caij raws nyoog. Xws li nyob hauv txhua lub koom txoos, Pab Kwv Tij Uas Sawv Cev Cov Txwj Laus nrog rau tag nrho cov txwj laus uas saib xyuas ib pawg tshaj tawm, lawv npaj ua ntej tias yuav pab cov uas cheem tsum kev pab li cas. Tus txwj laus uas saib xyuas pawg mus tshaj tawm, nws yog tus uas nug moo seb txhua tsev neeg uas nyob hauv nws pawg xav tau kev pab li cas thaum muaj teeb meem ceev, xws li tshuaj, zaub mov, dej, ib qho chaw nyob, thiab ris tsho. Tus txwj laus uas saib xyuas koj pawg tshaj tawm, yeej yuav pab koj thaum muaj teeb meem ti tes ti taw!

15. Txhua tus uas teev tiam Yehauvas koom siab li cas?

¹⁵ Ua li peb twb hais lawm, Yehauvas lub koom haum loj heev. Feem uas nyob saum ntuj ceeb tsheej muaj qas txhiab qas vam tus tub txib nyob saum ntuj. Feem uas nyob hauv ntiaj teb muaj coob tshaj li cuaj plhom thiab tseem yuav muaj coob ntxiv tuaj. (Xakhaliyas 8:23; Tshwmsim 5:11) Tag nrho txhua tus uas teev tiam Yehauvas, tsis hais cov nyob saum ntuj thiab nyob hauv ntiaj teb, koom siab siv zog tshaj tawm txoj xov zoo txog Vajtswv lub Nceeg Vaj! (Tshwmsim 14:6, 7) Cia peb txhua tus mus koom nrog peb pawg mus tshaj tawm tsis tseg tsis tu. Rau qhov yuav pab txhawb peb mus rau ntau txoj ke, thiab haj yam yuav pab tau peb qhuas peb tus Vajtswv Yehauvas.​—Phau Ntawv Nkauj 111:1.