Xyaum Nplig Lwm Tus Li Vajtswv

1. Vim li cas peb ho yuav tau nplig lwm tus?

PEB txhua tus yeej “raug kev txomnyem nyuaj siab” ces peb yeej yuav xav tau lwm tus nplig thiab txhawb peb lub zog. (1 Petus 1:6) Peb yeej zoo siab thaum muaj lwm tus tuaj nplig peb ces cia peb nco ntsoov maj nrawm nroos mus nplig lwm tus thaum lawv raug kev txom nyem nyuaj siab. (Mathais 7:12) Yehauvas uas yog “Vajtswv tus uas nplig tau txhua yam kev nyuaj siab” twb qhia tseg kom txawj mus “nplig lwm tus thaum lawv ntsib kev txom nyem tsis hais yam twg los xij.” Peb kuj yoog nws es “nplig txhua tus.” (2 Kauleethaus 1:3, 4; 1 Thexalaunikas 4:18) Qhov uas peb mus nplig cov kwv tij nkauj muam no tsis yog peb lam ua kom tag kev tag cai xwb tiam sis vim peb hlub lawv. Nyob rau hauv zaj kawm no yuav tham txog (1) phau Vajlugkub hais li cas txog qhov uas nplig lwm tus, (2) peb yuav nplig lwm tus li cas, thiab (3) peb yuav coj li cas thaum peb vam khom lwm tus los nplig peb.

PHAU VAJLUGKUB HAIS LI CAS TXOG QHOV UAS NPLIG LWM TUS?

2. Nyob hauv phau Vajlugkub, lo lus nplig ntawd yog txhais li cas?

² Nyob hauv phau Vajlugkub, lo lus Kilis “nplig” txhais tau ntau ntau yam nyob ntawm seb koj sob lus yog li cas xwb. Xws li tej zaud kuj yog “txhawb” ib tug twg lub zog hos tej zaud kuj yog “txhib” kom ib tug maj nrawm nroos ua dab tsi. (Loos 12:8) Thaum cov neeg Kilis hnov lo lus nplig, lawv yeej pom kiag “ib tug sawv nreg nroos ntawm ib sab pab ib tug.” Ces cia peb nco ntsoov li no thaum peb hnov lo lus nplig. Txawm koj yuav nplig ib tug twg li cas los xij peem, thaum dhau ntawd, nws yeej yuav kaj siab lawm hov ntau tuaj.

3. Npananpas txawj nplig lwm tus li cas? (Saib daim duab.)

³ Cia peb mus tham txog ib tug uas nyob hauv phau Vajlugkub npe hu ua Yauxej. Nws txawj txhawb thiab nplig sawv daws siab heev, Yexus cov tub txib thiaj li muab nws tis npe hu ua Npananpas uas txhais hais tias “tus uas txhawb zog.” (Tes Hauj Lwm 4:36) Lub npe ntawd phim nws heev, yog li ntawd nyob hauv phau Vajlugkub thiaj tsis hu nws ua Yauxej ntxiv lawm. Tau muaj ntau zaus Npananpas mus pab cov kwv tij nkauj muam thaum lawv muaj chaw ti. Xws li tom qab kiag Xolaus hloov los ua ib tug Khixatias, nws kuj mus rau hauv Yeluxalees thiab xav ntsib cov kwv tij nkauj muam uas nyob rau hauv tiam sis lawv ntshai nws heev vim yav thaud nws tsim txom cov ntseeg kawg li. Tiam sis Npananpas kuj tso siab rau Xolaus ces nws thiaj li coj Xolaus mus cuag cov tub txib.​—Tes Hauj Lwm 9:26-28.

PEB MUS NPLIG LWM TUS

4. Yuav ua li cas peb thiaj nplig tau lwm tus siab? (Loos 1:11, 12)

⁴ Nco ntsoov mus xyuas lawv. Yehauvas siv nws cov tib neeg mus nplig lwm tus siab. Xws li thaum Eliyas ntxhov ntxhov siab, Yehauvas kuj siv ib tug tub txib saum ntuj mus txhawb nws lub zog. (1 Vajntxwv 19:4-7) Tus tub txib Povlauj kuj xam pom tias qhov uas mus xyuas cov kwv tij nkauj muam tim ntsej tim muag mas yeej txhawb siab kawg li. (Nyeem Loos 1:11, 12.) Thaum koj mus xyuas ib tug twg, tsis txhob mus tshwm ib yam li muab hluav taws xwb. (1 Kauleethaus 16:7) Yog koj ho mus xyuas tsis tau no los nco ntsoov hu xov tooj, ntaus ntawv hauv xov tooj los sis sau ib tsab ntawv mus cuag nws. Nco ntsoov cia Yehauvas siv koj mus nplig lwm tus.

5. Vim li cas muaj tej thaum ho tsis yooj yim rau peb mus nplig cov kwv tij nkauj muam siab?

⁵ Thaum lub sim ceeb no yuav kawg zuj zus ces yuav nyuaj zuj zus rau peb mus nplig cov kwv tij nkauj muam tim ntsej tim muag. Cia peb xyaum Aunexifaulas uas tuaj ntawm Efexaus tus yam ntxwv. Thaum Povlauj raug kaw nyob rau hauv Loos, txawm phom sij heev rau Aunexifaulas los nws haj tseem xawb xuav nrhiav Povlauj vim nws xav nplig Povlauj siab. (2 Timautes 1:16-18) Niaj hnub no cov kwv tij nkauj muam nyob rau teb chaws Lav Xias coj ib yam li Aunexifaulas thaum muaj ib tug raug ntes coj mus kom hauv tsev tu plaub. Lawv yeej mus nyob hauv chav ntawd tab txawm phom sij rau lawv txoj sia. Cia peb nco ntsoov mus tshawb nrhiav cov ntseeg uas nyob txheej thaum ub thiab cov uas nyob txheej nim no tej yam ntxwv seb lawv sib pab sib txhawb li cas xwv thiaj pab tau peb muaj lub siab tawv mus nplig cov kwv tij nkauj muam.

6. Thaum peb nplig lwm tus, peb yuav yoog Yehauvas li cas? (Saib daim duab.)

⁶ Nco ntsoov mloog. Thaum Eliyas tus uas cev Vajtswv lus ntshai nyob tsam ho phom sij rau nws txoj sia ces nws qhib siab lug thov Yehauvas. Yehauvas kuj mloog nws tej lus thov tab txawm Yehauvas twb paub txog nws tej kev txhawj xeeb lawm. Txawm Eliyas pheej hais tej lus qub xwb los Yehauvas yeej ua siab ntev mloog. (1 Vajntxwv 19:9, 10, 14) Hos thaum Hanpakus tus uas cev Vajtswv lus qhia nws tej kev txhawj xeeb rau Yehauvas paub los Yehauvas yeej ua tib zoo mloog thiab tsis cem nws rov qab li tab txawm zoo yam li nws hais tej lus tuam mom Yehauvas. (Hanpakus 1:2, 3) Niaj hnub no los Yehauvas haj tseem ua tib zoo mloog peb tab txawm nws twb paub peb tej kev nyuaj siab lawm. Cia peb yoog Yehauvas es ua tib zoo mloog thaum cov kwv tij nkauj muam hais lus, tsis txhob tshuam lawv lus, thaum lawv hais yuam kev los tsis txhob khaws chim, thiab ua siab ntev mloog tab txawm lawv pheej rhaub qub zaub.​—Yakaunpaus 1:19; Tej Lus Qhia 7:9.

7. Yuav ua li cas peb thiaj paub tias ib tug kwv tij nkauj muam xav tau dab tsi?

⁷ Ua zoo saib seb koj pab tau li cas. Peb tsis paub tib neeg lub siab li Yehauvas, yog li ntawd peb yuav tau ua tib zoo mloog tus kwv tij nkauj muam ntawd piav peb thiaj paub pab nws. Tsis txhob xav hais tias koj twb paub tej yam uas nws xav tau lawm. Nco ntsoov tias peb nyias coj txawv nyias ces peb yuav tau lauj me ntsis sij hawm ua tib zoo mloog thiab ua tib zoo nug seb nws xav tau kev pab li cas.​—Pajlug 20:5.

8. Yexus nplig Mathas thiab Maivliag nkawd li cas tom qab Laxalaus tuag lawm? (Saib cov duab.)

⁸ Cia peb tham seb thaum Laxalaus tuag, Yexus ho nplig Mathas thiab Maivliag nkawd li cas. Ob tug nyias quaj ntsuag txawv nyias, yog li ntawd Yexus yuav tau nplig ib tug txawv ntawm ib tug. Yexus txhawb kom Mathas nco ntsoov txog txoj kev vam kev cia siab rau cov tuag thiab nws pab kom Mathas tsav Mathas txoj kev ntseeg. Tiam sis thaum Yexus pom Maivliag quaj quaj, nws ho tsis tham txog qhov uas ib hnub cov tuag yuav rov qab muaj siab dua. Nws cia li nrog Maivliag quaj quaj thiab nug seb muab Laxalaus tso rau qhov twg lawm. (Yauhas 11:20-35) Ob tug yam ntxwv no qhia rau peb tias thaum peb nplig cov uas raug kev quaj ntsuag, peb tsis txhob nplig lawv tib yam nkaus xwb tiam sis nplig ib tug txawv dua ntawm ib tug.

9. Peb siv tau phau Vajlugkub mus nplig lwm tus li cas? (Loos 15:4, 5)

⁹ Siv phau Vajlugkub. Thaum koj nyeem ib nqes Vajlugkub los txhawb ib tug twg, twb yog koj pab kom nws muaj kev vam kev cia siab. (Nyeem Loos 15:4, 5.) Txoj kev cia siab no txhawb kom nws tso siab tias Yehauvas yeej hlub thiab yuav saib xyuas nws. (Yaxayas 40:31) Yuav ua li cas koj thiaj paub siv nqe Vajlugkub twg los txhawb ib tug twg? Ib txhia kuj muab cov nqe Vajlugkub sau cia rau ib qho twg los sis mus saib Tej Nqe Vajlugkub Uas Pab Cov Khixatias ntawm lub ntsiab “Nplig Siab.” Tsis tas li ntawd, thov kom Yehauvas pab koj txawj siv nws Txoj Lus mus txhawb lwm tus. Nws lub hwj huam dawb huv yuav pab kom koj nco tau tej nqe Vajlugkub los nplig lwm tus.​—Yauhas 14:26.

10. Thaum peb xav txhawb ib tug twg lub zog, vim li cas peb yuav tau nco ntsoov hais lus zoo?

¹⁰ Hais lus zoo rau lwm tus. Muaj tej zaug thaum peb mus nplig lwm tus, peb yuav tau pab kom lawv hloov lawv txoj kev xav vim lawv pheej muab xav ntau dhau. Nco ntsoov peb yuav tau mam xav mam hais, thiaj hais tau tej lus uas txhawb tau lawv lub zog. (Pajlug 12:18) Cia peb yoog Yehauvas ib yam li thaum nws pab Eliyas. Nyob rau lub caij ntawd, Eliyas xav hais tias tshuav nws tib leeg thiaj tseem teev tiam Yehauvas xwb, thiab nws xav tias nws ua tsis tau ib tug cev lus zoo rau Yehauvas. Yehauvas tsis hais rau Eliyas tias Eliyas ua qhov twg tsis yog tiam sis nws pab kom Eliyas hloov tej yam uas Eliyas xav tsis yog. (1 Vajntxwv 19:15-18) Koj los kuj ua tau ib yam li no thiab thaum koj tham ib zaj lus qhuab qhia los sis tsa tes teb tom kev sib txoos. Nco ntsoov hais tej lus uas txhawb cov kwv tij nkauj muam lub zog.

11. Cov uas raug kev nyuaj siab xav tau kev pab li cas? (1 Yauhas 3:18)

¹¹ Cev tes pab lwm tus. Cov uas raug kev nyuaj siab tsis yog xav tau peb lo lus nplig xwb tiam sis lawv kuj xav tau peb txoj kev pab thiab. (Nyeem 1 Yauhas 3:18.) Npananpas tso tau ib tug yam ntxwv zoo kawg li rau peb xyaum. Nws kuj muag nws ib daim teb thiab muab cov nyiaj ntawd tuaj rau cov tub txib tuav xwv lawv thiaj pab tau cov kwv tij nkauj muam uas txom nyem. (Tes Hauj Lwm 4:36, 37) Muaj coob leej ntau tus kwv tij nkauj muam niaj hnub nim no coj raws li Npananpas es mus pab cov kwv tij nkauj muam uas xav tau kev pab. Nyob rau teb chaws Phaulees (Poland) muaj ib tug muam npe hu ua Nkanpi-elas (Gabriela) lub tsev raug dej nyab piam ntau heev. Nws hais tias: “Kuv niam thiab kuv txiv peb ntshai heev, tsis pom qab tias yuav kho lub tsev li cas thiaj tau. Muaj ib cov kwv tij uas nyob ntawm lwm lub koom txoos kuj tuaj cev tes pab kho peb lub tsev ib hnub xwb ces twb tiav tag lawm. Qhov lawv ua li no pab kuv pom tias Yehauvas yeej yog tus siv nws cov tib neeg los nplig cov uas raug kev txom nyem tiag.”

12. Yog koj ua siab ntev thev koj tej kev sim siab ces yuav txhawb tau cov kwv tij nkauj muam li cas?

¹² Thev koj tej kev sim siab kam tiag. Povlauj qhia rau cov Thexalaunikas tias thaum nws hnov lawv raug tsim txom los haj tseem tuav rawv lawv txoj kev ntseeg mas txhawb tau nws lub zog kawg li. Nws xam pom hais tias qhov uas nws pab lawv yav tag los lawm tsis tag dawb tag do xwb. (1 Thexalaunikas 3:5-8) Nws thiaj li tuav rawv nws txojkev ntseeg thaum nws raug kev sim siab xwv nws thiaj txhawb tau kom cov kwv tij nkauj muam tuav rawv lawv txoj kev ntseeg tib yam nkaus. (Kaulauxis 2:1, 2) Zoo tib yam nkaus li ntawd, yog koj tuav rawv koj txoj kev ntseeg thaum raug kev sim siab ces kuj yuav txhawb tau cov kwv tij nkauj muam tias Yehauvas yeej yuav pab lawv thiab.

13. Yog tias peb xav txhawb lwm tus, peb yuav tau coj li cas?

¹³ Ua siab ntev. Muaj tej zaud cov kwv tij nkauj muam uas raug kev nyuaj siab kuj yuav tsis kaj siab tom qab peb txhawb lawv lub zog tag. Nyob hauv phau Vajlugkub thiaj li qhia tias kom peb yuav tau “txhawb” lawv tsis tu ncua. (1 Thexalaunikas 5:11) Yog li ntawd, peb yuav tau ua siab ntev mus txhawb lawv lub zog kam tiag. (1 Thexalaunikas 5:14) Ua li nyob tsam peb ho yog tus uas xav tau kev nplig siab, peb ho yuav ua li cas?

THAUM KOJ XAV TAU KEV NPLIG SIAB

14-15. Peb yuav ua li cas yog peb ho raug kev nyuaj siab?

¹⁴ Thov Yehauvas. Thov kom Yehauvas nplig koj rau lub sij hawm uas koj raug kev nyuaj siab. (Phau Ntawv Nkauj 94:19) Phua hlo koj lub siab thiab qhia tej yam uas koj xav tau rau nws paub. (Phau Ntawv Nkauj 62:8) Txawm Yehauvas twb paub tej uas koj xav tau lawm los qhov uas koj thov qhia tau tias koj tso siab rau nws. Yehauvas yeej ib txwm teb tus uas muaj kev ntseeg rau nws. (Malakaus 11:24) Filipis 4:6, 7 txhawb peb li no tias: “Qhia txhua yam uas nej xav tau rau Vajtswv paub. Mas Vajtswv yuav pub nej muaj lub siab tus. Qhov ntawd yuav tsom kwm nej lub siab thiab nej txoj kev xav.”

¹⁵ Thov kev pab. Qhia rau ib tug kwv tij nkauj muam los sis ib tug txwj laus uas koj tso siab tau rau paub txog tej yam uas koj xav tau. Yog koj tsis qhia ces lawv yuav tsis paub hais tias koj xav tau dab tsi. (Pajlug 14:10) Tej zaud nug kom lawv mloog koj tham, kom lawv qhia koj txog ib nqes Vajlugkub los sis ib zaj kawm uas ho nplig tau lawv siab rau koj.

16. Thaum lwm tus txhawb koj lub zog, tej zaud ho muaj li cas tiam sis koj yuav tau nco ntsoov li cas?

¹⁶ Ua siab ntev thiab sib zam txim. Tej zaud thaum cov kwv tij nkauj muam tuaj txhawb koj lub zog, lawv yuav hais tau lus siab lus qis rau koj. Yog muaj li no rau koj ces cia li ua siab ntev. (1 Kauleethaus 13:4, 7) Nyob hauv Yakaunpaus 3:2 hais tias: “Tus uas tsis tau hais lus yuam kev ib zaug li, tus ntawd yog tus uas zoo kawg nkaus.” Nco ntsoov xav qhov zoo ntawm cov kwv tij nkauj muam tias lawv xav pab koj xwb. Lawv yeej xav ua qhov zoo tiam sis tej zaud lawv hais los sis ua tau yuam kev lawm xwb.​—Mathais 26:41.

17. Peb yuav tau kub siab lug ua dab tsi?

¹⁷ Peb txhua tus puav leej xav tau kev nplig vim lub sim ceeb no yuav dua mus zuj zus ces peb lub neej yuav huab yam nyuaj ntxiv thiab Vajtswv cov yeeb ncuab los yuav huab yam tawm tsam peb. Yog li ntawd, cia peb ib leeg kub siab lug txhawb ib leeg lub zog kam tiag.