Tej Tswv Yim Uas Pab Tau Koj Thaum Raug Kev Sim Siab

1-2. Peb yuav ua li cas thaum peb raug kev sim siab xwv peb thiaj thev taus? (Saib daim duab.)

PUAS yog koj tab tom raug kev tsis ncaj ncees, raug tsev neeg tawm tsam los sis raug kev tsim txom vim koj ntseeg Yehauvas? Puas yog koj tab tom muaj mob muaj nkeeg los sis laus es ua tsis taus dab tsi? Puas yog ib tug uas koj hlub tau tag sim neej los sis koj raug ib yam xwm txheej twg? Yehauvas cov tib neeg coob leej kuj raug tib yam li koj es muaj lub neej “txomnyem thiab nyuaj siab xwb.”​—Phau Ntawv Nkauj 90:10.

² Yuav kom peb thev dhau tej kev sim siab uas peb raug, peb yuav tau muab saib ib yam li Yehauvas saib. Vim li cas ho tseem ceeb rau peb ua li no? Yog peb tsis saib li ntawd ces peb yuav tsis pom qab ua zaj twg tsav twg thiaj thev dhau peb tej kev sim siab. Xws li yog peb tsav ib lub tsheb es daim iav pem hauv ntej plooj nplas xwb ces peb yuav tsis pom tej yam nyob pem hauv ntej. Tiam sis yog peb daim iav huv si ces peb yuav pom kaj taws nrig tias mus qhov twg thiaj yog. Nyob rau hauv zaj kawm no peb yuav tham txog (1) seb Yehauvas xav kom peb xav li cas, (2) yuav muaj dab tsi tshwm sim yog peb tsis xav ib yam li Yehauvas xav, thiab (3) tej yam peb ua tau thaum raug kev sim siab.

XAV IB YAM LI YEHAUVAS XAV

3. Peb yuav tau xam pom li cas cheem peb tseem nyob rau lub qab ntuj uas Xatas kav no?

³ Nyob rau lub sim ceeb no ces peb yeej yuav raug kev sim siab. Tos peb raug kev txom nyem los, yeeb vim yog peb nyob rau lub qab ntuj uas Xatas yog tus kav thiab txhua tus tib neeg puav leej yog noob txaug neeg txhaum. Thaum lub sim ceeb no xaus zuj zus lawm, peb lub neej yuav nyuaj zuj zus ntxiv. Yuav muaj xwm txheej xws li av qeeg, dej nyab, thiab hav zoov kub hnyiab. Tsis tas li ntawd, vim muaj tej txhia tib neeg ua phem heev zuj zus ces kuj ua rau coob leej ntau tus raug kev txom nyem. (Mathais 24:8; 2 Timautes 3:13) Yog Yehauvas kho txhua yam teeb meem uas tib neeg raug tam sim no ces zoo yam li Yehauvas tab tom nrog Xatas raus tes kav lub qab ntuj no. Yog tseem muaj Xatas kav lub qab ntuj no ces peb yeej yuav raug ntau yam kev sim siab.​—Tej Lus Qhia 9:12.

4. Muaj dua ib yam uas cov Khixatias raug yog dab tsi?

⁴ Cov uas raws Yexus qab huab yam raug kev nyuaj siab. Xatas iab liam tias tos tib neeg teev tiam Vajtswv los twb yog lawv xav tau yam ub yam no xwb. Yuav kom tib neeg tsis txhob paub qhov tseeb, nws thiaj li tawm tsam Yehauvas cov tib neeg ti ntsa nkaus. (Yauj 1:9-11) Yexus thiaj hais ntau zaus tias nws cov thwj tim yuav raug tsim txom vim lawv txoj kev ntseeg. (Mathais 24:9; Yauhas 16:2) Qhov uas peb nco ntsoov nws cov lus no yuav pab kom peb tuav rawv peb txoj kev ntseeg thaum raug tsim txom. (1 Thexalaunikas 3:3, 4) Yog peb muaj kev hlub rau Yehauvas es thev kam tiag ces peb yuav ua rau Nws zoo siab, tau txoj sia mus ib txhis thiab qhia tias peb tuaj Nws tog.​—Pajlug 27:11.

5. Peb khaws tau dab tsi los ntawm Tej Lus Qhia 7:13, 14? (Saib cov duab.)

⁵ Yehauvas tsis txiav txwv kom tsis txhob muaj kev phem. Yehauvas yeej tsis ua phem thiab nws tsis muab tej kev phem los sim peb. (Yakaunpaus 1:13) Yog li ntawd, vim li cas Vajntxwv Xalaumoos ho sau tias thaum “raug kev txomnyem” yog “tej uas Vajtswv ua”? (Nyeem Tej Lus Qhia 7:13, 14.) Xalaumoos tus nru lus tsis yog hais tias Yehauvas yog tus ua kom muaj tej kev phem ntawd tiam sis nws tsis cuam tshuam. Ua li peb khaws tau Xalaumoos cov lus no li cas? Qhov ib, peb yuav tsum xam pom tias cheem peb tseem nyob rau lub qab ntuj uas Xatas kav ces yeej yuav muaj hnub phem hnub zoo. Thaum hnub uas zoo rau peb ces cia peb nco ntsoov ris Vajtswv txiaj ntsig. Qhov ob, Xalaumoos pab kom peb nco ntsoov tias peb “tsis muaj cuabkav paub hais tias yuav muaj dabtsi tshwmsim” rau hnub ntawd, tsis hais yuav phem los sis zoo. Tsis tas li ntawd, peb yuav tau nco ntsoov tias cov tib neeg ncaj ncees thiab cov tsis ncaj ncees puav leej raug tej teeb meem uas lawv tsis faj txog.

6. Vim li cas Yehauvas ho tsis cuam tshuam thaum peb raug kev sim siab? (Henplais 12:7, 11)

⁶ Thaum peb tab tom raug kev sim siab, Yehauvas xav kom peb tso siab rau nws ua tus pab peb thev es tsis txhob tso siab rau peb tus kheej. Yehauvas yeej saib ntsoov peb thiab nws yeej mob siab heev thaum peb raug kev txom nyem. Txawm nws tsis cuam tshuam los nws yeej pab coj peb txoj hau kev, nws yeej ua qhia tias nws hlub peb, thiab nws kuj ntxiv dag ntxiv zog kom peb thev taus tej uas peb raug. (Phau Ntawv Nkauj 23:4) Thaum peb tab tom raug kev nyuaj siab, kuj ua ib qho kev kawm rau peb kom txawj kho peb lub neej thiab peb txoj kev sib raug zoo nrog Yehauvas. (Nyeem Henplais 12:7, 11.) Xws li Yauj yuav tau xyaum ua ib tug neeg txo hwj chim. Yehauvas tsis yog tus tsub tej kev nyuaj siab rau Yauj tiam sis nws kuj tsis cuam tshuam thiab, ces kuj ua ib qho kev kawm rau Yauj. (Yauj 42:1-6) Peb tsis paub tias yuav muaj xwm dab tsi los raug peb tiam sis yog Yehauvas tsis cuam tshuam es peb thev kam tiag ces peb yeej yuav kov yeej tej uas peb raug ntawd xwb xwb li.​—Loos 8:35-39.

7. Vim li cas koj ho muaj taus kev zoo siab thaum raug tsim txom?

⁷ Thaum peb raug kev tsim txom, peb yeej muaj taus kev zoo siab. Yog tias koj raug tsim txom vim koj rau siab ntseeg Yehauvas, tsis txhob xav hais tias Yehauvas tsis txaus siab rau koj. Yehauvas yeej txaus siab rau koj heev. (Mathais 5:10-12) Yog tias peb nco ntsoov li hais no ces peb yuav muaj kev zoo siab ib yam li cov tub txib thaum ub. (Tes Hauj Lwm 5:40-42) Tsis tas li ntawd, tej zaud peb kuj pab tau tej tug uas tsis tau paub Yehauvas kom los kawm Vajlugkub thiab “qhuas Vajtswv.” (1 Petus 2:12) Cia peb ua tib zoo xav txog Yauxej. Yehauvas yeej pab Yauxej thiab foom koob hmoov rau nws thaum nws nyob hauv tsev loj cuj, tsis yog tom qab nws dim los lawm xwb. Zoo ib yam li ntawd, Yehauvas kuj pab tau peb rau lub sij hawm uas peb tab tom raug kev sim siab thiab.​—Chivkeeb 39:3, 23.

8. Yuav ua li cas peb thiaj li thev taus tej kev sim siab uas peb raug?

⁸ Peb tej kev sim siab yeej yuav muaj hnub xaus xwb. Yauj tej kev sim siab yeej txawj xaus ces peb li los yeej txawj tag thiab. Tsis tas li ntawd, Yehauvas “foom koob hmoov rau Yauj lub neej zoo heev dua thaum chiv thawj.” (Yauj 42:12) Zoo ib yam li ntawd, txawm peb lub neej nyuaj tam sim no los lub neej uas Yehauvas cog tseg hauv lub qab ntuj tshiab yuav zoo heev. Qhov uas peb nco ntsoov li no yuav pab kom peb thev tiag mus txog thaum kawg!​—Mathais 24:13.

TXHOB XAV YUAM KEV

9. Peb yuav tau tseg tsis txhob xav li cas thiab yog vim li cas?

⁹ Thaum peb raug kev sim siab, yog peb ntseeg tej yam uas tsis muaj tseeb ces peb kuj huab yam tsub kev nyuaj siab ntxiv rau peb. Xws li peb yuav xav hais tias ntshe tej uas peb raug ntawd yog Yehauvas ua rau peb. Zoo ib yam li Yauj, tau ib ntus ntev loo nws kuj xav hais tias tej uas nws raug ntawd yog Yehauvas ua ces nws pheej hais tias nws “ua ncaj, tiamsis Vajtswv ua tsis ncaj.” (Yauj 32:2) Hos Na-aumis liam hais tias Yehauvas tsub tej kev txom nyem rau nws. (Luv 1:13, 20, 21) Yog hais tias Yauj thiab Na-aumis pheej xav li no mus li ces kuj yuav rhuav tau nkawd txoj kev sib raug zoo nrog Yehauvas. (Pajlug 19:3) Txawm li ntawd los Yehauvas kuj pab kom nkawd nkag siab tias tej teeb meem ntawd tsis yog nws txhob txwm ua rau nkawd. Vim nkawd tuav rawv nkawd txoj kev ntseeg, Yehauvas kuj foom koob hmoov rau nkawd.

10. Thaum peb raug kev nyuaj siab, tej thaud peb yuav xav li cas?

¹⁰ Txawm peb paub hais tias Yehauvas tsis yog tus tsub tej kev sim siab rau peb los tej thaud peb puas xav tias Yehauvas tsis nco qab peb? Yog peb pheej xav yuam kev li no ces yuav txo peb lub zog heev. (Pajlug 24:10) Vaj Ntxwv Daviv thiab Hanpakus nkawd kuj raug kev sim siab mas qee lub sij hawm nkawd kuj xav tias Yehauvas puas mloog nkawd tej lus quaj thov. (Phau Ntawv Nkauj 10:1; Hanpakus 1:2) Txawm nkawd ho tau xav li ntawd lawm los nkawd haj tseem thov Yehauvas tsis tseg tsis tu. Yehauvas kuj teb nkawd tej lus thov thiab pab nkawd ntshuj ntshis. Peb los Yehauvas kuj yuav pab tib yam thiab.​—Phau Ntawv Nkauj 10:17.

11. Yuav muaj li cas xwb yog peb tsis saib peb tej kev sim siab li Yehauvas saib?

¹¹ Yog peb tsis ua zoo xav ces thaum peb raug kev sim siab, tej zaum yuav ua rau peb poob siab thiab peb yuav xav hais tias ua li cas tej no haj tseem los raug peb thiab. (1 Petus 4:12) Zoo ib yam li Yexus cov thwj tim, thaum Yexus qhia rau lawv tias nws yuav raug tsim txom thiab tua tuag mas ua rau lawv tsis nkag siab thiab lawv tsis ntseeg tias yuav muaj tej ntawd los raug nws. (Lukas 18:33, 34) Xws li Petus kuj xav tias Vajtswv yeej tsis cia tej ntawd los raug Yexus. Yexus paub hais tias cov lus no tsuas yog hais los cuam tshuam kom nws tsis txhob ua Yehauvas tes hauj lwm xwb ces nws thiaj li ntuas Petus. (Malakaus 8:31-33) Txawm tom qab Yexus tuag lawm los nws cov thwj tim haj tseem tsis tau nkag siab vim li cas Yexus ho tuag. Yexus kuj tsis tau tso lawv tseg. Tom qab nws sawv rov qab los nws “txhais Vajtswv Txoj Lus” kom lawv nkag siab tias vim li cas nws thiaj tuag txom nyem ntsuav. (Lukas 24:25-27, 32, 44-48) Qhov uas lawv muab Yexus tej lus coj los ua zoo xav pab tau kom lawv thev taus tej kev tawm tsam uas lawv tseem yuav raug. Cia peb mus nyeem tej yam txog kev sim siab hauv phau Vajlugkub xwv thiaj npaj peb rau tej kev sim siab uas tseem yuav los raug peb yav pem suab.

12. Yog peb tsis ua zoo xav ces yuav ua rau peb muaj txoj kev xav twg?

¹² Yog peb tsis ua zoo xav ib yam li Yehauvas xav txog tej yam peb raug ces peb yuav muab qhov teeb meem ntawd ua loj tshaj li muaj thiab. Yexus qhia txog ib zaj lus piv txwv txog cov tub zog uas xav tias lawv tus tswv them nqi zog tsis ncaj rau lawv. Tiam sis tus tswv hais rau ib tug tias: “Kuv tsis tau ua txhaum koj.” (Mathais 20:10-13) Qhov uas cov tub zog yws tus tswv teb tsis yog tim tus tswv teb ua tsis ncaj tiam sis yog tim lawv xav ntau tshaj li tsim nyog. Niaj hnub nim no los ib txhia kwv tij nkauj muam kuj xav thooj li ntawd thiab. Xws li lawv xav tias tsis ncaj yog lawv tsis tau ua ib teg hauj lwm uas tsim nyog lawv tau ua rau Yehauvas. Cia peb mam mus ua tib zoo kawm kom peb txawj xav ib yam li Yehauvas xav.

TEJ YAM PEB UA TAU THAUM RAUG KEV SIM SIAB

13. Thaum kev nyuaj siab los raug koj kiag, tej zaud koj kuj yuav xav li cas?

¹³ Tej zaum koj kuj paub cov nqe Vajlugkub twg qhia txog kev sim siab thiab tej zaud koj twb tau muab coj mus txhawb lwm tus lub zog. Tiam sis thaum tej kev nyuaj siab ho los raug koj kiag lawm, koj kuj xav tsis tawm tias ua qhov twg thiaj yog. Xws li tej zaud koj yuav xav tias Yehauvas rau txim rau koj los sis nws tsis mloog koj tej lus thov lawm. Yog koj pib xav li no yuav ua li cas thiaj pab tau koj?

14. Koj thov tau dab tsi xwb thaum koj raug kev txom nyem nyuaj siab? (Filipis 4:13)

¹⁴ Thov Yehauvas pab. Qhia rau Yehauvas tias koj raug li cas rau li cas thiab qhia hais tias koj ho xav li cas rau nws paub. Koj kuj thov tau tias koj xav kom Yehauvas pab koj rau seem twg. Ntxiv ntawd, koj kuj thov kom Yehauvas muab nws lub hwj huam dawb huv los txhawb koj thiab tsav tswv yim rau koj kom thev taus tej uas koj raug. Nco ntsoov tias qhov uas Yehauvas teb koj yuav txawv ntawm qhov uas koj xav tau. (Efexaus 3:20) Tej zaud nws kuj yuav siv cov tub txib saum ntuj los sis cov kwv tij nkauj muam los mus pab koj. (Phau Ntawv Nkauj 34:7) Yog li ntawd, cia li txaus siab rau tej yam uas Yehauvas ua los pab koj. Nws yeej txaus siab hlo muab lub hwj huam dawb huv los pab koj thev kom dhau tej yam koj raug.​—Nyeem Filipis 4:13.

15. Koj yuav tau ua dab tsi rau lub sij hawm uas muaj kev nyuaj siab? (Saib daim duab.)

¹⁵ Ua tej yam los tsav koj txoj kev ntseeg. Thaum koj raug kev nyuaj siab, tej zaum koj yuav ua tsis tau npaum li koj ib txwm ua los lawm. Lub sij hawm no koj yuav tau nyeem thiab mloog tej yam uas pab tau kom koj xav txog Yehauvas thiab tej uas nws hais. (Phau Ntawv Nkauj 119:143) Kav tsij nyeem phau Vajlugkub kam tiag, tshawb nrhiav cov lus koj nyeem, thiab zaum tsaws xav txog tej lus ntawd. Tsis tas li ntawd, mus tshaj tawm txoj xov zoo npaum li koj mus tau, mus kev sib txoos thiab tsa tes teb. Tswj koj lub siab tsis txhob nyob ib leeg tiam sis koj yuav tau nrog cov kwv tij nkauj muam ua ke.​—Pajlug 18:1.

16. Thaum muaj kev nyuaj siab los raug koj, tej zaud koj lub siab yuav ua xyem xyav li cas thiab koj yuav kho li cas? (2 Kauleethaus 10:4, 5)

¹⁶ Kho koj txoj kev xav. Thaum koj muaj kev sim siab, koj yuav tau rhuav tej “yam cog ruaj cog khov” hauv koj lub siab, xws li tej yam uas koj xav ntau ntau txog koj tus kheej los sis Yehauvas. (Nyeem 2 Kauleethaus 10:4, 5.) Yog tias koj pheej ua xyem xyav ces koj yuav tau mus tshawb nrhiav hauv phau Vajlugkub thiab tej ntaub ntawv uas Yehauvas lub koom haum luam tawm. Muab ua piv txwv tias koj lub siab pheej niaj hnub nkaug koj tias Yehauvas puas txaus siab rau koj. Tsis txhob ua siab deb, kav tsij mus kawm txog tus tub txib Povlauj lub neej. Thaum nws mus tshaj tawm txoj xov zoo, nws raug ntau yam kev nyuaj siab. Tej uas nws raug ntawd qhia tau rau nws tus kheej tias nws yog Khetos ib tug tub txib. (2 Kauleethaus 11:23-27) Hos yog koj pheej ua xyem xyav tias Yehauvas puas zam txim rau tej kev txhaum koj ua tag los lawm ces koj yuav tau mus sau ib co nqe Vajlugkub tseg cia uas qhia tias Yehauvas yeej zam tau tus neeg ua txhaum. (Yaxayas 43:25) Tom qab ntawd muab nyeem thiab zaum tsaws xav txog cov nqe Vajlugkub ntawd. (Phau Ntawv Nkauj 119:97) Hos yog koj ho raug ib qho xwm txheej ua rau koj xav tias Vajtswv puas tiv thaiv nws cov tib neeg ces koj yuav tau mus tshawb nrhiav seb vim li cas Vajtswv ho cia muaj kev txom nyem thiab nws ho tiv thaiv peb txoj kev sib raug zoo nrog nws li cas. (Phau Ntawv Nkauj 91:9-12) Ntxiv ntawd, mus nyeem tej zaj uas sau txog cov kwv tij nkauj muam uas raug xwm txheej tiam sis lawv haj tseem kub siab lug teev tiam Yehauvas.a

17. Peb yuav ua li cas thaum muaj kev nyuaj siab los raug peb?

¹⁷ Niaj hnub no yog koj tsis raug kev sim siab dab tsi, nco ntsoov ua Yehauvas tsaug thiab lauj sij hawm xav txog tej yam zoo uas nws tau ua. (Tej Lus Qhia 7:14) Tiam sis thaum muaj kev nyuaj siab dab tsi los raug koj, nco ntsoov xav qhov zoo thiab tso siab plhuav rau Yehauvas. Yog koj ua li no Yehauvas yuav “qhib kev rau [koj] kom [koj] thiaj thev taus.” (1 Kauleethaus 10:13) Ua li thaum peb cov kwv tij nkauj muam ho raug kev nyuaj siab, peb yuav pab lawv li cas? Nyob rau zaj txuas ntxiv tom ntej mam li tham txog qhov no.