Pab Lwm Tus Los Paub Yehauvas

1. Koj xav li cas xwb thaum koj pom tus kawm Vajlugkub txoj kev ntseeg loj hlob?

KOJ xav li cas xwb thaum tus uas koj qhia Vajlugkub rau tuaj koom kev sib txoos thawj zaug? Thaum nws pib tsa tes teb? Thaum nws mus tshaj tawm? Thiab thaum nws txiav txim siab ua kev cai raus dej? Yeej ua rau koj zoo siab kawg li! Yeej tsim nyog peb qhuas Yehauvas, rau qhov nws yog tus pab tus kawm Vajlugkub kom nws txoj kev ntseeg loj hlob.​—1 Kauleethaus 3:5-9; 3 Yauhas 3, 4.

2. Qhov uas Yehauvas ntshaw tshaj rau cov kawm Vajlugkub yog dab tsi? (1 Timautes 2:3, 4)

² Qhov uas Yehauvas ntshaw tshaj yog kom “txhua hom neeg tau kev cawm dim thiab kom lawv los paub qhov tseeb tiag tiag.” (Nyeem 1 Timautes 2:3, 4.) Yehauvas xav kom tib neeg los paub nws, los paub txog tej yam zoo uas nws tau ua yav tas los, thiab tej uas nws tseem yuav ua rau yav pem suab. (Yelemis 9:24) Yuav kom lawv paub lawv yuav tau los kawm qhov tseeb. Kawm paub “qhov tseeb” yog li cas? Tsis yog hais txog los kawm paub txog Vajtswv xwb. Muaj ib tug tshawb fawb txog phau Vajlugkub qhia li no tias, thaum ib tug kawm paub qhov tseeb lawm, nws yuav “ua npaum li nws ua tau los nrog Vajtswv sib raug zoo.” Thiab qhov uas nws los paub Vajtswv, nws yuav hloov nws txoj kev xav thiab nws txoj kev coj kom ua haum Vajtswv siab. Thaum nws ua lub neej haum Vajtswv siab lawd, nws yuav tau “txoj sia ntev dhawv mus ib txhis.”​—Yauhas 17:3.

3. Peb yuav tham txog dab tsi hauv zaj no?

³ Yehauvas pub lub cib fim rau peb mus pab lwm tus los nrog nws sib raug zoo. Nyob hauv zaj kawm no, peb yuav mus tham txog cov lus nug no: Vim li cas cov kawm Vajlugkub yuav tsum paub Yehauvas kom zoo? Peb yuav qhia li cas lawv thiaj paub tias Yehauvas zoo li cas tiag? Thiab peb yuav pab lawv li cas kom lawv ua tau lub neej raws li qhov uas lawv kawm paub txog Yehauvas?

PAB TUS KAWM KOM PAUB YEHAUVAS ZOO

4. Raws li Malakaus 12:30, peb lub hom phiaj yog pab tus kawm kom nws ua li cas?

⁴ Yexus qhia tias txoj kev cai uas loj dua ntais yog kom peb yuav tsum hlub Yehauvas kawg siab kawg ntsws, kawg peb txoj sia, thiab kawg laj lim tswv yim. (Nyeem Malakaus 12:30.) Tus kawm Vajlugkub yuav tsum sib raug zoo nrog Yehauvas nws thiaj yuav hlub Yehauvas. Thiab thaum nws ua kev cai raus dej los twb vim yog nws hlub Yehauvas. Tsis yog tias nws xav ua peb tus phooj ywg los sis nws tsuas nyiam tej yam uas qhia nyob hauv phau Vajlugkub xwb. Yog li peb lub hom phiaj yog pab tus kawm kom paub thiab hlub Yehauvas.

5. Yog koj tus kawm Vajlugkub hlub Yehauvas lawm, nws yuav ua li cas?

⁵ Thaum tus kawm Vajlugkub los paub thiab hlub Yehauvas lawm, nws yeej yuav mloog Yehauvas lus. Yexus hais li no: “Yuav kom lub qab ntuj no paub tias kuv hlub Leej Txiv, kuv yuav ua txhua yam raws nraim li Leej Txiv tau sam hwm tseg rau kuv.” (Yauhas 14:31) Zoo tib yam li ntawd, yog tus kawm Vajlugkub hlub Yehauvas tiag tiag, ces nws yeej yuav mloog Yehauvas lus thiab npuab siab rawv rau nws.​—1 Yauhas 5:3.

6. Piav seb qhov uas tus kawm Vajlugkub paub Yehauvas zoo, yuav pab tau nws li cas?

⁶ Cov kawm Vajlugkub uas nrog Yehauvas sib raug zoo yuav txawj txiav txim siab zoo dua. Cia peb muab piv rau ib tug uas tsav dav hlau. Tsis yog nws kawm kom paub txoj kev cai tsav dav hlau xwb ces nws txawj tsav lawm. Nws yeej yuav tau xyaum tsav lub dav hlau ntau zaus nws thiaj txawj tsav. Thaum nws tsav es muaj huab cua zoo li cas los nws paub txiav txim siab tias yuav tsav lub dav hlau li cas rau li cas. Tib yam li ntawd, tus kawm Vajlugkub tsis yog paub Yehauvas los ntawm tej uas nws kawm xwb, tiam sis thaum nws txiav txim siab ua raws li Yehauvas tej lus hais thiab nws pom tias pab tau nws, ces nws haj yam yuav paub Yehauvas zoo dua tuaj. Thaum nws paub Yehauvas zoo dua tuaj thiab pom tias Yehauvas yeej pab nws tiag, ces txawm nws yuav ntsib tej teeb meem zoo li cas los nws yuav txawj txiav txim siab zoo.

7. Dab tsi pab tau Yauxej txawj txiav txim siab zoo?

⁷ Vim Yauxej paub Yehauvas lub siab nyiam, thaum Pautifas tus poj niam ntxias Yauxej deev, los nws thiaj tsis kam ua txhaum. Txij thaum Yauxej yau nws yeej tau hnov lwm tus piav txog Adas, Evas, Anplahas, thiab Xalas lawv lub neej. (Chivkeeb 2:24; 20:3, 6) Yauxej kawm tau los ntawm lawv tias Yehauvas xav li cas txog kev pw ua niam txiv. Yauxej paub Yehauvas zoo heev nws thiaj tsis kam ua raws li Pautifas tus poj niam yuam nws. Yauxej thiaj hais li no rau nws: “Kuv yuav ua li cas muaj pluaj siab deev koj thiab ua txhaum rau Vajtswv?” (Chivkeeb 39:7-9) Yauxej paub tias yam twg zoo thiab yam twg phem rau Yehauvas. Tsis tas li ntawd, nws to taub tias dab tsi yuav ua rau Vajtswv tu siab. Yog li nws thiaj txawj txiav txim siab zoo. Yog peb pab cov kawm Vajlugkub kom paub Yehauvas zoo, thiab paub tias Yehauvas nyiam li cas ces yuav pab tau lawv txawj txiav txim siab kom haum nws siab.

QHIA KOM NWS PAUB TIAS YEHAUVAS ZOO LI CAS

8. Peb yuav siv phau Nyob Kaj Siab Lug Mus Ib Txhis! los qhia li cas rau tus kawm kom nws thiaj paub tias Yehauvas xav li cas?

⁸ Yuav ua li cas peb thiaj pab tau tus kawm Vajlugkub paub Yehauvas? Yehauvas pab Yauj kom Yauj paub Yehauvas zoo dua, nws thiaj nug Yauj ntau tshaj 50 lo lus nug! (Yauj 38:1–41:34) Peb kuj yuav tau ua lus nug rau tus kawm thiab. Cov lus nug nyob hauv phau Nyob Kaj Siab Lug Mus Ib Txhis! yog sau los pab tus kawm Vajlugkub kom paub Yehauvas zoo li cas. (Saib lub ntsiab “Cov Lus Nug Uas Pab Peb Txawj Qhia.”) Siv cov lus nug no los pab tus kawm kom paub Yehauvas.

9-10. (1) Dab tsi yuav pab cov kawm kom lawv haj yam paub Yehauvas zoo thaum nyeem Vajlugkub? (Yakaunpaus 5:11) (2) Piav seb thaum tus kawm Vajlugkub nyeem txog Daniyees lub neej, nws yuav tau xav li cas nws thiaj paub tias yam twg haum Yehauvas siab thiab yam twg tsis haum?

⁹ Thaum peb pib qhia Vajlugkub rau ib tug, peb yuav tau txhawb kom nws nyeem phau Vajlugkub txhua txhua hnub.a Peb yuav pab li cas nws thiaj rau siab nyeem phau Vajlugkub nws thiaj paub Yehauvas zoo? Peb kuj qhia rau nws tias txhua zaus nws nyeem ib zaj hauv phau Vajlugkub, kom nws ua zoo xav seb yog vim li cas Yehauvas thiaj muab sau rau hauv nws Txoj Lus, thiab zaj ntawd qhia li cas txog Yehauvas tej yam ntxwv. Thaum tus tub txib Yakaunpaus kawm txog Yauj lub neej, nws kawm tau tias Yauj muaj lub siab nyiaj taus. Tsis tas li ntawd, nws kuj kawm tau Yehauvas cov yam ntxwv xws li, Yehauvas muaj lub siab hlub thiab hmov tshua.​—Nyeem Yakaunpaus 5:11.

¹⁰ Peb xav kom thaum tus kawm nyeem txog ib zaj nyob hauv phau Vajlugkub, nws pom tias yam twg haum Yehauvas siab thiab yam twg tsis haum. Muab piv tias nws siv daim “Cia Li Pib Nyeem Phau Vajlugkub” nyob hauv phau Nyob Kaj Siab Lug Mus Ib Txhis! Nws qhia rau koj tias nws yuav nyeem txog Daniyees nyob hauv lub qhov tsov ntxhuav. Koj kuj pab kom nws ua tib zoo xav li no: ‘Vim li cas Yehauvas thiaj cawm Daniyees? Zaj no qhia tias dab tsi ua rau Yehauvas zoo siab? Muaj li cas rau cov txiv neej uas iab liam Daniyees? Zaj no qhia tias dab tsi thiaj tsis haum Yehauvas siab?’ (Daniyees 6:4, 5, 10, 22, 24) Thiab koj kuj pab kom nws ua zoo xav seb nws kawm tau dab tsi ntxiv txog Yehauvas cov yam ntxwv.​—Daniyees 6:26, 27.

11. Peb yuav pab tus kawm li cas kom nws to taub tias Yehauvas yog tus qhia nws?

¹¹ Yeej ua rau peb zoo siab thaum tus kawm Vajlugkub ris txiaj ntsig thiab pom tias tej uas nws kawm pab tau nws lub neej. Tiam sis tseem ceeb peb yuav tau pab kom nws to taub tias, twb yog Yehauvas tus Xib Hwb uas txawj qhia tshaj plaws yog tus uas pab nws. (Yaxayas 30:20, 21) Tej zaum tus kawm yuav ua peb tsaug thiab qhuas tias peb txawj qhia Vajlugkub rau nws. Txawm tej lus qhuas ntawd tsis txhaum los, peb yuav tau qhia rau nws tias tus uas tsim nyog ris txiaj ntsig tshaj plaws thiab qhuas yog Yehauvas.

PAB NWS UA LUB NEEJ RAWS LI TEJ UAS NWS KAWM

12-13. Qhov uas tus kawm paub Yehauvas zoo pab tau nws li cas thaum nws nyeem txog tej zaj hauv phau Vajlugkub uas tsis yooj yim to taub? (Saib daim duab.)

¹² Yuav kom pab tau tus kawm, nws yuav tau muab tej uas nws kawm thiab paub txog Yehauvas coj los siv hauv nws lub neej. Peb yuav pab nws li cas? Ib txoj ke uas yuav pab tau nws, yog thaum nws nyeem ib zaj uas tsis yooj yim to taub, pab kom nws xav seb Yehauvas yog ib tug Vajtswv zoo li cas. Piv txwv tias nws nyeem txog tej zaj uas yav thaum ub Yehauvas txiav txim rau tib neeg, es nws xav tias vim li cas Yehauvas muab tej txhia rhuav tshem tiam sis ho tseg tej txhia. Peb yuav pab nws li cas nws thiaj to taub?

¹³ Peb kuj txhawb kom nws ua zoo xav li no: ‘Txoj sia tseem ceeb npaum li cas rau Yehauvas? (2 Petus 3:9) Txawm peb yog neeg txhaum los, Yehauvas twb tau ua ntau npaum li cas lawm kom thiaj cawm tau peb dim? (Efexaus 2:4, 5) Yehauvas puas lam rau txim rau tus ua twb tsis tsim nyog raug txim? Los sis puas yog nws tsis rau txim rau tus uas twb ua txhaum?’ (Khiav dim 34:6, 7) Tej zaum peb yuav tau qhia rau tus kawm tias, tej zaj hauv phau Vajlugkub tsis qhia ntxaws ntxaws kom peb to taub yog vim li cas Yehauvas thiaj li txiav txim siab ua tej yam. Txawm li los peb tsis tas paub txhua yam. Yog peb paub Vajtswv zoo lawm, peb tso siab plhuav tias nws yeej ib txwm ua qhov yog.

14. Koj yuav pab tus kawm li cas yog nws muaj kev tsis sib haum xeeb nrog ib tug hauv lub koom txoos?

¹⁴ Cia peb tham txog ib txoj ke ntxiv uas pab tau tus kawm kom nws coj tau raws li qhov uas nws paub txog Yehauvas. Muab xav tias tus kawm tuaj koom tej kev sib txoos, tiam sis nws tsis haum xeeb nrog ib tug nyob hauv lub koom txoos. Tej zaum tus kwv tij los sis tus nkauj muam tau hais lus siab nws. Thaum muaj li no, pab kom nws pom tias Yehauvas xav li cas txog cov kwv tij nkauj muam. Thiab pab kom nws ua zoo xav tias, Yehauvas twb tau ua npaum li cas los qhia rau cov kwv tij nkauj muam tias nws hlub lawv. (Yauhas 3:16) Qhov uas peb nyob sib haum xeeb tseem ceeb heev rau Yehauvas. (Phau Ntawv Nkauj 133:1) Qhia rau nws tias yog peb ua npaum li peb ua tau kom muaj kev koom siab, yuav ua rau Yehauvas xav li cas? (2 Kauleethaus 13:11) Pab nws pom tias Yehauvas zoo siab npaum li cas diam, yog peb xav ntsoov txog qhov zoo ntawm lwm tus.

15-16. (1) Thaum muaj ib txoj kev txiav txim siab tseem ceeb, peb yuav pab tus kawm kom xyaum Yexus tus qauv li cas? (Yauhas 8:29) (2) Malis-anam pab tus uas nws qhia Vajlugkub rau txawj txiav txim siab li cas? (Saib daim duab.)

¹⁵ Lwm txoj ke ntxiv uas pab tau tus kawm yog thaum nws muaj ib txoj kev txiav txim siab, nws yuav muab tej uas nws kawm paub txog Yehauvas los pab nws li cas. Peb kuj siv tau zaj kawm 35 nyob hauv phau Nyob Kaj Siab Lug Mus Ib Txhis! uas muaj lub ntsiab hu ua “Yuav Ua Li Cas Peb Thiaj Li Paub Txiav Txim Siab Kom Zoo?” los qhia rau nws. Ntxiv ntawd yog nws twb thov Vajtswv thiab tshawb nrhiav tej ntaub ntawv kawg siab kawg ntsws, los nws tseem txiav txim siab tsis tau yuav ua li cas? Tej zaum nws tsis paub hais tias cov nqe Vajlugkub uas nws nyeem, nqe twg thiaj yuav pab tau nws. Koj kuj qhia kom nws xyaum Yexus tus qauv, seb thaum Yexus txiav txim siab nws ua li cas? Yexus hais tias: “Kuv ua txhua yam raws li [kuv Leej Txiv] pom zoo.” (Nyeem Yauhas 8:29.) Txhawb kom nws rov nug nws tus kheej li no, ‘Raws li kuv tau tshawb nrhiav thiab paub txog Yehauvas, txoj kev txiav txim siab twg yuav haum nws siab dua?’ Pab nws to taub tias txoj kev txiav txim siab uas haum Yehauvas siab, yeej yog txoj zoo.

¹⁶ Muaj ib tug poj niam uas kawm Vajlugkub nyob teb chaws Tshiv Lim (Chile), nws muaj ib txoj kev txiav txim siab tseem ceeb uas nws yuav tau ua tib zoo xav. Nws tsev neeg pheej yuam tas zog kom nws cia li txais ua txoj hauj lwm uas them nyiaj ntau, tiam sis nws yuav mus tsis tau tej kev sib txoos cuag ncua. Tus muam Malis-anam (Marianne) uas yog tus qhia Vajlugkub rau nws hais li no: “Kuv txhawb nws kom nws ua zoo xav seb qhov uas nws txiav txim siab ntawd, yuav ua rau Yehauvas xav li cas, seb yuav ua rau Yehauvas zoo siab los sis tu siab? Thiab kuv kuj txhawb kom nws thov Yehauvas tsi ntsees rau qhov uas nws txiav txim siab, thiab saib seb Yehauvas yuav teb nws li cas. Nws tsis txais ua txoj hauj lwm ntawd, nws kuj nrhiav tau lwm txoj hauj lwm ua, thiab nws tuaj koom tau tej kev sib txoos.” Tus muam tsis qhia kom nws yuav tsum txiav txim siab li cas, tiam sis nws pab kom tus kawm ua tib zoo xav seb Yehauvas xav li cas. Qhov uas tus muam txhawb nws li ntawd haj yam pab tau nws nrog Yehauvas sib raug zoo. Malis-anam hais li no ntxiv: “Tus uas kuv qhia Vajlugkub rau pom tias Yehauvas yeej saib xyuas peb yog peb muab nws tso ua ntej.”

YEHAUVAS FOOM KOOB HMOOV RAU COV UAS PAUB NWS ZOO

17. Peb haj yam xav kom cov kawm Vajlugkub paub leej twg zoo tshaj?

¹⁷ Cov kawm Vajlugkub yeej kawm tau ntau yam tseem ceeb. Lawv yeej xub kawm txog tias ua li cas rau cov tuag lawm, ua cas muaj tus nqi txhiv, thiab kawm txog Vajtswv lub Nceeg Vaj. Ntxiv ntawd, lawv kuj kawm tias lub koom haum dhia dej num li cas, muaj li cas tom kev sib txoos, cov txwj laus tes hauj lwm yog dab tsi, thiab Pab Uas Ntaus Thawj tes hauj lwm yog li cas. Peb yeej xav kom lawv paub ntau tshaj no ntxiv thiab. Peb haj yam xav kom lawv paub Yehauvas zoo tshaj plaws.

18. Cov uas los paub Yehauvas yuav txais tej koob hmoov twg?

¹⁸ Yog ib lub cib fim zoo uas peb tau qhia Vajlugkub rau lwm tus kom lawv los paub txog Yehauvas! Txawm tam sim no los, cov uas los kawm thiab teev tiam Yehauvas yeej tau txais koob hmoov thiab muaj kev zoo siab. (Phau Ntawv Nkauj 25:12-15) Yav tom hauv ntej, Yehauvas tus uas “pub tswvyim rau peb kom peb paub tus uas yog Vajtswv tiag,” yuav pub txoj sia ntev dhawv mus ib txhis rau peb. (1 Yauhas 5:20) Tiam sis tsis tag li ntawd xwb. Phau Vajlugkub qhia rau peb tias, cov uas rau siab ntso los kawm kom paub thiab hlub Yehauvas “mas [Yehauvas] thiaj paub tus ntawd xwb.” (1 Kauleethaus 8:3) Muaj tseeb tiag, Vajtswv tus uas muaj hwj chim loj kawg nkaus yeej pom thiab lees yuav peb ua nws cov phooj ywg. Yeej yog ib txoj koob hmoov zoo kawg nkaus uas peb tau los paub tus tseem Vajtswv!