Me Nyuam Yog “Qub Txeeg Qub Teg” Los Ntawm Yehauvas

THAUM koj hnov lo lus “qub txeeg qub teg” koj xav txog dab tsi? Tej zaum koj yuav xav txog nyiaj txiag, ib thaj av los sis ib lub tsev uas yog koj tsev neeg li teej li tug. Txawm qhov qub txeeg qub teg ntawd yuav yog dab tsi los, yeej tseem ceeb rau koj, thiab koj yeej xav ua tib zoo ceev kom zoo.

Phau Vajlugkub hais tias, me nyuam “yog qub txeeg qub teg” los ntawm Yehauvas. (Ntawv Nkauj 127:3) Yog li cov niam thiab cov txiv uas hlub Yehauvas yuav tau pom tias, lawv cov me nyuam yog tej koob hmoov uas los ntawm Leej Txiv tus uas nyob saum ntuj. Niam thiab txiv yuav tau ua tib zoo tu tej me nyuam kom lawv noj qab nyob zoo, kom lawv nyob nyab xeeb, thiab muaj ib txoj kev sib raug zoo nrog Vajtswv Yehauvas.

Tu siab kawg li tias niaj hnub nim no, muaj tej txhia niam txiv tsis xam pom tias lawv tej me nyuam yog qub txeeg qub teg los ntawm Vajtswv. (Yaxayas 49:15; 2 Timautes 3:1-3) Hos lwm cov niam txiv yeej xav ua npaum li lawv ua tau los tu lawv cov me nyuam, tiam sis muaj ntau yam kev nyuaj siab ntxhov plawv. Tej yam twg ua nyuaj rau lawv tu lawv cov me nyuam? Yehauvas xav kom leej niam thiab leej txiv ua dab tsi? Thiab cov niam txiv uas hlub Yehauvas, yuav tau ua li cas thiaj tu lawv cov me nyuam kom loj hlob los tau lub neej zoo?

TEJ YAM UAS NYUAJ

Tej uas tsev neeg thiab lwm tus hais kom ua. Nyob rau tej lub teb chaws, cov niam txiv uas muaj coob tus me nyuam, luag lwm tus yeej saib taus dua. Yog li tej zaum tsev neeg los sis lwm leej lwm tus, xav kom ib nkawm niam txiv yug me nyuam kom coob tshaj li qhov uas nkawd xav tau.
Txhawj txog yav tom ntej. Nyob rau tej lub teb chaws vim tsis muaj txaus noj txaus haus, muaj kab mob kev nkeeg, tsis muaj kws kho mob thiab tsev kho mob ntau, tej me nyuam mos liab thiaj tsis ua neej ntev. Ces lawv thiaj yug me nyuam kom coob coob, kom ib txhia tsis nyob lawm los, ib txhia thiaj ua neej nyob mus txog tiav niam tiav txiv. Nyob rau tej lub teb chaws, tej nom tswv tsis muaj kev pab rau cov laus. Yog li, cov niam txiv thiaj yug me nyuam kom coob coob, kom yav laus thiaj muaj tej me nyuam los tu lawv.
Kev npaj rau lub neej. Nyob rau tej lub teb chaws, nyuaj rau cov txij nkawm kom txhob yug me nyuam coob coob. Vim tias tsis muaj tej khoom los sis tej tshuaj los pab tiv thaiv kom txhob muaj me nyuam. Hos ib txhia ntshai tsam tej tshuaj los sis tej khoom uas lawv siv kom txhob muaj me nyuam yuav ua tau mob rau lawv. Hos lwm cov niam txiv vim tej tshuaj los sis tej khoom siv ntawd kim dhau yuav tsis taus.a

YEHAUVAS XAV KOM COV NIAM THIAB COV TXIV UA DAB TSI?

Ib tsev neeg lauj sij hawm nyob ua ke tom qhov chaw ua si. Leej txiv ua tib zoo mloog nws tus ntxhais piav qhia seb nws xav li cas hos leej niam nrog tus me tub cuam pob. — Lauj sij hawm nrog neb ib tug me nyuam zuj zus

Saib xyuas neb cov me nyuam. Yehauvas muab lub luag hauj lwm rau leej niam thiab leej txiv kom saib xyuas nkawd cov me nyuam. Yehauvas yeej xav kom leej niam leej txiv nrhiav noj nrhiav haus, nrhiav tsoos tsho, thiab nrhiav vaj nrhiav tsev rau tej me nyuam nyob. Tsis tas li ntawd, Yehauvas yeej xav kom leej niam thiab leej txiv cob qhia cov me nyuam. Yog li, cov niam thiab cov txiv yuav tsum tsis txhob lam cia tej me nyuam mus kawm ntawv rau lwm qhov. Tiam sis yuav tsum cia cov me nyuam nrog nkawd nyob kom thiaj cob qhia tau lawv. Yog nkawd pab cov me nyuam li no ces thaum cov me nyuam loj hlob, lawv thiaj paub ua neej. Tsis tas li ntawd, nkawd yuav tsum siv sij hawm nrog txhua tus me nyuam kom lawv paub tias nkawd yeej hlub thiab tiv thaiv lawv. Yehauvas yeej to taub txog nej cov ua niam ua txiv, nws yeej tsis tau xav kom nej yog neeg nplua nuj. Zoo tib yam li thaum uas nws xaiv nkawm niam txiv los tu thiab saib xyuas nws tus Tub. Nkawm niam txiv ntawd yeej tsis yog neeg nplua nuj, tiam sis nkawd siv tag nrho nkawd lub dag lub zog los yug thiab tu nws tus Tub.—Mathais 13:55, 56; Lukas 2:24.

Phau Vajlugkub qhia tias: “Yog leej twg tsis saib xyuas nws tsev neeg, tshwj xeeb yog cov uas nrog nws nyob ua ib tse ces twb yog nws tsis lees yuav txoj kev ntseeg lawm. Nws tseem phem tshaj tus uas tsis tau ntseeg lawm thiab.”—1 Timautes 5:8.

Yehauvas yeej to taub tias thaum cov niam txiv laus lawm lawv yeej cheem tsum kev pab. Ib txoj ke uas cov me nyuam hwm lawv niam thiab lawv txiv, yog lawv npaj seb yav laus yuav saib xyuas lawv niam lawv txiv li cas. (Khiav Dim 20:12; 1 Timautes 5:4) Yuav ua rau Yehauvas txaus siab dua, yog cov niam thiab cov txiv tsis txhob xav tias cov me nyuam yuav saib xyuas lawv xwb tiam sis lawv yuav tsum xav tias lawv yuav tau pab lawv cov me nyuam li cas.—2 Kauleethaus 12:14.

Qhia kom cov me nyuam hlub Yehauvas. Cov niam thiab cov txiv muaj lub luag hauj lwm cob qhia lawv cov me nyuam kom hlub thiab teev tiam Yehauvas. Tes hauj lwm no yog ib tes uas tseem ceeb heev uas lawv yuav tsum tau cob qhia cov me nyuam.—2 Kevcai 6:6, 7.

Phau Vajlugkub qhia tias: “Cia li tu [nej cov me nyuam] raws li Vajtswv Yehauvas tej lus qhuab ntuas thiab lub tswv yim.”—Efexaus 6:4.

YEHAUVAS XAV KOM NEB VAM MEEJ

Ib nkawm niam txiv sib tham nyob hauv tsev. Muaj phau Vajlugkub qhib nyob ntawm lub rooj. — Sib tham ua ntej seb neb xav muaj pes tsawg tus me nyuam

Npaj ua ntej. Yog neb xav muaj me nyuam ua tib zoo xav txog neb lub neej. Xws li tias neb puas yuav yug tau neb cov me nyuam? Neb puas yuav nrhiav tau tsoos tsho rau lawv hnav? Thiab neb puas yuav cob qhia tau lawv? Yog tias neb yuav ua tsis tau li hais no, ces neb ib leeg yuav tau nrog ib leeg tham, seb neb yuav muaj pes tsawg tus me nyuam. Yog neb sib tham li no, ces thaum neb muaj me nyuam neb thiaj li yuav tu thiab saib xyuas thiab cob qhia tau cov me nyuam raws li Yehauvas hais kom neb ua. Yehauvas yeej to taub tias txhua yam yeej tsis mus raws li qhov uas yus npaj tseg. (Tej Lus Qhia 9:11) Tiam sis Yehauvas yeej yuav foom koob hmoov rau qhov uas neb siv zog ua ib leej niam thiab ib leej txiv zoo.

Phau Vajlugkub qhia tias: “Nquag thiab ua tib zoo npaj koj thiaj muaj nplua mias. Yog koj lam tau lam ua, koj yuav muaj tsis txaus.”—Pajlug 21:5.

“Yog nej leej twg xav ua ib lub tsev, nej yeej zaum tsaws xam zoo zoo ua ntej seb puas muaj nyiaj txaus ua kom tiav los sad?”—Lukas 14:28.

Muab Yehauvas tso ua ntej. Neb tsev neeg yuav tau muab txoj kev teev tiam Yehauvas tso ua ntej txhua yam. Yog neb twb muaj me tub me nyuam lawd, rau siab ntso cob qhia kom cov me nyuam hlub Yehauvas. Thaum mus kev sib txoos, pab kom lawv cuab pob ntseg mloog lawv thiaj kawm tau. Nej yuav tau ua tsev neeg pe hawm Vajtswv ua ke txhua txhua lub lim tiam. Coj thiab cob qhia neb cov me nyuam kom txawj mus tshaj tawm. Tsis txhob muab neb lub luag hauj lwm ua niam ua txiv tso rau tej me nyuam hlob los sis tej txheeb ze. Cob qhia neb cov me nyuam kom loj hlob los mus hlub Yehauvas. Yeej yuav siv dag siv zog tiam sis yuav ua rau neb zoo siab heev thaum neb pom neb cov me nyuam teev tiam Yehauvas.

Phau Vajlugkub qhia tias: “Tsis muaj ib yam dabtsi ua rau kuv zoo siab tshaj qhov uas kuv hnov hais tias kuv cov menyuam ua lawv lub neej raws li qhov tseeb.”—3 Yauhas 4.b

Tso siab plhuav rau Yehauvas. Txawm neb tab tom txiav txim siab tias neb xav muaj me nyuam los sis neb twb muaj tub ki lawm, nco ntsoov tias qhov uas neb ua raws li Yehauvas qhia, tseem ceeb dua li neb haiv neeg los sis tej kab lig kev cai pom zoo.

Cov duab: 1. Ib nkawm niam txiv nrog nkawd tus tub nyob hauv kev sib txoos. Tus tub tsa tes teb. 2. Ib tsev neeg mus tshaj tawm ua ke. Leej txiv nrog tus ntxhais hlob hos leej niam nrog ob tug yau. — Yeej yuav tau siv dag siv zog los cob qhia me nyuam kom paub teev tiam Yehauvas thiab ua haum Yehauvas siab

Txawm yog tias neb txiav txim siab tsis muaj me nyuam coob coob, los tso siab rau Yehauvas tias nws yeej yuav saib xyuas neb thaum neb laus. Tsis txhob muab xav tias tej me nyuam yog cov uas yuav tau los tu yus thaum yav laus. Neb tsis tas yuav txhawj yuav ntshai tias tsam tsis muaj leej twg saib xyuas neb. Yehauvas twb cog lus tseg lawm tias, nws yuav saib xyuas neb thiab nws yeej ua raws li nws tej lus cog tseg.—Yausuas 23:14.

Phau Vajlugkub qhia tias: “Cia siab rau [Yehauvas] kom kawg koj lub siab lub ntsws. Tsis txhob cia siab rau koj tej kev txawj ntse. Txhua yam uas koj ua koj yuav tsum nco ntsoov [Yehauvas], nws thiaj yuav coj koj taug txojkev uas yog txoj tseeb.”—Pajlug 3:5, 6.

“Nimno kuv yog ib tug neeg laus, kuv ua neej nyob los tau ntev lawm, tiamsis kuv tsis pom [Yehauvas] muab ib tug neeg zoo tso povtseg rau qhov twg, lossis cia nws tej menyuam mus thov khawv noj.”—Phau Ntawv Nkauj 37:25.

“Kav tsij txhawb Vajtswv txoj kev kav thiab coj raws li nws tej kev cai ncaj ncees ua ntej tso ces Vajtswv mam li muab tej uas nej cheem tsum tsav ntxiv rau nej.”—Mathais 6:33.

Tej me tub me nyuam yog koob hmoov zoo kawg nkaus uas Yehauvas tau muab pub rau leej niam leej txiv. Yehauvas txaus siab kawg li thaum neb cob qhia tej me nyuam raws li nws pom zoo! Neb yuav muab qhov uas Yehauvas hais kom neb ua, saib hlob dua li neb haiv neeg los sis tej kab lig kev cai qhia. Neb ua tib zoo txiav txim siab seb yuav muaj pes tsawg tus me nyuam, thiaj li yuav nrhiav txaus noj txaus hnav rau cov me nyuam. Ntxiv ntawd neb yuav tau xav tias, yuav ua li cas thiaj pab tau thiab cob qhia cov me nyuam kom hlub Yehauvas. Yog cov ua niam ua txiv coj li uas hais no, ces twb yog nej pom tias nej cov me tub me nyuam yog “qub txeeg qub teg” uas los ntawm Yehauvas.

Lawv Yeej Txaus Siab

Cov niam txiv uas txiav txim siab tsis yug me nyuam coob puas txom nyem dua? Cov niam txiv uas nyob rau cov teb chaws uas txom nyem nyiaj txiag, yeej muab lo lus nug no coj los xav. Cia peb mus saib seb ib co txiv tsev hais li cas.

Puas muaj lwm tus hais kom neb yug me nyuam coob coob?

“Muaj kawg. Txawm nyob hauv lub koom txoos los, ib txhia yeej hais li ntawd. Muaj ib nkawm niam txiv hais rau wb tias, ‘Vim li cas neb muaj ib tug tub xwb? Nyob hauv Afika, yog yus muaj tib tug tub xwb ces cuag li yus tsis muaj ib tug li. Yog tias yus muaj ob tug tub ces cuag li yus muaj ib tug xwb.’ Tom qab wb yug tus me nyuam ob uas yog tus ntxhais, lawv tseem hais tas zog kom wb yug ntxiv.”—Zawlamias (Jeremias)

Neb puas txom nyem vim neb tsis muaj me nyuam coob?

“Wb tsis txom nyem li. Qhov uas wb txiav txim siab tsis yug me nyuam coob, wb thiaj nrhiav tau noj tau hnav rau wb cov me nyuam. Ib qho uas tseem ceeb tshaj, yog wb pab tau wb ob tug me nyuam kom hlub Yehauvas. Kuv loj hlob los ntawm ib tse neeg uas coob heev. Kuv pom tias kuv niam thiab kuv txiv txom nyem heev, rau qhov nkawd yuav tau khwv heev kom thiaj nrhiav tau noj tau hnav rau peb cov me nyuam. Thiab nkawd khwv heev kom thiaj pab tau peb mus kawm ntaub kawm ntawv.”—Zawlamias

Neb cov me nyuam xav li cas txog qhov uas neb txiav txim siab?

“Qhov uas wb txiav txim siab no yeej txhawb tau wb ob tug me nyuam, rau qhov tias nkawd tsis ntsib kev txom nyem li lwm cov me nyuam uas los ntawm ib tse neeg uas muaj me nyuam coob heev.”—Filipe

“Thaum wb ob tug me nyuam loj hlob tuaj nkawd zoo siab kawg, rau qhov nkawd pom tias wb yeej saib xyuas nkawd zoo thiab nkawd yeej nyob nyab xeeb. Wb kuj caw cov kwv tij nkauj muam uas hlub Yehauvas tuaj tom peb tsev. Lawv tso tau tej qauv zoo kawg rau peb xyaum thiab lawv txhawb kom peb muaj hom phiaj ntawm sab kev ntseeg. Yog li wb pom tias, wb ob tug me nyuam kuj xyaum lawv tej qauv thiab.”—Khalaus (Carlos)

Qhov Uas Neb Txiav Txim Siab Tsis Muaj Me Nyuam Coob Pab Tau Neb Li Cas?

“Qhov uas wb tsev neeg tsis coob, pab tau wb nrhiav tau noj tau haus zoo dua. Peb lub xyoos dhau los kuv poob kuv txoj hauj lwm uas them nyiaj zoo. Vim peb tsev neeg tsawg ces thaum muaj li ntawd, peb tsis muaj nyiaj los peb tsis siv ntau.”—Zawlamias

“Vim wb tsis muaj me nyuam coob ces wb thiaj nrhiav tau noj tau haus rau wb ob tug me nyuam thiab pab tau nkawd hlub Yehauvas. Peb thiaj mus pab qhia txoj xov zoo, rau tej thaj tsam uas cheem tsum cov tshaj tawm. Thiab vim wb muaj ob tug me nyuam xwb ces wb muaj sij hawm nrog nkawd ua ke thiab saib xyuas tau nkawd zoo dua. Wb ob tug me nyuam puav leej teev tiam Yehauvas thiab muaj hom phiaj ntawm sab kev ntseeg.”—Lanadis (Lenadi)

Koj Muaj Dab Tsi Koj Xav Hais Rau Cov Ua Niam Ua Txiv?

“Kuv pom tias yeej muaj tseeb li cov lus uas hais nyob ntawm qhov kawg hauv Phau Ntawv Nkauj 34:10, uas hais tias: ‘Cov neeg uas hwm Yehauvas yuav muaj txhua yam zoo uas lawv xav tau.’ Yeej muaj tseeb li ntawd rau kuv tsev neeg. Yehauvas tau muab txhua yam uas peb cheem tsum rau peb tiag.”—Lafaus (Rafael)

a Ib nkawm niam txiv mam txiav txim siab seb nkawd yuav muaj pes tsawg tus me nyuam, thiab thaum twg mam muaj me nyuam. Tsis tas li ntawd seb nkawd puas yuav siv tej khoom los sis tej tshuaj tiv thaiv kom txhob muaj me nyuam. Tsis muaj leej twg yuav txiav txim tau rau nkawd. (Loos 14:4, 10-13) Ntxiv ntawd, cov niam txiv yuav tsum nco ntsoov lub hauv paus ntsiab lus nyob ntawm 1 Kauleethaus 7:3-5.

b Nyob ntawm nqe no, lo lus “me nyuam” yog Yauhas hais txog cov uas nws cob qhia tau los ua thwj tim. Txawm li los cov niam thiab cov txiv yeej muaj tau kev zoo siab tib yam li Yauhas, thaum lawv pom tias lawv cov me nyuam teev tiam Yehauvas.