Yuav Ua Li Cas Yog Koj Ntsib Teeb Meem Tom Qab Ua Kev Cai Raus Dej?

1-2. Piav seb peb yuav npaj li cas thaum peb ntsib teeb meem?

PEB paub tias peb nyob hauv Xatas lub ntiaj teb ces peb yeej yuav ntsib teeb meem. Yexus twb ceeb toom nws cov thwj tim lawm tias: “Yeej yuav muaj cov uas ua rau lwm tus ua txhaum.” (Mathais 18:7) Yog li peb yuav tau nco ntsoov cov lus ceeb toom no, peb thiaj paub npaj rau thaum muaj teeb meem tshwm sim. Tej zaud, peb yuav muaj tau teeb meem nrog peb cov kwv tij nkauj muam los kuj muaj.

² Muab xav li no. Yehauvas cov tib neeg yeej ib sij tau kev ceeb toom kom paub npaj ua ntej thaum muaj xwm txheej phem. Peb yuav npaj li cas? Ua ntej tshaj, peb yuav tau paub tias yuav muaj tej xwm txheej zoo li cas los raug ntawm thaj tsam uas peb nyob. Yog tias peb nyuam qhuav khiav los nyob rau ib thaj tsam tshiab, yim huab tseem ceeb rau peb paub tias, nquag muaj tej xwm txheej twg. Thaum peb paub tias muaj tej xwm txheej twg lawm, peb thiaj paub npaj. (Pajlug 21:5) Zoo tib yam li ntawd, peb yuav tau paub tias yuav muaj tau tej teeb meem zoo li cas tshwm sim tom qab ua kev cai raus dej. Yog peb paub, peb thiaj paub npaj tias yuav ua li cas. Ntxiv ntawd, peb thiaj li yuav thev taus, thiab tuav rawv peb txoj kev sib raug zoo nrog Yehauvas. (Phau Ntawv Nkauj 17:5) Yog li, peb yuav mus tham txog peb yam teeb meem uas kuj yuav muaj tau tshwm sim, thiab peb yuav npaj li cas rau cov teeb meem ntawd.a

THAUM IB TUG KWV TIJ LOS SIS MUAM UA TSIS ZOO RAU PEB

3. Tom qab ua kev cai raus dej tas peb yuav ntsib tau tej teeb meem twg?

³ Koj puas nco tau thawj zaug koj mus koom kev sib txoos thiab pom tias Yehauvas cov tib neeg sib hlub heev? Thaum ntawd koj yeej ntseeg tias koj nrhiav tau txoj kev ntseeg tseeb lawd, puas yog? (Yauhas 13:35; Kaulauxis 3:12) Muaj ib tug muam hu ua Npliasb kuj xav tib yam li ntawd thiab. Tiam sis tom qab nws ua kev cai raus dej tas, nws txawm ntsib ib qho teeb meem uas nws tsis nco faj txog. Nplias hais tias: “Muaj ib tug viv ncaus coj tsis zoo rau kuv. Kuv pom tias nws kuj hais lus tsis zoo txog lwm tus thiab. Ua rau kuv tsis pom qab xav li, rau qhov yav tas los, kuv twb kawm tias Yehauvas Cov Tim Khawv siv zog coj kom muaj kev sib haum xeeb thiab sib hlub.” Yeej muaj tseeb tias, cov kwv tij nkauj muam siv zog xyaum kom coj tau li Yehauvas tej xeeb ceem, tiam sis vim lawv yog neeg zoo tsis tiav, ces lawv yuav hais los sis ua tau yuam kev. (Efexaus 4:23, 24; 1 Yauhas 1:8) Yog li, tej thaud yuav muaj tej tug hais los sis ua tau rau peb chim. (Yakaunpaus 3:8) Yeej tu siab kawg li tias, tej teeb meem no ua rau tej tug cia li tsis kam teev tiam Yehauvas lawm.

4. Dab tsi yuav pab tau peb thaum ib tug kwv tij nkauj muam ua tsis zoo rau peb? (Efexaus 4:32)

⁴ Koj yuav npaj li cas tam sim no, es thaum ib tug kwv tij nkauj muam ua rau koj chim, los koj yuav teev tiam Yehauvas mus li? Ua tib zoo xav txog cov lus hais nyob ntawm Efexaus 4:32. (Nyeem.) Yog koj ua zoo thiab muaj kev hlub tshua, koj yuav zam tau teeb meem nrog lwm tus. Tsis tas li ntawd, koj kuj maj nroos zam txim rau tej uas lwm tus ua yuam kev rau koj. Dab tsi yuav pab tau koj ua neeg zam txim? Ua tib zoo xav tias, koj twb thov Yehauvas kom nws zam koj lub txim pes tsawg zaus lawm, thiab nws yeej zoo siab hlo zam tej uas koj ua yuam kev. (Mathais 6:12) Thaum koj ua zoo xav txog Yehauvas muaj lub siab dawb siab zoo zam koj lub txim li cas, ces yuav yooj yim dua rau koj zam lwm tus lub txim.

5. Lub hauv paus ntsiab lus twg pab tau peb ua neeg zam txim? (Pajlug 19:11) (Saib cov duab.)

⁵ Nyeem Pajlug 19:11. Phau Vajlugkub qhia tias, thaum ib tug ua rau peb chim, kev txawj xavc yuav pab kom peb rub tau lub siab ntev txhob chim. Lub hauv paus ntsiab lus no pab tau Limam (Rima). Nws nyuam qhuav ua kev cai raus dej tau ob peb lub xyoos xwb. Nws hais li no tias: “Thaum kuv pom tias ib tug kwv tij los sis ib tug viv ncaus, hais los sis ua tau tej yam rau kuv tu siab, los yog ua rau kuv chim, kuv nco ntsoov nqe Vajlugkub nyob ntawm Pajlug 19:11. Kuv ua tib zoo xav txog lawv lub neej thiab tej uas lawv raug yav tas los, thiab yog vim li cas lawv thiaj hais los sis coj li ntawd rau kuv. Kuv caw lawv nrog kuv mus tshaj tawm ua ke. Qhov uas kuv ua li no, ua rau kuv haj yam to taub lawv zoo.” Yog li, peb yuav tau paub cov kwv tij nkauj muam kom zoo. Thaum peb paub lawv zoo lawd, yog lawv ho hais los sis ua tau tej yam rau peb chim, los yuav yooj yim dua rau peb zam txim rau lawv.

6. Yuav ua li cas peb thiaj nrog tau txhua tus hauv lub koom txoos sib raug zoo?

⁶ Yuav ua li cas koj thiaj muaj kev sib raug zoo nrog cov kwv tij nkauj muam hauv lub koom txoos? Thaum koj los paub cov kwv tij nkauj muam, xav txog lawv cov yam ntxwv zoo. (Muab piv rau Pajlug 10:12; Loos 12:10; Filipis 2:2, 3) Muaj ib tug kwv tij hu ua Moj (Mark) coj li hais no, mas pab tau nws kawg li. Thaum nws siv sij hawm nrog cov kwv tij nkauj muam ua ke, nws pom tias lawv muaj tej tug cwj pwm uas nws tsis nyiam. Txawm li los, dab tsi pab tau kom Moj tsis txhob cia lawv cov cwj pwm ua rau nws xav yuam kev? Nws hais tias: “Yog muab tej uas kuv cov kwv tij nkauj muam ua yuam kev, piv rau tej kev txhaum uas cov neeg tsis ntseeg Yehauvas ua, mas cov neeg ntawd haj yam ua txhaum loj tshaj. Yog li, kuv txiav txim siab tias kuv yuav tsis xav txog tej yam me me uas kuv cov kwv tij nkauj muam ua yuam kev. Kuv xav ntsoov txog lawv tej xeeb ceem zoo xwb.” Yog koj tsuas xav qhov zoo txog cov kwv tij nkauj muam xwb, yuav pab tau koj nrog txhua tus sib raug zoo hauv lub koom txoos.

KOJ ROV KHUV XIM LUB NEEJ TAS LOS

7. Dab tsi ua tau rau peb khuv xim lub neej yav tas los?

⁷ Thaum koj los ua Yehauvas ib tug Tim Khawv, koj zoo siab kawg li tias koj tsis coj lub neej raws li Xatas lub qab ntuj lawm. Tej zaum koj yuav xav tias koj yeej tsis khuv xim lub neej ntawd ib zaug li. Tiam sis thaum koj ntsib teeb meem, yuav ua rau koj tshua los sis rov khuv xim txog lub neej tas los uas koj tau muab tso tseg los teev tiam Yehauvas. (Muab piv rau Teev Npe 11:4-6.) Xws li tej tug kwv tij tau txiav txim siab muab lawv txoj hauj lwm uas muaj koob nto npe thiab khwv heev tso tseg. Hos ib txhia thaum lawv pib kawm Vajlugkub, lawv cov phooj ywg tau muab lawv tso tseg lawm. Hos lwm cov, Yehauvas pab lawv tso tau txoj kev quav yeeb quav tshuaj tseg. Yuav tu siab heev, yog tias ib tug Khixatias cia li tso Yehauvas tseg thiab rov qab mus ua tej yam uas Yehauvas ntxub! Koj yuav tau npaj li cas tam sim no, kom thaum koj ntsib teeb meem los, koj yuav tsis rov qab mus ua tej yam uas koj ua yav tas los?

8. Peb kawm tau li cas los ntawm Anplahas thiab Xalas?

⁸ Phau Vajlugkub qhia txog tej tug uas npuab siab rau Yehauvas, tias yog lawv pheej xav txog lub neej yav tas los, tej zaum kuj yuav ua tau rau lawv khuv xim. Muab xav txog Anplahas thiab Xalas. Thaum Yehauvas hais kom nkawd khiav tawm lub nroog Ules uas muaj koob muaj npe thiab mus nyob hauv tej tsev ntaub lawm xwb, nkawd yeej mloog Yehauvas lus. (Henplais 11:8, 9) Yeej muaj tseeb tias, tej thaud nkawd yeej nco txog lub neej tau zoo nyob hauv lub nroog Ules. Tiam sis yog nkawd pheej xav ntsoov txog yav tas los, yuav ua rau nkawd ntshaw thiab nco lub neej uas nkawd tau tso tseg. Ces tej zaum kuj ua rau nkawd xav rov qab los muaj thiab yuav ua rau nkawd tsis tau hau ntsoov rau yav tom hauv ntej.​—Henplais 11:15, 16.

9. Povlauj xav li cas txog tej uas nws muab tso tseg? (Filipis 3:7, 8, 13)

⁹ Tus tub txib Povlauj hloov nws lub neej los teev tiam Yehauvas. Ua ntej nws los ua ib tug Khixatias, nws kawm txog cov Yudais tej kev cai ntawm tus xib hwb uas nto npe heev hu ua Kamali-ees. (Tes Hauj Lwm 22:3) Yog li Povlauj yeej muaj peev xwm los tuav tau ib tes hauj lwm uas tseem ceeb, uas yog los ua ib tug thawj coj cov Yudais. (Kalatias 1:13, 14) Tiam sis thaum nws los txais yuav txoj xov zoo lawm, nws muab txhua yam tso tseg huv tib si. Tom qab uas nws los ua ib tug Khixatias lawm, nws puas ntsib teeb meem? Nws yeej ntsib teeb meem. Nws raug ntaus, raug kaw, thiab nws haiv neeg haj tseem ntxub nws. (2 Kauleethaus 11:23-26) Yog tias nws xav ntsoov txog cov teeb meem uas nws raug, thiab nws muab piv rau lub neej yav tas los, ces nws yuav xav tias lub neej yav tas los zoo dua. Tiam sis nws tsis xav li ntawd, nws xav ntsoov txog tej koob hmoov uas nws tau los ua Yexus Khetos ib tug tub txib thiab tseem yuav tau txais nqi zog rau yav tom ntej. Povlauj ntseeg tag siab nrho tias, qhov uas nws los raws Yexus qab, muaj nqis tshaj ib puas tsav yam uas nws tau muab tso tseg lawm.​—Nyeem Filipis 3:7, 8, 13.

10. Peb yuav tau xav txog dab tsi? (Malakaus 10:29, 30) (Saib cov duab.)

¹⁰ Koj kawm tau li cas? Thaum koj pib xav txog tej uas koj tau muab tso tseg los ua ib tug Khixatias, koj yuav tau nco ntsoov tias yog vim li cas koj muab tej ntawd tso tseg. (Tej Lus Qhia 7:10) Koj yuav tau muab tej uas koj tso tseg, piv rau tej koob hmoov uas koj tau thaum koj los kawm paub qhov tseeb hauv phau Vajlugkub. Thiab koj yuav tau muab xav tias, koj twb tau los nrog tus Vajtswv uas kav ib puas tsav yam sib raug zoo. (Pajlug 3:32) Tsis tas li ntawd, koj kuj muaj ib tse neeg ntawm txoj kev ntseeg uas nyob thoob qab ntuj uas hlub koj. (Nyeem Malakaus 10:29, 30.) Thiab koj tseem yuav tau tej koob hmoov nplua mias rau yav tom hauv ntej! (Yaxayas 65:21-23) Yog koj ua tib zoo xav txog tej koob hmoov koj tau txais thaum koj los teev tiam Yehauvas, ces koj yuav tsis khuv xim tej uas koj tau muab tso tseg.

11. Koj khaws tau li cas los ntawm tus muam Laumalis?

¹¹ Muaj ib tug muam hu uas Laumalis (Rosemary), nws ua kev cai raus dej thaum nws muaj 50 tawm xyoo. Cia peb mus tham seb muaj li cas rau tus muam no. Nws hais tias: “Thaum xub thawj, kuv nco lub koob tsheej Khixamav (Christmas) kawg, rau qhov lub sij hawm ntawd yog lub sij hawm uas yus nrog yus tsev neeg thiab muaj kev zoo siab. Kuv nyiam muab khoom pub rau kuv tsev neeg heev. Thiab kuv nyiam heev, thaum cov me nyuam yaus zaum puag ncig tsob ntoo Khixamav luag ntxhi qhib lawv cov khoom pub.” Dab tsi pab kom Laumalis txhob tshua txog lub neej yav tas los? Nws hais tias: “Kuv nrhiav lwm lub caij los nrog kuv tsev neeg ua ke. Txhua txhua xyoo kuv yeej xaiv ib lub sij hawm mus nrog kuv tsev neeg ua ke thiab muab khoom pub rau lawv. Thiab kuv qhia rau lawv tias kuv hlub lawv.” Nws hais ntxiv tias: “Thaum kuv los ua Yehauvas ib tug Tim Khawv, kuv cov phooj ywg muab kuv tso tseg tas. Tej thaud kuv nco lawv kawg thiab nyob kho siab khuav.”d Dab tsi pab tau nws? Nws thiaj teem caij nrog ib tug viv ncaus zuj zus hauv lub koom txoos mus tshaj tawm ua ke. Nws hais tias: “Qhov uas kuv ua li ntawd, pab tau kuv nrog cov viv ncaus sib raug zoo.” Koj kawm tau li cas los ntawm Laumalis? Tej zaum koj yuav tshua txog tej yam uas ua rau koj muaj kev zoo siab yav tas los ua ntej koj los kawm paub qhov tseeb hauv phau Vajlugkub. Tiam sis nco ntsoov tias muaj lwm yam uas zoo tshaj uas yuav ua rau koj muaj kev zoo siab dua. (Filipis 4:8, 9) Thiab nco ntsoov tias Yehauvas yeej pub ntau tshaj rau koj dua li tej uas koj tau tso tseg.

COV UAS TSO YEHAUVAS TSEG

12. Muaj tej yam twg tshwm sim nyob hauv lub koom txoos uas tej zaum ua nyuaj rau koj?

¹² Thaum koj los ua Yehauvas ib tug Tim Khawv, koj zoo siab kawg li tias koj tsis koom nrog lub qab ntuj phem no lawm, tiam sis koj los koom nrog ib pab neeg uas qhia qhov tseeb thiab ua qhov yog. (Yaxayas 65:14) Txawm li los, tej thaud koj yuav hnov txog tej tug uas tau ua txhaum loj, thiab raug tshem tawm hauv lub koom txoos mus. (1 Kauleethaus 5:13) Cia peb mus saib seb thaum muaj zoo li no, tus muam Xemaum (Samar) xav li cas. Nws hais tias: “Thaum kuv ua kev cai raus dej tsis tau ntev, muaj ib tug txwj laus tau ua kev txhaum loj thiab raug tshem tawm hauv lub koom txoos mus. Ua rau kuv xav tsis thoob li tias ib tug txwj laus yuav ua tau txhaum rau Yehauvas thiab lub koom txoos.” Peb yuav tau ntseeg tias cov kwv tij nkauj muam yeej muaj lub siab hlub thiab xav npuab siab rawv rau Yehauvas. (1 Kauleethaus 13:4, 7) Txawm li los tu siab kawg tias, ib xyoos twg kuj muaj cov uas raug tshem tawm hauv lub koom txoos mus. Thiab yeej paub tias, yim huab nyuaj rau koj yog tias koj ib tug txheeb ze, ib tug uas koj sib raug zoo nrog, los sis ib tug uas koj hwm tau ua txhaum loj thiab tso Yehauvas tseg.

13. Peb yuav tau ua dab tsi los txhawb peb txoj kev ntseeg es yog muaj ib tug peb hlub tshua tso Yehauvas tseg, los peb thiaj tsis tso nws tseg?

¹³ Koj yuav npaj li cas tam sim no kom koj thiaj nyob ruaj ntawm Yehauvas, yog tias ib tug uas koj hlub tshua tso Yehauvas tseg? Kav tsij rau siab ntso txhawb koj txoj kev sib raug zoo nrog Yehauvas. (Yakaunpaus 4:8) Nco ntsoov tias nyias muaj nyias ib txoj kev sib raug zoo nrog Yehauvas. Txawm peb nrog lub koom txoos thiab peb tsev neeg kawm Vajlugkub ua ke thiab thov Vajtswv ua ke los, peb txhua tus nyias yuav tsum rau siab thov Vajtswv thiab kawm Vajlugkub rau nyias tus kheej.​—Phau Ntawv Nkauj 1:2; 62:8.

14. Tus tub txib Petus tso tau tus qauv zoo li cas rau peb xyaum? (Yauhas 6:66-68)

¹⁴ Tus tub txib Petus tus qauv pab tau peb. Muaj ib zaug, coob tus thwj tim tso Yexus tseg, vim lawv tsis to taub txog tej uas Yexus hais. Thaum xub thawj Petus twb tsis to taub thiab. Txawm li los nws npuab siab rawv rau Yexus. (Nyeem Yauhas 6:66-68.) Petus tsis xav txog tej uas lwm tus ua, tiam sis nws xav ntsoov txog qhov tseeb uas Yexus qhia rau nws xwb. Twb vim yog li ntawd nws thiaj tsis tso Yexus tseg. Tib yam li ntawd, txawm niaj hnub no muaj lwm tus tso Yehauvas tseg, los koj yuav tau nco ntsoov tias, tsuas yog Yehauvas lub koom haum thiaj qhia qhov tseeb rau koj xwb. Tuav koj txoj kev ntseeg rau Yehauvas kom ruaj! Xemaum uas hais tas los hais tias, “Kuv nco ntsoov tias, txawm muaj ib tug tau ua txhaum, los tsis yog txhua tus hauv lub koom txoos ua txhaum, los sis tsis yog hais tias lub koom haum qhia tau yuam kev. Txawm tib neeg yuav ua li cas los, Yehauvas yog ib tug Vajtswv uas zoo heev.”

15. Tau muaj li cas rau Emolis?

¹⁵ Cia peb xav txog Emolis (Emily). Nws ua kev cai raus dej tau ib lub lim tiam xwb, nws niam cia li khiav tso nws tsev neeg tseg thiab raug tshem tawm hauv lub koom txoos mus lawm. Emolis hais tias: “Kuv yeej tsis xav tias yuav muaj tau li no. Nyuaj kawg li rau kuv, kuv nco kuv niam kawg nkaus li.” Dab tsi pab tau nws? Emolis hais tias: “Tsis yog muaj kuv ib leeg xwb. Kuv txiv hlub kuv heev thiab nws txhawb kuv kawg li. Tsis tas li ntawd, cov kwv tij viv ncaus hauv lub koom txoos txhawb thiab pab kuv ib yam li peb yog ib tse neeg. Yog li tseem ceeb heev, peb txhua tus ib leeg yuav tau nyob ze ib leeg thiab ib leeg txhawb ib leeg.” (1 Petus 5:9) Tsis txhob tos kom thaum koj raug ib qho teeb meem, es koj mam li nrog cov kwv tij nkauj muam sib raug zoo. Kav tsij nrog cov kwv tij nkauj muam sib raug zoo tam sim no. Yog koj ua li no, thaum koj ntsib ib txoj kev nyuaj siab twg, lawv thiaj li tuaj txhawb thiab tuaj nplig tau koj.

16. Peb yuav tau nco ntsoov li cas? (Saib daim duab.)

¹⁶ Peb yuav tau nco ntsoov tias Yehauvas qhuab ntuas tus uas nws hlub. (Henplais 12:6) Nws yeej xav kom cov uas raug tshem tawm lawd, tig rov qab los cuag nws. (2 Petus 3:9) Yog ib tug uas ze koj raug tshem tawm lawm, koj yeej tso siab tau tias, cov txwj laus yuav ua npaum li lawv ua tau, mus pab nws kom rov qab los rau Yehauvas.​—2 Timautes 2:24, 25.

17. Peb tso siab tau li cas?

¹⁷ Peb tsuas tham txog qho yam teeb meem uas tej zaud koj yuav ntsib tom qab koj ua kev cai raus dej xwb. Txawm li los, koj yeej muaj peev xwm teev tiam Yehauvas twj ywm. Koj yeej npaj tau ua ntej rau tej teeb meem. Nco ntsoov tias Yehauvas yuav pab kom koj npuab siab rawv rau nws. Nws twb pab koj los lawm, thiab nws tseem yuav pab koj mus ib txhis! (1 Petus 5:10) Yehauvas yeej yuav ntxiv dag ntxiv zog rau koj, kom koj thev taus tej teeb meem. Yog koj cia Yehauvas pab koj twj ywm, ces yeej yuav tsis muaj ib yam teeb meem twg uas yuav rhuav tau koj txoj kev sib raug zoo nrog nws li!​—Phau Ntawv Nkauj 119:165; Loos 8:38, 39.