Tej Uas Peb Xav Paub

Thaum twg cov nom tswv mam li tshaj tawm tias “muaj kev thaj yeeb nyab xeeb”?

Raws li peb twb tau qhia nyob rau ntawm lub ntsiab “Tej Uas Peb Xav Paub” hauv ib Phau Tsom Fajauas nyuam qhuav tawm tsis ntev tas los no, peb hais tias tsis ntev tom ntej no Yehauvas yuav tshoov “kaum tus kub” lub siab (uas yog tag nrho cov nom tswv) kom “lawv xav ua raws li Vajtswv lub siab nyiam,” uas yog muab lawv lub hwj chim thiab txoj kev kav rau tus “tsiaj liab ploog” uas yog lub koom haum ntiaj teb UN (United Nations). Tus tsiaj no kuj yog “tus mlom uas muaj yamntxwv zoo li thawj tus tsiaj.” (Tshwmsim 13:14, 15; 17:3, 16, 17) Ces “kaum tus kub” thiab tus tsiaj uas nyuam qhuav sawv los txais lub hwj chim kav, yuav muab tag nrho cov kev ntseeg cuav nyob thoob qab ntuj rhuav tshem mus. Yog li cov nom tswv puas yuav tshaj tawm tias “muaj kev thaj yeeb nyab xeeb”b ua ntej los sis tom qab muab kev ntseeg cuav rhuav tshem mus?​—1 Thexalaunikas 5:3.

Peb yeej tsis paub tseeb tias, thaum twg nom tswv mam li tshaj tawm tias “muaj kev thaj yeeb nyab xeeb.” Yog peb paub tsi ntsees tias yuav muaj li cas lawm ces peb yuav tsis ceev faj thiab tsis zov tos. Yexus ntuas nws cov thwj tim tas zog kom lawv yuav tsum “ceev faj zov tos.” (Mathais 24:42; 25:13; 26:41) Cia peb ua tib zoo mus kawm txog Yehauvas cov lus faj lem uas nws txib kom tus tub txib Povlauj sau mus rau cov ntseeg nyob hauv lub nroog Thexalaunikas.

Povlauj sau tias: “Thaum nej hnov luag hais tias, ‘Muaj kev thaj yeeb nyab xeeb lawm lauj!’ ces lawv yuav raug kev puas tsuaj nthawv nthav.” (1 Thexalaunikas 5:2, 3) Yav tas los, peb cov ntaub ntawv feem ntau yeej qhia li no txog Povlauj cov lus: Thaum tej nom tswv tshaj tawm tias “muaj kev thaj yeeb nyab xeeb” ua ntej kiag txoj kev txom nyem loj kawg nkaus pib, ces lub nroog Npanpiloos uas loj dua ntais uas yog tag nrho cov kev ntseeg cuav yuav raug puas tsuaj. Thiab cov lus tshaj tawm no, yuav yog lub cim kawg uas qhia tias txoj kev txom nyem loj kawg nkaus tab tom yuav pib ntag.

Tiam sis thaum peb muab coj los ua tib zoo tshawb fawb, peb kawm tau tias muaj lwm yam uas peb kuj yuav tsum to taub txog thiab. Tej zaum cov lus tshaj tawm “muaj kev thaj yeeb nyab xeeb” kuj yuav tshaj tawm tom qab kev ntseeg cuav raug puas tsuaj los muaj. Vim li cas thiaj hais li no? Cia peb ua tib zoo xav txog cov lus nug no.

Kev ntseeg cuav muaj kev cuam tshuam li cas nrog kev tsov rog hauv ntiaj teb? Phau Vajlugkub qhia tias: “Lub nroog Npanpiloos [“tus niam ntiav uas phem kawg nkaus”] . . . muab . . . cov neeg uas nyob hauv ntiajteb no tua povtseg tas lawm.” (Tshwmsim 17:1, 5; 18:24) Ib txwm kev ntseeg cuav yeej txhawb kev tsov kev rog, thiab yog lub hauv paus ua nruj ua tsiv thiab tua neeg tuag coob kawg li. Kev ntseeg cuav ua tsis tau kom muaj kev thaj yeeb nyab xeeb. Yog li tej zaum nom tswv kuj yuav tshaj tawm tias “muaj kev thaj yeeb nyab xeeb” tom qab lub nroog Npanpiloos raug puas tsuaj los peb kuj paub tsis tau.

Yuav muaj dab tsi tshwm sim tom qab nom tswv tshaj tawm tias “muaj kev thaj yeeb nyab xeeb”? Povlauj hais tias: “ces lawv yuav raug kev puas tsuaj nthawv nthav.” (1 Thexalaunikas 5:3) Yog tias nom tswv tshaj tawm “muaj kev thaj yeeb nyab xeeb” tom qab kev ntseeg cuav raug puas tsuaj ces tej nom tswv yuav raug puas tsuaj nthawv nthav.

Yehauvas cov tib neeg paub tias yuav muaj li cas? Povlauj hais tias: “Cov kwv tij, nej tsis yog cov uas nyob hauv qhov tsaus ntuj. Yog li, hnub ntawd yuav tsis ua rau nej poob siab li tej tub sab.” (1 Thexalaunikas 5:4) Muab xav li no: Yog tias cov lus “muaj kev thaj yeeb nyab xeeb” tshaj tawm tom qab kev ntseeg cuav raug puas tsuaj, ces Yehauvas cov tib neeg paub tias cov nom tswv yuav raug puas tsuaj tam sid. Tiam sis tej nom tswv tsis xav tias lawv yuav raug puas tsuaj nthawv nthav li tub sab tuaj.

Muaj ib yam uas peb paub tseeb. Tsis ntev tom ntej no, “kaum tus kub” thiab tus tsiaj uas sawv los kav yuav muab kev ntseeg cuav rhuav kom puas tsuaj. Thaum muaj li no, txoj kev txom nyem loj kawg nkaus yuav pib. Peb paub tias yuav muaj ib lub sij hawm, nom tswv yuav tshaj tawm tias “muaj kev thaj yeeb nyab xeeb.” Thaum twg mam li tshaj tawm? Peb twb tham lawm tias tej zaum yuav muaj ob txoj hau kev. Txoj hau kev ib: Cov lus tshaj tawm yuav hais ua ntej muab kev ntseeg cuav rhuav tshem. Txoj hau kev ob: Cov lus tshaj tawm yuav hais tom qab nom tswv muab kev ntseeg cuav rhuav tshem. Yog li peb yuav tau tos seb yuav muaj li cas. Yuav kom peb to taub meej txog tej lus faj lem hauv phau Vajlugkub tias muaj tiav li cas, yuav tsum yog cov lus faj lem tab tom muaj tshwm sim los sis twb muaj tiav lawm.​—Muab piv rau Yauhas 12:16.

Txawm li cas los xij, qhov tseem ceeb tsis yog tias thaum twg mam li tshaj tawm cov lus “muaj kev thaj yeeb nyab xeeb,” tiam sis yog qhov uas peb yuav tsum tuav rawv peb txoj kev ntseeg rau Vajtswv. Peb yuav tau “feeb meej thiab ceev faj zov tos,” kom peb thiaj li yuav npaj txhij zog thaum muaj tej xwm txheej no tshwm sim.​—1 Thexalaunikas 5:6.