Yadda Za A Yi Wa’azi ta Wajen Yin Amfani da Tebura da Amalanke

Ana taimaka wa mutane masu tawali’u su san gaskiya ta wajen yin wa’azi ta hanyar tebura ko amalanke. (Yoh. 6:44) Saboda haka, an ƙarfafa dattawa su kafa tsarin yin wa’azi ga jama’a a yankin ikilisiyarsu, inda mutane suke yawan wucewa. Ba a bukatar a nemi izini daga wurin hukumomi kafin a ajiye tebura ko amalanke tun da ba a barinsu a wurin har washegari. Su waye ne suka cancanci su yi irin wannan wa’azi? Masu shelan da suka manyanta da suke ado da kyau kuma sun ƙware a yin magana. Ga wasu abubuwa da ya kamata masu shela su yi da kuma waɗanda bai kamata su yi ba don su yi nasara.

Abin da ya kamata a yi:

Ka kasance da fara’a kuma ka marabci mutanen da suke wucewa. Wasu masu shela suna yin murmushi kuma su gai da mutanen da suke wucewa. Idan wani ya zo wucewa kuma ya kalli littattafan da ke kan amalanken ko teburin, kana iya cewa, “Za ka iya ɗaukan littafin da kake so.”
Ka ɗan tsaya nesa da teburin ko amalanken. A wasu wurare, masu shela suna samun sakamako mai kyau idan suka yi hakan. Wasu kuma sun lura cewa wurin da suka tsaya yana hana mutane zuwa ɗaukan littattafai, saboda haka, suna ɗan ƙara yin nisa da teburin kuma su jira sai wani ya tsaya a wurin. Da zarar mutumin ya zo wurin amalanken ko teburin, ka zo ka soma hira da shi. Za ka iya tambayarsa, “Ka taɓa yi wa kanka wannan tambayar kuwa?”
Ka karanta Littafi Mai Tsarki a duk lokacin da ya dace.
Idan wani ya karɓi littattafan da muke amfani da su wajen yin nazari da mutane kamar Menene Ainihi Littafi Mai Tsarki Yake Koyarwa?, ka gaya masa cewa za a iya yin nazari da shi idan yana so. Idan ya yarda, ka kunna masa bidiyon nan Me Ya Sa Zai Dace Mu Yi Nazarin Littafi Mai Tsarki?
Idan zai yiwu, ka karɓi adireshi da kuma lambobin wayar waɗanda suke son saƙonmu. Idan mutumin ba ya zama a yankinku, ka cika fom ɗin Please Follow Up (S-43), kuma ka ba sakataren ikilisiyarku ba tare da ɓata lokaci ba.