Gayyata ga Kowa

1. Yaushe ne za a soma rarraba takardun gayyata zuwa taron yanki?

¹ Idan kana shirya wata liyafa ta musamman kuma kana son danginka ko abokanka su hallara, babu shakka, za ka yi farin ciki sosai sa’ad da kake gayyatar su. Hakazalika, ’yan’uwan da suka shirya taron yankin da za a yi nan ba da daɗewa ba sun yi aiki tuƙuru. Makonni uku kafin taron, Jehobah zai ba mu gatan gayyatar mutane zuwa taron. Mene ne zai taimaka mana mu rarraba takardun gayyatar da ƙwazo da kuma farin ciki?

2. Mene ne zai motsa mu mu yi wannan kamfen da ƙwazo?

² Idan mun yi bimbini sosai a kan yadda muke amfana daga yadda Jehobah yake koyar da mu a taron yanki, hakan zai motsa mu mu rarraba takardun gayyatar da ƙwazo. (Isha. 65:13, 14) Ya kamata mu kuma tuna cewa ana samun sakamako mai kyau daga wannan kamfen. (Ka duba akwatin nan “Ana Samun Sakamako Mai Kyau.”) Wasu mutanen da muka gayyata za su halarci taron amma wasu ba za su halarta ba. Ko da mutane nawa ne suka halarci taron, ƙwazon da muka yi a lokacin wannan kamfen zai ɗaukaka Jehobah kuma ya nuna cewa shi mai karimci ne.—Zab. 145:3, 7; R. Yoh. 22:17.

3. Wane tsari ne za mu bi don rarraba takardun gayyatar?

³ Ya kamata kowane rukunin dattawa ya yanke shawara a kan yadda za a rarraba takardun gayyatar a yankin gabaki ɗaya, da kuma ko zai dace a ajiye wa mutanen da ba sa gida ko kuma a rarraba su sa’ad da ake wa’azi ga jama’a. A rarraba mujallu tare da takardun gayyatar a ƙarshen mako idan hakan zai yiwu. Bayan kamfen ɗin, za mu yi matuƙar farin ciki sa’ad da muka tuna cewa mun rarraba takardun da ƙwazo kuma mutane sun halarci wannan taron da Jehobah ya shirya mana!

Ana Samun Sakamako Mai Kyau

Shekaru da yawa da suka shige, wata ’yar’uwa da ta yi wannan kamfen ta yi tunanin ko ƙwazon da take yi wajen rarraba takardun gayyatar zai kawo sakamako mai kyau. Ta ce, ‘Shin mutane za su halarci taron yankin kuwa?’ A ranar Asabar da safe a Majami’ar Taron, ta ga wani ɗan addinin Sikh zaune kusa da ita, sai ta je ta gaishe shi. Bayan gaisuwar, ta lura cewa wani ne ya ba mutumin takardar gayyata zuwa taron. Mutumin ya yi mata tambayoyi da yawa kuma ta amsa duka. Sai ya gaya mata cewa yana jin daɗin taron kuma ado da ɗabi’ar waɗanda suka halarci taron sun burge shi sosai. Da rana kuma, ’yar’uwar ta soma taɗi da wasu ma’aurata da ke zaune kusa da ita. Su ma an ba su takardar gayyata ne kuma sai da suka shiga mota zuwa taron. Sun ce sun jin daɗin taron kuma za su sake halarta ranar Lahadi. Hakan ya sa ’yar’uwar ta san cewa kamfen da muke yi kowace shekara yana da muhimmanci sosai.
A wani taron yanki da aka yi a kwana kwanan nan, wasu majagaba mata da miji sun je su gaishe da wasu ma’aurata tsofaffi. Waɗannan tsofaffin sun ce lokaci na farko da suka halarci taronmu ke nan. Sai majagaban suka tambaye su, “Wane ne ya gayyato ku?” Sun ce, “Wata rana da muka dawo gida ne muka tarar da takardar gayyata a bakin ƙofarmu.” Sun karanta takardar kuma suka cika fom da ke bayan takardar. Wasu ’yan’uwa da suka halarci taron sun ba ma’auratan abinci. Sun ji daɗin taron sosai har suka ce za su dawo washegari. ’Yan’uwa sun shirya yadda za su ci gaba da tattauna Littafi Mai Tsarki da su.