Hanyoyin Kyautata Yadda Muke Wa’azi—Samun Wani da Za Ku Riƙa Kai wa Mujallu a Kai a Kai

Muhimmancinsa: Mutane da yawa da suke jin daɗin karanta mujallunmu ba sa so mu yi nazarin Littafi Mai Tsarki da su. Wataƙila don sun fi son addininsu ko kuma suna ji ba su da lokacin yin nazari. Amma, yayin da suke karanta mujallunmu a kai a kai, suna iya yin marmarin Kalmar Allah. (1 Bit. 2:2) Wani talifi zai iya ratsa zuciyarsu ko kuma yanayinsu zai iya canjawa. Idan muna ziyartarsu a kai a kai, hakan zai iya sa su saki jiki da mu kuma zai taimaka mana mu san abin da suka fi so. A sakamakon haka, za mu iya soma nazarin Littafi Mai Tsarki da su.

Yadda Za Mu Cim ma Hakan:

A kowane wata, ka keɓe lokacin da za ka kai musu sababbin Hasumiyar Tsaro da Awake! Kana iya ziyartarsu a wani lokaci dabam a watan don hakan zai iya sa su yi marmarin karanta mujallar da ka ba su ko kuma ka ba su littattafan da ake rarrabawa a watan. Ka riƙa rubuta ranar da ka kai musu ziyara da mujallun da ka ba su da batu da kuma nassosin da ka tattauna da su.—Ka duba Hidimarmu ta Mulki ta Janairu 2014, shafi na 3.
Ka yi shiri kafin ka kai ziyara. Maimakon ba su mujallun kawai, ka ɗan tattauna da su kuma ka zama abokinsu don ka iya ratsa zuciyarsu.
Ka nemi damar soma nazari da su. Idan wani da kake kai wa mujallu ya tambaye ka abin da Littafi Mai Tsarki ya ce game da wani batu, ka kawo masa wani littafin da ke ɗauke da amsar kuma ku tattauna shi tare. Kafin ka bar wurinsa, ka yi wata tambaya da ke da alaƙa da abin da kuka tattauna kuma ku tattauna tambayar sa’ad da ka sake dawowa. Idan kana yin amfani da Littafi Mai Tsarki ko littattafan nazari wajen tattaunawa da su a kai a kai, ko da na ’yan mintoci ne, kana gudanar da nazarin Littafi Mai Tsarki ke nan. Shin ka taɓa ba su ƙasidar nan Albishiri Daga Allah! kuma ka gwada yin nazari da su na ’yan mintoci? Shin ka nuna musu bidiyon nan Me Ya Sa Zai Dace Mu Yi Nazarin Littafi Mai Tsarki? da Yaya Ake Gudanar da Nazarin Littafi Mai Tsarki? Ko da ba su yarda a yi nazari da su a dā ba, yanayinsu zai iya canjawa. Shin zai dace ka sake gwadawa?

Ku Bi Shawarar Nan a Wannan Watan:

Ka rubuta jerin sunayen mutanen da za ka riƙa kai musu mujallu kowane wata. Ka ba su sababbin mujallu kuma ka gaya musu cewa za ka kawo musu na wata mai zuwa.