Hanyoyin Kyautata Yadda Muke Yin Wa’azi—Yadda Za Ka Zama Abokin Wa’azi Mai Taimako

Abin da Ya Sa Yake da Muhimmanci: Yesu ya san muhimmancin zuwa wa’azi tare da abokin wa’azi. Shi ya sa a lokacin da ya aiki almajiransa guda 70 yin wa’azi, ya haɗa su bibbiyu. (Luk 10:1) Abokin wa’azi zai iya taimakawa idan wanda yake tare da shi yana bukatar taimako a wani yanayi mai wuya sa’ad da suka fita wa’azi ko kuma idan bai san amsar da zai ba maigida ba. (M. Wa. 4:9, 10) Zai kuma iya gaya ma wanda yake tare da shi labarin abubuwan da ya taɓa fuskanta a wa’azi da kuma wasu shawarwari da za su iya taimaka ma abokin wa’azinsa ya ƙware sosai a yin wa’azi. (Mis. 27:17) Abokan wa’azi za su iya ƙarfafa juna ta irin tattaunawa da suke yi kafin su isa wani ƙofa.—Filib. 4:8.

Yadda Za Mu Iya Yin Hakan:

Ku saurara sa’ad da abokin wa’azinku yake tattaunawa da wani. (Yaƙ. 1:19) Ku riƙa buɗe naku Littafi Mai Tsarki kuma ku bi karatun yayin da abokin wa’azinku yake karanta wani nassi. Hakan zai ba ku damar taimakawa idan abokin wa’azinku yana bukatar taimako.
Sa’ad da wanda kuka fita wa’azi tare yana tattaunawa da wani, zai dace ku yi amfani da fahimi wajen sanin ko ya kamata ku saka baki ko a’a. (Mis. 25:11) Idan kuka je gudanar da nazarin Littafi Mai Tsarki da ɗalibin wanda kuka fita wa’azi tare, yin kalami sa’i-sa’i idan hakan ya dace zai iya taimaka masa. Amma, idan kuna wa’azi gida-gida ne, ƙila abokin wa’azinku ba zai so ku saka baki sa’ad da yake yi wa wani wa’azi ba. Hakika idan bai san amsar da zai bayar ga wata tambaya ba ko kuma shi sabon mai shela ne, wataƙila zai ji daɗi idan kuka taimaka masa a wannan lokacin. Amma, ko da kuna wa’azi gida-gida ko nazarin Littafi Mai Tsarki da wani ko kuma kun koma ziyara ne, kada ku katse wanda yake magana ko ku ƙwace tattaunawar gaba ɗaya ko kuma ku soma tattauna wani batu dabam.
Ku gaya wa juna labarin da kuke da shi game da wa’azi. Idan wani yanayi ya bukaci ku ba abokin wa’azinku shawarar da za ta taimaka masa ya ƙware a yin wa’azi, kada ku fasa yin hakan. (Mis. 3:27) Idan kuka sami dama, sai ku soma da cewa: “Yaya ka ga tattaunawar?” ko “Don Allah, bari in ba ka wata shawara,” ko kuma “Ga yadda nake bi da irin wannan yanayin.” Ku tuna cewa, wasu ba za su yi fushi ba idan ana ba su shawara sa’i-sa’i, amma idan ana musu gyara a kowane lokacin da suka yi kuskure, za su iya kasala.

Ku Bi Wannan Shawarar a Watan Nan:

Bayan kun gama yin wa’azi, ka gaya ma abokin wa’azinka wani abin da ya yi da ya sa ya zama abokin wa’azi mai ban taimako.