Yehova Imbwa Ki Abwate?

Ekero okorengereria igoro ya Yehova Nyasae, ninki gekogochera ase ebirengererio biao? Inee, nigo are bw’ogokumia korende akaba aare mono korwa asore, buna ching’eneng’eni chire aare? Gose inee, nigo okomorengereria koba nechinguru korende otari nechimbwa buna enkoba? Bori Yehova ere inaki are? Goetera Ring’ana riaye, Ebibilia, Yehova nigo agototebia egati yechimbwa chiaye, boigo nigo akogwechandera.

1. Naseki totari komorora Nyasae?

“Nyasae n’Omoika.” (Yohana 4:24) Yehova tabwati omobere buna oyoito. Ere n’Omoika nigo amenyete igoro ase totari korora.

2. Chimbwa chia Yehova nchirichi?

Neba Yehova tari kororekana, nabwate chimbwa chikogokia ase baria bamomanyete. Ebibilia nigo egoteba: “Omonene [“Yehova” NW] nigo anchete oboronge.” (Zaburi 37:28) Boigo ere “nomonyene amabeebe amange na amabera,” kobua mono ase abanto baria bagwetera emechando. (Yakobo 5:11) “Omonene [“Yehova” NW] nigo are ang’e nabwo chinkoro chiabo chiabunekire, nigo akobatooria abwo berusirie moyo.” (Zaburi 34:18) Inee, nomanyete ng’a nabo tokomokora Yehova agokigwe gose agechigwe? Omonto ogochora gokora ebinto ebibe nigo akomoichania naende omogechia. (Zaburi 78:40, 41) Korende oria ogokora ayare amaronge nigo akomorentera omogoko.—Soma Emerang’anio 27:11.

3. Inaki Yehova akoorokia ng’a natwanchete?

Embwa ya Yehova enene nobwanchani. Buna ere, “Nyasae nobwanchani.” (1 Yohana 4:8) Yehova nigo akoorokia obwanchani bwaye goetera ase Ebibilia, boigo goetera ase ebinto atongete. (Soma Ogokora kw’abatomwa 14:17.) Ase omobwekano, rora enchera atotongete. Otoire okobua gw’okorora chirangi chikogokia, gotegerera chingero chingiya, na gooncha endagera enyansu. Nigo aganetie togokere obogima.

EGERA AMANGE

4. Omoika omochenu—chinguru chiogokora chia Nyasae

Buna togotumeka amaboko aito gokora emeremo, nabo Yehova agotumea omoika oye omochenu. Ebibilia nigo egoasioria ng’a omoika omochenu tari Nyasae, korende nechinguru Nyasae agotumea goikerania ebinto. Soma Luka 11:13 na Ogokora kw’abatomwa 2:17, na mokwanere amaborio aya:

• Nyasae ‘nabaiterere’ omoika oye omochenu ase baria bonsi bakomosaba. Igo bono, okorengereria omoika omochenu Nyasae, gose ne chinguru chiogokora chia Nyasae? Naseki ogoteba boigo?

Yehova nigo agotumea omoika oye omochenu erio goikerania ebinto bi’ogokumia. Soma Zaburi 33:6 na 2 Petero 1:20, 21, na mokwanere riborio eri:

• Ase chinchera buna chirichi chinde Yehova atumiire omoika oye omochenu?

5. Yehova nigo abwate chimbwa chikogokia

Musa nigo arenge omosomba omwegenwa o Nyasae, korende akagania komomanya Omotongi oye buya mono. Erio Musa akabora asare: “Onyorokie chinchera chiao erinde inyare gokomanya.” (Okong’anya 33:13) Yehova akamotebia Musa chimbwa chiaye. Soma Okong’anya 34:4-6, na mokwanere amaborio aya:

• Imbwa buna chirichi Yehova atebetie Musa?

• Aye, imbwa ki chia Yehova chigokogokia?

6. Yehova nigo agwechandera abanto

Abanto ba Nyasae, Abaibirania, nigo barenge abasomba aaria Misri. Inaki Yehova aigwete ekero abanto baye bare gochandeka? Beka EREKOTI Y’OGOTEGERERA na obwatane nero, gose soma Okong’anya 3:1-10. Na mokwanere amaborio akobwatia.

EREKOTI Y’OGOTEGERERA: Yehova Agechanda Asengencho y’Emechando Yabo (2:45)

• Ase ayio gwasoma, Yehova inaki akoigwa ekero abanto bagochandeka?—Rora ebibungo 7 na 8.

• Inee, okorengereria Yehova naganetie kobakoonya abanto, naende nare nokobua kwogokora bo? Naseki okorengereria bo?

7. Nabo tokwegera chimbwa chia Yehova korwa ase ebinto atongete

Yehova nigo akoorokia chimbwa chiaye goetera ebinto atongete. Orokia EVIDIO. Na soma Abarumi 1:20, na mokwanere riborio rikobwatia.

EVIDIO: Obotongi Bwaorokirie Obwanchani bwa Yehova—Omobere o Mwanyabanto (1:57)

• Imbwa ki chia Yehova kwarorire ase ebinto atongete?

ASE OBWENG’E

Yehova ere n’Omoika otarikororekana na nigo abwate chimbwa chinyinge chingiya, kobua mono obwanchani.

Einyorie

• Naseki totari konyara komorora Yehova?

• Omoika omochenu ninki?

• Chimbwa chia Yehova nchirichi?

TUKA MONO

Momanye Yehova buya mono goetera kwegera igoro yechimbwa chiaye inye chinene.

“Chimbwa chia Nyasae Chirichi?” (Mnara wa Mlinzi Na. 1 2019)

Rora oboene bokoenekia ng’a Yehova tarigotoka kera aase.

“Inee, Nyasae Nigo Agotoka Kera Aase?” (Erikire ase omotandao)

Rora naseki Ebibilia ekobwekania omoika omochenu na amaboko a Nyasae.

“Omoika Omochenu Ninki?” (Erikire ase omotandao)

Nigo yarenge akong’u ase omosacha oyomo, orenge omouko kwegena ng’a Nyasae komwechandera are. Rora ekio kiamokoonyete goonchoreria ebirengererio biaye.

“Bono Nabo Nkonyara Gokoonya Abande” (Mnara wa Mlinzi, Oktoba 1, 2015)