ERESENI 17

Yeso Imbwa Ki Abwate?

Makala Iliyochapishwa

Ekero tokwegera igoro y’ebinto Yeso akwanete na gokora ase ense, nigo tokomanya chimbwa echio chigotong’usa toganie koba abasani ba Yeso na Ise oye, Yehova. Gati yechimbwa echio chikogokia mono nchirichi? Inaki toramwegie Yeso ase obogima bwaito?

1. Nase nchera ki Yeso anga Ise?

Ekero arenge igoro, Yeso akaba okomorigereria Ise oyio obwate obwanchani na kwegera korwa asare ase chibillioni chi’emiaka. Ase engencho eyio, nigo akorengereria, koigwa, na gokora buna Yehova. (Soma Yohana 5:19.) Ase ekeene, Yeso nigo akoorokia chimbwa chia Ise ase oboronge, erio agateba: “Oyondorire inche, ororire na Tata.” (Yohana 14:9) Buna okwegera igoro yechimbwa chia Yeso, noche komomanya buya mono Yehova. Ase omobwekano, enchera Yeso aorogetie abanto amabera nigo ekoorokia buna Yehova akogwechandera.

2. Naki Yeso aorokirie ng’a namwanchete Yehova?

Yeso agateba: “Nigo ngokora buna Tata anchigete, erinde ense emanye ng’a nimwanchete Tata.” (Yohana 14:31) Ekero arenge ase ense, Yeso akaorokia obwanchani obonene gochia ase Ise, goetera komoigwera nonya nekero yarenge akong’u gokora bo. Yeso nanchete gokwana igoro ya Ise na gokoonya abande koagacha obosani amo na Nyasae.—Yohana 14:23.

3. Inaki Yeso aorokirie ng’a nabanchete abanto?

Ebibilia nigo egoteba ng’a “nkaba nsasokerete mwanyabanto.” (Emereng’anio 8:31) Nigo aorogetie obwanchani goetera kobasegeta na kobakoonya abanto nenkoro yonsi. Nigo akorete ebikone erio koorokia chinguru chiaye na boigo amabera. (Mariko 1:40-42) Nigo arenge gokorera abanto ase obuya na tarenge kobaorokia ogwanchereria. Amang’ana aye nigo abaremetie na korwa ogosemeria gochia ase bonsi baria bamotegererete ase oboegenwa. Yeso akerua erio gochandeka na gokwa ase engencho y’obwanchani bwaye ase mwanyabanto bonsi. Korende nigo anchete baria boka bakobwatia amaorokererio aye.—Soma Yohana 15:13, 14.

EGERA AMANGE

Egera amange igoro yechimbwa chia Yeso. Na rora buna toraorokie obwanchani na korua n’omoyo bw’ogwancha buna akorete.

4. Yeso namwanchete Ise

Omobwekano o Yeso nigo ogotworokereria buna toraorokie obwanchani bwaito gochia ase Nyasae. Soma Luka 6:12 na Yohana 15:10; 17:26. Nyuma gwasomire kera ririko kwanera riborio eri:

Ase okomwegia Yeso, naki toraorokie ng’a ntomwanchete Yehova?

Yeso ogosaba. — Yeso nigo amwanchete Ise ore igoro na nigo arenge gokwana nere botambe goetera ogosaba

5. Yeso nigo agwechandera abanto bare n’okogania

Yeso agatang’ania amaganio y’abanto bande kobua okogania kwaye omonyene. Nonya ekero konyora arosire, nigo atumiete chingaki chiaye ne chinguru erio gokoonya abanto. Soma Mariko 6:30-44, na mokwanere amaborio aya:

Ase omogano oyo, nase nchera ki Yeso abechanderete abande?—Rora ebibungo 31, 34, 41, na 42.
Ninki kiamosegete Yeso erio gokoonya abanto?—Rora ekebungo 34.
Ase engencho Yeso akoorokia chimbwa chia Yehova, ninki chigokworokereria igoro ya Yehova?
Nchera ki chinde echio toramwegie Yeso ase okobechandera abande?

Yeso okorageria chilibu chia abanto goetera emegati etano na chinsu chinke ibere. Aborokigwa bakoenana endagera gochia ase abasacha, abakungu, na abana.

6. Yeso nigo akorua ase omoyo bw’ogwancha

Nonya Yeso tabwate binto binge nasangete ebio abwate nabande na nigo agotosegeta tobe nomoyo omorabu. Soma Ogokora kw’abatomwa 20:35, na mokwanere riborio eri:

Koreng’ana na Yeso naki torabe nomogoko?

Orokia EVIDIO, na mokwanere riborio rikobwatia.

EVIDIO: ‘Oyokorua Nabe Nomogoko Omonge’—Ekeng’ese (4:00)

Nchera ki chinde toranyare korua, nonya tore noboremeru?

Inee, nomanyete?

Ebibilia nigo egotworokereria tosabe ase Yehova goetera ase erieta ria Yeso. (Soma Yohana 16:23, 24.) Ekero togosaba ase enchera eyio, nigo tokoorokia ng’a nkoiraneria tore mbuya mono ase aria Yeso akorire erio gotokoonya koba abasani ba Yehova.

ABANTO BANDE NIGO BAGOTEBA: “Abanto nigo bagochandeka ase engencho Nyasae nere okobatema.”

Ase engencho Yeso akoorokia chimbwa chia Ise, naki amakora aye akoenekia ng’a tari Yehova okorenta emechando?

ASE OBWENG’E

Yeso nigo amwanchete Yehova, na nigo abanchete abanto. Ase engencho Yeso anga Ise, buna oragenderere komomanya Yeso buya mono, erio nario orache komomanya buya mono Yehova.