Nabo Okoba Omosani o Yehova

Yehova nigo aganetie omomanye buya. Naseki? Nigo asemeretie ng’a buna oragenderere kwegera igoro yechimbwa chiaye, chinchera chiaye, na okogania kwaye ase mwanyabanto, erio nario oraganie koba omosani oye. Inee, aye mbwegene ng’a nobe omosani o Nyasae? (Soma Zaburi 25:14.) Ninki orakore erio obe omosani oye? Ebibilia nkoiraneria ere amaborio ayio, naende yatotebia naseki obosani amo na Yehova bore bw’engencho mono oratware.

1. Ninki Yehova agokoarigania okore?

“Moike Nyasae ang’e na ere [nagoike] ang’e.” (Yakobo 4:8) Engencho y’amang’ana aya ninki? Yehova nigo agokoarigania obe omosani oye. Yabeire akong’u ase abande kwegena ng’a, mbabe abasani amo na Nyasae, ase engencho tibakonyara komorora. Nonya nabo, ase Ring’ana riaye, Ebibilia, Yehova oorokirie kera egento ekio toganetie erio komanya chimbwa chiaye erinde tonyare komoika ang’e. Ekero togosoma amang’ana a Nyasae gocha asetore, ase Ebibilia, obosani bwaito amo na Yehova nigo bogokina neba titwanyakomorora.

2. Naseki Yehova are Omosani bw’engencho oratware?

Onde taiyo ogwanchete mono kobua buna Yehova agwanchete. Yehova nigo atagete obe n’omogoko na gosaba asare ngaki ende yonsi otagete obokoonyi. Nabo okonyara ‘komotweka ogwechanda kwao gwonsi ekiagera ere nigo agwechanda mono ase engencho yao.’ (1 Petero 5:7) Botambe Yehova nigo are ang’e kobasiira, kobaremia, na kobategerera abasani baye.—Soma Zaburi 94:18, 19.

3. Ninki Yehova aganetie abasani baye bakore?

Yehova nanchete abanto bonsi, korende “nigo are omosani bw’abanto bamoirogete.” (Zaburi 25:14) Yehova nigo aganetie abasani baye bateme gokora ebinto biria akorora bire boronge, na betange gokora ebinto biria akorora bitari ebiya. Abanto bande nigo bakorora ng’a tibakonyara komenya koreng’ana n’ebirengo bia Yehova bi’amaya na amabe. Korende Yehova namanyete aya tokonyara. Yehova nigo akogokigwa na onde bwensi oy’okomwancha ase ekeene, na gotema gokora ayakomogokia.—Zaburi 147:11; Ogokora kw’abatomwa 10:34, 35.

EGERA AMANGE

4. Ibrahimu nigo arenge omosani o Yehova

Aria Ebibilia egoteba igoro ya Ibrahimu (naende okorokwa Aburamu) nigo agotokoonya komanya engencho y’okoba omosani o Nyasae. Soma igoro ya Ibrahimu ase Omochakano 12:1-4. Na mokwanere amaborio aya:

• Ninki Yehova amotebetie Ibrahimu akore?

• Eira ki Yehova amorierete?

• Ninki Ibrahimu akorete?

5. Ekio Yehova aganetie korwa ase abasani baye

Botambe nigo tokogania ebinto gete korwa ase abasani baito.

• Mbinto buna biribi oranche abasani bao bagokorere?

Soma 1 Yohana 5:3, na mokwanere riborio eri:

• Ninki Yehova aganetie korwa ase abasani baye?

Erio komoigwera Yehova ntoganeirie goonchoreria chitabia gose chimbwa chiaito. Soma Isaya 48:17, 18, na mokwanere riborio eri:

• Naseki Yehova aganetie abasani baye baonchorerie?

6. Ekio Yehova agokora erio gokoonya abasani baye

EVIDIO: Yehova Onkoonyire Mono (3:20)

• Ase evidio eye inaki Yehova amokoonyete omokungu ore gochandwa n’ebirengererio ebibe?

Soma Isaya 41:10, 13, na mokwanere amaborio aya:

• Eira ki Yehova ariereire abasani baye bonsi?

• Inee, okorengereria Yehova nabe Omosani bw’engencho? Naseki?

7. Erio koba omosani o Yehova ntobwenerete komokwanera na komotegerera

Ekero abasani bagokwana na gotegererana, nigo obosani bwabo bogoting’a. Soma Zaburi 86:6, 11, na mokwanere amaborio aya:

• Inchera ki torakwane na Yehova?

• Inchera ki Yehova ere agokwana naintwe?

ASE OBWENG’E

Yehova nigo aganetie koba Omosani oo, naende nagokoonye omoike ang’e.

Einyorie

• Inaki Yehova agokoonya abasani baye?

• Naseki Yehova agochika abasani baye baonchorerie?

• Inee, okorengereria Yehova naganetie amange korwa ase abasani baye? Naseki?

TUKA MONO

Inaki koba omosani amo na Nyasae koraonchorerie obogima bwao?

“Yehova—Nyasae Obwenerete Komanywa” (Mnara wa Mlinzi, Februari 15, 2003)

Egera buna orabe omosani o Nyasae.

“Inaki Ndanyare Koba Omosani o Nyasae?” (Maswali Ambayo Vijana Huuliza—Majibu Yafanyayo Kazi, Buku la 2, sura ya 35)

Manya naseki omokungu oyomo akorora ng’a, obosani bwaye amo na Yehova, nabwo bwagerete akamenya obogima obuya.

“Tinatagete Gokwa!” (Mnara wa Mlinzi Na. 1 2017)

Tegerera buna abasae bagoteba enchera bakoigwa igoro ya Yehova.

Ninki Engencho Yokoba Omosani o Nyasae? (1:49)