Inaki Obogima Bwachagete?

Nyasae “[nere] ore ensoko y’obogima.” (Zaburi 36:9) Inee aye mbwegenete boigo? Abanto bande nigo bagoteba ng’a obogima tibwatongetwe nonde. Onye nigo twachete mobasokano rirorio obogima tibori na ngencho. Korende onye Yehova Nyasae otongete obogima, igo obogima mbore n’ekerenga. Rengereria ango eki Ebibilia egoteba igoro y’omochakano bw’obogima. Naende naseki tobwenerete kwegena ng’a aria egoteba nayekeene.a

1. Ning’o otongete igoro na ense?

Ebibilia nigo egoteba: “Agwo Omochakano Nyasae nigo atongete igoro na ense.” (Omochakano 1:1) Abanasayansi abange nigo bagwancherana ng’a igoro na ense mbiabwate omochakano. Inee, naki Nyasae atongete igoro na ense? Nigo atumiete ‘omoika’ oye omochenu—chinguru chiaye chiogokora—gotonga kera egento igoro na ense amo neching’enang’eni.—Omochakano 1:2.

2. Naseki Nyasae atongete ense?

Yehova “Tayetongete ng’a ebe bosa, nigo ayetongete emenywe.” (Isaya 45:18) Nigo arosetie ense koba obomenyo obuya, erio etware ebinto bionsi mwanyabanto aganetie, erinde komenya goika kare na kare. (Soma Isaya 40:28; 42:5.) Sayansi yaenekirie ng’a ense nigo ere eyabeene. Nero yoka emanyekanete mwanyabanto aramenye.

3. Ninki gekogera mwanyabanto batari buna ching’iti?

Nyuma gatongire ense, Yehova agatonga obogima imeo. Ritang’ani, agaichoria ense n’ebimeri na ching’iti. Naende, “Nyasae agatonga mwanyabanto ase omogwekano oye omonyene.” (Soma Omochakano 1:27.) Ninki gekogera mwanyabanto bare aba beene? Ase engencho totongire ase omogwekano o Nyasae, nigo tokoorokia chimbwa chiaye, buna obwanchani na oboronge. Boigo nigo atotongete tore n’ebiegwa bi’okwegera emenwa ao ao, kogokera chibicha, na boigo kogokera chingero. Naende nigo tokomosasima Omotongi oito, ng’iti chinde chitari gokora bo.

EGERA AMANGE

Rora egekoenekia ng’a obogima nigo bwatongetwe na aria Ebibilia egokwanera igoro y’obotongi nare boronge. Egera ninki chimbwa chire ase mwanyabanto chigotoorokereria igoro ya Nyasae.

4. Obogima nigo bwatongetwe

Mwanyabanto nigo bagotogigwa ase ebinto bakoroisia ebio beegetie obotongi. Gati y’omotongi na oria bw’egetie obotongi ning’o ogwenerete konyora ogotogigwa? Orokia EVIDIO, na mokwanere riborio rikobwatia.

EVIDIO: Komwegena Nyasae (2:43)

• Ninki mwanyabanto baroisiri ekio beegetie obotongi?

Kera enyomba nigo ekoroswa na koagachwa n’omonto. Korende ning’o orosete na koagacha ebinto bionsi ebitongire? Soma Abaibirania 3:4, na mokwanere amaborio aya:

• Gati y’ebinto bitongire mbiribi bigokogokia aye?

• Inee ngoisanekia ere kwegena ng’a, igoro na ense n’ebinto bionsi bire imeo nigo biatongetwe? Naseki?

Inee, nomanyete?

Nabo okonyora ebitabu na chividio igoro y’etobiki eye ase jw.org ase omobwatano oyo “Inee, ne Emeremo y’Obotongi?” na “Ebirengererio Igoro y’Omochakano bw’Obogima.”

“Kera enyomba nigo ekoagachwa nomonto, korende Nyasae nere omoagachi bw’ebinto bionsi”

5. Chisababu nchireo chingiya chi’okwegena ng’a aria Ebibilia egoteba igoro y’obotongi n’ayekeene

EVIDIO: Inee, Igoro na Ense Nchiatongetwe?—Ekeng’ese (3:51)

• Inee, Ebibilia ngotoorokereria ere ng’a ense na obogima bore imeo nigo biatongetwe ase amatuko 6 kera rituko rire obotambe bwe chinsa 24?

• Inee, okorengereria amang’ana Ebibilia egokwanera igoro y’obotongi n’ayekeene na nkoegeneka are? Naseki?

Soma Omochakano 1:1, na mokwanere riborio eri:

• Abasayansi nigo bagoteba ng’a igoro na ense mbiabwate omochakano. Inee, ebirengererio biabo nkoigwanana bire naria ogosoma ase Ebibilia?

Abanto bande nigo bakorengereria ng’a Nyasae nigo atumiete eborusoni (evolution) gotonga obogima. Soma Omochakano 1:21, 25, 27, na mokwanere amaborio aya:

• Inee Ebibilia ngoorokereria ere ng’a Nyasae nigo atongete obogima botare na engencho bogaonchoka bokaba chinswe, ching’iti, na mwanyabanto? Gose nigo atongete obogima bwensi ase “kera egesaku nengencho yaye?”b

6. Mwanyabanto nigo bare ebitongwa bia beene bia Nyasae

Intwe titobwekaini ching’iti echio Yehova atongete. Soma Omochakano 1:26, na mokwanere riborio eri:

• Ase engencho totongire ase omogwekano o Nyasae, nkonyara tore koorokia obwanchani na amaabera Nyasae ere imbwa ki akoorokia?

ASE OBWENG’E

Yehova nigo atongete igoro na ense na obogima bwensi boreo.

Einyorie

• Ninki Ebibilia ekoorokereria buna igoro na ense biachagete?

• Inee Nyasae nigo atongete obogima bwensi, gose nigo atigete bogaonchoka korwa ase obogima botare na engencho na koba n’echingencho ao ao?

• Inaki mwanyabanto bare aba beene?

TUKA MONO

Rora emebwekano y’obotongi ekoenekia ng’a Omotongi nareo.

“Ninki Tokwegera Korwa ase Obotongi?” (Amkeni!, Septemba 2006)

Rora buna omwana araorokererigwe na ise igoro y’amang’ana Ebibilia egokwanera igoro y’obotongi.

‘Yehova Agatonga Ebinto Bionsi’ (2:37)

Rora gati ya eborusoni na Ebibilia ninki kegokwana ekeene.

“Inee, Nyasae Eborusoni Atumiete Gotonga Obogima Ao Ao ?” (Erikire ase omotandao)

Ringoria gose ebinto bia kare na obotuki bwa sayansi, nigo bikoorokia ng’a obogima ebwatongetwe gose ebweretete bwoka obonyene.

Amaborio Atano Yengencho Buna Obogima Bwachagete (eburoshua)