Jarrespetákena umi ótro odesidíva

1, 2. ¿Mbaʼérepa la jadesidíva ikatu idiferénte la odesidívagui umi ermáno ha ermána?

¿OÑEÑEʼẼ vaímapa raʼe nderehe algúna ves la redesidi vaʼekuére? ¿Térãpa nde voi ekritika raʼe peteĩ ermáno térã ermánare odesidi haguére álgo? Katuete koʼã mokõi mbaʼe oiméne oikóma raʼe nderehe.

² Sapyʼánte ningo jadesidítante voi diferénte umi ermanokuéragui, ha upéva normál. ¿Mbaʼérepa? Pórke ñanediferénte ojuehegui. Káda uno oreko la opensa lája ha upéva odepende asegún la ikultúra, mbaʼéichapa okakuaa raʼe ha umi mbaʼe ohasa vaʼekuére. Péro nañapensáiramo jepe jojapa, ndajahejái vaʼerã upéva ombyai pe unida oĩva kongregasiónpe ha ndajaikovéi pyʼaguapýpe ermanokuérandi (Efes. 4:3).

3. ¿Mbaʼérepa sapyʼánte jahusgase la peteĩ ermáno térã ermána odesidíva?

³ Peteĩ ermáno térã ermána odesidi jave álgo nañandegustáiva ikatu hína ñande jaʼese chupe okambia vaʼerãha la opensáva, térã jaʼe voi ótrope upe ermáno odesidi vaiha. Provávlemente jajapose koʼã mbaʼe pórke jahayhu ñane ermáno ha ermanakuérape, avei jajepyʼapy hesekuéra ha jaipota la iporãvéva chupekuéra g̃uarã (Prov. 17:17). Ndajaipotái ningo upe ermáno térã ermána upéi ombyasy la odesidi vaʼekue térã upéva káusare oñemomombyry Jehovágui.

4, 5. ¿Mbaʼépa jajapo vaʼerã peteĩ ermáno odesidíramo álgo ñandéve nañandegustáiva?

⁴ ¿Tekotevẽpa jaha ñañeʼẽ peteĩ ermáno térã ermánandi ñapensárõ oĩ vaiha hína la odesidíva? Upéva ningo odependéta la isituasiónre. Por ehémplo ñamoĩ chupe peteĩ ermáno ojaposeha peteĩ mbaʼe la Biblia heʼíva oĩ vaiha, péicha jave ñaipytyvõséta chupe okambia hag̃ua la opensa lája jahayhúgui chupe (Prov. 27:​5, 6). Péro epensamína upe ermáno ojaposeha peteĩ mbaʼe ndohóiva Jehová léi kóntrape, sólo ke ñandévente nañandegustái hína upe odesidíva. ¿Mbaʼépa jajapóne péicha jave? La Biblia ñanepytyvõ ñambohovái hag̃ua upéva. Romanos 14:​1-pe heʼi: “Ani pehusga umi mbaʼe káda uno ikatúvare odesidi”.

⁵ Upéicharamo jepe ikatu hína ijetuʼu ñandéve jaasepta umi ótro desisión. Upévare ko artíkulope jahecháta mbaʼérepa jarrespeta vaʼerã la ótro odesidíva ha mbaʼéichapa ikatu jajapo upéva. Péro primero ñaanalisáta mbaʼéicha rupípa ikatu jaju ñañeʼẽ vai peteĩ ermáno térã ermána odesidi vaʼekuére. Jahechamína unos kuánto ehémplo.

¿MBAʼÉREPA IKATU HÍNA JAHUSGA LA ÓTRO ODESIDÍVA?

6, 7. Emombeʼu peteĩ ehémplo ohechaukáva mbaʼeichagua situasiónpepa jahusgase jepi la ótro odesidíva.

⁶ Jahecháma haguéicha káda uno jareko ñapensa lája asegún mbaʼéichapa jakakuaa vaʼekue ha umi mbaʼe jahasáva. Ikatu voi hína ñaimoʼã umi ótro opensataha ñande ñapensaháicha, péro ndahaʼéi hína upeichaite. Jahechamína unos kuánto ehémplo ohechaukáva upéva. Ehémplo 1: Oiko mboyve chugui Testígo, peteĩ ermáno okakuaa aja ohecha mbaʼeichaitépa itúa ikaʼu. Upéi peteĩ díape ko ermáno oñembyaty unos kuánto ermánondi ha ohecha umi ermáno hoʼuha vevída. Upémarõ haʼe ipochy ha heʼi chupekuéra oĩ vaiha la ojapóva hikuái. Ehémplo 2: Peteĩ ermána okuera peteĩ mbaʼasýgui. Upéi haʼe oñentera oĩha ótra ermána orekóva avei peichagua mbaʼasy. Pe ermána okuera vaʼekue oipytyvõseterei pe ótra ermánape, upévare haʼe ojopy chupe ojapo hag̃ua la mísma kósa haʼe ojapo vaʼekue. Ikatu oime heʼi chupe mbaʼeichagua tembiʼúpa hoʼu vaʼerã, mbaʼe tratamiéntopa osegi vaʼerã térã mbaʼe pohãpa okonvenive. Ehémplo 3: Peteĩ ermáno oiko mboyve chugui Testígo oĩ vaʼekue ótro rrelihiónpe. Haʼe opyta ndoikuaasevéi mbaʼeve upe rrelihióngui. Upéinte haʼe ou oñentera peteĩ ermáno oho hague peteĩ funerálpe tupaópe, ha upémarõ haʼe ipochyeterei.a

⁷ Jahechamína avei ótro káso. Ehémplo 4: Peteĩ ermáno okakuaa tiémpope heta hénte opensa vaʼekue ivaiha peteĩ kuimbaʼe oipuru várva térã umi kuña oipuru pantalón ohóta jave rreunión, asambléa ha predikasiónpe. Koʼág̃a pe ermáno oikuaa umi instruksión pyahu omeʼẽva pe esklávo de konfiánsa ko témare, péro lomímonte osegi heʼi umi ótrope ndovaleiha peteĩ ermáno oipuru várva térã umi ermána osegínte vaʼerãha oipuru sólamente polléra ha vestído. Ehémplo 5: Peteĩ ansiáno oikuaa kuri peteĩ mitãrusu otermina rire ikoléhio osegi hague ostudia ha upéi ou oñemomombyry Jehovágui. Koʼág̃a pe ansiáno oñentera peteĩ mitãrusu ikongregasionpegua odesidi hague osegitaha ostudia. Pe ansiáno ojepyʼapyeterei anga hese, upévare oñehaʼã okonvense pe mitãrusúpe ha ituakuérape okambia hag̃ua la odesidíva.

8. a) ¿Mbaʼérepa algúno túa ha sy ikatu oñepyrũ ohusga umi ótro tuakuérape? b) ¿Mbaʼépa ikatu oiko jakritikárõ umi ermánore umi mbaʼe odesidívare?

⁸ Jahechamína peteĩ ehémplo tuakuérape g̃uarã. Ehémplo 6: Peẽ ningo katuete peñehaʼã “pemongakuaa, pekorrehi ha peñemoñeʼẽ” pene famíliape “Jehová heʼiháicha” (Efes. 6:4). Péro ikatu oime umi ótro túa opermiti ifamíliape ojapo umi mbaʼe peẽ ndapehejáiva pene famíliape. Por ehémplo ikatu oime oĩ ohejáva ifamíliape og̃uahẽ tárde hógape, ohuga umi videohuégo naivioléntoiva ha omeʼẽ chupekuéra teléfono imitãiterei reheve. Upéicha rupi pene família ikatu heʼi peẽme: “Peẽ ningo pejopyetereíma orendive, ore amigokuéra túa ndahaʼéi upéicha”. Koʼã mbaʼe oikóramo penderehe, ikatu hína peñepyrũ pehusga umi ótro tuakuérape ha pepensa vai hesekuéra. Jahecháma haguéicha, umi ótro odesidi jave peteĩ mbaʼe nañandegustáiva ikatu voi ñañepyrũ ñandepochy ha ñapensa vai hesekuéra. Por ehémplo ikatu hína nañandegustái mbaʼéichapa peteĩ ermáno térã ermána ogasta ipláta, mboy vésepa oho de vakasión ha mbaʼe diversiónpa oiporavo. Péro ñanemanduʼa vaʼerã umi mbaʼe ñapensáva ha ñañandúva ndahaʼeiha la iñimportantevéva, upévare ndajahejái vaʼerã umíva ombyai pe unida oĩva kongregasiónpe.

9. ¿Mbaʼépa enterovéva jahupytyse ha mbaʼépa ndovaléi jajapo? (Ehecha pe taʼanga).

⁹ La ñande jadesidíva ningo ikatu idiferénte la ótro ermáno térã ermána odesidívagui, péro upéva ndeʼiséi la ñande jadesidíva oĩ porãha ha pe ermáno térã ermána odesidíva oĩ vaiha (Rom. 14:5). La Biblia ningo heʼi ñañemoĩ vaʼerãha “peteĩ ñeʼẽme”. Upéva heʼise enterovévante jajapo vaʼerãha umi mbaʼe Jehová ohaʼarõva ñandehegui, péro ndeʼiséi hína enterovéva ñapensa vaʼerãha elmimoite opa mbaʼépe (2 Cor. 13:11). Epensamína ko ehémplore: Ñamoĩ chupe unas kuánta persóna oviahaseha og̃uahẽ hag̃ua peteĩ lugárpe ha oĩ diferénte tape ohóva upépe. Jaikuaaháicha káda uno ikatu oelehi moõrupipa ohóta asegún mbaʼépa la ogustavéva ha okonvenivéva chupekuéra. Upéicha avei oĩ heta mbaʼe káda kristiáno ikatuhápe odesidi mbaʼépa ojapóta, ha peichagua situasiónpe ndajadesidimoʼãi elmimoite. Péro amo ipahápe entéronte jahupytyse la mísma kósa, jaipota Jehová ovyʼa ñandereheve. Upévare aníkena jahusga umi ótrope umi mbaʼe odesidívare (Mat. 7:1; 1 Tes. 4:11).

¿MBAʼÉREPA JARRESPETA VAʼERÃ UMI ERMANOKUÉRA ODESIDÍVA?

10. Ohechaukaháicha Santiago 4:​12, ¿mbaʼe deréchopa ndajarekói ha mbaʼérepa?

¹⁰ La Biblia heʼi ñandéve mbaʼe mbaʼérepa jarrespeta vaʼerã la umi ermáno odesidíva. Por ehémplo, ñande ndajarekói derécho jahusgávo ñane ermánope umi mbaʼe káda uno ikatuhápe odesidi la ojapótava (elee Santiago 4:12). Jehová hína pe hués ha pe omeʼẽva pe léi, upévare haʼe añoite ikatu heʼi mbaʼépa ovale ha ndovaléi jajapo. Upéicha rupi umi ermáno ha ermána ojecháta Jehová ndive la odesidívare ha ndahaʼéi ñanendive (Rom. 14:10). Ñande ñapensáramo jepe diferénte umi ermáno ha ermánagui, nokorrespondéi ñandéve jahusga ñane ermánope ni jakritika la odesidívare.b

11. ¿Mbaʼéichapa ñaipytyvõta oĩ hag̃ua unida kongregasiónpe? (Ehecha pe taʼanga).

¹¹ Jehová oipota isiervokuéra oĩ unído, péro ndeʼíri enterovéva elmimoite vaʼerãha. Entéronte ningo ñanediferenteterei ojuehegui ha upéva la ogustáva Jehovápe. Pe ikreasiónre voi jahecha upeichaha. Por ehémplo ñapensamína peteĩ yvyramátare, umi hogue ojojoguaiterei péro ni peteĩva ndahaʼéi elmimoite. Ha koʼág̃a ñapensami umi persónare. Ñaime ningo mas de 8 mil millón ko yvy ape ári, péro ndaipóri mokõi persóna ikatúva jaʼe haʼeha elmimoite ipíntape térã ilájape. Jehová ningo ñandeapo vaʼekue voi ñanediferénte hag̃ua ojuehegui ha ndahaʼéi jajokopiapa hag̃ua, péro si oipota jaiko peteĩ ñeʼẽme. Upévare jaaseptánte vaʼerã oĩ jave peteĩ odesidíva diferénte ñandehegui ha ani ñandepochy hendive. La iñimportantevéva hína jaiko peteĩ ñeʼẽme kongregasiónpe, upévare ñambotapykuéntema umi mbaʼe ñapensáva ha ñandegustáva (Rom. 14:19).

¿MBAʼÉICHAPA IKATU JAHECHAUKA JARRESPETAHA LA ÓTRO ODESIDÍVA?

12, 13. ¿Mbaʼépa ñañeporandu vaʼerã oimérõ jahecha oĩha álgien ohóva “tape vaíre”? (Gálatas 6:1; Ehecha pe rrekuádro “Repensa jave peteĩ ermáno odesidi vaiha”).

¹² Umi situasión káda uno ikatuhápe odesidi la ojapótava. Peteĩ ermáno odesidi jave peteĩ mbaʼe, iporãta reñeporandúramo: “¿Oho piko hína legálmente upe persóna ‘tape vaíre’, térãpa odesidínte hína peteĩ mbaʼe chévente ndachegustáiva?”. Ñamoĩ chupe pe ermáno ohoha tape vaíre pórke ojapo hína peteĩ mbaʼe la Biblia heʼíva oĩ vaiha. Péicha jave ikatu reñeporandu: “¿Oĩ porãta piko che ahárõ añeʼẽ upe ermánondi, térãpa opyta porãvéta peteĩ ansiáno térã ótro ermáno oñeʼẽramo hendive?”. Oimérõ nde hína pe oipytyvõ porãvétava chupe ikatu reñeʼẽ hendive, péro ejapókena upéva mborayhúpe (elee Gálatas 6:1). Péro legálmente hetave kásope pe ermáno térã ermána ndohói hína tape vaíre, síno odesidínte hína peteĩ mbaʼe idiferénteva la ñande jadesidíta vaʼekuégui. Oimérõ upéicha, aníkena ekritika hese ni eiko ere oĩ vaiha hína la odesidíva. Upe ermáno térã ermána ningo oreko derécho odesidi hag̃ua ijehegui la ojapótava. Upévare nde rerrespeta vaʼerã chupe ha ani ehusga upe ermánope (Rom. 14:​2-4).

¹³ Epensamína ko ehémplore. Ñamoĩ chupe rehoha ne amígondi pekaru hag̃ua peteĩ lugárpe. Ajépa nderejopymoʼãi hína upe ne amígope ojerure hag̃ua avei pe tembiʼu nde rejerurétava. Nde ningo reipota upe ne amígo hoʼu pe tembiʼu ogustavéva chupe. Amo ipahápe la haʼe ojeruréva nandegustáiramo jepe noimportái, pórke haʼe hína la hoʼútava upe tembiʼu, ndahaʼéi nde. Epensa porãramo, ndéve avei nandegustamoʼãi haʼe ojeruréramo pe tembiʼu ogustáva chupe nembaʼerã. Ko ehémplo ñanemboʼe jahechaukataha jarrespetaha umi ótrope jahejávo chupekuéra odesidi ijeheguiete, ha ndajajopýi vaʼerã chupekuéra ojapo hag̃ua la ñande ñapensáva oĩ porãha.

14. Jadesidíta jave peteĩ mbaʼe, ¿mbaʼéichapa ñaipytyvõta oĩ hag̃ua unida kongregasiónpe? (1 Corintios 8:​12, 13).

¹⁴ Umi situasión nde ikatuhápe redesidi la rejapótava. Ñañehaʼãmbaite vaʼerã ani ñaofende umi ótrope jadesidi jave peteĩ mbaʼe, upéicha ñaipytyvõta oĩ hag̃ua unida kongregasiónpe (elee 1 Corintios 8:​12, 13). Ñamoĩ chupe nde redesiditaha rejapo peteĩ mbaʼe ha reikuaa porã upe rejapótava ndaivairiha. Péro epensamíntena, upe redesidíva ombopochýtarõ peteĩ ermáno térã ermánape, ¿ikatúpa ere upe rejapótava ‘ideprovechotaha’? (1 Cor. 10:​23, 24).c Péicha jave aníkena eñemohatã ha epensa: “Chéko ikatu ajapo la ajaposéva”. Upéva rangue iporãvéta repensáramo mbaʼéichapa umi ótro oñeñandúta (Rom. 15:1). ¿Péro ndajaʼéi piko raʼe umi ótro orrespeta vaʼerãha avei umi mbaʼe ñande ikatúva jadesidi? Upéicha ningo, haʼekuéra orrespeta vaʼerã la ñande jadesidíva, ñande jarrespetaháicha chupekuéra. Péro jareko vaʼerã avei enkuénta la Biblia heʼíva Romanos 12:​18-pe. Upépe heʼi: “Pejapókena entéro mbaʼe ikatúva peiko hag̃ua pyʼaguapýpe pende rapichakuérandi”. Upéicharõ, ñañehaʼãmbaitékena jajapo oĩva guive ñande posivilidápe jaiko hag̃ua pyʼaguapýpe umi ermáno ha ermánandi, ha oimérõ jaikuaa pe jajapótava ikatuha ombopochy chupekuéra, mehorvénte ndajajapói.

15. ¿Mbaʼéichapa ansianokuéra oipytyvõ oĩ hag̃ua unida kongregasiónpe? (1 Corintios 4:6).

¹⁵ Umi ansiáno ohechauka orrespetaha umi ermanokuéra odesidíva. Umi ansiáno avei oipytyvõ oĩ hag̃ua unida kongregasiónpe. ¿Mbaʼéichapa? Haʼekuéra ndoikói omoĩ rrégla umi situasión káda ermáno ha ermána ikatuhápe odesidi la ojapótava. Avei haʼekuéra ojesegi “Ñandejára Ñeʼẽ heʼívarente” (elee 1 Corintios 4:6). Upéicha rupi haʼekuéra ndoikomoʼãi heʼi mbaʼeve ndaipóriva ñane puvlikasionkuérape térã la Bíbliape. Avei peteĩ ermáno ojerure jave konsého umi ansiánope, haʼekuéra ndeʼimoʼãi chupe la opensávante síno oipurúta hikuái la Biblia omeʼẽ hag̃ua konsého (Is. 48:​17, 18).

16. ¿Mbaʼéichapa káda ansiáno ikatu ohechauka orrespetaha la odesidíva pe kuérpo de ansiáno?

¹⁶ Káda ansiáno orrespeta la odesidíva pe kuérpo de ansiáno. Ojedesidíta jave peteĩ mbaʼe, umi ansiáno oñemboʼe ojerure hag̃ua espíritu sánto, ohecha porã hikuái mbaʼépa heʼi la Biblia ha upéi oñondivepa odesidi peteĩ mbaʼe. Péicha jave káda ansiáno oapoja vaʼerã la odesidíva pe kuérpo de ansiáno, oĩramo jepe opensáva diferénte (Efes. 5:17). Avei umi ansiáno orresivi jave peteĩ instruksión ñane organisasióngui ojekuida ani hag̃ua ontende haʼekuéra ontendeseháichante, ni ndoikói omoĩve hikuái la opensáva. Por ehémplo peteĩ ansiáno ni mbaʼevéicharõ noñakaramái peteĩ fráserente oĩva ñane puvlikasiónpe ohechauka hag̃ua la haʼe heʼíva siertoha. Upéva rangue haʼe orekóta enkuénta la heʼíva upe informasión kompletoite.

17. ¿Mbaʼe iporãvapa ojehupyty jarrespetáramo la ótro odesidíva?

¹⁷ Ko artíkulope jahecha entéronte ñanediferenteha ojuehegui umi mbaʼe ñandegustávape ha ñapensávape. Upéva ningo omoporãiterei Jehová organisasiónpe. Káda uno ningo ñanediferénte ñande lájape ha mbaʼéichapa jakakuaa raʼe. Upéicha rupi kongregasiónpe enterovetévante ikatu oñeñandu porã. Ñanediferénteramo jepe ojuehegui, ndajahejái vaʼerã upéva ñandedividi síno ñañehaʼã vaʼerã jaiko pyʼaguapýpe. Upévare jajapo ikatúva guive ani hag̃ua ñaofende ótrope ha jarrespeta la haʼekuéra odesidíva. ¡Péicha ñaĩta peteĩ ñeʼẽme kongregasiónpe ha enterovévante oikóta vyʼápe! (Sal. 133:1; Mat. 5:9).