Aníkena reñemomombyry Jehovágui restudia aja

1, 2. a) Redesidíramo restudiave, ¿mbaʼépa resegi vaʼerã rejapo? b) ¿Mbaʼépa heʼise la oĩva Filipenses 3:​16-pe?

ALGÚNO testígo de Jehová odesidi ostudiavetaha otermina rire pe edukasión vásika ojeruréva pe goviérno. Haʼekuéra ikatu oime opensa umi estúdio oipytyvõtaha chupekuéra otopa hag̃ua peteĩ traváho ikatu hag̃uáicha oñemantene ha osegi oservi porã Jehovápe. Oimérõ nde redesidi raʼe restudiavetaha, ¿mbaʼépa ikatu rejapo ani hag̃ua reñemomombyry Jehovágui? (Sant. 4:8a). Katuete heta mbaʼe ijetuʼúva reaguanta raʼe reĩrõ guare eskuéla ha koléhiope, ha koʼág̃a tekotevẽ ‘esegi reiko péicha ha eho meme tenonde gotyo’. Upéva heʼise esegi vaʼerãha eservi Jehovápe fiélmente rejapoháicha voi koʼág̃a peve (elee Filipenses 3:16).

² Idióma griégope pe fráse ojetradusíva “jasegíkena jaiko upéicha ha jaha meme tenonde gotyo” ojepuru vaʼekue oñeñeʼẽ hag̃ua umi ehérsitore. Umi soldádo oguata jepi jojaite tenonde gotyo ha ndoguevíri hikuái. Péicha avei oimérõ nde redesidi restudiavetaha, tekotevẽ avei reho meme tenonde gotyo Jehová servísiope ha ni mbaʼevéicharõ nderepytái ni ndereguevíri vaʼerã. Upévare ko artíkulope jahecháta 4 konsého bíblico nepytyvõtava upearã. Nde ningo reikuaa ha rejapóma voi la heʼíva koʼã konsého bíblico, péro ani hag̃ua reñemomombyry Jehovágui tekotevẽ nemanduʼa meme koʼã konséhore restudia aja ha restudiapa rire avei.

ESEGÍKENA EJAPO UMI MBAʼE NEMOAG̃UÍVA JEHOVÁRE

3. Reñepyrũvo restudia, ¿mbaʼépa ikatu oiko?

³ ¿Mbaʼépa ikatu oiko? Reñepyrũvo restudia katuete erekóta hetave mbaʼe rejapo vaʼerã káda día. Jaikuaa ningo reñehaʼãmbaitetaha oho porã hag̃ua ndéve la nde estúdiope. Upéicha jave ikatu hína reñepyrũ rembotapykue Jehová servísio, ikatu voi hína reñepyrũ refalta rreunionhápe, nderepredikameméi, ndereleevéima la Biblia káda día ha reñemboʼe saʼive (Apoc. 2:4).

4. ¿Mbaʼépa heʼise ‘ñanerembiapo heta vaʼerãha ñande Ruvicha servísiope’? (1 Corintios 15:58).

⁴ (Elee 1 Corintios 15:58). Epensamíntena, reho hag̃ua tenonde gotyo peteĩ visikléta ári tekotevẽ esegi epedalea. Péicha avei remombarete hag̃ua ne amista Jehovándi, resegi vaʼerã ‘nerembiapo heta ñande Ruvicha servísiope’. Upéva ndeʼiséi rehasánte vaʼerãha tiémpo Jehová servísiope, síno reñatende vaʼerã avei mbaʼépa la nemomýiva rembaʼapo hag̃ua Ñandejárape g̃uarã. Nemanduʼákena Jehová la iñimportanteve vaʼerãha ndéve g̃uarã, ndahaʼéi umi estúdio (Mat. 22:37). Peteĩ ermána imitãva hérava Samantha heʼi: “Che haʼe vaʼekue la che estúdio káusare ndaikatuvéi mbaʼérõ aservi Jehovápe, upepete ahejataha la che estúdio”.

5. ¿Mbaʼépa ikatu rejapo resegi hag̃ua nerembiapo heta Jehová servísiope?

⁵ ¿Mbaʼépa ikatu rejapo reñepyrũ mboyve la nde estúdio? Ejasegurákena resegitaha remotenonde Jehovápe. Upearã ikatu eñeporandu: “¿Mbaʼépa ajapóta pono afalta rreunionhápe, apredika ha astudia meme hag̃ua la Biblia?” (Jos. 1:8; Mat. 28:​19, 20; Heb. 10:25). Iporã avei eñeporandu mbaʼéichapa reĩrõ guare koléhiope remotenonde vaʼekue umi mbaʼe iñimportantevéva. Oimérõ rehechakuaa ikatu hague emehora algúna kósape, eñehaʼãkena ejapo umi kámbio. Ejedesidíkena esegitaha nerembiapo heta Jehová servísiope restudia aja ne profesionrã. Jaikuaa eñehaʼãmbaitetaha eho porã hag̃ua la nde estúdiope, péro aníkena upéva rehehápe embotapykue Jehovápe (Mat. 6:24).a

6. ¿Mbaʼe mbaʼépa ikatu reñeporandu? (Ehecha pe taʼanga).

⁶ Reñepyrũ rire restudia, eñemotiémpokena káda mes ehecha hag̃ua resegípa hína remotenonde Jehovápe. Upearã ikatu eñeporandu: “¿Pyʼỹintepa afalta rreunionhápe térã ag̃uahẽ tárde? ¿Apensa memépa che taréare aĩ aja rreunionhápe? ¿Ajepokuaápa añekonektántema rreunionrã aha rangue aime umi ermáno ha ermánandi?”. Avei iñimportánte epensa koʼã mbaʼére: “¿Saʼivépa añemboʼe ha alee la Biblia koʼág̃arupi? ¿Ahápa predikasiónpe aikuaáguinte ajapo vaʼerãha upéva? ¿Aipotántemapa og̃uahẽ pe óra opa hag̃ua predikasión?”. Oimérõ epilla oikoha nderehe koʼã mbaʼe, pyaʼékena ejapo umi kámbio tekotevẽva. Aníkena esakrifika Jehová servísio emotenonde hag̃ua umi estúdio.

ESEGÍKENA EPENSA PORÃ

7. Restudia aja, ¿mbaʼéichapa ikatu hína reñepyrũ repensa?

⁷ ¿Mbaʼépa ikatu oiko? Asegún la mbaʼépa restudia, ikatu omoinge hikuái ne akãme umi mbaʼe ko múndo omboʼéva péro noĩporãiva la Biblia omboʼévandi. Por ehémplo ikatu omboʼe hikuái la vída oñepyrũ hague pe evolusión rupive térã Ñandejára ndoexistiriha. Koʼãvape la Biblia ohenói voi “yvypóra arandu” ha ‘vyrorei oporombotavýva’ (Col. 2:8). Umi profesór ikatu nemboʼe rejerovia vaʼerãha ndejehe. Peteĩ ermáno imitãva ostudia vaʼekue heʼi: “Ndéko reho reñembokatupyry hag̃ua peteĩ mbaʼépe, péro ndahaʼéi upévante la reaprendéva. Umi profesór nemboʼe voi mbaʼéichapa repensa vaʼerã ha upéva pyʼỹinte idiferénte la Jehová opensa lájagui. Por ehémplo oremboʼe vaʼekue hikuái rojeroviámante vaʼerãha orejehe rosẽ porã hag̃ua, upévare che añepyrũ vaʼekue apensa naikotevẽiha Jehováre avyʼa hag̃ua ha ijetuʼuve vaʼekue chéve akonfia hag̃ua hese”.

8. ¿Mbaʼérepa iñimportánte ‘ñapensa porã’? (Proverbios 5:​1, 2).

⁸ (Elee Proverbios 5:​1, 2). La Biblia heʼi ñandéve tekotevẽha ‘ñapensa porã’. Upéva ningo iñimportanteterei pórke Satanás ha imúndo tódo el tiémpo oñehaʼã okambia ñapensa lája ikatu hag̃uáicha ñapensa haʼekuéraicha (1 Ped. 5:8). Ko múndo opensáva ha la Biblia heʼíva idiferénte heta mbaʼépe. Upévare ikatu eñepyrũ eduda mbaʼépa oĩ porã ha mbaʼépa oĩ vai, mbaʼéichapa oñepyrũ la vída ha oexistípa añete Ñandejára. Umi profesór ha umi ótra persóna ikatu oroviakase ndéve la haʼekuéra heʼíva oĩ porãha, péro legálmente la haʼekuéra opensáva “vyroreiete Ñandejárape g̃uarã” (1 Cor. 3:​18-20).

9. ¿Mbaʼépa ikatu rejapo emboyke hag̃ua la ojeʼéva ha ‘epensa porã’ hag̃ua?

⁹ ¿Mbaʼépa ikatu rejapo reñepyrũ mboyve la nde estúdio? Ikatu hag̃uáicha emboyke la ojeʼéva ha ‘epensa porã’ hag̃ua, rejasegura vaʼerã reĩpa konvensído la Biblia heʼíva haʼeha la verda. Eñeporandumína: “¿Mbaʼérepa che ajerovia Ñandejárare? ¿Mbaʼérepa che apensa la Biblia haʼeha Ñandejára Ñeʼẽ? La Biblia heʼi ñandéve mbaʼépa iporã ha mbaʼépa ivai, ¿mbaʼérepa aĩ segúro ajegia vaʼerãha upévare, ajegia rangue la hénte heʼívare?”. Avei ikatu nemanduʼa reĩrõ guare koléhiope ha epensa koʼã mbaʼére: “Rehendúrõ guare oĩha la ogueroviáva siertoha pe evolusión, ¿reñepyrũpa raʼe reduda Ñandejára añetehápe oexistiha ha ojapo hague entéro mbaʼe? Rehechárõ guare ne kompañerokuéra ojapoha ivaíva, ¿ndestirápa avei upéva?”. Oimérõ ehecha ikatu hague emehora algúna kósape, epensána mbaʼépa ikatu ejapo koʼág̃a reñekonvense hag̃ua la Biblia heʼíva ideprovechoveha. Restudia aja ne profesionrã eñehaʼãmbaitékena siémpre ‘epensa porã la rejapótavare’ (2 Tim. 2:​16-18).b

10. ¿Mbaʼéichapa resegíta ‘epensa porã’?

¹⁰ Reñepyrũ rire jepe restudia, ejepokuaákena eñeporandu koʼã mbaʼe: “¿Añepyrũmapa apensa ndahaʼeiha la ivaietereíva umi hénte ojapóva, haʼéramo jepe álgo ndogustáiva Jehovápe? ¿Apillápa oñemboʼe jave umi mbaʼe ndahaʼéiva siertogua? ¿Agueroviápa che pyʼaite guive Ñandejára Rréino añoite osolusionataha entéro umi provléma?”. Esegi hag̃ua ‘epensa porã’ tekotevẽ restudia meme Ñandejára Ñeʼẽ. Restudiáramo la Biblia ha rejepyʼamongetáramo hese, nderehejamoʼãi hína mbaʼeve nemboduda la Biblia heʼiha la verda (1 Tim. 4:15).

EIPURU PORÃKENA NE TIÉMPO

11. ¿Mbaʼérepa ikatu ijetuʼu hína ndéve reipuru porã la ne tiémpo?

¹¹ ¿Mbaʼépa ikatu oiko? Umi estúdio hoʼúta ndehegui heta tiémpo, koʼýte tekotevẽ jave restudia umi examenrã térã oñemoag̃ui jave pe fécha epresenta hag̃ua peteĩ projékto. Ndereipuruporãirõ la ne tiémpo ikatu hína reju rejepyʼapyeterei ha reiko nekaneʼõháre. Upévare iñimportánte eipurukuaa la ne tiémpo péro avei ekuida vaʼerã ndejehe.

12. ¿Mbaʼe mbaʼépa hína umi mbaʼe rejapo vaʼerã? (Efesios 5:​15, 16).

¹² (Elee Efesios 5:​15, 16). Heta mbaʼe ningo erekóta ejapo vaʼerã, upéicha rupi ijetuʼúta ‘eipuru porã hag̃ua ne tiémpo’. Por ehémplo heta vése tekotevẽta restudia, péro avei reñemotiémpo vaʼerã reĩ hag̃ua ne hentekuérandi ha umi ermáno kongregasionpeguándi (Sal. 133:1; Prov. 18:1). Péro iñimportantevéntema esegi ejapo umi mbaʼe nemoag̃uítava Jehováre (Mat. 6:33). Ikatu oime tekotevẽ reipytyvõ ne hentekuérape nde rogapýpe ha ikatu oime rembaʼapo avei. Péro ndahaʼéi upévante, avei rekuida vaʼerã nde salúre ha upearã repytuʼu porã vaʼerã ha rejapo vaʼerã ehersísio (Ecl. 4:6; 1 Tim. 4:8). Ejapo hag̃ua entéro koʼã mbaʼe reipuru porãmante vaʼerã ne tiémpo.

13. ¿Mbaʼéichapa ikatu ‘reipuru porã ne tiémpo’?

¹³ ¿Mbaʼépa ikatu rejapo reñepyrũ mboyve la nde estúdio? La Biblia heʼi ñaplanea porãramo la jajapótava katuete osẽ porãtaha ñandéve la jajaposéva (Prov. 21:5). Upearã tekotevẽ eorganisa porã la nde orário eñepyrũ mboyve la nde estúdio. Ikatu nemanduʼa nde koléhio tiémpore ha epensa mbaʼéichapa reñemaneha vaʼekue upérõ guare. ¿Reñemotiémpopa rakaʼe ejapo hag̃ua umi mbaʼe iñimportantevéva? Ikatu eñemeʼẽ enkuénta ikatu hague remehora algúna kósape. Oimérõ upéicha, ¿mbaʼe kámbiopa tekotevẽ koʼág̃ama voi rejapo? Eñehaʼãmbaitékena eñeorganisa porã ani hag̃ua eñandu ofaltapaha ndéve la tiémpo.c

14. ¿Mbaʼe mbaʼépa iporãta reñeporandúramo?

¹⁴ Resegi aja nde estúdio, pyʼỹintekena ehecha mbaʼéichapa reipuru reikóvo ne tiémpo. Iporãta reñeporandúramo: “¿Apytuʼu porãpa aikóvo ha ajapo ehersísio? ¿Añemotiémpopa aĩ hag̃ua ermáno ha ermanakuérandi? ¿Ajapopápa itiempoitépe che tareakuéra? Oimérõ nahániri, ¿oikópa cherehe upéva ojoʼapágui la ajapo vaʼerã térã aheja rupi última orarã? ¿Heʼípa jepi chéve che amígo ha che hentekuéra tekotevẽha akambia algúna kósape?”. Ikatu oime ehechakuaa tekotevẽha eorganisa porãve nde orário, térã ikatu oime reñeorganisáma raʼe péro nderejapói la ere vaʼekue. Tahaʼe haʼeháicha, pyaʼékena ejapo umi kámbio tekotevẽva. Katuete nde jerére oĩ umi persóna oorganisakuaaitereíva la itiémpo, iporãta reñeʼẽramo hendivekuéra ejerure hag̃ua konsého (Prov. 11:14).

EIKO MEMÉKENA UMI IÑARANDÚVANDI

15. ¿Mbaʼe ótra kósa ijetuʼúvapa ikatu rehasa restudiakuévo?

¹⁵ ¿Mbaʼépa ikatu oiko? Amáske ohasa la tiémpo, ne kompañerokuéra ikatu hína neinvita pehasa hag̃ua tiémpo oñondive opa rire umi kláse, ha ndéve ikatu ndegusta la idéa. Amo ipahápe ningo oiméne peẽ ojoavegua, pendegusta la mísma kósa lénto, ha peĩmba oñondive umi kláse aja. Sapyʼánte ikatu voi repensa rejoguaveha chupekuéra umi ermánope rangue. ¡Péro eñatendékena! Oiméramo jepe ejogua hína algúna kósape ne kompañerokuérape, nde nediferénte hína pórke nde rembovyʼase Jehovápe ha haʼekuéra nahániri. Avei ereko vaʼerã enkuénta amáske rehasa tiémpo hendivekuéra ikatuha reju epensa haʼekuéra opensaháicha (1 Cor. 15:33). Upéva oiko vaʼekue peteĩ ermáno héravare Michael. Haʼe ostudia vaʼekue elektrisida 4 áñore. Pe ermáno heʼi: “Ahasa vaʼekue mas de 40 óra káda semána che kompañerokuérandi. Haʼekuéra ijurutieʼỹ, ohendu músika vai ha nomombaʼeiete voi la kuñáme. Kon el tiémpo añepyrũ vaʼekue apensa la haʼekuéra heʼíva ha ojapóva ndahaʼeiha la ivaietereíva”.

16. ¿Mbaʼépa ñanemboʼe Proverbios 13:20?

¹⁶ (Elee Proverbios 13:20). La Biblia ñandeavisa porã ipeligrosoitereiha ñanejúnta vai, péro heʼi avei ‘umi oiko meméva umi iñarandúvandi iñarandutaha’. ¿Mbaʼépa ñaaprende? Jahecha ikatuha ñasẽ porã térã ñasẽ vai, asegún mávapepa jaelehi ñane amigorã. Upévare eiporavókena ne amigorã umi ohayhúvape Jehovápe ndéicha avei. Haʼekuéra ningo oipotaiterei la iporãvéva ndéve g̃uarã (Sal. 101:​6, 7; 119:63).

17. ¿Mbaʼépa ikatu rejapo ani hag̃ua nejúnta vai?

¹⁷ ¿Mbaʼépa ikatu rejapo reñepyrũ mboyve la nde estúdio? Edesidíma vaʼerã mboy tiémpopa rehasáta ne kompañerokuérandi ha mbaʼeichaite pevépa reñemoag̃uíta hesekuéra. Peteĩ Testígo hérava Trenton heʼi: “Che ajogueraha porã che kompañerokuérandi, péro ndahasái tiémpo hendivekuéra umi kláse rire. Haʼekuéra ningo che kompañerokuérante, ndahaʼéi che amigoite”. Ha nde, ¿mbaʼépa rejapóta ani hag̃ua reñamigaiterei umi ne kompañerokuérare? Ekontesta hag̃ua upéva nemanduʼami jeýna koléhio tiémpore. ¿Mbaʼépa rejapo vaʼekue pono reñemoag̃uieterei ne kompañerokuérare? Oimérõ ehechakuaa ikatuha rejapo porãve álgo, ¿mbaʼépepa koʼág̃ama voi ikatu ekambia? Eñehaʼãkena eiko meme umi iñarandúvandi ha ani ehasaiterei tiémpo umi hénte ndohayhúiva ndive Jehovápe.d

18. ¿Mbaʼe mbaʼépa reñeporandu vaʼerã? (Ehecha pe taʼanga).

¹⁸ Káda tánto eñeporandu vaʼerã: “¿Aikópa añamigaiterei hína che kompañerokuérare? ¿Noiméipa añeʼẽ ha apensáma hína haʼekuéra ojapoháicha? ¿Térãpa ajapóma umi mbaʼe haʼekuéra ojapóva? ¿Mbaʼépa Jehová opensáne ohechávo mbaʼéichapa ajogueraha che kompañerokuérandi?” (Sal. 1:1). Oimérõ ehecha tekotevẽha ekambia, ekuʼékena ha ensegída ejapo umi kámbio. Eiporavókena ne amigorã umi ohayhúvape Jehovápe nde rehayhuháicha chupe. Avei ani reduda epredika hag̃ua ne kompañerokuérape. Haʼekuéra ojepokuaáma nderehe, upévare ereko pe oportunida porãite eñeʼẽvo chupekuéra Jehováre ha la Bíbliare.

SIÉMPREKENA EIME PREPARÁDO EJAPO HAG̃UA IPORÃVA

19. ¿Mbaʼéichapa ikatu rejeprepara embohovái hag̃ua umi situasión ijetuʼúva? Emombeʼu peteĩ ehémplo.

¹⁹ Epensamína ko ehémplore. Emoĩ chupe peteĩ persóna ojupiseha peteĩ sérro yvate. Haʼe ndoikuaái mbaʼe ijetuʼúvapa ohasáta tapére, péro iñarandúramo ojeprepara porãta ojupi hag̃ua. Por ehémplo haʼe imbarete vaʼerã ojupi hag̃ua pe sérrope, omondéta umi ao ikómodova ha oikuaa porã moõpa og̃uahẽse. Upéva ikatu ñakompara ne situasiónre restudia aja. Nde avei tekotevẽterei ndejerovia mbarete, emoĩ vaʼerã ndejehe “pe armadúra kompletoite oúva Ñandejáragui” ha nemanduʼa meme vaʼerã mbaʼépa la rehupytyséva. Nde ningo remombaʼeguasuse Jehovápe entéro mbaʼe rejapóvape ha ndahaʼéi ku restudiáva hína nderríko hag̃ua térã neimportánte hag̃ua ko múndope (Efes. 6:​11-13; 1 Cor. 9:​26, 27; 10:31).

20. ¿Mbaʼéichapa rehecháta resegípa rejerovia mbarete hína?

²⁰ La Biblia heʼi ñandéve: “Pesegíkena peñatende pendejehe pehecha hag̃ua pejerovia mbaretépa hína” (2 Cor. 13:5). ¿Mbaʼéichapa ikatu rejapo upéva restudia aja? Upearã pyʼỹintekena ehecha rejapópa hína umi mbaʼe oñeanalisáva ko artíkulope. Por ehémplo, ¿esegípa hína ejapo umi mbaʼe nemoag̃uítava Jehováre? ¿Epensa porãpa hína ha remboyke pe arandu oúva ko múndogui? ¿Reipuru porãpa hína ne tiémpo? ¿Reiporavópa ne amigorã umi oservívape Jehovápe ha rejei pe júnta vaígui? Legálmente entéro kristiáno jajapo vaʼerã koʼã porandu tahaʼe ñaime jave jastudiahápe, ñande travahohápe térã ótro hendápe. Eñehaʼãmbaitékena esegi ndejerovia mbarete oimehaichagua situasiónpe ha katuete Jehová nevendesíta upe haguére (Prov. 3:​5, 6).