¿Restudiavétapa térãpa nahániri? ¿Mbaʼéichapa ikatu redesidi porã?

1, 2. a) ¿Mbaʼépa tekotevẽ odesidi umi mitãrusu ha mitãkuña? b) ¿Mbaʼeichagua estúdiorepa ñañeʼẽta ko artíkulope? (Ehecha pe nóta).

OIMÉRÕ nemitãiti, provávlemente heta vésema oñeporandu ndéve: “¿Mbaʼépa rejapose retermina rire nde koléhio?”. La iporãvéva ikatúva rejapo haʼe reservi Jehovápe de tiémpo kompléto, péro jaikuaa tekotevẽtaha avei rembaʼapo reñemantene hag̃ua (2 Tes. 3:10). Upévare oiméne nde rekalkuláma hína mbaʼépepa rembaʼapóta rekakuaa rire.

² Algúno mitãrusu oñeʼẽ ituakuérandi odesidi hag̃ua mbaʼépepa ombaʼapóta okakuaa rire. Oñeʼẽmba rire hikuái, algúno odesidi ostudiavetaha álgo otermina rire pe edukasión vásika ojeruréva pe goviérno.a Ikatu oime nde reñeporandu avei tekotevẽpa hína restudia algúna kósa, ha oimérõ upéicha, ¿mbaʼépa restudiáta? Ko artíkulope ñaanalisáta unos kuánto konsého oĩva la Bíbliape ikatúva nepytyvõ redesidi porã hag̃ua. Legálmente ningo ko artíkulo ojeprepara espesiálmente umi mitãrusu ha mitãkuñáme g̃uarã, péro avei oipytyvõta enterove kristiáno opensávape hína ostudiávo algúna kósa. Avei umi konsého jahechátava oipytyvõta umi tuakuérape ogia hag̃ua ifamíliape.

¿TEKOTEVẼPA RESTUDIAVE ÓTRA KÓSA?

3. ¿Mbaʼérepa oĩ algúno kristiáno odesidíva ostudiavetaha koléhio rire?

³ Heta lugárpe peteĩ persóna otermina rire ikoléhio natekotevẽi osegi ostudia otopa hag̃ua peteĩ traváho iporãva. Péro ótro lugárpe katu umi persóna ostudiave pórke upéva ikatu hína oipytyvõ chupe otopa hag̃ua peteĩ traváho ijorário porãva ha ogana porãtahápe. Peichagua traváho ningo oikoite peteĩ kristiánope g̃uarã, pórke itiempovéta opredika hag̃ua ha oservi hag̃ua ótro hendáicha. Péro avei umi odesidíva osegitaha ostudia ojesakrifikáta ha ikatu hína ombohovái heta mbaʼe ijetuʼúva.

4. ¿Mávapa la odesidi vaʼerã peteĩ persóna ostudiavétapa térãpa nahániri? (Ehecha pe nóta).

⁴ La Biblia heʼi ‘káda uno oguerahataha ikárga’ térã oñerresponsavilisa vaʼerãha la ojapóvare (Gál. 6:5). Upéva heʼise káda kristiáno okakuaapáva odesidi vaʼerãha ijeheguiete ostudiavétapa otermina rire pe edukasión vásika.b Tuakuéra rresponsavilida avei ogia ifamília imitãvape odesidi hag̃ua la ojapótava (Efes. 6:1). Umi sy ha túa ogiáramo ifamíliape, haʼekuéra ikatúta odesidi porã okakuaapa vove okonvenítapa chupekuéra osegi ostudia térãpa nahániri (Prov. 22:6).

5. ¿Arakaʼépa peteĩ persóna odesidi vaʼerã osegítapa ostudia ha mbaʼérepa? (Ehecha pe taʼanga).

⁵ Pyʼỹinte umi mitãrusu ha mitãkuña otermina mboyve ikoléhio odesidíma vaʼerã osegítapa ostudia. Iporãta umi mitãrusu voi reheve oñeʼẽramo ko témare ituakuérandi, ani hag̃ua upéi apúrope odesidi la ojapótava. Upéva omeʼẽta chupekuéra tiémpo oinvestiga porã hag̃ua mbaʼe mbaʼépa la ikatúva ojapo otermináre ikoléhio. Sapyʼánte ikatu pe koléhiope voi umi mitãrusu ostudia peteĩ mbaʼe oipytyvõtava chupekuéra ombaʼapo hag̃ua upéi, térã ideprovéchotava chupekuéra pe ostudiasévape g̃uarã opa rire pe koléhio. ¿Péro tekotevẽpa pe mitãrusu térã mitãkuña odesidíma voi si o si la ojapótava otermina mboyve ikoléhio? Ndahaʼéi katuete la peichaite (Prov. 21:5). Oĩ algúno mitãrusu ha mitãkuña odesidíva primero otermina ikoléhio, upéi otopa peteĩ traváho, omoñepyrũ la iprekursorádo ha upe rire ae odesidi ostudiavétapa álgo. Peteĩ persóna ikatu voi ohaʼarõ ohasave pe tiémpo odesidi hag̃ua upéva.

6. ¿Mbaʼépa ikatu hína nepytyvõ redesidi porã hag̃ua?

⁶ ¿Mbaʼéichapa ikatu redesidi porã? Ejerurékena Jehovápe tanepytyvõ (Sant. 1:5). Avei iñimportánte ejapo koʼã mokõi mbaʼe: Primero, nesinsérokena ha ehecha mbaʼérepa hína resegise restudia (Sal. 26:2). Segundo, repensa porã vaʼerã umi ventáha ha desventáha oĩvare restudiáramo upe ndegustáva (Prov. 14:15). Koʼág̃a ñaanalisáta jahávo koʼã mbaʼe peteĩteĩ.

EPENSA MBAʼÉREPA HÍNA RESTUDIASE

7. ¿Mbaʼépa iñimportánte reñeporandu?

⁷ Oimérõ repensa hína restudiavetaha iñimportánte reñeporandu: “¿Mbaʼérepa hína astudiase ko mbaʼe?”. Heta persóna odesidi ostudiavetaha oreko hag̃ua peteĩ traváho ogustáva chupekuéra térã ogana porãve hag̃ua. ¿Oĩ vai piko la ñapensa upéicha? Ndahaʼéi katuete la ivaíva (1 Tim. 5:8). Péro la Biblia ñandeavisa ipeligrosoha ñandeplatarayhu ha ñapensa pe pláta añoite ikatuha ñandeprotehe (Prov. 23:​4, 5; 1 Tim. 6:​8-10; 1 Juan 2:17). Oimérõ nde resegise hína restudia pórke ndeplatase térã rejechaukase la erekóvare, amo ipahápe nderevyʼamoʼãi. Ha ivaiveha ikatu hína reñemomombyry Jehovágui.

8, 9. a) ¿Mbaʼéichapa jahecha vaʼerã umi estúdio? (Mateo 6:33). b) ¿Mbaʼépa ñaaprende la heʼívagui Josefina, Morine ha Iris?

⁸ Upéicharõ, ¿mbaʼéichapa rehecha vaʼerã pe estúdio? Upéva ningo ndahaʼéi vaʼerã la iñimportantevéva nde rekovépe, síno la iñimportantevéva hína haʼe vaʼerã Jehová servísio (Mat. 22:​37, 38; Filip. 3:8). Upévare nemanduʼákena upe restudiáva nepytyvõ vaʼerãha upéi reñemantene hag̃ua ikatu hag̃uáicha reservi Jehovápe nde pyʼaite guive (elee Mateo 6:33).

⁹ Jahechamína mbaʼépa la oipytyvõ vaʼekue algúno ermánope ohecha hag̃ua hendápe porã umi estúdio. Por ehémplo Josefina oikóva Chílepe heʼi: “Che adesidi vaʼekue astudiavetaha ikatu hag̃uáicha upéi areko peteĩ traváho omeʼẽtava chéve tiémpo Jehová servísiope. Astudiárõ guare, la che amista Jehovándi la iñimportanteve vaʼekue ha ndahaʼéi la che estúdio”. Peteĩ ermána hérava Morine ojapo peteĩ kúrso de un áño oiko hag̃ua chugui pelukéra. Haʼe heʼi: “Che aservise vaʼekue oĩvehápe nesesida, upévare astudia álgo chepytyvõtava upearã. Atermina rire la che kúrso añepyrũma ambaʼapo de pelukéra ha ambyaty la che pláta ikatu hag̃uáicha ava. Upéi ava rire peteĩ lugár oĩvehápe nesesida, la astudia vaʼekue chepytyvõ atopa hag̃ua traváho upe lugárpe”. Iris ostudia vaʼekue oiko hag̃ua chugui dentísta ha heʼi: “Oreko ningo añete la iventáha restudiáramo álgo, péro upéva núnka nanembovyʼamoʼãi legálmente. Oimérõ revyʼase nde pyʼaite guive, Jehová haʼe vaʼerã ne amigoite ha emotenonde vaʼerã iservísio, upéva hína la sekréto”. Upéva ningo siertoite, Jehová haʼéramo la iñimportantevéva ndéve g̃uarã revyʼáta katuete pórke redesidi porãta.

EPENSA UMI VENTÁHA HA DESVENTÁHARE

10. ¿Mbaʼéichapa la heʼíva Deuteronomio 32:29 ikatu nepytyvõ redesidíta jave restudiátapa térã nahániri?

¹⁰ Ikatu oime erekóma ne akãme mbaʼépa la restudiátava, péro ani ndeserrádo upévape. Epensákena avei umi ótro posivilida erekóvare, ikatu hína retopa álgo ojoguáva pe restudiasévape térã ótra kosaite (ekompara Proverbios 18:17 heʼívare). Koʼág̃arupi ningo legálmente oĩ hetave oportunida yma guarégui, por ehémplo ikatu restudia Internet rupive. Avei epensákena tekotevẽpa añete restudiave etopa hag̃ua peteĩ traváho. Por ehémplo, Johanna oikóva Finlándiape ndostudiái kuri mbaʼeve otermina rire ikoléhio. Haʼe heʼi: “Che añepyrũntema vaʼekue ambaʼapo de médio tiémpo ha ajapo che prekursorádo. Opa mbaʼe rei ningo ajapo ha Jehová núnka nombofaltáiva chéve mbaʼeve, siémpre okumpli la ipromésa”. Reikuaa vaʼerã tahaʼe haʼéva la redesidíva, oĩtaha ventáha ha desventáha. Upévare eñeporandúkena: “¿Oĩpa hína hetave ventáha térã desventáha?” (elee Deuteronomio 32:29; 1 Cor. 10:23). Jahechamína unas kuánta kósa tekotevẽva ereko enkuénta rembohovái hag̃ua upe porandu.

11. ¿Mbaʼérepa iñimportánte repensa mboy tiémpopa hoʼúta ndehegui upe restudiátava? (Ehecha pe taʼanga).

¹¹ Mboy tiémpopa hoʼúta ndehegui. Epensákena mboy tiémpopa nderaháta káda semána eg̃uahẽ hag̃ua nde klásepe, ejapo hag̃ua nde práktika ha umi taréa reguerahátava nde rógape. ¿Erekótapa tiémpo emombarete hag̃ua ne amista Jehovándi ha ekumpli hag̃ua umi rresponsavilida erekóva nde rogapýpe? (Filip. 1:10). ¿Ndereikomoʼãipa nekaneʼõiterei rejapo hag̃ua nde estúdio personál térã ejeprepara hag̃ua rreunionrã? Upéva la oiko vaʼekue peteĩ ermáno héravare Jeroz oikóva Índiape. Haʼe heʼi: “Ijetuʼu vaʼekue chéve asẽ meme hag̃ua apredika ha añatende hag̃ua rreunión aja, sapyʼánte katu afalta voi rreunionhápe. Koʼág̃a apensa ndovaléi hague la péna pe kúrso, pórke hoʼueterei chehegui che tiémpo ha che mbaretekue”. Péro jaikuaa avei oĩha umi kúrso ndoʼupamoʼãiva ndehegui ne tiémpo, algúno ningo médio díante voi ha saʼi taréa omeʼẽ hikuái. Por ehémplo Rabeca oikóva Mozambíquepe ovyʼaiterei la ostudia vaʼekuére. Haʼe heʼi: “Che kláse ningo 2 óra al díante vaʼekue, ha upéicha rupi ikatu vaʼekue asegi ajapo che prekursorádo rregulár astudia aja”.

12. ¿Mbaʼe mbaʼépa iñimportánte reñeporandu? (Eclesiastés 12:1).

¹² Mboy tiémpopa ipukúta. Tekotevẽ avei repensa mboy mése térã áño nderaháta ekompleta hag̃ua la nde estúdio. Oimérõ restudiavéta, ¿reipuru porãtapa hína upéicha la ne tiémpo? (Efes. 5:​15-17). ¿Ikatútapa remeʼẽ Jehovápe la iporãvéva nemitã aja, por ehémplo reservívo de tiémpo kompléto? (elee Eclesiastés 12:1). ¿Ndaipóripa ótro kúrso mbykyvéva ikatútava nepytyvõ retopa hag̃ua pe traváho ndegustáva? Por ehémplo, oĩ umi lugár ikatuhápe pyaʼeve reaprende ne profesionrã térã peteĩ traváhopema voi ikatu reaprende peteĩ ofísio. Umichahárupi sapyʼánte ojegasta saʼive rekomparátarõ umi universidáre. Mario oikóva Chílepe heʼi: “Che ajapo vaʼekue peteĩ kúrso de 2 áño areko hag̃ua peteĩ profesión. Hetave ningo agasta vaʼerãmoʼã ahárire fakultápe. Umi kláse ningo 4 vése a la semánante kuri, upéicha rupi ajapo che prekursorádo astudia aja”.

13. ¿Mbaʼépa ikatu oiko rehóramo restudia mombyry?

¹³ Moõpa restudiáta. Ikatu oime retopa peteĩ lugár ikatutahápe restudia ag̃ui nde rógagui. ¿Péro mbaʼetekópa tekotevẽrõ eho mombyry ne hentekuéragui restudia hag̃ua, térã reiko voi umi ótro estudiántendi? Nemanduʼákena ipeligrosoitereiha rehóramo reiko umi ndoadoráivandi Jehovápe tahaʼe jepe raʼe ne hénte, pórke ikatu rembyai ne amista Jehovándi (Prov. 22:3; 1 Cor. 15:33). Matías oikóva Mozambíquepe osegi peteĩ kúrso de un áño ha ndahaʼéi vaʼekue la hepyetereíva, upéicharõ jepe haʼe ombyasy la odesidi vaʼekue. ¿Mbaʼérepa? Haʼe heʼi: “Pe kúrso aja aiko vaʼekue pe lugár astudiahápe ha upéva opyta kuri mombyry che rógagui. Káda día oñepresenta vaʼekue chéve umi tentasión, upévare namokyreʼỹiete voi avavépe ojagarra hag̃ua peteĩ kúrso tekotevẽhápe ova mombyry ihentekuéragui”. Peteĩ ermána oikóva Rúsiape heʼi: “Astudiárõ guare ndahái vaʼekue aiko umi ótro alúmnondi, síno asegi aiko che tuakuérandi. Upéicha rupi ajehekýi vaʼekue heta mbaʼe vaígui”. Erekókena avei enkuénta ikatuha koʼág̃a restudia Internet rupive.

14. ¿Mbaʼéichapa pe konsého oĩva Lucas 14:​28-pe ikatu nepytyvõ redesidi porã hag̃ua?

¹⁴ Mboýpa regastáta. Oĩ ningo umi estúdio ndahaʼéiva la hepyetereíva térã ikatu voi pe goviérno opaga. Peichagua kásope ikatu hína nderegastaguasúi ha reaprendéma peteĩ profesión upéi rekonsegi hag̃ua peteĩ traváho. Péro heta kásope avei umi estúdio hepyeterei ha ikatu voi oĩ hetave gásto. Por ehémplo sapyʼánte tekotevẽ ekontrata peteĩ profesór partikular nemboʼe vaʼerã ikatu hag̃uáicha reike pe lugár restudiasehápe. Oĩ avei hénte opytáva odeve ijestúdiore hetaiterei áño. Adilson oikóva Mozambíquepe oñarrepenti la ostudia vaʼekuére, haʼe heʼi: “Che astudia vaʼekue 4 áñore, ha che avuelokuéra heta ojesakrifika vaʼekue opaga hag̃ua la che estúdio. Upévare upe tiémpope oĩ vaʼekue umi tembiʼu ndaikatúiva roʼu ha heta mbaʼe roikotevẽva ndaikatúi vaʼekue ropaga”. Oimérõ restudiaseve, iporãta reñeporandu: “¿Mboýpa agastáta? ¿Ikatútapa chepuʼaka umi gástore, térã orekótapa che família opaga hag̃ua cherehe? ¿Ndaipóri piko algún estúdio ivaratomiéva?” (elee Lucas 14:28). “Ajapóramo peteĩ préstamo, ¿mboy tiémpope apagapáta? Upéi atermina rire la che estúdio, ¿atopáta piko peteĩ traváho chepytyvõtava añemantene hag̃ua ha apagapa hag̃ua pe préstamo?” (Prov. 22:7).

15. Redesidi mboyve mbaʼépa restudiáta, ¿mbaʼérepa ereko vaʼerã enkuénta oĩtapa traváho upévape?

¹⁵ Oĩtapa traváho ndéve g̃uarã. Ereko vaʼerã enkuénta avei oĩtapa traváho pe lugár reikohápe térã pe reikosehápe. Upévare, ¿nepytyvõtapa rekonsegi hag̃ua traváho upe restudiaséva? Heta estúdio ningo ndopreparái la héntepe ombaʼapóma hag̃ua, síno omeʼẽnte chupekuéra heta informasión térã oipytyvõ chupekuéra oikuaánte hag̃ua algúna kósa (Col. 2:8). Peteĩ ermána oikóva Índiape heʼi: “Pe kúrso ajapo vaʼekue nachembokatupyrýi akonsegi hag̃ua pe traváho aipotáva, upéicha rupi ndaikatúi vaʼekue ambaʼapo la astudia vaʼekuépe”. Péro oĩ avei umi kúrso nepytyvõva ndevale hag̃ua peteĩ mbaʼépe, péro amo ipahápe saʼi oĩ traváho upévape. Upéva la oiko vaʼekue peteĩ ermáno héravare Sublime oikóva República Centroafricánape. Haʼe ojapo vaʼekue peteĩ kúrso omyatyrõ hag̃ua umi áire akondisionádo, péro upéi heʼi: “Che aikohápe la hénte ojepokuaa haʼekuérante oarregla la ikosakuéra, upéicha rupi ijetuʼu vaʼekue chéve atopa hag̃ua che travahorã”.

16. Redesidi mboyve mbaʼépa restudiáta, ¿mbaʼérepa rekalkula vaʼerã avei mbaʼeichagua traváhopa rekonsegíta?

¹⁶ Epensa vaʼerã avei mbaʼeichagua traváhopa retopáta restudia rire. Por ehémplo, ¿ndegustátapa upe rejapóva? (Ecl. 3:​12, 13). ¿Moõpa rehóta rembaʼapo ha mbaʼeichagua persónapa la ombaʼapóva upépe? ¿Ikonosídopa umichagua traváho ipeligróso haguére térã nekevrantaitereíta? ¿Oñehaʼãpa oñogana upépe la hénte ohechauka hag̃ua mávapa la ivalevéva? ¿Mboýpa ojepaga jepi umichagua traváhope? ¿Nderupytýtapa upéva reñemantene hag̃ua? ¿Tekotevẽtapa resegi rejekapasita pono reperde upe traváho? Ha la iñimportanteveha, ¿ikatútapa resegi remotenonde Jehová servísio? (Ecl. 12:13). Jaikuaa ningo saʼihápe la traváho ndaikatuiha ñañembohelikadoiterei. Péro koʼág̃a redesidi porãramo mbaʼépa restudiáta, upéva tuicha nepytyvõta etopa hag̃ua nde travahorã. Tabitha oikóva Índiape ojapo vaʼekue peteĩ kúrso de kostúra 6 mésere. Haʼe heʼi: “Che astudia vaʼekue modistarã pórke aikuaa upéva chepytyvõtaha ajapo hag̃ua che prekursorádo. Avei siémpre oĩ traváho upévape, ha ikatúta amaneha la che orário ha avei ndagastamoʼãi heta pláta”. Pe kúrso ojapo vaʼekue Tabitha oipytyvõ kuri chupe oñemantene hag̃ua ha ojapo hag̃ua iprekursorádo.

17. a) ¿Mbaʼéichapa rekonsegíta umi informasión reikotevẽva redesidi porã hag̃ua? b) ¿Mbaʼe konsého bíblicopa ikatu nepytyvõ redesidíta jave? (Ehecha pe rrekuádro “Epensákena koʼã konsého bíblicore”).

¹⁷ Ko artíkulope jahecháma unas kuánta kósa tekotevẽva ereko enkuénta. Péro ikatu avei ejapo hetave mbaʼe rekonsegi hag̃ua umi informasión reikotevẽva redesidi porã hag̃ua. Por ehémplo, oimérõ erekóma ne akãme la restudiaséva, ikatu hína evisita pe lugár ojestudiahápe upéva térã eheka Internétpe orekópa hikuái algúna páhina eñeinforma hag̃ua. Ehecha vaʼerã avei oĩpa traváho upévape. Avei ikatu reñeʼẽ umi ostudia vaʼekuéndi térã ombaʼapóva upe ndegustávape (Prov. 13:10). Eporandukuaa chupekuéra mbaʼe ventáha térã desventáhapa oreko upe estúdio térã pe traváho. Eñeʼẽ vaʼerã avei umi ermáno vyʼápe oservívandi Jehovápe (Prov. 15:22). Ehechamína mbaʼépa orrekomenda ndéve hikuái estudia térã embaʼapo hag̃ua. Ikatu hína haʼekuéra heʼi ndéve álgo anteve ndereguerekói vaʼekue enkuénta.

18. ¿Mbaʼépa ñanemanduʼa vaʼerã?

¹⁸ Ko artíkulope jahecha oĩha ventáha ha desventáha oimérõ edesidi restudiavetaha, upévare eñemboʼékena ko témare ha epensa mbaʼe mbaʼépa ikatu rejapo. Umi estúdio ikatu nepytyvõ ereko hag̃ua peteĩ traváho reñemantene hag̃ua, péro nemanduʼákena avei sólamente revyʼa añetetaha erekóramo peteĩ amista imbaretéva Jehovándi (Sal. 16:​9, 11). Jehová ningo siémpre oñangareko isiervokuérare ha noimportái mbaʼeichagua estúdiopa oreko (Heb. 13:5). Péro ñamoĩ chupe redesidíma hague resegitaha restudia, ¿mbaʼépa nepytyvõta eñemoag̃ui meme hag̃ua Jehováre restudia aja? Upévare ñañeʼẽta hína pe artíkulo oúvape.