¿Mbaʼépa ikatu jajapo ñaporomboʼe porãve hag̃ua?

1. ¿Mbaʼépa enterove tekotevẽ jajapo, ha mbaʼérepa? (2 Timoteo 4:2). (Ehecha pe taʼanga).

JESÚS heʼi vaʼekue idisipulokuérape: ‘Pemboʼe umi héntepe oiko hag̃ua chuguikuéra che disípulo. Ha pemboʼe chupekuéra ojapo hag̃ua entéro mbaʼe amanda vaʼekue peẽme’ (Mat. 28:​19, 20). Jesús heʼírõ guare upéva ohechauka entéro kristiáno oporomboʼe vaʼerãha. Jaikuaa ningo Jehová omoag̃uiha ijehe ‘umi ipyʼaporãvape’, ha avei umi ánhel ñanepytyvõ jatopa hag̃ua umi héntere (Hech. 13:48; Juan 6:44; Apoc. 14:6). Upéicharõ jepe, ñande tekotevẽ jajapo ñande párte. Ñapensamíntena apóstol Pablo ha Bernabé ehémplore. La Biblia omombeʼu haʼekuéra opredika hague pe sinagógape Icóniope. Upérõ guare Pablo ha Bernabé “opredika porãiterei”, ha upévare “hetaiterei judío ha griego oñepyrũ ojerovia” (Hech. 14:1). Péicha jahecha mokõivévante oñehaʼã hague ‘ivale oporomboʼe hag̃ua’ (elee 2 Timoteo 4:2). Añetehápe, enterove kristiáno ñañehaʼã vaʼerã ñandekatupyryve ñamboʼe hag̃ua la héntepe.

2. ¿Mbaʼérepa algúno opensa ndaikatuiha omboʼe porãve?

² Algúno ermáno ha ermána opensa ndaikatuiha omboʼe porãve. Oĩ heʼíva: “Chéngo che eskuelaʼi ha upévare naporomboʼekuaái”, térã heʼi: “Che namboʼekuaái voi mbaʼeve”. Yma ningo oĩ vaʼekue avei unos kuánto Ñandejára siérvo oñeñandu vaʼekue péicha (Éx. 4:10; Jer. 1:6). Avei oĩ umi opensáva nomboʼekuaaiha pórke ndorekói umi experiénsia neporãmba jepéva predikasiónpe orekoháicha ótro ermáno. Péro legálmente, ndahaʼéi voi ku enteroite umi hénte ohendusétava umi notísia porã. Avei la jahupytýva predikasiónpe nodependéi ñamboʼe lájare añoiténte. Jahecha haguéicha Jehová ha umi ánhel ñanepytyvõ avei jatopa hag̃ua umi hénte ipyʼaporãvare. Upéicharõ jepe, ndajajaposéi péicha péichante ko traváho, síno ñamboʼe porãse la héntepe ikatu hag̃uáicha ñag̃uahẽ ikorasõme. Upévare ko artíkulope jahecháta mbohapy konsého ñanepytyvõtava ñandekatupyryve hag̃ua.

ÑAÑEINTERESA VAʼERÃ UMI HÉNTERE

3. ¿Mbaʼéicha rupípa Jesús og̃uahẽ vaʼekue umi hénte korasõme?

³ La Biblia heʼi Jesús oikuaaha “mbaʼépa oĩ umi hénte pyʼapýpe” (Juan 2:25). Upéva heʼise Jesús oikuaa hague mbaʼépa opensa umi persóna ha mbaʼépa omomýi chupekuéra ojapo hag̃ua heta mbaʼe. Haʼe ohechakuaa vaʼekue mbaʼépa oikotevẽ la hénte, upévare oporomboʼérõ guare ikatu vaʼekue opoko umi hénte korasõre. Jesús ohechakuaa vaʼekue umi hénte oikotevẽha ojegia ha oñekonsola chupekuéra, pórke umi líder rrelihióso ojopyeterei hendivekuéra (Mat. 9:36; 23:4). Upévare Jesús omboʼe vaʼekue umi mbaʼe oipytyvõtava chupekuéra ovyʼa hag̃ua, ha upéva ojekuaa porã umi mbaʼe heʼívare pe Sermón del Móntepe. Heta hénte oñemoag̃uise vaʼekue Jesús rehe pórke haʼe oñeʼẽ umi mbaʼe oipyʼapývare chupekuéra.

4. ¿Mbaʼéichapa ikatu jahechauka jajepyʼapyha umi héntere? (Ehecha pe taʼanga).

⁴ ¿Mbaʼéichapa ikatu jahechauka jajepyʼapyha umi héntere? Upearã ñañehaʼã vaʼerã ñantende umi mbaʼe oipyʼapýva chupekuéra. Ko múndo aña oĩ Satanás poguýpe, upévare káda persóna oreko hína peteĩ provléma okevrantáva chupe. Jarekórõ enkuénta upéva, ifasilvéta ñandéve ñantende hag̃ua umi hénte situasión. Por ehémplo, ¿oikópa raʼe álgo ivaíva ikatúva oipyʼapy umi oikóvape ñande territóriope? ¿Okyhyjépa umi tuakuéra ojehúrõ g̃uarã álgo ifamíliape eskuélape? ¿Ijetuʼúpa hína umi héntepe otopa hag̃ua itravahorã? Ñañehaʼã vaʼerã ñañeimahina mbaʼeichaitépa ijetuʼu koʼã ára paha umi hénte ndoikuaáivape pe esperánsa oĩva la Bíbliape (2 Tim. 3:1; Is. 65:​13, 14).

5. ¿Mbaʼérepa jaʼekuaa Jesús idiferentete hague umi líder rrelihiósogui? (Mateo 11:​28-30).

⁵ Jesús ohayhu vaʼekue umi héntepe ha oñeinteresa hesekuéra. Ha umi hénte ohechakuaa vaʼekue upéva, pórke Jesús otrata porãiterei chupekuéra. Jesús ndojoguái vaʼekue ni michĩmi umi líder rrelihiósope. Umi líder oapoʼi vaʼekue umi héntepe ha heta vése omaltrata chupekuéra (Mat. 23:13; Juan 7:49). Jesús katu opororrespeta ha imbaʼeporã vaʼekue. Haʼe ningo ‘ndaipochyreíri ha iñumílde ipyʼaite guive’, ha upéicha rupi oiko chugui peteĩ mboʼehára ikatupyrýva (elee Mateo 11:​28-30). Ñande avei japororrespeta ha ñanembaʼeporã vaʼerã ñaporomboʼe jave.

6. ¿Mbaʼéichapa jahechaukáta ñanembaʼeporãha umi nohenduséivandi umi notísia porã?

⁶ Oĩ umi hénte nohenduséiva umi notísia porã ha sapyʼánte oñemoĩ voi ñane kóntrape. ¿Mbaʼépa jajapo vaʼerã péicha jave? Jesús heʼi vaʼekue ani hag̃ua jatrata vai umi oñemoĩvape ñanderehe, péro ndahaʼéi upévante la jajapo vaʼerã. Haʼe heʼi vaʼekue: “Siémpre pejapo vaʼerã iporãva umi ndaijaʼéivare penderehe. Pesegi vaʼerã pejerure Ñandejárape ovendesi hag̃ua umi penemaldesívape ha peñemboʼe umi oñembohorývare penderehe” (Luc. 6:​27, 28). Ifasilvéta ñandéve ñanembaʼeporã hag̃ua ndajaikóirõ pyaʼeterei ñapensa vai umi héntere. Jaikuaa oĩha umi oñemoĩva umi notísia porã kóntrape. Péro sapyʼánte ikatu hína álgien nohenduséi pe mensáhe jaraháva, oahoʼi rupi chupe umi provléma hogapýpe térã ojepyʼapyeterei rupi ótra kósare. Ikatu voi oime ñag̃uahẽ raʼe hógape ijetuʼuve jave la situasión hendive. Tahaʼe haʼéva la oikóva, jasegíkena ko konsého: “Umi mbaʼe pejéva siémpre iporã ha ijuky vaʼerã, peikuaa hag̃ua mbaʼéichapa pembohováita káda persónape” (Col. 4:6). Ñañehaʼãrõ ñantende umi héntepe ha jaikuaárõ la oikotevẽva hikuái, ndajaikomoʼãi pyaʼeterei ñandepochy ha oikóta ñandehegui mboʼehára ikatupyrýva.

JAIPURU MEMÉKENA ÑANDEJÁRA ÑEʼẼ

7. ¿Moõguipa onohẽ vaʼekue Jesús umi mbaʼe omboʼéva? (Juan 7:​14-16).

⁷ Jesús nomboʼéi vaʼekue umi mbaʼe haʼe opensávante, síno siémpre omboʼe la oĩva Ñandejára Ñeʼẽme. Avei ndahasyiete vaʼekue la omboʼe lája, upévare ifásil vaʼekue umi héntepe ontende hag̃ua la haʼe heʼiséva ha upéi imanduʼa umívare. La Biblia heʼi voi: “Umi hénte oñesorprendepa ohendúvo mbaʼeichaitépa oporomboʼe, pórke Jesús omboʼéva ou Ñandejáragui, ndahaʼeiete umi mboʼehára leipegua ojapoháicha” (Mar. 1:22). Upe tiémpope, umi líder rrelihióso omboʼe vaʼekue la heʼíva umi mboʼehára rrelihióso ifamósova, péro Jesús siémpre oipuru vaʼekue la heʼíva Ñandejára Ñeʼẽ. Jesús ningo oiko vaʼekue Itúa ndive yvágape ha upévare iñarandueterei. Péro ni upeichavérõ haʼe ndoipurúi umi mbaʼe oikuaáva oimpresiona hag̃ua ótrope ni ndoapoʼíri avavépe. Upéva rangue haʼe siémpre omboʼe vaʼekue mbaʼépa Itúa volunta ha oipuru meme Ñandejára Ñeʼẽ (elee Juan 7:​14-16). Ajépa iporãite pe ehémplo ohejáva ñandéve Jesús.

8. ¿Mbaʼérepa jaʼekuaa Pedro osegi hague Jesús ehémplo?

⁸ Jesús disipulokuéra osegi vaʼekue iñehémplo ha oipuru Ñandejára Ñeʼẽ oporomboʼérõ guare. Por ehémplo jahechamína apóstol Pedro káso. Haʼe ningo ilápi mbyky vaʼekue, péro pe Pentekostés áño 33-pe Pedro omboʼe vaʼekue heta héntepe, ha la ojapo lája opoko ikorasõrekuéra. Haʼe oipuru vaʼekue la heʼíva Ñandejára Ñeʼẽ oexplika hag̃ua umi profesía oñekumplíva Jesúsre (Hech. 2:​14-37). ¿Mbaʼépa oiko upéi? La Biblia heʼi: “Ojevautisa umi ipyʼaite guive ogueroviáva Pedro heʼi vaʼekue, ha upe díape 3.000 persónarupi omoirũ umi disípulope” (Hech. 2: 41).

9. ¿Mbaʼérepa jaipuru vaʼerã Ñandejára Ñeʼẽ ñaporomboʼe jave?

⁹ La Biblia añoite oreko podér okambia hag̃ua la héntepe ikatu hag̃uáicha ojapo umi mbaʼe ogustáva Ñandejárape (Heb. 4:12). Upévare jaipuru meme vaʼerã la Biblia ñaporomboʼe jave. Ñande ningo ñamombeʼu vaʼerã “Ñandejára ñeʼẽ” heʼíva, ha ndahaʼéi la ñande ñapensáva (2 Tim. 4:2). Proverbios 2:6 heʼi: “Jehová ñanemoarandu, iñeʼẽ ñanepytyvõ jaikuaa hag̃ua heta mbaʼe, ha avei ñadiferensia hag̃ua ivaíva ha iporãva”. Jaʼe porãsérõ g̃uarã, jaipuru jave la Biblia jaheja hína Jehová oñeʼẽ (Mal. 2:7). Ñande jaipota umi hénte ohechakuaa umi konsého oĩva Ñandejára Ñeʼẽme ndaijojaiha, ha ndaiporiha voi ni peteĩ persóna ikatúva omeʼẽ konsého iporãvéva umívagui. La Biblia heʼíva ningo ou Ñandejáragui ha ñanepytyvõ ñambovyʼa hag̃ua chupe ha avei ñande voi jaiko hag̃ua vyʼápe (2 Tim. 3:​16, 17).

10. ¿Mbaʼépa jajapo vaʼerã pe estudiánte ohechakuaa hag̃ua la oaprendéva oĩha la Bíbliape?

¹⁰ ¿Mbaʼéichapa jajeprepara vaʼerã jajapo hag̃ua peteĩ kúrso bíblico? Ñapensákena mbaʼe téxto bíblicopa jaipurúta pe estudiánte ontende hag̃ua la Biblia omboʼéva. Ñande jaipuru añete umi taʼanga ha vidéo ñaporomboʼe jave, péro la Biblia hína la iñimportantevéva. ¿Ha mbaʼépa jareko vaʼerã enkuénta jajapo aja pe kúrso bíblico? Jaleékena pe estudiánte ndive umi téxto omyesakãva umi leksión prinsipál, ha upéi ñaipytyvõ chupe opensa hag̃ua umi téxtore. Oimérõ jahechauka chupe peteĩ taʼanga térã vidéo, jajasegura vaʼerã tontende umi konsého bíblico oñeñeʼẽvare upépe. Upéva ndeʼiséi ñañeʼẽtaha tódo el tiémpo ni jalee vaʼerãha enteroite umi téxto bíblico. Iporãvéta ñameʼẽramo tiémpo pe estudiántepe ontende porã hag̃ua upe jaleéva, ha tekotevẽramo jalee jey vaʼerã hendive upe téxto. Jajapóramo entéro koʼã mbaʼe, pe persóna opilláta haʼe ndostudiaiha hína peteĩ vidéo térã peteĩ taʼanga, síno ostudiaha hína Ñandejára Ñeʼẽ (1 Cor. 2:13).

11, 12. a) ¿Mbaʼéichapa ikatu jahechauka ñanepasiensiaha ñane estudiántere? (Hechos 17:​1-4). (Ehecha pe taʼanga). b) ¿Mbaʼépa ndoikuaái heta hénte, ha mbaʼéichapa ikatu ñaipytyvõ chupekuéra?

¹¹ Sapyʼánte ikatu oĩ algúna enseñánsa ijetuʼúva pe estudiántepe ontende térã oguerovia hag̃ua. Oikóramo upéva, ñanemanduʼákena ‘ñanepasiénsia vaʼerãha japredika jave Ñandejára ñeʼẽ’. Umi estudiánte ningo idiferénte ojuehegui. Upévare ikatu oĩ umi enseñánsa ijetuʼuvéva peteĩ persónape g̃uarã, haʼetéramo jepe ñandéve ndahasyietéva ñantende hag̃ua. Por ehémplo, Pablo omboʼérõ guare Tesalónicape ndahaʼéi ku sapyʼaitépe umi judío ontendéva la haʼe heʼíva. Upévare Pablo unas kuánta vése omyesakã vaʼekue chupekuéra Ñandejára Ñeʼẽ. Upe rire ae oĩ kuri algúno oñepyrũva ojerovia (elee Hechos 17:​1-4).

¹² ¿Mbaʼéichapa ikatu avei jahechauka ñanepasiensiaha? Por ehémplo ñaporandúrõ ñane estudiántepe peteĩ mbaʼe, ñameʼẽkena chupe tiémpo okontesta hag̃ua. Ani ñande jajagarrapa ha ñañeʼẽterei. Ñahendu vaʼerã pe estudiántepe trankílo porã ha ñañehaʼã ñantende chupe. Upéi jalee ha ñaanalisa umi téxto bíblico oipytyvõtava chupe ontende hag̃ua la Jehová opensáva pe témare. Avei ñanemanduʼa vaʼerã oĩha heta hénte núnka ni ndohecháiva peteĩ Biblia, ha ndoikuaái la oĩva pype. Péicha jave ikatu hína okonveni jahechaukáramo pe persónape peteĩ Biblia imprésa. Ikatu jaraha chupe pe Traducción del Nuevo Mundo, ha jahechauka pe persónape pe párte oĩva iñepyrũme hérava “Reikuaave hag̃ua mbaʼépa oĩ Ñandejára Ñeʼẽme”. Upe párte oipytyvõta chupe ohecha hag̃ua oĩha heta informasión la Bíbliape. Avei ikatu jahechauka pe estudiántepe unos kuánto téxto oĩva pe pregúnta 15-pe g̃uarã, péicha ohecháta mbaʼéichapa la Biblia ñanepytyvõ javyʼa hag̃ua. Jahechaukáramo umi estudiántepe mbaʼeichaitépa ideprovécho Ñandejára Ñeʼẽ oikóta ñandehegui mboʼehára ikatupyrýva.

ÑAÑEʼẼ MEMÉKENA JEHOVÁRE

13. Ñamboʼe jave, ¿mávarepa ñañeʼẽ meme vaʼerã? Emombeʼu peteĩ ehémplo.

¹³ Ñaporomboʼe jave ñaipytyvõse la héntepe oikuaa porã hag̃ua Jehovápe ha Jesúspe (Sant. 4:8). Por ehémplo ñapensamíntena: Ñaipytyvõramo peteĩ persónape ohecha hag̃ua álgo pytũmbýpe, provávlemente jaipurúta peteĩ lintérna. Péro ndajaikomoʼãi jahesape ñandejehe, síno jahesapéta la oĩvare ñane renondépe ha jahechasévare hína. Upéicha avei ñamboʼe jave la Biblia ndajaipotái umi hénte ojesarekoiterei ñanderehe, síno jaipota ontende Jehová haʼeha pe omboʼéva chupekuéra ha la haʼe opensáva hína la iñimportánteva. Upévare ñañeʼẽ meme vaʼerã Jehováre ha la haʼe opensávare.

14. ¿Mbaʼéichapa ikatu ñamomýi ñane estudiántepe ojapose hag̃ua umi mbaʼe ombovyʼáva Jehovápe?

¹⁴ Ñande ñaipytyvõ vaʼerã ñane estudiántepe ohayhu hag̃ua Jehovápe, pórke péicha ojaposéta umi mbaʼe ogustáva chupe (Prov. 27:11). Ndajaikomoʼãi ñamboʼénte chupe mbaʼépa ojapo vaʼerã ha mbaʼépa ndovaléi ojapo oiko hag̃ua chugui testígo de Jehová. Ñande ningo jaipota okambia ombovyʼaségui Jehovápe. Upévare, oimérõ ñane estudiántepe ijetuʼu hína omboyke hag̃ua peteĩ mbaʼe ivaíva, ñaporandumína chupe: “¿Mbaʼérepa Jehovápe ndogustái ojejapo ko mbaʼe? ¿Mbaʼérepa ndéverõ g̃uarã Jehová oipota reheja peteĩ mbaʼe ndéve ndegustáva? ¿Mbaʼéichapa Jehová ohechauka nderayhuha ojerurévo ndéve upéva?”. Ñaipytyvõkena ñane estudiántepe ojepyʼamongeta hag̃ua mbaʼeichaguápa hína Jehová, péicha ohechakuaáta orekoha peteĩ Túa ohayhuetereíva chupe. Ha upéva omomýita pe persónape ojapo hag̃ua umi mbaʼe ombovyʼáva Jehovápe.

JASEGÍKENA ÑANDEKATUPYRYVE ÑAPOROMBOʼE HAG̃UA

15. ¿Mbaʼéichapa ikatu ñamehora ñaporomboʼe lájape?

¹⁵ Iporãta jajeruréramo Jehovápe tohechauka ñandéve mbaʼépepa ikatu ñamehora ñaporomboʼe lájape (1 Juan 5:14). Ñañemboʼe rire tekotevẽ avei ñamoĩ ñande párte Jehová ñanevendesi hag̃ua. Por ehémplo ñañatende porã vaʼerã umi rreunión ojepreparávare ñanembokatupyryve hag̃ua ha jajapo la ojeʼéva upépe. Avei jajapóta jave peteĩ kúrso bíblico ikatu jajerure peteĩ ermáno térã ermána ivalévape tañanemoirũ. Upéi ñaporandu chupe mbaʼépepa ikatu ñamehora. Aníkena ñanderesarái ñande jaikuaáramo jepe pe informasión, pe estudiánte ndoikuaaiha hína. Upévare ñañeimahina vaʼerã mbaʼéichapa haʼe oñeñandúta ñaanalisa vove pe leksión. Ñaipytyvõ chupe tohechakuaa ideprovechoha la oaprendéva ha tomombaʼe Jehová promesakuéra porãite. Jajapóramo koʼã mbaʼe, ñane estudiántegui oikóta Jehová amígo ha oikóta vyʼápe (Sal. 1:​1-3).

16. ¿Mbaʼérepa tekotevẽ jasegi ñañehaʼã ñamboʼe porãve hag̃ua?

¹⁶ Igustoiterei ningo ñamboʼe ótrope la Jehová heʼíva, ndaipóri voi ótra kósa ñanembovyʼavéva. Pe múndo pyahúpe koʼytevéntema tekotevẽta ñaporomboʼe. Upévare koʼág̃ama voi japredika aja, jasegíkena ñañeinteresa la héntere, jaipuru meme Ñandejára Ñeʼẽ ha ñañeʼẽ meme Jehováre. Péicha katuete ñandekatupyryvéta ñaporomboʼe hag̃ua.