Ñaipytyvõkena ótrope oikuaa porã hag̃ua Jehovápe

1. ¿Mbaʼéichapa reñeñandu rehechávo peteĩ estudiánte oñepyrũmaha oservi Jehovápe?

¿MBAʼÉICHAPA reñeñandu rehechávo peteĩ estudiánte primera ves ohoha rreuniónpe, oñepyrũha okomenta, opredika ha upéi ojevautisa? Katuete ningo revyʼaitereíta. Jaikuaa ningo Jehová la oipytyvõva upe persónape ojapo hag̃ua umi mbaʼe. Ha upévare ñande ñamombaʼeguasu chupe (1 Cor. 3:​5-9; 3 Juan 3, 4).

2. Ohechaukaháicha 1 Timoteo 2:​3, 4, ¿mbaʼépa Jehová oipota umi estudiántepe g̃uarã?

² Jehová “oipota opaichagua persóna ojesalva ha oikuaa porã pe añetegua” (elee 1 Timoteo 2:​3, 4). Haʼe oipotaiterei umi hénte oikuaa porã chupe ha avei umi mbaʼe porãita ojapóma vaʼekue ha osegítava ojapo amo gotyove (Jer. 9:24). Upearã umi hénte tekotevẽ “oikuaa porã pe añetegua”. Upéva ndeʼiséi haʼekuéra oikuaánte vaʼerãha heta mbaʼe Ñandejáragui. Upéicharõ, ¿mbaʼépa heʼise ‘jaikuaa porã pe añetegua’? Peteĩ expérto heʼi upéva heʼiseha peteĩ persóna oaprendeha umi mbaʼe omomýiva chupe oñemoag̃ui hag̃ua Ñandejárare. Upévare peteĩ estudiánte oúramo oikuaa porã Jehovápe okambiaséta voi oiko lája ha upéicha rupi ‘oikovéta pára siémpre’ (Juan 17:3).

3. ¿Mbaʼépa jahecháta ko artíkulope?

³ Jehová ningo omeʼẽ ñandéve peteĩ oportunida iporãitereíva. Haʼe oheja ñande ñaipytyvõ umi héntepe oikuaa hag̃ua chupe. Upévare, ko artíkulope ñaanalisáta koʼã pregúnta: ¿Mbaʼérepa umi estudiánte de la Biblia oikuaa porã vaʼerã Jehovápe? ¿Mbaʼéichapa ikatu ñamboʼe chupekuéra la ogustáva ha ndogustáiva Jehovápe? ¿Ha mbaʼéichapa ikatu ñaipytyvõ chupekuéra ojapo hag̃ua umi mbaʼe oaprendéva Jehovágui?

ÑAIPYTYVÕKENA UMI ESTUDIÁNTEPE OIKUAA PORÃ HAG̃UA JEHOVÁPE

4. ¿Mbaʼépa jahupytyse jajapo jave kúrso bíblico? (Marcos 12:30).

⁴ Jesús heʼi vaʼekue pe mandamiénto iñimportantevéva haʼeha jahayhu Jehovápe ‘ñande pyʼaite guive, ñande rekove kompletoite reheve, entéro ñane pensamiénto reheve, ha ñane mbaretekue omeʼẽmíva reheve’ (elee Marcos 12:30). Péro ñane estudiánte ohayhu hag̃ua Jehovápe oikuaa porãmante vaʼerã chupe. Ñande ningo jaipota la ñane estudiánte ojevautisa ohayhúgui Jehovápe, ndahaʼéi haʼéguinte ñane amígo, oipotágui iñamigorã umi Testígope térã ogustáguinte chupe algúno umi enseñánsa oĩva la Bíbliape. Upévare jajapo jave peteĩ kúrso bíblico la iñimportantevéva hína ñaipytyvõ ñane estudiántepe oikuaa ha ohayhu hag̃ua Jehovápe.

5. ¿Mbaʼépa ojaposéta peteĩ estudiánte ohayhúramo Jehovápe?

⁵ Peteĩ estudiánte oikuaa porãramo Jehovápe ha ohayhúramo chupe iñeʼẽrenduséta avei. Jesús heʼi vaʼekue: “Ko múndo oikuaa hag̃ua che ahayhuha pe Túape, ajapopaite pe Túa omanda hagueichaite chéve”. Péicha Jesús ohechauka peteĩ persóna ohayhúva Ñandejárape ojaposetaha la haʼe oipotáva (Juan 14:31). Upéicha avei peteĩ estudiánte ohayhu añetéramo Jehovápe okumpliséta la haʼe omandáva ha ndohejareimoʼãi chupe (1 Juan 5:3).

6. ¿Mbaʼépa ojapo vaʼerã pe estudiánte oikuaa porãve hag̃ua Jehovápe, ha mbaʼéichapa upéva oipytyvõta chupe?

⁶ Peteĩ estudiánte oikuaa porãramo Jehovápe, ifasilvéta avei chupe odesidi porã hag̃ua ha upearã ndahaʼéi ostudiánte vaʼerã. Ñapensamína ko ehémplore: Ñamoĩ chupe peteĩ persóna oaprendeseha omaneha peteĩ veíkulo. Haʼe ningo noaprendemoʼãi sólamente omañáramo ótro omanehávare, térã olee haguérente umi informasión oñeʼẽva pe témare. Haʼe omanehaséramo legálmente, tekotevẽta opraktika heta. Upéi opraktika rire ivakeanovéta ha oikuaáta mbaʼéichapa omaneha vaʼerã diferénte situasiónpe. Upéicha avei peteĩ estudiánte ndaikatumoʼãi oikuaa porã Jehovápe ijestúdio rupivénte, síno jaʼe porãsérõ g̃uarã opraktika vaʼerã. Haʼe ojegia vaʼerã umi konsého oĩvare la Bíbliape odesidi hag̃ua, ojapóvo upéva ohechakuaáta ovyʼaveha. Péicha haʼe oikuaa porãvéta ohóvo Jehovápe. Amáske oikuaa porãve Jehovápe ha ohechávo mbaʼéichapa oipytyvõ chupe, pe estudiánte oĩtama preparádo odesidi porã hag̃ua oimehaichagua situasiónpe.

7. José oikuaa porã rupi Jehovápe, ¿mbaʼéichapa upéva oipytyvõ chupe?

⁷ Ñanemanduʼamína José rehe. Haʼe ningo oikuaa porãiterei vaʼekue Jehovápe. Upéva oipytyvõ Josépe ani hag̃ua opeka Potifar rembireko heʼírõ guare chupe oñeno hag̃ua hendive. Imitã guive haʼe oiméne oikuaa raʼe Jehová omeʼẽ hague Adánpe peteĩnte hembirekorã ha oiméne ohendu avei la oiko vaʼekue ojeguerahárõ guare Sárape, haʼéva Abrahán rembireko (Gén. 2:24; 20:​3, 6). José oikuaa rupi umi rreláto ontende avei mbaʼépa Jehová opensa pe matrimóniore ha umi rrelasión sexuál rehe. José oikuaa porãiterei rupi Jehovápe orrechasaite voi Potifar rembirekópe ha heʼi chupe: “¿Mbaʼéichaiko ajapóta ko mbaʼe vaiete ha péicha apeka Ñandejára renondépe?” (Gén. 39:​7-9). Jahechaháicha José oikuaa kuri mbaʼépa oĩ porã ha mbaʼépa oĩ vai Jehovápe g̃uarã. Haʼe ontende porã mbaʼépa la ikatúva hína omoñeñandu vai Ñandejárape, upéicha rupi odesidi porãiterei. Ñande avei ñaipytyvõ vaʼerã ñane estudiántepe oikuaa porã hag̃ua Jehovápe ha avei umi mbaʼe ogusta ha ndogustáiva chupe. Péicha haʼekuéra katuete odesidíta avei umi mbaʼe Jehová oguerohorýva.

ÑAMBOʼÉKENA UMI ESTUDIÁNTEPE MBAʼÉPA OGUSTA HA NDOGUSTÁI JEHOVÁPE

8. ¿Mbaʼéichapa ikatu ñaipytyvõ ñane estudiántepe jaipurukuévo pe lívro ¡Jaikóta vyʼápe pára siémpre!?

⁸ Ñamboʼékena ñane estudiántepe mbaʼe mbaʼépa Jehová oguerohory ha nahániri. ¿Péro mbaʼéichapa ikatu jajapo upéva? Ñapensamína Jehová ehémplore. Haʼe oipytyvõ vaʼekue Jóbpe oikuaa porãve hag̃ua chupe. Upearã ojapo voi Jóbpe mas de 50 pregúnta (Job 38:1–41:34). Ñande avei ikatu hína jajapo pregúnta ñane estudiántepe. Umi porandu oĩva pe lívro héravape ¡Jaikóta vyʼápe pára siémpre!, ojejapo voi espesiálmente umi estudiánte oikuaa porãve hag̃ua ohóvo Jehovápe (ehecha pe rrekuádro “Porandu ikatúva ñanepytyvõ ñaporomboʼe hag̃ua”). Upévare eipurúkena umi porandu eipytyvõ hag̃ua ne estudiántepe oikuaa porãve hag̃ua Jehovápe.

9, 10. a) ¿Mbaʼéichapa umi estudiánte oikuaa porãvéta Jehovápe oleekuévo ibíblia? (Santiago 5:11). b) Ñane estudiánte oleétarõ Daniel istória, ¿mbaʼe mbaʼépa ikatu oñeporandu oikuaa porãve hag̃ua Jehovápe?

⁹ Ñañepyrũrehema voi jastudia peteĩ persóna ndive ñamokyreʼỹ chupe olee hag̃ua ibíblia káda día.a ¿Mbaʼéichapa ñaipytyvõkuaa ñane estudiántepe oikuaa porãve hag̃ua Jehovápe oleévo ibíblia? Ikatu jaʼe ñane estudiántepe oleévo peteĩ istória opensa vaʼerãha mbaʼérepa oiméne Jehová oipota raʼe upéva ojeskrivi Iñeʼẽme. Ha topensa mbaʼépa upe istória omboʼe chupe Jehovágui. Jahechamína disípulo Santiago ehémplo. Haʼe imanduʼárõ guare Job rehe heʼi oaguanta hague heta mbaʼe ijetuʼúva. Péro avei Job istória rupive Santiago ohechakuaa Jehová oporombyasy ha oporoporiahuverekoha (elee Santiago 5:11).

¹⁰ Káda istória oĩva la Bíbliape ohechauka mbaʼépa ogusta ha ndogustái Jehovápe. Ha ñande jaipota ñane estudiánte ohechakuaa upéva oleévo umi istória. Jaikuaaháicha ñane estudiánte oreko pe lívro ¡Jaikóta vyʼápe pára siémpre! Ñamoĩ chupe jaleeha pe párte hérava “Umi téma iñinteresánteva retopátava la Bíbliape”, ha heʼi ñandéve oleeseha Daniel istória ojeitýrõ guare chupe pe yvykua oĩháme umi león. Upépe ñande ñamokyreʼỹkuaa chupe oñeporandu hag̃ua koʼã mbaʼe oleekuévo: “¿Mbaʼérepa Jehová osalva vaʼekue Daniélpe? ¿Mbaʼéichapa ko istória chemboʼe mbaʼépa la ogustáva Jehovápe? (Dan. 6:​10, 22). ¿Mbaʼépa ojehu raʼe umi kuimbaʼe oakusa vaʼekuépe Daniélpe? ¿Mbaʼéichapa ko istória chemboʼe mbaʼépa la ndogustáiva Jehovápe? (Dan. 6:​4, 5, 24)”. Avei jaʼekuaa ñane estudiántepe ojepyʼamongeta hag̃ua mbaʼe ótra kósapa omboʼe chupe upe rreláto Jehovágui (Dan. 6:​26, 27).

11. ¿Mbaʼéichapa ñaipytyvõkuaa ñane estudiántepe ohechakuaa hag̃ua Jehovágui ouha la oaprendéva?

¹¹ Oiméne ñane estudiánte ohechakuaáma mbaʼéichapa ideprovécho chupe la oaprendéva ha oagradese ñandéve upévare. Katuete ningo ñanembovyʼaiterei upéva. Péro avei iñimportánte ñaipytyvõ chupe ohechakuaa hag̃ua entéro umi mbaʼe oaprendéva ouha Jehovágui, haʼe hína pe “Mboʼehára Ijojahaʼỹva” (Is. 30:​20, 21). Ikatu voi hína ñane estudiánte oagradese ñandéve ñamboʼe haguére chupe ha ñanderecharamo ñamboʼe lájare. Ndaivaíri ningo añete la ñane estudiánte heʼi ñandéve upéva, péro siémprekena ñamomanduʼa chupe omombaʼeguasu vaʼerãha Jehovápe, pórke haʼe hína la omboʼéva chupe opa mbaʼe.

ÑAIPYTYVÕKENA UMI ESTUDIÁNTEPE OJAPO HAG̃UA LA OAPRENDÉVA

12, 13. Ñane estudiánte oikuaa porãramo Jehovápe, ¿mbaʼéichapa upéva oipytyvõta chupe olee jave peteĩ istória ijetuʼúva ontende hag̃ua? (Ehecha pe taʼanga).

¹² Ñane estudiánte tekotevẽ ojapo umi mbaʼe oaprendéva ideprovécho hag̃ua chupe umíva. Upearã ñamboʼe vaʼerã chupe imanduʼa vaʼerãha umi mbaʼe oikuaámava Jehovágui olee jave la Bíbliape peteĩ istória nontendeporãiva. Por ehémplo ñamoĩ chupe ñane estudiánte oleeha umi mbaʼe Jehová ojapo vaʼekue yma. Péicha jave ikatu hína oñeporandu mbaʼérepa Jehová odesidi rakaʼe ohundi algúnope, ha ótrope katu oheja oikove. Oimérõ ne estudiánte oikuaase upéva, ¿mbaʼéichapa ikatu reipytyvõ chupe?

¹³ Emokyreʼỹkuaa ne estudiántepe ojepyʼamongeta hag̃ua umi mbaʼe oaprendéma vaʼekuére Jehovágui. Por ehémplo ikatu ere ne estudiántepe oñeporandu hag̃ua koʼã mbaʼe: “¿Mbaʼeichaite pevépa iñimportánte ñande rekove Jehovápe g̃uarã? (2 Ped. 3:9). ¿Mbaʼe iporãitévapa ojapo raʼe ñandesalva hag̃ua ñande haʼéramo jepe pekadór? (Efes. 2:​4, 5). ¿Okastiga piko Jehová umi hénte inoséntepe, ha oheja rei umi omeresévape ojekastiga chupe? (Éx. 34:​6, 7)”. Sapyʼánte umi istória oĩva la Bíbliape nomeʼẽi ñandéve entéro umi detálle ñanepytyvõva ñantende hag̃ua mbaʼérepa Jehová ojapo raʼe peteĩ mbaʼe. Péro legálmente natekotevẽi voi jaikuaa entéro mbaʼe, pórke ñande jaikuaa porã Jehovápe ha ni michĩmi voi ndajadudái chugui pórke haʼe siémpre ojapo la oĩ porãva.

14. Ne estudiántepe ijetuʼúramo ojogueraha porã hag̃ua peteĩ ermánondi, ¿mbaʼéichapa ikatu eipytyvõ chupe?

¹⁴ ¿Mbaʼe ótro situasiónpepa ñane estudiánte ikatu avei ojapo la oaprendéva? Ñamoĩ chupe ne estudiánte ohomaha rreuniónpe, péro ijetuʼu hína chupe ojegueraha porã hag̃ua peteĩ ermáno térã ermána kongregasionpeguándi. Ikatu oime pe ermáno ojapo raʼe álgo omoñeñandu vaíva chupe. Péicha jave emokyreʼỹkena ne estudiántepe ohecha hag̃ua umi ermánope Jehová ohechaháicha chupekuéra. Ikatu ere ne estudiántepe oñeporandu hag̃ua: “¿Mbaʼe sakrifísiopa Jehová ojapóma ohechauka hag̃ua Jehová ohayhuha chupekuéra? (Juan 3:16). ¿Mbaʼeichaite pevépa Jehovápe g̃uarã iñimportánte isiervokuéra oĩ unído? (Sal. 133:1). ¿Mbaʼéichapa Jehová oñeñandu ohechávo ñañehaʼãmbaiteha ñaime hag̃ua unído? (2 Cor. 13:11)”. Ñaipytyvõkena ñane estudiántepe ontende hag̃ua Jehová ovyʼaitereitaha heseve ojesareko meméramo umi kualida porã orekóvare umi ermáno ha ani umi idefektokuérare.

15, 16. a) ¿Mbaʼéichapa peteĩ estudiánte ikatu osegi Jesús ehémplo odesidíta jave álgo iñimportánteva? (Juan 8:29). b) ¿Mbaʼéichapa Marianne oipytyvõ raʼe iñestudiántepe odesidi porã hag̃ua? (Ehecha pe taʼanga).

¹⁵ Eipytyvõkena avei ne estudiántepe ojapo hag̃ua la oaprendéva odesidíta jave umi mbaʼe iñimportánteva. Upearã ikatu reipuru pe lívro ¡Jaikóta vyʼápe pára siémpre!, ha ehechauka chupe pe leksión 35 hérava “¿Mbaʼépa ñanepytyvõta jadesidi porã hag̃ua?”. Péro ikatu oime ne estudiánte ohekáma informasión, oñemboʼéma Jehovápe ha lomímonte ndoikuaái gueteri mbaʼépa la ojapótava. Ikatu oime otopa hetaiterei konsého bíblico ha ndoikuaái mavaitévapa oipytyvõta chupe isituasiónpe. Pépe ikatu emokyreʼỹ chupe opensa hag̃ua Jesús ehémplore. ¿Mbaʼépa Jesús oreko vaʼekue enkuénta odesidi hag̃ua? Haʼe heʼi vaʼekue: ‘Che siémpre ajapo umi mbaʼe che Túa oguerohorýva’ (elee Juan 8:29). Emokyreʼỹkena ne estudiántepe opensa hag̃ua ko mbaʼére: “Asegún umi informasión atopa vaʼekue ha umi mbaʼe aikuaáva Jehovágui, ¿mbaʼépa iporãvéta adesidi?”. Ñaipytyvõkena ñane estudiántepe ohechakuaa hag̃ua upe odesidíva ombovyʼáramo Jehovápe, katuete oĩ porãha hína.

¹⁶ Peteĩ estudiánte oikóva Chílepe tekotevẽ vaʼekue odesidi peteĩ mbaʼe iñimportánteva. Ojeofrese kuri chupe peteĩ traváho ogana porãitereitahápe, ha ihentekuéra ojopy chupe oasepta hag̃ua upe traváho. Péro upe estudiánte oaseptáramo, ofaltáta kuri algúno umi rreuniónpe. Pe ermána omboʼéva chupe la Biblia hérava Marianne heʼi: “Che haʼe chupe opensa hag̃ua mbaʼéichapa omoñeñandúta Jehovápe la haʼe odesidíva. ¿Ovyʼátapa Jehová térãpa oñembyasýta? Avei amomanduʼa chupe oñemboʼe vaʼerãha Jehovápe la oikóvare ha upéi toñatende mbaʼéichapa Jehová ombohovái chupe iñemboʼe”. ¿Mbaʼépa oiko raʼe upéi? Marianne heʼi: “Haʼe orrechasa upe traváho ha upéi pyaʼeterei otopa ótro traváho opermitíva chupe oho meme rreunionhápe”. Jahechaháicha Marianne ndeʼíri iñestudiántepe mbaʼépa la ojapo vaʼerã, síno oipytyvõ chupe ojepyʼamongeta hag̃ua umi mbaʼe oaprendéma vaʼekuére Jehovágui. La oiko vaʼekue oipytyvõ pe estudiántepe oñemoag̃uive hag̃ua Marianne rehe, péro ndahaʼéi upévante, síno avei oñemoag̃uive hag̃ua Jehová rehe. Marianne heʼi iñestudiánte oaprende hague Jehová oñangarekotaha ñanderehe ñamotenonde meméramo iservísio.

JEHOVÁ OVENDESI UMI OIKUAA PORÃVAPE CHUPE

17. ¿Mbaʼépa hína la iñimportantevéva ñane estudiantekuéra oikuaa?

¹⁷ Pe kúrso bíblicope ñane estudiánte oaprende heta mbaʼe iñimportánteva oĩva la Bíbliape. Por ehémplo oikuaa hikuái mbaʼépa oiko peteĩ persónagui omano rire, mbaʼérepa Jesús omano ñanderehehápe ha mbaʼépa ojapóta Ñandejára Rréino. Avei oaprende hikuái heta mbaʼe Jehová organisasióngui, por ehémplo mbaʼépa ojejapo rreunionhápe, mbaʼe traváhopa oreko umi ansiáno ha mávapa hína pe Kuérpo Governánte. Péro jahecha haguéicha ko artíkulope ñande ndajaipotái ñane estudiantekuéra oaprende koʼã mbaʼénte, síno ñandéve iñimportanteve hína haʼekuéra oikuaa porã Jehovápe.

18. ¿Mbaʼe mbaʼe iporãvapa ohupyty umi oikuaáva Jehovápe?

¹⁸ Javyʼaiterei ningo ikatu haguére ñaipytyvõ ótrope oaprende hag̃ua Jehovágui. Umi ohayhu ha oikuaáva Jehovápe ikatu koʼág̃ama voi oiko vyʼápe (Sal. 25:​12-15). Avei umi hénte ‘oikuaáva Ñandejára teépe’ oikovéta vyʼápe ha pára siémpre amo gotyove (1 Juan 5:20). Péro ndahaʼéi upévante. La Biblia voi heʼi ‘Ñandejára oikuaa porãha’ umi hénte oikuaáva ha ohayhúvape chupe (1 Cor. 8:3). Ñandejára Jehová ñandereko enkuénta ha heʼi ñande haʼeha iñamígo. Péva hína pe vendisión tuichavéva jarresivíva jaikuaa haguére Ñandejára teépe.