Julio

Oĩ heta ermáno ijedáva, hasykatúva térã orekóva algúna diskapasida. Upévare ndaikatúi ojapo hetave mbaʼe Jehová servísiope. Upéicha rupi oĩ jepi opensáva naiñimportanteiha Ñandejára renondépe ha oñeporandu: “¿Chedeprovéchopa gueteri Jehovápe g̃uarã?”. Pe salmísta oskrivíva Salmo 71 oñeñandu vaʼekue avei upéicha. Haʼe heʼi vaʼekue Ñandejárape: “Anína chereja cheaño koʼág̃a nachembaretevéimarõ” (Sal. 71:​9, 18). Pe salmísta oĩ vaʼekue segúro Jehová oipytyvõ ha ogiataha chupe oservíramo fiélmente chupe. Haʼe oaprende vaʼekue Jehová oguerohoryetereiha umi omeʼẽvape chupe iporãnguete iposivilida omeʼẽháicha chupe (Sal. 37:​23-25). Oimérõ nde ndeeda, eñehaʼãna epensa mbaʼéichapa Jehová nderecha. Haʼe nepytyvõkuaa ejepytaso mbarete hag̃ua ijykére, oiméramo jepe nekangýma ejapo hag̃ua heta mbaʼe iservísiope (Sal. 92:​12-15). Upévare ejesarekóna umi mbaʼe ikatúvare rejapo. w24.10 28 párr. 14-16

Heta vése la Biblia ndeʼíri derechoite mbaʼépa jadesidi vaʼerã. Upéicha jave umi kristiáno neʼĩrava okakuaapáva ndoikuaái mbaʼépa ojapóta ha oforsa chupekuéra odesidi hag̃ua. Péicha jave koʼã kristiáno opensa ikatuha ojapo la ojaposéva, térã oipota oñemoĩ peteĩ léi osegi vaʼerã, natekotevẽiramo jepe. Por ehémplo, amalisia umi Corintogua ojerure vaʼekue Páblope heʼi hag̃ua ovale térã ndovaléipa peteĩ kristiáno hoʼu umi tembiʼu ojeofrese vaʼekue umi dios raʼangápe. Heʼi rangue umi kristiánope mbaʼépa ojapo vaʼerã, apóstol Pablo omomanduʼa chupekuéra káda uno orekoha ‘derécho odesidi hag̃ua’ asegún la ikonsiénsia. Haʼe omensiona umi enseñánsa oĩva la Bíbliape ikatúva oipytyvõ umi kristiánope ojegia hag̃ua ikonsiénsia heʼívare ha pono oofende ótrope (1 Cor. 8:​7-9). Péicha Pablo omboʼe umi Corintoguápe oipuru hag̃ua iñakã odesidíta jave álgo, oiko rangue odepende ótrore térã oheka rangue peteĩ léi opa mbaʼépe. Pablo oipytyvõ vaʼekue umi kristiánope okakuaapa hag̃ua Ñandejára servísiope. w24.04 5 párr. 14

Ñanemanduʼamína la Jesús heʼi vaʼekuére Juan 5:​29-pe. Haʼe heʼi vaʼekue oĩtaha ‘orresusitáva ojehusga hag̃ua’. Ha koʼãva apytépe oikéta hína “umi ojapo vaʼekue ivaíva”. Jaikuaa umi ninivita hembiapo vai hague umi hénte Sodoma ha Gomorrapeguáicha avei. Péro koʼãva ndorekói vaʼekue oportunida oñarrepenti hag̃ua oreko haguéicha umi ninivita. Upéicharõ, provávlemente oĩ hína esperánsa umi hénte Sodoma ha Gomorraguápe g̃uarã. Ikatu hína algúno jepe ijapyteguikuéra orresusita. Ha ñande ikatu jareko la oportunida ñaipytyvõvo chupekuéra oikuaa hag̃ua Jehová ha Jesúspe. Jehová siémpre ohesaʼỹijo “yvypóra korasõ” ha oipyguara “yvypóra pensamiénto ipypukuvéva”. Jehová odesidíta vove mávapepa omoingove jeýta, “haʼe opagáta káda únope asegún pe hape” siémpre voi ojapoháicha. Jehová oporokondenáta tekotevẽramo, péro ohecháramo ikatuha oporoporiahuvereko, siémpre ojapóta upéicha. ¡Upévare núnka ndajaʼéi vaʼerã peteĩ persóna ndorresusitamoʼãiha oimérõ la Biblia ndoasegurái upeichataha! w24.05 6 párr. 15, 16

Ymaite guive Jehová siervokuéra orekónteva voi umi asignasión ijetuʼúva, péro la Ñandejára heʼíva ombopyʼaguasu chupekuéra. Upéicha vaʼekue Jeremías kásope. Jehová omanda vaʼekue chupe opredika hag̃ua, péro haʼe okyhyje. Jeremías heʼi voi Jehovápe: “Che ningo chemitãiterei gueteri ha nañeʼẽkuaái” (Jer. 1:6). Jeremías ndojeroviapái vaʼekue ijehe, péro la Jehová heʼi vaʼekue chupe omombeʼu hag̃ua ombopyʼaguasu chupe. Haʼe heʼi: “Pe iñeʼẽ haʼete voi tatarendy oĩva che kangue kuápe, ha chekaneʼõma ajejoko hague” (Jer. 20:​8, 9). Jeremías oikuaa vaʼekue ijetuʼutaha opredika umi héntepe, péro pe mensáhe tekotevẽva omombeʼu ombopyʼaguasu chupe okumpli hag̃ua iñasignasión. Koʼág̃arupi avei Jehová ñanembopyʼaguasu umi mbaʼe heʼíva rupive la Bíbliape. Apóstol Pablo ojerure vaʼekue umi ermánope ‘oikuaa porã hag̃ua Ñandejára rembipota’. ¿Maʼerãpa? Ikatu hag̃uáicha oiko “oikoháicha umi oservíva Jehovápe”, péicha haʼekuéra ikatúta kuri osegi ojapo “umi mbaʼe oĩ porãva” (Col. 1:​9, 10). w24.04 14, 15 párr. 2-4

Abiatar omboyke vaʼekue Jehovápe otraisionárõ guare rréi Davídpe, ha oapoja Adoníaspe opytaséva rréiramo. Upéicharõ jepe Sadoc osegi vaʼekue ifiél Jehovápe. David oikuaa vaʼekue ikatuha ojerovia Sadoc rehe. Oñemombeʼúrõ guare rréi Davídpe mbaʼépa la oplaneáva Adonías, haʼe ojerure ajúda Sadoc, Natán ha Benáyape, ikatu hag̃uáicha oñenombra rréi Salomónpe (1 Rey. 1:​32-34). Oiméne omokyreʼỹete Sadócpe ohechávo oĩha ótro Jehová siérvo ifiélva. Por ehémplo Natán ndohejái vaʼekue Jehovápe ha oapoja Davídpe. Salomón ojupírõ guare de rréi, ‘onombra vaʼekue pe saserdóte Sadócpe, Abiatar rekovia’ (1 Rey. 2:35). ¿Mbaʼéichapa ikatu resegi Sadoc ehémplo? Oimérõ álgien nde rehayhuetereíva oheja Jehovápe, ehechaukákena Jehovápe nde redesidiha ndefieltaha chupe (Jos. 24:15). Haʼe nembopyʼaguasúta ha omeʼẽta ndéve la fuérsa reikotevẽva. Eñemboʼe memékena ha eñemoag̃ui umi ne amigokuéra ifiélvare Jehovápe. Jehová omombaʼeterei ohecha jave mbaʼeichaitépa eñehaʼã ndefiél ha katuete nepremiáta (2 Sam. 22:26). w24.07 6, 7 párr. 16, 17

Salmo 15:2 heʼi umi haʼéva Ñandejára amígo ‘siémpre iñeʼẽrenduha, ndojapoiha mbaʼeve ivaíva ha ihustoha’. Koʼã mbaʼe siémpre ñañehaʼã vaʼerã jajapo ha ndahaʼéi un tiémporente. ¿Péro añetehápepa siémpre ikatu ñaneñeʼẽrendu? Si ikatu. Enterove ningo ñaneimperfékto péro Jehová renondépe ikatu siémpre ñaneñeʼẽrendu ñañehaʼãmbaitéramo jajapo la haʼe heʼíva. Ñañemeʼẽvo chupe ha jajevautisa ñañepyrũ ramónte hína. Por ehémplo, yma peteĩ persóna haʼe haguérente israelita ndeʼiséi haʼe ikatumaha oĩ Ñandejára rógape. Oĩ vaʼekue umi oñemboʼéva chupe péro ijapu ha ‘ndojapói mbaʼeve iporãva’ (Is. 48:1). Umi israelita ipyʼaporãva oaprende vaʼerã kuri mbaʼépa Jehová ohaʼarõ chuguikuéra ha oiko haʼe oipotaháicha. Upéicha avei koʼág̃arupi ñaime porã hag̃ua Ñandejárandi, ndahaʼéi jajevautisánte vaʼerã ha ojeʼe ñanderehe ñande haʼeha testígo de Jehová. Upéva rangue ‘ndajajapói vaʼerã mbaʼeve ivaíva’ ha ñandehústo vaʼerã. w24.06 9 párr. 4; 10 párr. 6

¿Mbaʼéichapa Jehová ohechauka imbaʼeporãha ñanendive? Haʼe omeʼẽ ñandéve la ñaikotevẽva. Ikatu oime ndajarekói hetaiterei mbaʼe, péro jareko la ñaikotevẽva jaikove hag̃ua. Por ehémplo Ñandejára rupive jareko la ñamonde vaʼerã, jaʼumi vaʼerã ha peteĩ lugár jaiko hag̃ua (Sal. 4:8; Mat. 6:​31-33; 1 Tim. 6:​6-8). Jehová nomeʼẽi ñandéve koʼã mbaʼe oñandúgui ojapómante vaʼerãha upéva ñanderehehápe. Jahechamína la Jesús heʼi vaʼekue Mateo 6:​25, 26-pe. Haʼe oñeʼẽ vaʼekue umi guyráre ha heʼi: “Haʼekuéra noñemitỹi, nomonoʼõi ha nombyatýi hembiʼurã galpónpe”. Péro upéi Jesús heʼive: “Pende Ru oĩva yvágape omongaru chupekuéra. ¿Ndapevalevéi piko peẽ chuguikuéra?”. ¿Mbaʼépa ñaaprende? Jehová okuidárõ umi animál rehe, koʼýte omeʼẽta ñandéve la ñaikotevẽva. Peteĩ túa oporohayhúvaicha, Jehová okuida ifamíliare ohayhuetereígui chupekuéra (Sal. 145:16; Mat. 6:32). w24.09 26, 27 párr. 4-6

Peteĩ siérvo ministeriál haʼe peteĩ ermáno ojevautisámava. Umi ansiáno onombra koʼã ermánope espíritu sánto rupive ojapo hag̃ua heta mbaʼe iñimportánteva kongregasiónpe. Umi siérvo ministeriál haʼe kuimbaʼe ojerovia mbaretéva. Haʼekuéra ohayhueterei Jehovápe ha oiko haʼe oipotaháicha, avei umi siérvo ipyʼaite guive ohayhu umi ermáno ha ermánape (Mat. 22:​37-39). ¿Mbaʼéichapa peteĩ ermáno ojevautisáva ikatu oñehaʼã oservi de siérvo ministeriál? La Bíbliape oĩ entéro umi rrekisíto tekotevẽva okumpli peteĩ ermáno oiko hag̃ua chugui siérvo ministeriál (1 Tim. 3:​8-10, 12). Upévare ikatu hag̃uáicha reservi de siérvo ministeriál reikuaa porã vaʼerã umi rrekisíto oĩva la Bíbliape, ha upéi rembaʼapo jejopy vaʼerã reguereko hag̃ua umi kualida oñekotevẽva. Péro primero iñimportanteterei eñeporandu: “¿Mbaʼépa la chemomýiva hína aservi hag̃ua de siérvo ministeriál?”. w24.11 14, 15 párr. 4, 5

Oĩ umi hénte heʼíva oleéma hague la Biblia hetaiterei vése, ¿péro oguerovia añetépa hikuái la Biblia heʼíva? ¿Okambiápa hikuái oiko hag̃ua la Biblia heʼiháicha? Nahániri, la majoría umi hénte ndojapói upéva. ¡Ajépa idiferentete Jehová siervokuéra! Ñande jaheja la Biblia ñanepytyvõ ha jasegi umi konsého oĩva pype. Ndahaʼéi ningo la ifasilpáva jalee ha jajapo Ñandejára Ñeʼẽ heʼíva. Sapyʼánte ijetuʼu ñañemotiémpo upearã, térã jalee pyaʼe pyaʼéntema ha ndajajepyʼamongetái hese. Avése katu ñañedesanima pórke hetaiterei mbaʼépe tekotevẽ ñamehora. Tahaʼe haʼeháicha, aníkena ñañentrega. Jehová ñanepytyvõ rupi ikatúta jasupera oimeraẽ mbaʼe. Upévare jajapókena Iñeʼẽ heʼíva. Amáske jalee Ñandejára Ñeʼẽ ha jajapo heʼíva pype javyʼavétantema (Sant. 1:25). w24.09 7 párr. 15, 16

Jahasa jave umi mbaʼe ijetuʼúva ha ñanemarkaitéva voi, Jehová ikatu ñanekonsola ijespíritu sánto rupive. Oimérõ nde rehasa hína peteĩ situasión ijetuʼuetereívare, eñemboʼékena Jehovápe ha emombeʼupaite chupe la reñandúva. Ikatu reñeʼẽ hendive heta vése, ha nderehéma odepende ipukútapa térã mbykýtapa ne ñemboʼe (Sal. 86:3; 88:1). Ejerure jey jeýkena Jehovápe ijespíritu sánto ha haʼe siémpre nepytyvõta. ¿Rehasápa raʼe álgo ijetuʼúva ha koʼág̃a reñandu neremeʼẽveimaha? Jehová espíritu sánto ikatu nemombarete resegi hag̃ua reservi chupe (Efe. 3:16). Ejerure rire Jehovápe ijespíritu sánto, ejapo umi mbaʼe nepytyvõtava erresivi hag̃ua upe espíritu. Por ehémplo eho rreunionhápe ha esẽ epredika. Avei relee vaʼerã la Biblia káda día, péicha ikatúta rejepyʼamongeta Jehová opensa lájare (Filip. 4:​8, 9). Releévo la Biblia ikatu reanalisa pe ehémplo ohejáva umi Ñandejára siervokuéra yma guare. Haʼekuéra ombohovái vaʼekue heta mbaʼe ijetuʼúva, péro Jehová oipytyvõ vaʼekue chupekuéra oaguanta hag̃ua umi pruéva. w24.10 9 párr. 12-14

Jehová ha Jesús ohayhueterei umi héntepe ha ñande avei (Prov. 8:31). Ñande jaiporiahuvereko umi hénte ‘ndoikuaáivape Ñandejárape’ ha ‘oikóvape esperansaʼỹre’ (Efes. 2:12). Umi persóna hetaiterei iprovléma, haʼete oĩva hikuái peteĩ yvykua pypukúpe. Péro ñande haʼetévaicha ñambohasáva chupekuéra peteĩ pióla osẽ hag̃ua upégui ñamombeʼúvo chupekuéra umi notísia porã oñeʼẽva Ñandejára Rréinore. Ñande jahayhu ha jaiporiahuvereko ñande rapichápe. Upévare jajapose ikatúva guive ñamombeʼu hag̃ua chupekuéra umi notísia porã. Upe mensáhe porãite ikatu omeʼẽ esperánsa ha ombovyʼa la héntepe koʼág̃ama voi. Avei omeʼẽ chupekuéra la oportunida amo gotyove oikove hag̃ua pára siémpre Ñandejára múndo pyahúpe (1 Tim. 6:19). Jahayhu rupi ñande rapichakuérape, jaavisase avei chupekuéra ko múndo aña oñehundi potaitemaha (Eze. 33:​7, 8). Ñande jaipota umi hénte oikuaa mbaʼépa oikóta pe jehasa asy guasu aja. Primero oñehundipaitéta umi rrelihión japu ha upéi Armagedónpe oñehundíta kompletoite ko múndo aña (Apoc. 16:​14, 16; 17:​16, 17; 19:​11, 19, 20). w24.05 16, 17 párr. 8, 9

Apóstol Pablo heʼi vaʼekue umi kristiánope ‘oheja hag̃ua Ñandejárape tohechauka ipochyha umi mbaʼe vai ojejapóvare’. ¿Mbaʼéichapa ikatu jasegi upe konsého? Upearã jaheja vaʼerã Jehová ojapo hustísia itiempoitépe ha iporãveháicha chupe g̃uarã. Upéva ojapo vaʼekue John peteĩ ermáno otrata vaírõ guare chupe. John heʼi: “Chepochýramo jepe ajejokopaite pono chejeheguíntema asolusiona la oiko vaʼekue. Romanos 12:19 heʼíva chepytyvõ chepasiénsia hag̃ua ha akonfia hag̃ua Jehováre”. Tuicha ñasẽ porãta jahejáramo Jehovápe osolusiona umi provléma. Péicha ndajaikomoʼãi ñañekevranta jahekágui mbaʼéichapa ikatu ñasolusiona pe oiko vaʼekue. Jehová ojeofreséma ñanepytyvõ hag̃ua, haʼete voi heʼíva ñandéve: “Ani ejepyʼapy. Chéntema añenkargáta la oikóvare”. Jehová oprometéma ñandéve haʼe ohusgataha umi ñandetrata vaívape. Ñakonfiáramo hese ifasilvéta ñambohasa rei hag̃ua umi inhustísia, jaikuaágui Jehová siémpre ojapotaha la iporãvéva. w24.11 6 párr. 14, 15

Ñanemanduʼa vaʼerã umi mbaʼerepy jarekóva ndahaʼéi vaʼerãha la iñimportantevéva ñandéve g̃uarã. Upéva voi apóstol Pablo omomanduʼa vaʼekue umi kristiánope. Pablo oñeʼẽ la ojapo vaʼekuére umi israelita pe desiértope, por ehémplo la oiko vaʼekuére sérro Sinaí ypýpe. Haʼe heʼi umi kristiánope ‘ani hag̃ua ojapose ivaíva umi israelita ojapose haguéicha’ (1 Cor. 10:​6, 7, 11). Umi milágro rupive Jehová omeʼẽ vaʼekue umi israelítape la hoʼu vaʼerã. Péro haʼekuéra ohecharamoiterei rupi pe tembiʼu, amo ipahápe la Jehová omeʼẽva operhudika chupekuéra (Núm. 11:​4-6, 31-34). Avei oadorárõ guare hikuái pe vaka raʼy raʼangápe, ohechauka iñimportanteveha chupekuéra g̃uarã okaru, hoʼu vevída ha ojediverti, oadora rangue Jehovápe (Éx. 32:​4-6). Apóstol Pablo oñeʼẽ vaʼekue koʼã mbaʼére oavisa hag̃ua umi kristiánope oñatende vaʼerãha, pórke upérõ oñehundi potaite Jerusalén ha itémplo áño 70-pe. Koʼág̃a katu oñehundi potaitéma ko múndo aña jaikohápe, upévare ñañatendékena Pablo konséhore ani hag̃ua jajapo la ojapo vaʼekue umi israelita. w24.12 6 párr. 13

Jehová ningo haʼe ‘Ñandejára ovyʼáva’ ha oipota ñande avei javyʼa (1 Tim. 1:11). Haʼe omeʼẽ ñandéve heta rregálo iporãva ikatu hag̃uáicha jaiko vyʼápe (Sant. 1:17). Peteĩva umi rregálo haʼe hína pe matrimónio. Peteĩ kuña ha peteĩ kuimbaʼe omenda jave haʼekuéra opromete ojoayhu ha ojorrespetataha. Umi omendáva osegíramo ojoayhu ipyʼaite guive ikatúta oiko vyʼápe. Ñambyasýramo jepe, oĩ heta omendáva nokumplíriva la opromete vaʼekue omendárõ guare. Upéicha rupi ndovyʼavéi hikuái imatrimóniope. ¿Mbaʼéichapa haʼe oipota menakuéra otrata hembirekópe? Jehová omanda menakuérape omombaʼe hag̃ua hembirekópe. Jarrespetáramo peteĩ persónape ñamombaʼéta ha jatrata porãta chupe. Péicha avei peteĩ ména omombaʼéva hembirekópe imbaʼeporãta hendive ha otratáta chupe mborayhúpe (1 Ped. 3:7). w25.01 8 párr. 1, 2; 9 párr. 4, 5

Ndajadudái pe kárta apóstol Pablo oskrivi vaʼekue umi hebréope oipytyvõ hague chupekuéra ojeprepara hag̃ua pe jehasa asýpe g̃uarã. Haʼe omokyreʼỹ vaʼekue umi kristiánope ostudia ha ontende porãve hag̃ua Ñandejára Ñeʼẽ, ikatu hag̃uáicha orrechasaite umi enseñánsa ikatúva omokangy chuguikuéra ijerovia. Pablo omokyreʼỹ avei chupekuéra ojerovia mbarete hag̃ua. Péicha haʼekuéra pyaʼe ikatúta osegi umi instruksión Jesús omeʼẽ vaʼekue, ha avei umi instruksión omeʼẽva umi ogiáva pe kongregasión. Haʼe oipytyvõ avei umi kristiánope oaguantakuaa hag̃ua umi pruéva, oexplikávo Jehová ikatuha oipuru koʼã mbaʼe oentrena hag̃ua chupekuéra. Ñande avei jasegíramo koʼã konsého oĩva la Bíbliape ikatúta ñaaguanta ha ñandefiél ipahaite peve (Heb. 3:14). w24.09 13 párr. 17, 19

Ohechaukaháicha la Biblia, pe rreskáte haʼe hína pe présio ojepagáva ikatu hag̃uáicha oñeperdona ñande pekádo ha jaiko porã jey hag̃ua Ñandejárandi. ¿Péro mbaʼépa pe présio tekotevẽva ojepaga entéro yvypóra oreko jey hag̃ua la Adán operde vaʼekue? Ñanemanduʼa vaʼerã Adán ha Eva naiñeʼẽrendúirõ guare oiko hague chuguikuéra pekadór ha operde pe oportunida oikovévo pára siémpre. Upévare, ikatu hag̃uáicha ojerrekupera jey la ojeperde vaʼekue, tekotevẽ ojepaga el mísmo présio kómo rreskáte (1 Tim. 2:6). ¿Mávapa ikatúta kuri opaga ko présio? Sólamente peteĩ kuimbaʼe haʼéva 1) perfékto, 2) orekóva la oportunida oikovévo pára siémpre ko yvy ape ári, ha 3) oĩva osakrifika hag̃uáicha hekove umi hénte rehehápe. ¿Mbaʼérepa jaʼekuaa Jesús ikatu hague opaga pe rreskáte? 1) Haʼe perfékto ha “ndopekái vaʼekue” (1 Ped. 2:22). 2) Upéicha rupi haʼe ikatu vaʼekue oiko pára siémpre ko yvy ape ári, ha 3) oĩ vaʼekue dispuésto omboykévo upe oportunida ha omeʼẽ hekove ñanderehehápe (Heb. 10:9). w25.02 4, 5 párr. 11, 12

Tahaʼe haʼéva pe rembohováiva rejevautisa hag̃ua, ikatu reĩ segúro Jehová nderayhuetereiha ha oipotaha reĩ ifamília apytépe. Jesús heʼi vaʼekue unos kuánto idisipulokuérape: “Pende jerovia ojoguáramo peteĩ mostása semíllape jepe, pejéta ko montáñape: ‘Tereho koʼágui amoite’, ha ohóta, ha ndaiporimoʼãi mbaʼeve ndaikatumoʼãiva pejapo” (Mat. 17:20). Upérõ guare neʼĩra kuri ojapo heta tiémpo umi disípulo omoirũ hague Jesúspe, upévare haʼekuéra osegi vaʼerã kuri omombarete ijerovia. Péro Jesús oasegura vaʼekue chupekuéra oñehaʼãramo ojerovia mbareteve, Jehová oipytyvõtaha chupekuéra ombohovái hag̃ua umi provléma tuicháva peteĩ montáñaicha. ¡Jehová katuete avei péicha nepytyvõta! Rehechakuaárõ oĩha álgo ikatúva ndejoko rejevautisa hag̃ua, eñehaʼã pyaʼe embohovái umíva ikatu hag̃uáicha reñemeʼẽ Jehovápe ha ejevautisa. ¡Ndaipóri ningo ótra kósa iporãvéva ikatúva rejapo! w25.03 7 párr. 18-20

Ikatu ñambohovái porã umi situasión ijetuʼúva ñanemanduʼa memérõ Ñandejára oikovéva oĩha ñanepytyvõ hag̃uáicha siémpre. Ikatu ñamombarete ñande jerovia ñapensávo umi mbaʼe Jehová ojapo vaʼekuére yma (Is. 37:​17, 33-37). Avei ikatu jalee térã jahecha umi notísia osẽva ñande sítio jw.org-pe, ohechaukáva mbaʼéichapa Jehová oipytyvõ ñane ermanokuérape koʼág̃arupi. Avei iporãta nemanduʼa memérõ umi mbaʼe Jehová ojapóma vaʼekuére nderehehápe voi. Natekotevẽi katuete rehasa raʼe peteĩ mbaʼe iñimpresionántevare ehechakuaa hag̃ua Jehová oĩ hague nde ykére. ¿Mbaʼérepa? Pórke la iñimportánteva hína Jehová ojapóma hague heta mbaʼe nderehehápe, haʼe ningo oipota oiko ndehegui iñamigoite (Juan 6:44). Upévare, ejeruremína Jehovápe tanemomanduʼa haʼe okontestárõ guare ndéve ne ñemboʼe, omeʼẽrõ guare ndéve la reikotevẽva itiempoitépe ha okuidárõ guare nderehe peteĩ situasión ijetuʼúvape. Jajepyʼamongeta memérõ koʼã mbaʼére ñaiméta segúro Jehová osegitaha ojapo heta mbaʼe ñanderehehápe. w24.06 21 párr. 8

Ñande jajedesidíma ndajajapomoʼãiha mbaʼeve ñanemomombyrýtava Jehovágui, péro ñanemanduʼa vaʼerã ñaneimperfektoha ha ifasilha ñandéve jajapo ivaíva oñepresenta jave peteĩ tentasión (Rom. 7:​21-23). Ñaimoʼãʼỹve jave ikatu ñaĩ peteĩ situasión ñandestirahápe jajapo la ivaíva. Upévare, ikatu hag̃uáicha ñandefiél Jehovápe ha Itaʼýrape, tekotevẽ jasegi Jesús konsého ha siémpre ñañatende porã ani hag̃ua jaju japeka. Enterovévape oñepresenta umi tentasión opeka hag̃ua, péro káda uno jareko jey ñande devilida ha ñandestiráta álgo idiferénteva. Por ehémplo, algúno oñehaʼãmbaite ani hag̃ua opeka vai ha hekovai. Ótro katu olucha ani hag̃ua ojapo umi mbaʼe ikyʼáva, por ehémplo pono ohecha pornografía, oñemasturva térã ojejavyky. Oĩ avei umi oñehaʼãmbaitéva okambia pórke ikarákter vai, ipochypa rei térã ndojapói jepi la iporãva okyhyjetereígui hapichágui. w24.07 14 párr. 3; 15 párr. 5

Ñapensamína mbaʼépa oiko vaʼerãmoʼã umi ansiáno ndohejáirire pe kuimbaʼe oñarrepenti vaʼekuépe oĩ jey kongregasiónpe. Térã jakalkulami mbaʼépa ikatu vaʼerãmoʼã oiko umi ermáno ndohechaukáirire ohayhuha chupe. Provávlemente pe kuimbaʼe ikatu kuri ‘oñembyasyeterei ha oñentregántema’ openságui núnka ndaikatumoʼãveimaha oservi jey Jehovápe. Amo ipahápe haʼe ikatu kuri noñehaʼãvéintema oĩ porã jey Ñandejárandi. Péro oĩ ótra kósa ivaivéntemava. Umi ermáno ha ermána noperdonáirire pe kuimbaʼe oñarrepenti vaʼekuépe ombyaíta iñamista Jehovándi. Haʼekuéra noporoperdonáiramo ohechaukáta ndosegiriha Jehová ehémplo porãite, pórke haʼe operdona umi pekadór oñarrepentívape. Upéva rangue ohechaukáta hikuái ojoguaha Satanáspe, pórke haʼe ipyʼahatã ha ndoiporiahuverekói avavépe. Jaʼe porãsérõ g̃uarã Satanás ikatu kuri ojevale umi ermánore omomombyry hag̃ua pe kuimbaʼépe Jehovágui (2 Cor. 2:​10, 11; Efes. 4:27). w24.08 17 párr. 7, 10, 11

Jesús onombra vaʼekue algúno kuimbaʼépe oipytyvõ hag̃ua pe kongregasiónpe ótro hendáicha. Haʼe ojevale vaʼekue umi ansiáno oĩ vaʼekuére Jerusalénpe omondo hag̃ua Pablo, Bernabé ha hetavépe kómo superintendénte ovisita hag̃ua umi kongregasión (Hech. 11:22). Umi siérvo ministeriál ha ansiánope oñenombra omombarete hag̃ua pe kongregasión, ha umi superintendéntepe oñenombra avei upearã (Hech. 15:​40, 41). Umi superintendénte de sirkuíto tódo el tiémpo oviaha, algúno oviaha hetaiterei kilómetro ovisita hag̃ua umi kongregasión. Káda semána pe superintendénte de sirkuíto ojapo diskúrso, visíta de pastoréo, rreunión prekursorkuérandi, rreunión ansianokuérandi ha pe aty predikasionrã. Haʼekuéra oorganisa umi aty guasu, oprepara idiskúrso asamblearã, omboʼe pe Eskuéla de Prekursórpe ha oorganisa pe rreunión ojejapóva umi prekursorkuérandi oĩva pe sirkuítope. Hiʼarive pe sukursál omeʼẽ avei chupekuéra umi traváho iñimportánteva ha sapyʼánte umíva iñurhénte voi. w24.10 21 párr. 12, 13

Jehová heʼi vaʼekue Jeremíaspe umi mbaʼe jatopáva pe téxto koestediaguápe. Upéi Pablo imanduʼa ko versíkulore ha heʼi jey la Jehová heʼi vaʼekue: “Che aperdonáta chupekuéra hembiapo vaikue ha nachemanduʼamoʼãvéima ipekadokuérare” (Heb. 8:12). ¿Mbaʼépa la heʼiséva koʼã versíkulo? La Biblia heʼi jave peteĩ persóna imanduʼaha álgore, ndeʼiséi opensanteha peteĩ mbaʼe oiko vaʼekuére yma, síno upéva heʼise ojapotaha hína peteĩ mbaʼe. Por ehémplo, pe kriminál oñemosaingo vaʼekue Jesús ykére heʼi vaʼekue chupe: “Jesús, nemanduʼákena cherehe reike vove ne Rréinope” (Luc. 23:​42, 43). Ko kriminál ningo ndahaʼéi ojeruréva Jesúspe opensa hag̃uánte hese, síno haʼe ojerure Jesúspe ojapo hag̃ua álgo hesehápe. Ha la Jesús ombohovái lájare chupe, jahecha haʼe omoingove jeytaha upe kriminálpe. Upéicharõ Jehová heʼi jave naimanduʼaveimaha ñande pekádore, heʼise ndojapomoʼãiha mbaʼeve ñane kóntrape. Jehová ñaneperdonáma guive, haʼe ni mbaʼevéicharõ nañandekastigamoʼãi amo gotyove umi mbaʼe vai jajapo vaʼekuére. w25.02 11 párr. 14, 15

Ñaneentendído hag̃ua jaikuaa vaʼerã umi kualida Jehová orekóva, mbaʼépa hína ivolunta ha mbaʼe mbaʼépa ogusta ha ndogustái chupe. Upévare eñeporandumína: “Arekóvo enkuénta umi mbaʼe aikuaáva Jehovágui, ¿mbaʼépa ikatu adesidi ambovyʼa hag̃ua chupe?” (Efes. 5:17). Sapyʼánte ñambovyʼávo Jehovápe ikatu hína jajapo algúna kósa ndogustáiva ñane hénte térã ñane amigokuérape. Por ehémplo oĩ tuakuéra iñintensión porãgui ojopýva ifamíliape omenda hag̃ua peteĩ kuimbaʼe iplátavare, jepe upe kuimbaʼe ndorekói peteĩ amista imbaretéva Jehovándi. Jaikuaa ningo peichagua túa oipotanteha ojekuida itajýrare ani hag̃ua ofalta chupe mbaʼeve. Péro péicha jave iporãta tuakuéra oñeporandúramo: “¿Ikatúta piko pe kuimbaʼe oipytyvõ che famíliape oreko hag̃ua peteĩ amista imbaretéva Jehovándi? ¿Mbaʼépa oiméne Jehová opensa ko situasiónre?”. La Biblia heʼi mbaʼépa jajapo vaʼerã péicha jave. Por ehémplo Mateo 6:​33-pe Jesús heʼi vaʼekue umi kristiánope ‘omotenonde meme hag̃ua Ñandejára Rréino’. Ñande ñamombaʼe añete ñande tuakuérape ha umi hénte oĩvape ñande jerére, péro siémpre iñimportantevéta ñambovyʼa Jehovápe. w25.01 17 párr. 9, 10

Koʼág̃a oĩ heta oñemoĩva ñanderehe, upévare ñaikotevẽ Jehová ñanepytyvõ jajapo hag̃ua opa ikatúva jasegi hag̃ua japredika (Apoc. 12:17). ¿Péro mbaʼére ikatu reĩ segúro Jehová oĩtaha nde ykére? Pórke Jesús ojerure vaʼekue voi upéva Itúape peteĩ ñemboʼépe, ha upe ñemboʼe jatopa Juan kapítulo 17-pe. Upépe Jesús ojerure vaʼekue Itúape oñangareko hag̃ua umi apóstol rehe, ha Jehová ombohovái vaʼekue upe iñemboʼe. Pe lívro de Hechos omombeʼu mbaʼéichapa Jehová oipytyvõ umi apóstolpe osegi hag̃ua opredika kyreʼỹme ojepersegíramo jepe chupekuéra. Avei Jesús ojerure vaʼekue Jehovápe oñangareko hag̃ua umi ojeroviátavare hese ohendu rire la omboʼéva umi apóstol. Ha upépe reikéma nde avei. Jehová koʼág̃a peve osegi ombohovái Jesús ñemboʼe, upévare aníkena reduda Jehová oĩtaha nde ykére oipytyvõ haguéicha avei yma umi apóstolpe (Juan 17:​11, 15, 20). Amáske hiʼag̃ui pe fin ikatu hína ijetuʼuve ñandéve jasegi hag̃ua japredika kyreʼỹme. Péro Jesús oasegura ñandéve jarekotaha pe ajúda ñaikotevẽva jasegi hag̃ua japredika (Luc. 21:​12-15). w25.03 17, 18 párr. 13, 14

Jehová siervokuéra ‘osapukái vyʼágui’ pórke omombaʼeterei la Jehová ojapóva hesehapekuéra. Umi enseñánsa ha umi promésa oĩva Ñandejára Ñeʼẽme ñanemokyreʼỹ ha ñanembopyʼaguapy. Upéva ári jey, jareko la esperánsa jahupytývo hetaiterei mbaʼe porã amo gotyove Jesús sakrifísio rupive. Ha ñañemongeta jave koʼã mbaʼére javyʼaiterei voi (Sal. 34:8; 133:​1-3). Oĩ ningo avei mokõi mbaʼe ojekuaa porãitereíva ko paraíso espirituálpe: Pe mborayhu ha pe unida. Jahecha jave ermanokuéra oĩha “unído oñondivepa” ikatúma ñañeimahina mbaʼéichapa jaikóta pe múndo pyahúpe (Col. 3:14). Entéro oikuaaséva mbaʼépa heʼise la vyʼa otanteami vaʼerã oike ñande paraíso espirituálpe. Tahaʼe haʼéva la opensáva ñanderehe ko múndo, Jehová ñandeguerohory. Ñande ningo ñaime porãiterei Ñandejára ha entéro oadoráva chupe renondépe. Upévare Jehová heʼi voi omeʼẽha isiervokuérape “peteĩ téra pyahu” (Is. 65:15). w24.04 21 párr. 7, 8

¿Mbaʼéichapa entéro umi ermáno kongregasionpegua ikatu oipytyvõ umi omendasévape? Primeroite voi ñañatendeterei vaʼerã mbaʼépa jaʼe (Efes. 4:29). Ñañeporandumína: “¿Aikópa atallaiterei umi soltéro ha soltérare? Ahecha jave peteĩ soltéro ha soltérape oñeʼẽha oñondive, ¿ensegídapa apensa ojegustaha ojuehe?” (1 Tim. 5:13). Aníkena ni mbaʼevéicharõ ñantendeka umi ermánope menoveha hikuái la nomendái haguére. Iporãitevéta ningo jaheka la oportunida ñamokyreʼỹ ha jafelisita hag̃ua umi ermáno ha ermána soltérope. ¿Ha ñapensárõ peteĩ ermáno ha ermána hoʼaitereitaha ojuehe? La Biblia ñanemokyreʼỹ jareko hag̃ua enkuénta umi ótro oñandúva (Rom. 15:2). Heta ningo ndoipotái oñepresenta chupe peteĩ kandidáto térã kandidáta, ha ñande jarrespeta vaʼerã upéva (2 Tes. 3:11). Ótro katu oipota oñepytyvõ chupe, péro ndovaléi ñañentremete oimérõ ndojeruréi ajúda (Prov. 3:27). w24.05 24, 25 párr. 14, 15

Koʼã tiémpope ikatu hína oñepresenta ñandéve umi provléma ijetuʼuetereíva ñahaʼarõʼỹve jave ha umíva ikatu okambiaite la ñande rekove. Péicha jave jaikuaa porã Jehová ikatuha ñanepytyvõ. ¡Ajépa ñanembovyʼaite upéva! Jahecha jave haʼe ñanepytyvõha ñaĩve konvensído Jehová haʼeha peteĩ “Dios oikovéva” (Sal. 18:46). David heʼipa riremi Jehová haʼeha peteĩ “Dios oikovéva”, heʼi avei ojoguaha ‘peteĩ ita guasúpe’. Péro peteĩ ita ningo ndoikovéi, ¿mbaʼérepa David heʼi hese upéicha? La Bíbliape oñekompara Jehovápe peteĩ ita guasúre ñantende porãve hag̃ua mbaʼeichagua kualidápa haʼe oreko. Heta vése isiervokuéra heʼi vaʼekue hese upéicha ontendeka hag̃ua ndaiporiha ótro haʼeichagua. La Bíbliape jatopa heta vése isiervokuéra omombaʼeguasu jave Jehovápe ohenoiha chupe “Ita Guasu”. Primera ves jatopa upéva Deuteronomio 32:​4-pe. Ana heʼi vaʼekue avei Jehovápe peteĩ ñemboʼépe: “Ñandejára, nde rejogua peteĩ ita imbaretévape, ndaipóri nderupytýva” (1 Sam. 2:2). Habacuc heʼi vaʼekue Jehováre: “Nde hína pe Ita Guasu” (Hab. 1:12). Pe oskrivi vaʼekue Salmo 73 heʼi avei: “Nde hína che Ita Guasu” (Sal. 73:26). Ha Jehová jepe heʼi ijehe haʼeha pe Ita Guasu. w24.06 26 párr. 1, 3

Jehová oguerohory vaʼekue umi rréi de Israel oadorávape chupe ipyʼaite guive. Rréi Josías rehe la Biblia heʼi: “Ndaipóri vaʼekue ótro rréi haʼeichagua, haʼe ojevy Jehovápe ipyʼaite guive” (2 Rey. 23:25). ¿Ha mbaʼépa ikatu jaʼe Salomónre? Haʼe ojapo vaʼekue ivaíva ijeda rire, upévare la Biblia heʼi hese ‘haʼe naiñeʼẽrenduvéima hague Ijára Jehovápe ipyʼaite guive’ (1 Rey. 11:4). Rréi Abiyam ndohechaukái avei ifielha Jehovápe. La Biblia heʼi hese: “Ndoservíri Ijára Jehovápe ipyʼaite guive” (1 Rey. 15:3). La Bíbliape, ojepuru jave pe palávra “pyʼa térã korasõ”, ojepuru oñeñeʼẽ hag̃ua entéro mbaʼe pe persóna orekóvare ipyʼapýpe. Upévape oike umi mbaʼe ojaposéva, opensáva, ogustáva chupe, ohupytyséva, ojapokuaáva, ha umi mbaʼe omomýiva chupe. Peteĩ persóna oadoráva Jehovápe ipyʼaite guive oservi chupe ojaposégui voi, ndahaʼéi ojapo vaʼerãgui reínte. Peichagua persóna oservi Jehovápe ohayhúgui ha orrespetágui chupe oikove aja pukukue. w24.07 21 párr. 4, 5

Oĩ peteĩ ehémplo la Bíbliape ohechaukáva mbaʼéichapa Jehová ñaneperdonambaite. Haʼe voi heʼi: “Avorráta umi ne rembiapo vaikue ha nde pekadokuéra avei. Ha aipurúta peteĩ arai amoʼã hag̃ua umíva” (Is. 44:22). Jehová ñaneperdona jave haʼete oipurúva peteĩ arai omoʼã hag̃ua umi ñane rembiapo vaikue, péicha haʼe voi ndohechavéima ñande pekádo, ni ñande. ¿Mbaʼépa ñanemboʼe umi ehémplo jahecha vaʼekue? Jehová operdona jave ñane rembiapo vaikue, natekotevẽvéima ñañeñandu vai la jajapo vaʼekuére jaikove aja pukukue. Jesús sakrifísio ningo opaga kompletoite umi ñande pekadokuérare. Upéicha rupi, Jehová ñaneperdonávo haʼete voi núnka ndajajapói vaʼekue mbaʼeve ivaíva. Upévare ikatu ñaĩ segúro ñañarrepentíramo Jehová añetehápe ñaneperdonataha. Avei Jehová ñandeporiahuvereko rupi, ikatu jareko peteĩ amista hendive ha nañañeñandúi kulpávle umi mbaʼe jajapo vaʼekuére. w25.02 10, 11 párr. 11-14

Umi ansiáno oĩva peteĩ komitépe, oipytyvõ vaʼerã pe kongregasión ipotĩ hag̃ua. Upéva haʼe peteĩ rresponsavilida oguerekóva hikuái Jehová renondépe (1 Cor. 5:7). Péro avei haʼekuéra ojapo ikatúva guive oipytyvõ hag̃ua pe persónape oñarrepenti hag̃ua. Upévare haʼekuéra ipositívo ha opensa pe persóna ikatuha okambia hína. ¿Mbaʼérepa? Haʼekuéra osegi Jehová ehémplo, haʼe ningo ‘oporombyasy ha oporoporiahuvereko’ (Sant. 5:11). Apóstol Juan avei ohechauka vaʼekue otrataha mborayhúpe umi ermáno ha ermánape. Haʼe oskrivi vaʼekue: “Che raʼykuéra pohayhuetéva, askrivi peẽme koʼã mbaʼe ani hag̃ua pepeka. Upéicharõ jepe oĩramo opekáva, jareko peteĩ ajudánte pe Túa renondépe, upéva hína Jesucristo, ha haʼe ihústo hína” (1 Juan 2:1). Ñambyasýramo jepe sapyʼánte oĩ avei umi noñarrepentíriva. Upéicha jave oñenohẽmante vaʼerã pe persónape kongregasióngui. w24.08 25 párr. 19, 20

Sapyʼánte ñakomparaseterei la jajapóva umi mbaʼe ojapóvare umi ótro. Péro aníkena ejapo upéva pórke ni Jehová ndojapói upéicha (Gál. 6:4). Por ehémplo, ñanemanduʼa María omoĩ hague Jesús rehe peteĩ aséite perfumádo hepyetereíva (Juan 12:​3-5). Pe viúda mboriahumi katu omeʼẽ mokõi monedaʼi saʼieterei ovaléva (Luc. 21:​1-4). Péro Jesúspe g̃uarã mokõivévante ohechauka vaʼekue ojerovia mbareteha, ha omombaʼeterei chupekuéra. Jaikuaaháicha Jesús ojoguaiterei Itúape, upévare ñaĩ segúro Jehová avei omombaʼeha entéro mbaʼe jajapóva jahayhúgui chupe ha jajeroviágui hese, haʼetérõ jepe ñandéve saʼietereiha la jajapóva. Enterovéva sapyʼánte ikatu jaduda ha ñañeporandu heta mbaʼe, péro la Biblia ikatu ñanepytyvõ, péicha ndereikomoʼãi reduda. Ha reĩta segúro koʼã mbaʼégui: Jehová oñeinteresaha nderehe, oguerohoryha umi sakrifísio rejapóva hesehápe ha nevendesitaha. Jehová ohayhueterei entéro isiérvope ha oreko chupekuéra enkuénta. w24.10 25 párr. 3; 29 párr. 17, 18