Junio

Jesús sakrifísio koʼág̃ama voi ñanevenefisia. Por ehémplo pe rreskáte rupive Jehová operdona ñande pekadokuéra. Legálmente Jehová natekotevẽi kuri ñaneperdona, péro haʼe ojaposeterei upéva (Sal. 103:​3, 10-13). Ikatu oime algúno oñandu nomereseiha voi Jehová operdona chupe. Ha añetehápe ni peteĩva nañamereséi upéva. Apóstol Pablo heʼi vaʼekue voi ‘nomereseiha ojeʼe hese haʼeha apóstol’. Péro upéi heʼive: “Ñandejára imbaʼeporãiterei rupi, koʼág̃a che peteĩ apóstol” (1 Cor. 15:​9, 10). Ñañarrepentíramo Jehová ñaneperdona. ¿Mbaʼérepa? Ndahaʼéi ñamereségui, síno ñanderayhúgui. Upévare oimérõ reñandu neremereseiha Jehová neperdona, nemanduʼákena Jehová nomeʼẽi hague pe rreskáte hénte iperféktova rehehápe, síno haʼe ojapo vaʼekue upéva umi pekadór oñarrepentívape g̃uarã (Luc. 5:32; 1 Tim. 1:15). w25.01 26, 27 párr. 3, 4

Ñande ndaikatúi ñadomina entéro mbaʼe ñande rapicha heʼi térã ojaposéva, péro si ikatu jajejoko pono ñarreaksiona vai. Ha iporãve ningo ñaporoperdona. ¿Mbaʼérepa? Pórke ñande jahayhu Jehovápe ha haʼe oipota ñaperdona ñande rapichápe. Jasegíramo ñandepyʼaro, provávlemente jajapóta hína peteĩ mbaʼe naiporãmbáiva ha ikatu voi japerhudika ñande salu (Prov. 14:​17, 29, 30). Ñañehaʼãramo pono jasegi ñandepyʼaro, ndajaikomoʼãi ñañamarga la oiko vaʼekuére. Péicha haʼetéta voi jajapóva peteĩ rregálo ñandejupe g̃uarã, pórke jasuperáta la oiko vaʼekue ha javyʼa jeýta. ¿Mbaʼépa nepytyvõta anivéma hag̃ua resegi ndepochy la ojejapo vaʼekuére nderehe? Tekotevẽ ningo eheja ohasa peteĩ tiémpo reime porã jey hag̃ua. Por ehémplo, peteĩ persóna oñelastima vaírõ jaikuaa tekotevẽha peteĩ doktór oñatende hese. Péro upéi ohasámante vaʼerã la tiémpo pe persóna okueraite jey hag̃ua. Péicha avei ohasámante vaʼerã peteĩ tiémpo ñaĩ porã jey hag̃ua, ikatu hag̃uáicha ñaperdona peteĩ persónape ñande pyʼaite guive (Ecl. 3:3; 1 Ped. 1:22). Eñemboʼékena Jehovápe ejerure hag̃ua chupe tanepytyvõ eporoperdona hag̃ua. w25.02 15, 16 párr. 8-11

Epensamína umi enseñánsa primeroite ñaaprende vaʼekuére, por ehémplo tekotevẽha ñañarrepenti, jajerovia Ñandejárare ha pe enseñánsa oñeʼẽva vautísmore ha rresurreksiónre (Heb. 6:​1, 2). Koʼã mbaʼe hína umi enseñánsa iñimportantevéva ha primeroite ogueroviáva peteĩ kristiáno. Upévare apóstol Pedro omboʼe vaʼekue koʼã mbaʼe umi héntepe pe Pentekostéspe (Hech. 2:​32-35, 38). Ñande ningo jaasepta vaʼerã koʼã enseñánsa oiko hag̃ua ñandehegui Cristo segidór. Upévare Pablo heʼi vaʼekue ndajajeroviáirõ pe rresurreksiónre, ndaikatuiha jaʼe ñande haʼeha kristiáno tee (1 Cor. 15:​12-14). Péro ndaikatúi ñañekontenta koʼã enseñánsarente jajerovia mbarete hag̃ua. Oĩ avei pe “tembiʼu iñaliméntova” térã umi enseñánsa hypyʼũvéva. Umíva apytépe ndoikéi Jehová leikuéra añónte, síno umi konsého ha hetave enseñánsa bíblica ñanepytyvõva jaikuaa hag̃ua Jehová opensa lája. Jaaprovecha porã hag̃ua pe “tembiʼu iñaliméntova”, tekotevẽ jastudia Ñandejára Ñeʼẽ, jajepyʼamongeta hese ha upéi ñañehaʼãmbaite jajapo hag̃ua la ñaaprendéva. Péicha ñaaprende jadesidi hag̃ua umi mbaʼe ogustáva Ñandejárape. w24.04 5 párr. 12, 13

Ñandejára omomanduʼa Jonáspe umi ninivita ‘nodiferensiakuaái hague iporãva ivaívagui’ (Jon. 1:​1, 2; 3:10; 4:​9-11). Tiémpo rire Jesús oipuru vaʼekue ko káso omboʼe hag̃ua mbaʼeichaite pevépa Jehová ihústo ha oporoporiahuvereko. ¿Mbaʼépa hína pe ‘Día de huísio opuʼã jeytahápe’ umi ninivita? Jesús heʼi vaʼekue amo gotyove oĩtaha umi ‘orresusitáva ojehusga hag̃ua’ (Juan 5:29). Upérõ haʼe oñeʼẽ hína kuri igoviérno de 1.000 áñore. Upe tiémpope oñemoingove jeýta “umi ihústova ha iñinhústovape” (Hech. 24:15). Umi iñinhústova ‘orresusitáta ojehusga hag̃ua’. Upéva heʼise Jehová ha Jesús ohechataha iñeʼẽrendúpa hikuái ha ojapópa umi mbaʼe oaprendéva. Upéicharõ, peteĩ ninivita orresusitáva ndoadoraséiramo Jehovápe, haʼe nopermitimoʼãi chupe osegi oikove (Is. 65:20). Péro enterove umi odesidíva oadorataha Jehovápe fiélmente, orekóta pe oportunida oikove hag̃ua pára siémpre (Dan. 12:2). w24.05 5 párr. 13, 14

Jesús otrata porãvo umi héntepe ohechauka mbaʼeichaitépa Itúa oiporiahuvereko entérope (Juan 14:9). Jesús heʼíva ha ojapóva rupive jahechakuaa Jehová ohayhuha umi persóna imperféktape, ha ñanepytyvõseha jalucha hag̃ua pe pekádo kóntrape. Yma Jesús oipytyvõ vaʼekue voi umi héntepe okambia hag̃ua oiko hag̃ua chuguikuéra idisípulo (Luc. 5:​27, 28). Jesús oikuaa vaʼekue la ohaʼarõva chupe, heta vése heʼi vaʼekue idisipulokuérape oñetraisionataha chupe, ha ojejuka hag̃ua ojeklavataha chupe yvyráre (Mat. 17:22; 20:​18, 19). Haʼe oikuaa vaʼekue isakrifísio rupive ojepeʼataha ko múndogui pe pekádo. Jesús omboʼe vaʼekue avei haʼe omano rire ‘ombyatytaha opaichagua héntepe ou hag̃ua hendápe’ (Juan 12:32). Péicha Jehová ikatúta oguerohory umi hénte ojeroviávape Jesúsre ha ojapóva haʼe omandáva. Upéicha rupi umi hénte ikatúta ‘ojei pekádo poguýgui’ (Rom. 6:​14, 18, 22; Juan 8:32). Jesús oikuaáramo jepe omano asyetereitaha, pyʼaguasúpe omeʼẽ hekove ikatu hag̃uáicha ñandesalva (Juan 10:​17, 18). w24.08 5 párr. 11, 12

Epensamína mbaʼeichaitépa evyʼa raʼe reikuaávo rehóvo la Biblia heʼíva. Reaprende nde Ru yvagapegua nderayhuha ha oipotaha reime ifamília oadorávape chupe. Avei reaprende Jehová oipeʼaitetaha umi mbaʼe ñanembohasa asýva ha ñanembosufríva, ha ikatutaha rehecha jey pe múndo pyahúpe umi ne hénte omano vaʼekuépe (Mar. 10:​29, 30; Juan 5:​28, 29; Rom. 8:​38, 39; Apoc. 21:​3, 4). ¡Oiméne ndepyʼakyrỹi raʼe rehendúrõ guare koʼã enseñánsa porãite! (Luc. 24:32). Kon el tiémpo remombaʼeterei umi mbaʼe reaprendéva ha emombeʼuseterei retopávape guive (ekompara Jeremías 20:9 heʼívare). Ñamombaʼéramo la Biblia omboʼéva ñande pyʼaite guive ñamombeʼuséta enterovépe voi la ñaaprendéva (Luc. 6:45). Ñañeñandu Jesús disipulokuéra ypykue oñeñandu haguéicha, haʼekuéra heʼi vaʼekue: “Ore ndaikatúi roguerokirirĩ umi mbaʼe rohecha ha rohendu vaʼekue” (Hech. 4:20). Ñande ningo ñamombaʼeterei umi enseñánsa verdadéra ha upévare ñakompartise opa ikatúvandi. w24.05 15 párr. 5; 16 párr. 7

Ñande testígo de Jehová japredika pórke jahayhu ñande Ru Jehovápe ha ñaipytyvõse ñande rapichakuérape oikuaa hag̃ua chupe. Péro oĩ avei la ndovyʼapáiva opredika jave. ¿Mbaʼérepa? Oĩ ningo hiʼotĩva ha ndojeroviapáiva ijehe. Oĩ avei noñeñanduporãiva og̃uahẽ reíntema hag̃ua óga ahénope. Algúno okyhyje oñemosẽrõ g̃uarã, ótro katu nombopochyséi avavépe. Koʼã ermáno ha ermánape ijetuʼu omombeʼu hag̃ua umi notísia porã umi extráñope. Sapyʼánte reñeñandúramo péicha, aníkena reñedesanima. Oimérõ nderejeroviapái ndejehe, upéva ohechaukánte hína neumildeha ha ndereikoseiha reñembovale ótro renondépe. Ndaivaíri avei jaheka fórma ani hag̃ua jajodiskuti ñande rapichándi. Ha legálmente ndaigústoi voi ñañemosẽ óga ahénogui, koʼýte oimérõ jajapose iporãva ñande rapichakuéra rehehápe. Ñande Ru Jehová oikuaa porã umi mbaʼe ijetuʼúva ñandéve, ha ñanepytyvõseterei voi (Is. 41:13). w24.04 14 párr. 1, 2

Relee jave la Biblia, rejapose rangue entéro mbaʼe reaprendéva una vetépe voi, emoĩ umi méta ikatúva rehupyty. Etanteamína kóva: Ejapo peteĩ lísta emoĩháme umi mbaʼe emehoraséva. Upéi eiporavo peteĩva térã mokõi mbaʼe embaʼapo hag̃ua umívare, ha umi ótro katu eheja emehora hag̃ua amo gotyomie. ¿Mbaʼéichapa ikatu eñepyrũ ejapo ko mbaʼe? Primerorã ikatu emoĩ peteĩ méta ifasilvétava ndéve rehupyty hag̃ua, térã eñepyrũ embaʼapo peteĩ mbaʼe tekotevẽtereihápe emehora. Emoĩ rire peteĩ méta, eñehaʼã einvestiga upe téma ñane puvlikasionkuérape. Eñemboʼékena Jehovápe ha ejerure chupe tomeʼẽ ndéve ‘pe deséo ha pe podér ejapo hag̃ua entéro mbaʼe chupe ogustáva’ (Filip. 2:13). Upéi eñepyrũntema ejapo la reaprendéva. Rehupytývo pe primera méta remoĩ vaʼekue, nekyreʼỹvéta ehupyty hag̃ua umi ótro. Rehechávo rekambia hague térã remehora hague peteĩ mbaʼépe, rejaposevéta hetave kámbio ha provávlemente ifasilvétama ndéve ejapo hag̃ua umíva. w24.09 6 párr. 13, 14

Oimérõ reñeñandu vai rejapo haguére yma peteĩ mbaʼe hasy asýva ótrope, eñehaʼã ejapo ikatumíva guive reĩ porã jey hag̃ua pe persónandi ha resolusiona hag̃ua pe provléma. Ikatu ere ha ehechauka chupe rembyasyetereiha la rejapo vaʼekue. Ejerurékena avei Jehovápe tanepytyvõ ndéve ha pe persónape pesegi hag̃ua peservi chupe ha pendepyʼaguapy jey hag̃ua. Eñehaʼãkena eaprende umi mbaʼe vai rejapo vaʼekuégui, ha eheja Jehová tandepuru haʼe oipotaháicha. Jahechamína proféta Jonás ehémplo. Ñandejára omanda vaʼekue chupe oho hag̃ua Nínivepe, péro oho rangue upépe haʼe ojapi oho ótro ladoite. Upévare Jehová okorrehi Jonáspe ha haʼe oaprende upe mbaʼe vai ojapo vaʼekuégui (Jon. 1:​1-4, 15-17; 2:​7-10). Jehová nopensái vaʼekue Jonás naipohãveimaha, síno omeʼẽ jey chupe ótra oportunida oho hag̃ua Nínivepe, ha ko vuéltape Jonás pyaʼeterei ohechauka iñeʼẽrenduha ha oho. Haʼe ombyasyeterei vaʼekue la ojapóva, péro ndohejái upéva ojoko chupe oasepta hag̃ua peteĩ asignasión oúva Jehovágui (Jon. 3:​1-3). w24.10 8, 9 párr. 10, 11

Jehová ñaneperdona jave, ndahaʼéi okanselánteva la jadevéva, síno haʼe ovorraite voi. Ko téxtope pe palávra “operdona”, idióma griégope heʼise vaʼekue ojevorraha álgo. Epensamína ko ehémplore: Álgien okansela jave ñandéve la ñane kuénta, ikatu ñañeimahina otachaha pe kuatiápe la jadevéva. Upéicharamo jepe, jasegi gueteri jahecha la ojeskrivi vaʼekue upépe. Péro ojevorráramo ningo idiferenteterei. Ñanemanduʼa vaʼerã yma pe tínta ojepurúva ndahasyiete hague ojevorra hag̃ua. Ejagarráramo peteĩ trápo heʼõ ha evorra, ojeipaitéma voi. Upévare, yma ojevorra jave peteĩ kuénta, odesaparesete voi. Avave ndaikatuvéima ohecha la ojeskrivi vaʼekue ha haʼete núnka noñanotái vaʼekue la redevéva. Upéicha avei Jehová ñaneperdona jave, ovorrapaite ñane rembiapo vaikue ha opyta núnka ndoikoirõguáicha mbaʼevete. ¡Ajépa javyʼaite upévare! (Sal. 51:9). w25.02 10 párr. 11

Oimérõ oĩ opensa vaíva ñanderehe térã nañandetrataporãiva, japytánte pyʼaguapýpe pórke Jehová oikuaa porã la oikóva. Upéicha rupi ñaaguantánte umi inhustísia jaikuaágui Jehová osolusionataha entéro mbaʼe itiempoitépe. Jahejárõ Jehová pópe upe situasión ndajapytamoʼãi ñandepochy térã ñandepyʼaro. Japyta sapyʼárõ ñandepochy ikatu jajapo peteĩ mbaʼe vai, jaju ñañamarga ha ñambyai ñane amista Jehovándi. Ñarrekonose vaʼerã ndaikatumoʼãiha jasegi Jesús ehémplo jajavyʼỹre, sapyʼánte jajapo térã jaʼétante voi peteĩ mbaʼe upéi ñambyasýtava (Sant. 3:2). Ha ikatu ojejapo ñanderehe peteĩ inhustísia ñanembohasa asyetereíva ha ñanemarkaitéva jaikove aja ko múndo añáme. Oimérõ oiko nderehe upéva, ikatu reĩ segúro Jehová orekoha enkuénta mbaʼépa rehasa. Ñanemanduʼa vaʼerã Jesús ontendeha entéro mbaʼe ñañandúva pórke haʼe oaguanta vaʼekue avei heta inhustísia (Heb. 4:​15, 16). Javyʼaite Jehová omeʼẽ haguére ñandéve konsého iporãva ñaaguanta hag̃ua. w24.11 6 párr. 12, 13

‘Oikove hag̃ua pára siémpre’ umi hénte ohechauka vaʼerã kuri ojeroviaha Jesúsre, haʼéva hína pe Ñandejára ombou vaʼekue (Juan 3:​16-18, 36; 17:3). Heta judío ndoaseptái kuri tekotevẽha ojerovia Jesúsre. Upéi haʼekuéra oporandu chupe: “¿Mbaʼe milágro piko nde rejapóta rohecha ha roguerovia hag̃ua?” (Juan 6:30). Haʼekuéra heʼi Moisés tiémpope oñemeʼẽ hague umi héntepe maná hoʼu hag̃ua, ha upéva ikatu oñekompara pe pan rehe (Neh. 9:15; Sal. 78:​24, 25). Péicha jahecha umi hénte oseginteha opensa pe pan ikatúvare ojeʼu. Upéi Jesús oñeʼẽ chupekuéra ‘pe pan verdadéro oúvare yvágagui’, idiferénteva pe manágui pórke umi hoʼúva upe pan ikatu oiko pára siémpre. Péro ohendúrõ guare upéva, umi hénte ni noporanduvéima Jesúspe mbaʼépa la heʼiséva (Juan 6:32). Haʼekuéra opensaiterei rupi umi mbaʼe oikotevẽvare, ndohechakuaái umi mbaʼe iñimportantetéva Jesús omboʼeséva chupekuéra. w24.12 5, 6 párr. 10, 11

Eskuéla térã koléhiope pene família oaprendéta oĩha hetave diséño térã fórma pe naturalésape. Ñapensamíntena umi yvyramátare. Primero oreko la imáta, upéi pe imátagui osẽ umi hakãnguéra ha umi hakãnguéragui osẽ jey umi hakãʼi michĩvéva ha ipoʼivéva. Peichagua diséño, oĩháme peteĩ mbaʼe tuicháva ojedividíva peteĩ mbaʼe michĩvévape ojehecha heta mbaʼépe pe naturalésape. ¿Péro máva la ojapo vaʼekue koʼã diséño iporãitéva? Pene família ojepokuaárõ ojepyʼamongeta koʼã mbaʼére oĩvéta segúro Ñandejára ojapo hague entéro koʼã mbaʼe. Pene família okakuaavévo ohóvo, ikatu peporandu chupe: “Jahechávo Ñandejára ñandekrea hague, ¿isentídopa la haʼe omeʼẽ avei ñandéve umi léi ñanepytyvõtava javyʼa hag̃ua?”. Upéi pexplika chupe Ñandejára omeʼẽha ñandéve umi léi ideprovéchova, ha umíva oĩha la Bíbliape. w24.12 16 párr. 8

Espíritu sánto rupive apóstol Pablo oskrivi peteĩ kárta heʼihápe tekotevẽha oñenohẽ kongregasióngui peteĩ kuimbaʼe noñarrepentírivape (1 Cor. 5:13). ¿Mbaʼéichapa umi kristiáno otrata vaʼerã kuri chupe? Pablo heʼi chupekuéra ‘anive hag̃ua ojeheʼa hese’. ¿Mbaʼépa heʼise vaʼekue upéva? Pablo oexplika vaʼekue upe mandáto heʼiseha ‘ni ndokarúi vaʼerãha umichaguándi’ (1 Cor. 5:11). Jaguapy jave jakaru peteĩ persónandi, ndahasyiete upéi ñañepyrũ hag̃ua ñañemongeta hendive ha jahasa tiémpo upe persónandi. Upéicharõ, Pablo ontendekase kuri pe kongregasiónpe ndovaleiha ohasa tiémpo pe kuimbaʼéndi. Ojejapóvo péicha oñeñangarekóta umi ermáno oĩvare kongregasiónpe ani hag̃ua pe kuimbaʼe oraha vai chupekuéra (1 Cor. 5:​5-7). Avei péicha pe kuimbaʼe ikatúta kuri ohecha ivaieterei hague la ojapóva Jehovápe g̃uarã, ha ikatu voi upéi otĩ ha oñarrepenti. w24.08 15 párr. 4, 5

Umi israelita káda áño ogueromanduʼa vaʼerã pe Día Oñeperdonaha umi Pekádo. Upe díape, pe súmo saserdóte osakrifika vaʼekue umi animál pe puévlo rehehápe. Péro jaikuaaháicha, umichagua sakrifísio rupive ndaikatúi vaʼekue oñeperdonambaite umi israelita pekadokuéra, pórke umi animál ndaikatúi ñakompara yvypórare. Péro Jehová oĩ vaʼekue operdona hag̃uáicha umi israelítape haʼekuéra oñarrepentíma guive ha ojapóramo umi sakrifísio haʼe ojeruréva (Heb. 10:​1-4). Umi sakrifísio ojejapóva pe Día Oñeperdonahápe umi Pekádo omomanduʼa vaʼekue umi israelítape haʼekuéra pekadorha. ¿Mbaʼépa ojapo vaʼekue Jehová ikatu hag̃uáicha oñeperdona entéro yvypóra pekádo? Haʼe odesidi Itaʼýra ohayhuetéva ‘oñemeʼẽtaha una vénte ogueraha hag̃ua heta héntegui ipekádo’ (Heb. 9:28). Jesús omeʼẽ vaʼekue hekove ha ‘péicha opaga pe rreskáte oguenohẽ hag̃ua heta héntepe pekádo poguýgui’ (Mat. 20:28). w25.02 4 párr. 9, 10

“La hénte ojapose iporãva, péro hete ikangy” (Mat. 26:41b). Jesús heʼírõ guare upéva ohechauka ontendeha ñaneimperfektoha ha upévare jajavyha jepi. Péro heʼírõ guare upéva ñandeavisase avei álgo: Haʼe oipota ñañatende ani hag̃ua jajerovia ñandejehe ha ñaimoʼã siémpre jajapotaha iporãva. Upe pyhare Jesús heʼi mboyvemi upéva, idisipulokuéra oasegura kuri ndohejamoʼãiha chupe (Mat. 26:35). Haʼekuéra sinséramente ojapose kuri la iporãva, péro ndohechakuaái ijetuʼu jave la situasión pyaʼeterei ikatuha ñanekangy ha ndajajapovéi iporãva. Upévare Jesús heʼi porã chupekuéra umi mbaʼe jatopáva pe téxto koestedíape g̃uarã. Ñambyasýramo jepe, umi disípulo noñatendeporãi vaʼekue siémpre. Jesúspe ojejagarrárõ guare, ¿opytápa rakaʼe hikuái hendive térã okyhyjégui osẽ odipara upégui? Noñatendememéi rupi, haʼekuéra oheja rei Jesúspe, hiʼarive upéva la heʼi vaʼekue hikuái núnka ndojapomoʼãiha (Mat. 26:56). w24.07 14 párr. 1, 2

Adán ha Eva opeka rupi, oiko chuguikuéra Ñandejára enemígo. Adán ha Eva opeka mboyve oĩ vaʼekue Ñandejára família apytépe (Luc. 3:38). Péro oúrõ guare naiñeʼẽrenduvéi chupe, haʼekuéra oñemosẽ Ñandejára famíliagui. Upéva oiko kuri Adán ha Eva oñepyrũ mboyve ifamília (Gén. 3:​23, 24; 4:1). Upévare ñande haʼéva Adán ha Eva familiare, ndaikatúi ñaĩ Jehová família apytépe. Upéicha rupi tekotevẽmante oĩ ñanepytyvõva jaiko porã jey hag̃ua Ñandejárandi (Rom. 5:​10, 11). Ñaikotevẽmante kuri ajúda anivéma hag̃ua jaiko Ñandejára enemígoramo, ikatu hag̃uáicha oiko jey ñandehegui iñamígo. Opokoiterei ningo ñanderehe jaikuaávo Jehová voi ojapo hague la tekotevẽva upearã. ¿Mbaʼépa ojapo rakaʼe? Jehová ojapo la oñekotevẽva ikatu hag̃uáicha umi umáno imperfékto oreko jey peteĩ amista hendive. Tekotevẽ kuri ojerrekupera la Adán operde vaʼekue. Upearã Jehová omeʼẽ álgo hekovia, ha upéva elmimoite pe ojeperde vaʼekue. w25.02 3, 4 párr. 7, 8

Apóstol Pablo heʼi vaʼekue umi ermánope haʼekuéra ‘okorrehíma hague pe kuimbaʼe opeka vaʼekuépe, ha ja ovalemaha upéva’ (2 Cor. 2:​5-8). Pe kuimbaʼe oreko vaʼekue rrelasión sexuál itúa rembirekóndi oñarrepentíma kuri oñenohẽ rupi chupe kongregasióngui, ha oñarrepentíma rupi natekotevẽvéima osegi ojekorrehi chupe (1 Cor. 5:1; Heb. 12:11). Pe kuimbaʼe oñarrepentíma rupi, Pablo heʼi pe kongregasiónpe oheja jey hag̃ua chupe oĩ jey ijapytepekuéra. Péro ndahaʼéi upévante, haʼe heʼi umi ermánope: “Peẽ pyʼaporãme peperdona vaʼerã pe kuimbaʼépe, ha pekonsola chupe”. Avei heʼi: ‘Peipytyvõ pe kuimbaʼépe ohechakuaa hag̃ua pehayhuha chupe’. Pablo oipota vaʼekue umi ermáno ohechauka la ojapóva ha heʼíva rupive operdona ha ohayhuha pe ermáno oñarrepenti vaʼekuépe. Upéicha pe ermáno ohechakuaáta kuri pe kongregasión ovyʼaitereiha haʼe ou jey haguére. w24.08 15 párr. 4; 16, 17 párr. 6-8

Apóstol Pablo oikuaa porã vaʼekue mbaʼépa peteĩ persóna oikotevẽ oaguanta hag̃ua. Upévare Pablo heʼi vaʼekue umi kristiánope ojerovia vaʼerãha Jehováre ha ndahaʼéi ijehénte ohasa jave umi pruévare. Péicha umi kristiáno hebreo pyʼaguasúpe ikatúta heʼi: “Jehová chepytyvõ hína, ndakyhyjemoʼãi asy” (Heb. 13:6). Koʼág̃a avei algúno ñane ermánope ojepersegi mbarete hína. Upévare ikatu ñañemboʼe hesekuéra ha sapyʼánte ikatu voi ñameʼẽ chupekuéra álgo oikotevẽva. La Biblia heʼi porã: “Enterove oadoraséva Ñandejárape ipyʼaite guive Cristo Jesús disípuloramo, ojepersegíta avei” (2 Tim. 3:12). Upévare, enterovéva tekotevẽ jajeprepara pórke amo gotyove oúta hína umi tiémpo ijetuʼúva. Jasegíkena jajerovia ñande pyʼaite guive Jehováre, ha ani jaduda haʼe ñanepytyvõtaha ñaaguanta hag̃ua oimehaichagua pruéva. Jehová itiempoitépe omeʼẽta pyʼaguapy entéro oadorávape chupe (2 Tes. 1:​7, 8). w24.09 13 párr. 17, 18

¿Mbaʼépa oipytyvõ vaʼekue umi Corintoguápe ojevautisa hag̃ua? (2 Cor. 10:​4, 5). Ñandejára Ñeʼẽ ha pe espíritu sánto oipytyvõ vaʼekue chupekuéra okambiaite hag̃ua (Heb. 4:12). Umi Corintogua oñepyrũva ojerovia Crístore, ohejaite ikondúkta vai. Ijapytepekuéra oĩ vaʼekue okaʼúva, omondáva ha umi omosexuál. Péro upéi okambiaite hikuái (1 Cor. 6:​9-11). Umi Corintogua tekotevẽ vaʼekue ojapo umi kámbio tuicháva, péro haʼekuéra nopensái vaʼekue ndaikatumoʼãiha okambia oiko hag̃ua chuguikuéra kristiáno. Upéva rangue haʼekuéra oñehaʼãmbaite oike hag̃ua pe tape ipoʼívare “oporogueraháva jeikove opaveʼỹvape” (Mat. 7:​13, 14). ¿Ndépa reñehaʼã avei rejapo peteĩ kámbio tuicháva térã reheja hag̃ua peteĩ kostúmbre vai rejevautisa hag̃ua? Oimérõ upéicha, ¡aníkena reñentrega! Ejerure asýkena Jehovápe ijespíritu sánto ikatu hag̃uáicha ndepuʼaka umi deséo vaíre. w25.03 6 párr. 15-17

Jehová opromete nemoarandutaha reikuaa hag̃ua ogustápa térã ndogustáipa chupe peteĩ mbaʼe. Jehová pojerápe omeʼẽ pe arandu enterovépe ha “ndaipochymoʼãi upe ojerurévandi”. Reñemboʼe rire Jehovápe nepytyvõ hag̃ua, eñatende porãkena mbaʼéichapa haʼe ombohovái ne ñemboʼe. Por ehémplo, epensamína reviahaha rehóvo ha peichaháguinte ekañyete. Upévare ejerure ajúda peteĩ oikóvape pe lugárpe heʼi hag̃ua ndéve moõpa reime hína. ¿Péro ndépa reho jeýtama pe persóna okontesta mboyve ndéve? Nahániri. Upéva rangue eñatende porãta entéro mbaʼe pe persóna heʼívare ndéve. Upéicha avei, reñemboʼe rire Jehovápe nemoarandu hag̃ua, eñatende mbaʼéichapa ombohovái ne ñemboʼe reanalisávo umi léi ha konsého bíblico ikatúva nepytyvõ ne situasiónpe. Por ehémplo, redesidi hag̃ua rehótapa peteĩ fiestahápe ikatu ereko enkuénta la Biblia heʼíva umi ofarreávare itarovávaicha ha pe júnta vaíre. Avei nemanduʼa vaʼerã Jehová oipotaha ñamotenonde Irréino ñamotenonde rangue umi mbaʼe ñandéve ñandegustáva (Mat. 6:33; Rom. 13:13; 1 Cor. 15:33). w25.01 16 párr. 6, 7

Isaías omombeʼu vaʼekue umi oĩva pe paraíso espirituálpe tuicha oiko porãveha umi noĩrivagui upépe. Jehová omeʼẽ isiervokuérape entéro mbaʼe oikotevẽva oñemoag̃ui hag̃ua hese ha osegi hag̃ua ojerovia mbarete. Haʼe omeʼẽ ñandéve ijespíritu sánto, Iñeʼẽ ha atyraite puvlikasión omyesakãva ñandéve la Biblia heʼíva. Ndareíri upe profesía heʼi jarekotaha y, heta mbaʼe jaʼu vaʼerã ha javyʼataha (ekompara Apocalipsis 22:17 heʼívare). Péro umi noĩriva pe paraíso espirituálpe katu ndaupeichaiete. Haʼekuéra ‘iñembyahýi, ijuhéi ha oñemotĩ’, pórke ndorekói mbaʼeve oipytyvõva chupekuéra oñemoag̃ui hag̃ua Ñandejárare (Amós 8:11). Jehová nombofaltamoʼãi isiervokuérape mbaʼeve, umíva apytépe umi mbaʼe ñaikotevẽva imbarete hag̃ua ñande jerovia (Joel 2:​21-24). Haʼe ojevale hetaiterei mbaʼére ojapo hag̃ua upéva. Por ehémplo la Biblia, umi puvlikasionkuéra, ñane páhina jw.org, ñane rreunionkuéra ha umi aty guasukuéra. Siémpre jaaprovecha porãramo koʼã mbaʼe, tuicha ñañeñandu porãvéta ha ñandepiroʼýta. w24.04 21 párr. 5, 6

Reñemoĩsérõ de nóvio álgiendi, ikatu ningo ejerure chupe peñemongeta hag̃ua peteĩ lugár púvlikope térã por teléfono. Ere porã chupe ejegustaha hese ha eikuaa porãseveha chupe (1 Cor. 14:9). Tekotevẽramo, emeʼẽ pe persónape tiémpo opensa hag̃ua la peñeʼẽvare (Prov. 15:28). Péro heʼíramo ndéve ndojegustaiha nderehe, errespetákena la isentimiénto. ¿Mbaʼépa ikatu rejapo oĩramo heʼíva ndéve ojegustaha nderehe? Neamávlekena ha ehechauka repororrespetaha. Amo ipahápe ningo pe persóna oñembopyʼaguasu vaʼerã kuri oñeʼẽ hag̃ua nendive. Oiméramo reikotevẽ tiémpo ekontesta hag̃ua, ere porãnte chupe upéva. Péro aníkena emohaʼarõ puku rei chupe (Prov. 13:12). Oiméramo nderejegustái hese, ejasegurákena tontende porã upéva péro siémprekena neamávle hendive. Oimérõ nde ejegusta avei pe persónare, peñemongeta porã ha peñemoĩ de akuérdo mbaʼéichapa peipota oho hese la pene noviásgo. Ikatu hína pepensa diferénte algúna kósape. w24.05 23, 24 párr. 12, 13

Tiémpo rire, David imitãrusu aja gueteri oho vaʼekue oĩháme pe ehérsito israelita. Upérõ guare haʼe ohecha umi soldádo israelita okyhyjeterei hague pórke peteĩ gerréro filisteo tuichaitereíva, hérava Goliat oho vaʼekue ‘odesafia pe ehérsito israelítape’ (1 Sam. 17:​10, 11). Umi soldádo israelita okyhyjeterei vaʼekue pórke opensa meme Goliat heʼi vaʼekuére chupekuéra ha orekoiterei rupi enkuénta haʼe tuichaitereiha (1 Sam. 17:​24, 25). Péro David opensa meme vaʼekue ótra kósare. Haʼe oikuaa porã vaʼekue Goliat oñembohorýrõ guare Israel ehérsitore, oñembohoryha avei pe Dios oikovévare, haʼéva ‘Israel Jára soldadokuéra’ (1 Sam. 17:26). David ojerovia vaʼekue Jehováre ipyʼaite guive. Haʼe oikuaa Ñandejára oipytyvõ haguéicha chupe okuidárõ guare umi ovecháre, peichaite oipytyvõ jeytaha chupe ko situasiónpe. Ha jaikuaaháicha Ñandejára oipytyvõ rupi Davídpe haʼe oho oñorairõ Goliat kóntrape ha ogana chupe (1 Sam. 17:​45-51). w24.06 21 párr. 7

Iporãta avei ñañehaʼãramo ñañeimahina mbaʼeichaitépa idiferénteta kuri ñande rekove ndajaservíririre Jehovápe. Ñanemanduʼáramo mbaʼérepa iporã ñandéve g̃uarã jaservi Jehovápe, ifasilvéta ñandéve jasegi hag̃ua ñandefiél chupe. Ha pe salmísta heʼi haguéicha ikatúta avei jaʼe: “Che katu añemoag̃ui Ñandejárare, ha ndaipóri mbaʼeve iporãvéva upévagui” (Sal. 73:28). Ñande ikatúta ñambohovái porã oimeraẽ mbaʼe oikóva koʼã ára pahápe pórke jaservi “esklávoramo Ñandejára tee ha oikovévape” (1 Tes. 1:9). Ñandejára oñeinteresa ñanderehe ha oĩ siémpre ñanepytyvõ hag̃uáicha. Yma haʼe oipytyvõma vaʼekue voi isiervokuérape ha ojapo jey hína upéicha ñane tiémpope. Koʼẽrõitéma ningo og̃uahẽta pe jehasa asy guasu arakaʼeve oikoʼỹ haguéicha ko yvy ape ári. Péro nañaimemoʼãi ñaneaño. Jehová katuete oĩta ñande ykére. Upéicharõ “ani jakyhyje, síno jaʼe vaʼerã: ‘Jehová chepytyvõ hína, ndakyhyjemoʼãi asy’” (Heb. 13:​5, 6). w24.06 25 párr. 17, 18

La Biblia ohechauka oĩ hague mas de 40 rréi ogoverna vaʼekue Israel. Umi rréi ivuénova ojapo vaʼekue avei umi mbaʼe noĩporãiva. Epensamíntena rréi David rehe. Jehová heʼi vaʼekue hese: ‘Che siérvo David iñeʼẽrendu chéve ipyʼaite guive, ojapo entéro mbaʼe che aguerohorýva’ (1 Rey. 14:8). Péro jaikuaaháicha avei, David oñentremete vaʼekue tembireko ahénore ha ojukauka iménape gerrahápe (2 Sam. 11:​4, 14, 15). La Biblia omombeʼu avei oĩ hague rréi ndoservíriva Jehovápe ipyʼaite guive péro ojapo mimíva la iporãva. Epensamíntena Rehoboam rehe. Jehová heʼi vaʼekue hese ‘haʼe ojapoha ivaíva’ (2 Crón. 12:14). Péro sapyʼánte iñeʼẽrendu vaʼekue avei Ñandejárape. Peteĩ vuéltape Jehová heʼi vaʼekue chupe ohejánte hag̃ua umi 10 trívupe toelehi la irreirã. Upérõ guare Rehoboam ojapo la ojeʼéva chupe. Avei, haʼe oipytyvõ vaʼekue umi siuda oĩvape ipoguýpe imbarete hag̃ua (1 Rey. 12:​21-24; 2 Crón. 11:​5-12). ¿Mbaʼépa Jehová oreko vaʼekue enkuénta heʼi hag̃ua peteĩ rréi ifielha? Haʼe oreko vaʼekue enkuénta: 1) Mbaʼépa oreko ipyʼapýpe, 2) oñarrepentípa ha 3) oadorápa chupe haʼe oipotaháicha. w24.07 20 párr. 1-3

¿Mbaʼépa oikóta peteĩ menór de 18 áño ojevautisáva oúramo opeka vai? Péicha jave pe kuérpo de ansiáno ohecháta mokõi ansiáno oho hag̃ua oñembyaty pe menór de eda ndive, ha hendive oĩ vaʼerã avei ituakuéra haʼéva Testígo. Umi ansiáno oporandúta umi tuakuérape mbaʼépa haʼekuéra ojapóma oipytyvõ hag̃ua pe menór de edápe oñarrepenti hag̃ua. Ikatu oime pe menór de eda ohendu ituakuéra konsého, ha okambia opensa lája ha umi mbaʼe ojapóva. Péicha jave umi mokõi ansiáno ikatu odesidi natekotevẽiha peteĩ komite de ansiáno oñembyaty pe menór de eda ndive ha ituakuérandi. Amo ipahápe, Ñandejára omeʼẽ tuakuérape pe rresponsavilida okorrehi hag̃ua ifamiliakuérape (Deut. 6:​6, 7; Prov. 6:20; 22:6; Efe. 6:​2-4). Upe guive umi ansiáno oñeʼẽta jepi umi tuakuérandi ojasegura porã hag̃ua oñepytyvõ porãpa hína upe mitãme. Péro pe menór de eda ojevautisáva noñarrepentírirõ ha osegi hembiapo vai, peteĩ komite de ansiáno oñembyatýta hendive ha ituakuérandi. w24.08 24 párr. 18

Ñandepyʼarory jarresivi jave peteĩ rregálo, péro javyʼavéntema oimérõ ñande la ñameʼẽva hína. Jehová ñandeapo rupi péicha, omeʼẽ ñandéve la oportunida ñande voi jajapóvo álgo ikatu hag̃uáicha javyʼa. Upévare ikatu javyʼave jahekárõ mbaʼéichapa ñaipytyvõkuaa ótrope. ¡Ajépa iporãite la Jehová ñandeapo haguére péicha! (Sal. 139:14). La Biblia heʼi porã umi omeʼẽva ovyʼaitereiha. Upévare ikatu ñantende mbaʼérepa Jehová haʼe hína ‘Ñandejára ovyʼáva’ (1 Tim. 1:11). Haʼe pe primeroite imbaʼeporã vaʼekue ótrondi ha ndaipóri haʼéicha omeʼẽkuaáva. Apóstol Pablo heʼi haguéicha Jehová “rupive ningo jaikove, jakuʼe ha jaexisti” (Hech. 17:28). Añetehápe “entéro mbaʼe porã ha rregálo iporãva” ou Jehovágui (Sant. 1:17). Enterovéva javyʼaseve ñameʼẽvo, ha upéva ikatu jajapo jasegírõ Jehová ehémplo ha ñanembaʼeporãrõ haʼéicha (Efes. 5:1). w24.09 26 párr. 1-4

Ikatu ningo oĩ umi siérvo ministeriál opensáva ni núnka ndaikatumoʼãiha ohupyty umi rrekisíto oñekotevẽva oiko hag̃ua chugui ansiáno. Péro aníkena nderesarái ni Jehová ni iñorganisasión nohaʼarõiha nde ndeperfékto (1 Ped. 2:21). Avei nemanduʼákena pe espíritu sánto ikatuha nepytyvõ rehupyty hag̃ua umi rrekisíto oñekotevẽva (Filip. 2:13). Eñeporandumína: “¿Oĩpa algúna kósa tekotevẽhápe amehora?”. Oimérõ upéicha ikatu reñemboʼe Jehovápe, eheka umi informasión reikotevẽva ha ejerure konsého peteĩva umi ansiánope. ¡Esegíkena eprogresa! Ejerurékena Jehovápe tanembokatupyry ndedeprovechove hag̃ua chupe ha avei kongregasiónpe (Is. 64:8). Jehová tanevendesi reñehaʼãmbaite haguére rehupyty umi rrekisíto oñekotevẽva oiko hag̃ua ndehegui ansiáno. w24.11 25 párr. 17, 18

Ni peteĩva ndaikatúi jaʼe Jehová orekoha pe ovligasión ñaneperdonávo oiméramo jepe hetaiterei áñorema jaservi chupe. Jaikuaa ningo Jehová imanduʼaha entéro umi mbaʼe jajapo vaʼekuére hesehápe. Péro haʼe omeʼẽ vaʼekue upe rreskáte rregáloramo, ha ndahaʼéi opaga hag̃ua ñandéve umi mbaʼe jajapóvare iservísiope. Tuichaiterei jajavýta jaʼéramo Jehová ñaneperdonaha jajapógui heta mbaʼe hesehápe. Péicha ñapensáramo haʼetéta ku jaʼéva Jesús omano reiete hague ñanderehehápe (ekompara Gálatas 2:21 heʼívare). Apóstol Pablo ombaʼapo jejopy vaʼekue Jehová servísiope. Upéicharõ jepe haʼe oikuaa nomereseiha Jehová operdona chupe. ¿Mbaʼérepa upéicharõ Pablo ojapo hetaite mbaʼe Jehovápe g̃uarã? Ohechauka hag̃ua Jehovápe oagradeseha chupe imbaʼeporãiterei haguére hendive (Efes. 3:7). Ñande avei apóstol Pábloicha jaservi Jehovápe kyreʼỹme, péro ndahaʼéi ñapenságui péicha ñameresetaha Jehová ñaneperdona, síno jajapo upéva jahechauka hag̃ua ñandeagradesidoha hendive. w25.01 27 párr. 5, 6