Agosto

Jajerure ningo Jehovápe umi hénte ñanerendu ha odesidi hag̃ua oservi chupe ñanendive. Péro oĩ heta persóna nohendúiva ñane mensáhe koʼag̃aite peve, ¿mbaʼépa oikóta chuguikuéra? Ikatu hína Jehová odesidi osalva umi hénte okambiávape ohechávo oñehundiha Babilonia Guasu. Jaikuaávo upéva, ñantende porãvéntema mbaʼérepa tekotevẽterei jasegi jaavisa umi héntepe la oikótava. Haʼekuéra ikatu hína imanduʼa upe moméntope la ñande jaʼévare chupekuéra koʼág̃a (ekompara Ezequiel 33:33 heʼívare). Ikatu ou hína la hentekuéra akãme la avíso ñameʼẽ vaʼekue chupekuéra ha upéicha rupi odesidi oservi Jehovápe tardeterei mboyve. Ñanemanduʼa vaʼerã pe guardiakársel filipospeguáre. Haʼe oñepyrũ vaʼekue ojerovia Jehováre oiko rire ae “peteĩ terremóto tuichaitereíva”. Upéicha avei, ikatu oĩ umi hénte koʼag̃aite ndoaseptáiva ñane mensáhe, péro ikatúva okambia ohecha vove okachapaiteha ko múndo oñehundígui Babilonia Guasu (Hech. 16:​25-34). w24.05 17 párr. 9, 10

Ikatu ñaaprende álgo iñimportánteva apóstol Pablo heʼi vaʼekuégui umi hebréope. Oĩ vaʼekue umi nomombaretevéiva iñamista Jehovándi, upévare Pablo oskrivi chupekuéra peteĩ kárta ha heʼi: “Peikotevẽ jey kambýre umi mitãraʼy oikotevẽháicha, peʼu rangue tembiʼu iñaliméntova hoʼúva umi okakuaapámava” (Heb. 5:12). Haʼekuéra noaprendéi ha ndoaseptái vaʼekue umi mbaʼe pyahu Jehová omboʼéva chupekuéra pe kongregasión rupive (Prov. 4:18). Por ehémplo oĩ vaʼekue umi kristiáno judío oñemohatãva ha heʼíva ojesegi vaʼerãha oñekumpli Moisés léi. Péro upérõ ohasáma kuri 30 áño upe léi opa hague Cristo sakrifísio rupive (Tito 1:10). Pablo oipytyvõse chupekuéra oasepta hag̃ua umi enseñánsa hypyʼũvéva omboʼéva chupekuéra ko kártape. Haʼe oipota umi kristiáno ontende Jesucristo rupive ojeadora vaʼerãha Jehovápe, ha upéva iporãiteveha yma guarégui. Avei Pablo oipytyvõ chupekuéra ipyʼaguasu ha osegi hag̃ua opredika (Heb. 10:​19-23). w24.04 6 párr. 15

Adán ha Eva omoirũ vaʼekue Satanáspe ha opuʼã Jehová kóntrape. Upe guive hetaiterei héntema omano. ¿Mbaʼépa oikóta entéro umi hénte omano vaʼekuégui? Peteĩ grúpo michĩva, oĩháme 144.000 Jesucristo segidór ifiélva, orresusitáta yvágape ha núnka mas nomanomoʼãvéi (Apoc. 14:1). Avei hetaiterei hénte ifiélva ha ohayhúva Jehovápe oikove jeýta ‘umi ihústova apytépe’. Haʼekuéra oikóta pára siémpre ko yvy ape ári osegíramo iñeʼẽrendu Cristo goviérno de 1.000 áño aja ha pe pruéva finál aja avei (Dan. 12:13; Heb. 12:1). Umi 1.000 áño aja avei, ‘umi iñinhústova’ orekóta la oportunida oikuaávo Jehovápe ha oadorávo chupe fiélmente. Koʼãva apytépe oĩta hína umi núnka ndoservíri vaʼekue Jehovápe ha “ojapo vaʼekue ivaíva” (Juan 5:29; Luc. 23:​42, 43). Péro oĩ avei algúno iñañaitereíva, upévare haʼe odesidi koʼãva ndorresusitamoʼãiha ni mbaʼevéicharõ (Luc. 12:​4, 5). w24.05 2 párr. 3; 6 párr. 15, 17

Jaipotáramo Jehová ñandeguerohory, ñande ‘pyʼapýpe voi nañandejapúi vaʼerã’ (Sal. 15:2). Upéva ndeʼiséi ndajaikomoʼãihánte ñaporombotavy. Jehová oipota ñanesinséro entéro mbaʼe jaʼe ha jajapóvape (Heb. 13:18). Upéva iñimportánte “pórke Jehová ndaijaʼeiete umi oporombotavývare, péro umi ihústova iñamigoite hína” (Prov. 3:32). Umi ‘ipyʼapýpe voi ndaijapúiva’ ndoikói iñeʼẽrendu guaʼu Ñandejárape oĩ jave ohechátavante chupekuéra ha upéi oĩ jave haʼeño ojapo la ivaíva. Haʼekuéra ndoikói voi ojapo mbaʼeve oporombotavy hag̃ua. Péro peteĩ persóna oporombotavyséva ikatu oñepyrũ opensa umi mbaʼe Jehová omandáva ndahaʼeiha siémpre la iporãvéva jajapo (Sant. 1:​5-8). Upévare haʼe ikatu ou naiñeʼẽrendúi Jehovápe umi mbaʼe oimoʼãvape naiñimportanteguasuiha. Upéi haʼetéramo ndojehúiva chupe mbaʼeve naiñeʼẽrendúi jave, ikatu ojapo umi mbaʼe ivaivéva jepe. Upe persóna opensáramo jepe oserviha hína Ñandejárape, Jehová ni mbaʼevéicharõ ndoaseptamoʼãi iservísio pórke haʼe hovamokõi (Ecl. 8:11). Upéicha rupi ñande ñanesinserose entéro mbaʼe jajapóvape. w24.06 10 párr. 7, 8

Jehová siervokuéra ñamombaʼeterei umi enseñánsa verdadéra oĩva Ñandejára Ñeʼẽme ha jajerovia ñantende porã rupi umíva (Rom. 10:17). Ñaĩ segúro Jehová omoñepyrũ hague pe kongregasión kristiána ikatu hag̃uáicha “ojoko ha omopyenda hína pe añetegua” (1 Tim. 3:15). Satanáspe hiʼãiterei jaju nañakonfiavéi la Biblia heʼívare. Avei oipota jaduda pe gía omeʼẽvagui ñandéve Ñandejára organisasión (Efes. 4:14). Koʼẽrõitéma Satanás oipurúta umi japu haʼetéva voi la siértova ombotavy hag̃ua entéro umi tetãme ha péicha oñemoĩ hag̃ua hikuái Jehová kóntrape (Apoc. 16:​13, 14). Amedída ke jaha hese, Satanás oñehaʼãta ipy ha ipópe ombotavy hag̃ua Jehová puévlope (Apoc. 12:9). Upévare ñaaprende vaʼerã jahechakuaa hag̃ua ojeʼe jave ñandéve la verda ha ojeʼe jave ñandéve japu. Avei tekotevẽterei ñaneñeʼẽrendu pe añeteguápe (Rom. 6:17; 1 Ped. 1:22). Jajapómante vaʼerã koʼã mbaʼe ani hag̃ua ñañehundi pe jehasa asy guasúpe. w24.07 8 párr. 1-3

Jehová ojapo vaʼekue peteĩ kompromíso umi israelítandi. Haʼe omeʼẽ chupekuéra imandamiénto ha haʼekuéra opromete iñeʼẽrendutaha chupe. Jehová oprotehe ha ovendesíta kuri umi israelítape haʼekuéra iñeʼẽrendu aja chupe. Péro umi israelita naiñeʼẽrendúiramo Jehová léipe, térã odesidíramo oservi ótro dióspe, Jehová novendesimoʼãvéima chupekuéra ha pe puévlo osufríta. Upéva ndeʼiséi vaʼekue Jehová núnka ndoguerohorymoʼãveimaha chupekuéra. Upéva rangue haʼekuéra ikatu vaʼekue ‘ojevy jey Jehová Ijára rendápe ha ohendu iñeʼẽ’ (Deut. 30:​1-3, 17-20). Jahecha haʼekuéra ikatu hague oñarrepenti, ha péicha Jehová oñemoag̃ui jeýta hesekuéra ha ovendesi jeýta chupekuéra. Pe puévlo Jehová oiporavo vaʼekue hetaiterei vése ojerrevela ikóntrape. Upéicha rupi haʼekuéra heta osufri. Péro Jehová nopensái vaʼekue haʼekuéra naipohãveimaha, upéva rangue oñehaʼã oipytyvõ ipuévlope oservi jey hag̃ua chupe. Upévare omondo jey jey iprofetakuérape omomýi hag̃ua ipuévlope oñarrepenti ha oñemoag̃ui jey hag̃ua hese (2 Rey. 17:​13, 14). w24.08 9 párr. 4, 5

Jesús omano rire, umi kristiáno hebreo oikóva Jerusalénpe ha Judéape ohasa kuri heta mbaʼe ijetuʼúvare. Upérõ oñeforma ramoite pe kongregasión kristiána ha ojepersegi mbarete kuri chupekuéra. Amo 20 áñorupi upe rire, Jesús segidorkuérandi hendy ekonómikamente pórke ou vaʼekue peteĩ ñembyahýi guasu oparupiete (Hech. 11:​27-30). Upéi áño 61 rupi, oúma itrankilomie la situasión chupekuéra g̃uarã. Ikatu voi jaʼe umi kristiáno oiko hague pyʼaguapýpe upe tiémpope, ñakomparátarõ la ohaʼarõ vaʼekuére chupekuéra. Ha upépe kavalete Pablo oskrivi chupekuéra peteĩ kárta. Upe kártape oĩ umi konsého opreparátava umi kristiánope la oútavape g̃uarã. Pe kárta oñemondóva umi hebréope og̃uahẽ hiʼoraitépe, pórke haʼekuéra ndoikomoʼãi kuri pára siémpre pyʼaguapýpe. Pablo omeʼẽ vaʼekue chupekuéra konsého ikatu hag̃uáicha oaguanta pe jehasa asy ou potaitéva upe tiémpope. w24.09 8 párr. 1, 2.

Jahasa asy jave umi ermanokuéra haʼe peteĩ rregálo oúva Jehovágui ohechaukáva haʼe ñanderayhuha. Haʼekuéra ñanerendu ha sapyʼánte oĩ haguére ñanendive tuicha ñanekonsola. Avei ñanemokyreʼỹ hag̃ua, haʼekuéra olee jepi ñandéve peteĩ téxto térã oñemboʼe ñanendive (Rom. 15:4). Ikatu avei peteĩ ermáno térã peteĩ ermána ñanemomanduʼa la Jehová opensávare peteĩ mbaʼére, ha upéva ñanepytyvõ ñaĩ hag̃ua trankílo. Umi ermáno oñehaʼã avei ñanepytyvõ heta hendáicha, por ehémplo okomparti ñanendive hembiʼu. Sapyʼánte tekotevẽtamante jajerure umi ermánope ñanepytyvõmi hag̃ua (Prov. 17:17). Ikatu hína ndoikuaái hikuái mbaʼéichapa ñañeñandu térã mbaʼépa ñaikotevẽ (Prov. 14:10). Upévare, eñeʼẽkena peteĩ ne amígo ikalida ha iñakãguapývandi. Emombeʼu vaʼerã chupe mbaʼéichapa reñeñandu, ha mbaʼépa haʼe ikatu ojapo nepytyvõ hag̃ua. Ikatu avei reñeʼẽ peteĩ térã mokõi ansiáno reñeñandu porãvandi. Ha oĩ ermána odesidíva oñeʼẽ peteĩ ermána iñakãguapývandi ha upéva omokyreʼỹeterei chupekuéra. w24.10 10 párr. 15, 16

Heta persóna oñehaʼã okaru porã ha ojapo meme ehersísio hesãi hag̃ua, péro nopensái upe haguére oikovetaha pára siémpre. Ikatu oĩ opensáva upéva imposivleha, térã heʼi hikuái ndaigustomoʼãiha pórke hasypátama ijedaiterei vove. Péro Jesús nontendekái vaʼekue ndaigustomoʼãiha jaiko pára siémpre oñeʼẽrõ guare upe esperánsare Juan 3:16 ha 5:​24-pe. Peteĩ vuéltape Jesús ombohetave umi pan ha umi piraʼi omongaru hag̃ua hetaiterei persónape. Upérõ ojehecharamoiterei la haʼe ojapo vaʼekue, ha la heʼi vaʼekue al día sigiénte katu ojehecharamovéntema. Umi hénte Jesús omongaru vaʼekue oho hapykuéri Capernaúm peve, opytáva ag̃ui Galiléagui. Upépe haʼe heʼi chupekuéra umi omanóva ikatuha orresusita ha oikove pára siémpre (Juan 6:​39, 40). La Jesús heʼi vaʼekue ohechauka hetaiterei hénte omanóva ikatuha oikove jey, ha nde ha umi rehayhúva ikatuha peiko pára siémpre. w24.12 8 párr. 1, 2

Ramoite pe Organización Mundial de la Salud ojapo peteĩ investigasión, ha heʼi heta ména iviolentoha, oapoʼiha hembirekópe térã omaltrata chupe diferénte hendáicha. Koʼã ména sapyʼánte otrata porã guaʼu hembirekópe ótro rovake, péro omaltrata chupe haʼeñoháme. ¿Mbaʼérepa oĩ jepi umi ména otrata vaíva hembirekópe? Ikatu oime itúa voi iviolénto rakaʼe, upévare chupe g̃uarã ndaivaíri la ojapóva. Oĩ katu umi país ojeʼehápe umi kuimbaʼe ohechauka vaʼerãha mbaretépe mávapa la omandáva hogapýpe. Ha heta kuimbaʼépe núnka noñemboʼéiva ojejokokuaa vaʼerãha, por ehémplo ipochy jave. Oĩ avei umi ména ohecha meméva pornografía, ha upéva káusare nomombaʼevéi kuñanguérape ni ndohechái hendápe porã pe séxo. Hiʼarive oĩ expérto heʼíva pe pandémia de Covid-19 káusare koʼãichagua provléma oempeorave hague. Péro ni peteĩva koʼã mbaʼe nomeʼẽi derécho peteĩ ménape otrata vai hag̃ua hembirekópe. w25.01 8 párr. 2, 3

Jesús heʼi vaʼekue pe mandamiénto iñimportantevéva haʼeha kóva: “Rehayhu vaʼerã Jehová nde Járape nde pyʼaite guive, nde rekove kompletoite reheve, ha ne mbaretekue omeʼẽmíva reheve, ha entéro ne pensamiénto reheve” (Luc. 10:27). Koʼápe jahecha jahayhu vaʼerãha Jehovápe ñande pyʼaite guive, upévape oike umi mbaʼe ñañandúva ha jaipotáva. Avei jahayhu vaʼerã Jehovápe ñande rekove kompletoite reheve ha ñane mbaretekue térã ñande fuérsa omeʼẽmíva reheve. Péro avei jahecha jahayhu vaʼerãha Jehovápe ñane pensamiénto reheve, upéva ningo ojekuaa umi mbaʼe ñapensávare. Jaikuaaháicha, núnka ndaikatumoʼãi ñantendepaite entéro mbaʼe Jehová opensáva. Péro ikatu ñantende porãve Ñandejára opensa lája ñaanalisáramo Cristo opensa lája, pórke haʼe ojoguaiterei vaʼekue Itúape (1 Cor. 2:16). w25.03 8 párr. 1

Jesús haʼe vaʼekue peteĩ kuimbaʼe perfékto, haʼe haguéicha pe primer kuimbaʼe Adán opeka mboyve (1 Cor. 15:45). Upévare Jesús omanórõ guare ñanderehehápe, opaga kuri la oñekotevẽva ojerrekupera jey hag̃ua la Adán operde vaʼekue (Rom. 5:19). Péicha Jesúsgui oiko “pe último Adán”, upévare natekotevẽvéima ótro kuimbaʼe perfékto ou opaga pe rreskáte ojerrekupera hag̃ua la Adán operde vaʼekue. Jesús omano vaʼekue “una ves ha opa ára g̃uarã” (Heb. 7:27; 10:12). Péicha jahecha ikatuha ñaĩ porã jey Jehovándi, haʼe ojapo rupi la tekotevẽva guive oñeperdona hag̃ua ñandéve ñande pekádo. Ha ikatu hag̃uáicha oiko upéva, ojepaga vaʼerã kuri pe présio oñekotevẽva. Jesús osakrifikárõ guare hekove perfékto opaga vaʼekue upe présio (Heb. 9:14). w25.02 5 párr. 12, 13

Ñanemanduʼa memérõ Jehová haʼeha “Ñandejára oikovéva”, ñambohovái porãvéta umi pruéva jahasáva. ¿Mbaʼérepa jaʼe upéva? Jahasa jave umi situasión ijetuʼúva tekotevẽ ñanemanduʼa mbaʼépa hína la iñimportantevéva. Satanás heʼíma vaʼekue ñande ñaneprovléma jave jahejataha Jehovápe. Upévare, la jajapóva ijetuʼu jave ñanendive ikatu omoñeñandu vai térã omoñeñandu porã Jehovápe (Job 1:​10, 11; Prov. 27:11). Péro jasegi jave ñandefiél jahechauka jahayhuha chupe ha Satanás ijapuha. Ikatu oime nde reikohápe pe goviérno oñemoĩ mbarete Jehová puévlore térã ikatu oime ereko provléma ekonómiko. Avei ikatu umi hénte nohenduséi umi notísia porã nde reikohárupi térã ikatu rehasa oimehaichagua ótro provléma. Oimérõ upéicha, nemanduʼákena erekoha peteĩ oportunida embovyʼa hag̃ua Jehovápe. Ani nderesarái avei haʼe ndohejamoʼãiha rehasa mbaʼeve ndaikatumoʼãiva reaguanta. Jehová katuete ñanemombaretéta jasegi hag̃ua ñaaguanta. w24.06 22 párr. 9

¿Ndépa reikuaa mbaʼépa hína nde devilida? Ipeligróso jaiko ndajarekoiramog̃uáicha ni peteĩ devilida térã ñapensa ñandepuʼakataha entéro tentasiónre (1 Juan 1:8). Ani ñanderesarái apóstol Pablo heʼi hague voi umi ‘ojegiáva pe espíritu sántore’, ikatuha avei hoʼa peteĩ ñuhãme noñatendéiramo (Gál. 6:1). Upévare tekotevẽ ñanesinséro ha ñarrekonose mbaʼépepa ñanekangy (2 Cor. 13:5). Ikatu oime jaikuaáma mbaʼépa ñande devilida ha mbaʼe ivaívapa ñandestira jepi. ¿Mbaʼépa upéicharõ jajapo vaʼerã? Ñambaʼapo jejopy vaʼerã ñaaguanta hag̃ua umi tentasión ijetuʼuvéva ñandéve. Ñapensamíntena, yma umi siuda imurallapa vaʼekue ojeprotehe hag̃ua. ¿Péro moõrupi ikatu ojeataka umi hénte upe siudapeguápe? Umi okẽrupi. Upévare orreforsa vaʼekue hikuái upe párte ha omoĩ guárdia oñatende vaʼerã pe siudáre. Péicha avei ñande kásope, koʼýte jajekuida vaʼerã ñande devilidágui ñaaguanta hag̃ua umi tentasión (1 Cor. 9:27). w24.07 15 párr. 5-7

Japredika jave umi notísia porã jajapo hína peteĩ “mbaʼe oĩ porãva”. Upéicharõ, jalee jave la Biblia ha jajepyʼamongeta hese, katuete jajeroviavéta Jehováre ha ñantende porãvéta avei mbaʼérepa iñimportánte japredika. Jaaprovecha porã hag̃ua Ñandejára Ñeʼẽ heʼíva tekotevẽ jalee, jastudia ha jajepyʼamongeta hese. Péro ani la apúrope, síno ñañemotiémpo vaʼerã upearã. Oimérõ etopa peteĩ téxto bíblico nerentendeporãiva, ani rembohasa reíntema, upéva rangue eñehaʼã vaʼerã entende la heʼiséva pe versíkulo. Upearã ikatu eipuru pe Índice de las publicaciones Watch Tower ha Gía oipurúva testígo de Jehová otopa hag̃ua informasión. Reñemotiémporamo restudia porã hag̃ua, regueroviavéta siertoha la Biblia heʼíva (1 Tes. 5:21). Ha amáske rejeroviave la Biblia heʼívare, evyʼavéta ikatu haguére ekomparti ótrondi la reaprendéva. w24.04 15 párr. 4, 5

David heʼi vaʼekue: “Jehová, nde ningo nevuenoiterei ha reime oreperdona hag̃uáicha” (Sal. 86:5). Miqueas avei heʼi vaʼekue: “Ñandejára, ¿máva piko ótro Dios ndeichagua? Nde ningo reperdona umi mbaʼe vai ojapóva umi hembýva nde puévlogui, ha rembohasa rei ipekádo” (Miq. 7:18). Ha Isaías heʼi vaʼekue: “Pe iñañáva toheja hembiapo vai, ha anive opensa ivaívare. Tou jey Jehová rendápe, pórke haʼe oiporiahuverekóta chupe. Toñemoag̃ui Ñandejárare, pórke haʼe operdonambaitéta chupe hembiapo vaikue” (Is. 55:7). Pe kongregasión Corintogua osegi hag̃ua Jehová ehémplo ohechauka vaʼerã operdona ha ohayhuha pe kuimbaʼe oñarrepenti vaʼekuépe. Pe kongregasión ojapopaite kuri upéva, péicha ohechauka ‘iñeʼẽrenduha hikuái entéro mbaʼépe’. Añetehápe pe kuimbaʼe oñenohẽ rire kongregasióngui, unos kuánto mése haguépente haʼe ohechaukáma kuri oñarrepentiha. Upévare natekotevẽi kuri umi ansiáno ohaʼarõiterei orreadmiti hag̃ua chupe kongregasiónpe. w24.08 17, 18 párr. 12, 13

Koʼẽrõitéma oikóta heta kámbio tuicháva. Jesús ohusgáta káda persóna oikóvape ko yvy ape ári. Haʼe oikuaauka vaʼekue mbaʼéichapa oĩta ko múndo haʼe ohusga potaitépe. Upearã omeʼẽ vaʼekue idisipulokuérape peteĩ ‘señál ojepilla hag̃ua haʼe oĩmaha, ha pe fin ou potaitemaha’ (Mat. 24:3). Ko profesía jatopa Mateo kapítulo 24 ha 25-pe, avei Marcos kapítulo 13-pe ha Lucas kapítulo 21-pe. Jesús omombeʼu vaʼekue mbohapy ehémplo ñanepytyvõtava jajeprepara porã hag̃ua, haʼe ñandeavisa porã vaʼekue mbaʼépa ikatu oiko. ¿Mbaʼe ehémplopa Jesús oipuru vaʼekue? 1) Pe oñeʼẽva ovecha ha kavaráre, 2) pe oñeʼẽva umi kuñataĩ iñarandúvare ha umi oñembotavývare, ha 3) pe ehémplo oñeʼẽva umi vosa henyhẽvare plátagui. Koʼãva ñanepytyvõ ñantende hag̃ua Jesús ohusgataha umi héntepe asegún la ojapóvare. w24.09 20 párr. 1, 2

Jesucristo hína pe ehémplo iporãvéva, pórke ojapo entéro mbaʼe ohayhúgui Itúape ha umi héntepe. Upéva la omomýi vaʼekue chupe ombaʼapo jejopy hag̃ua, ha ojapo hag̃ua umi traváho isensillovéva jepe oservi hag̃ua ótrope (Mat. 20:28; Juan 13:​5, 14, 15). Ermanokuéra, oimérõ peẽme penemomýi avei pe mborayhu, ikatu peĩ segúro Jehová ovendesitaha umi méta perekóva iservísiope g̃uarã, ha penepytyvõtaha oiko hag̃ua pendehegui siérvo ministeriál (1 Ped. 5:5). Ko múndope oñemombaʼe jepi umi hénte oñemoimportántevape, péro Jehová organisasiónpe ndaupeichaiete. Peteĩ ermáno oporohayhúva Jesús ojapo haguéicha, ndoikomoʼãi omandase umi ermanokuérare ni nopensamoʼãi haʼe iñimportanteveha ótrogui. Epensamíntena oñenombráramo kongregasiónpe peteĩ ermáno oñemoimportántevape. Provávlemente upéi pe ermáno ndojaposemoʼãi umi traváho isensillovéva okuida hag̃ua Jehová ovecha mimíre, pórke opensáta umi traváho ndahaʼeiha chupe g̃uarã (Juan 10:12). w24.11 15 párr. 6, 7

Ko múndo tuichakuére ñaikotevẽterei umi ermáno ikatúvare oservi de siérvo ministeriál, ansiáno ha superintendénte de sirkuíto (Efes. 4:8). Oimérõ nde haʼe peteĩ ermáno ojevautisámava, ¿ikatúpa “rejapo álgo” reipytyvõve hag̃ua? (Prov. 3:27). ¿Ikatúpa remoĩ pe méta reservi hag̃ua de siérvo ministeriál? Térã oimérõ nde haʼéma siérvo, ¿ikatúpa remoĩ pe méta reservi hag̃ua de ansiáno? ¿Ikatúpa rejapo umi kámbio tekotevẽva reho hag̃ua pe Eskuéla de Evanhelisadórpe? Ko eskuéla tuichaiterei nepytyvõta Jesús ojevale porãve hag̃ua nderehe. Péro ikatu oime reñandu nereimeiha preparádo rejapo hag̃ua koʼã mbaʼe. Oimérõ upéicha, eñemboʼékena Jehovápe ha ejerure chupe ijespíritu sánto tanepytyvõ rekumpli porã hag̃ua oimeraẽ asignasión oñemeʼẽva ndéve (Luc. 11:13). Jesucristo onombrávo umi ermánope ohechauka ñandegia porãitereiha koʼã ára pahápe (Mat. 28:20). Javyʼaiterei jareko haguére peteĩ Rréi ñanderayhúva ha imbaʼeporãva. Haʼe oikuaa porãiterei la ñaikotevẽva ha omeʼẽ ñandéve umi ermáno ñanepytyvõ hag̃ua. w24.10 23 párr. 16, 17

¿Mbaʼépa oikóta umi mbaʼe ombosufrívagui Jehová siervokuérape? Koʼẽrõitéma koʼã mbaʼe vai “opytáta tesaráipe” ha Jehová voi oipeʼaitéta ‘anivéma hag̃ua ohecha’ umíva (Is. 65:16). Ñandejára oipeʼapaitéta ko múndogui entéro mbaʼe ñanembosufríva, ha kon el tiémpo ni nañanemanduʼamoʼãvéima umívare. Jaha jave rreunionhápe tuicha ñandepyʼaguapyve. Upépe ningo ikatu ñaime trankílo ha ñañembyesarái ñane provlemakuéragui. Ha koʼytevéntema ñaipytyvõta ñane ermanokuérape oñeñandu porã hag̃ua jahechauka jave rreunionhápe umi mbaʼe porã oúva pe espíritu sántogui. Por ehémplo mborayhu, vyʼa, pyʼaguapy, pyʼaporã ha mbaʼeporã (Gál. 5:​22, 23). ¡Ajépa tuichaite vendisión ñañembyaty Jehová siervokuérandi! Umi osegíva oĩ ko paraíso espirituálpe ohecháta mbaʼéichapa Jehová ojapo peteĩ “yvága ha yvy pyahu”. w24.04 22 párr. 9, 10

Peteĩ mbaʼe iporãitereíva ningo la oñeñepyrũ peteĩ noviásgo. Péro avei iñimportanteterei, pórke ikatu oñepyrũ hína peteĩ matrimónio. Pe omendaha díape umi nóvio opromete Jehová renondépe ojoayhu ha ojorrespetataha hikuái oikove aja entéro. Upévare pepensa porã vaʼerã pejapo mboyve ko kompromíso. Pe noviásgo ningo penepytyvõta mokõivépe pejokuaa porã hag̃ua ha pedesidi porã hag̃ua. Upe tiémpope pehecháta pemendátapa térãpa pejedeháta. Pedesidíramo pejedehataha, upéva ndeʼiséi hína osẽ vai hague la noviásgo. Penemanduʼa vaʼerã maʼerãpa pe noviásgo: Penepytyvõta pedesidi porã hag̃ua. ¿Mbaʼérepa iñimportantete umi oĩva soltéro ontende porã maʼerãpa la noviásgo? Pórke peteĩ soltéro ontende porãramo upéva, nomoñepyrũmoʼãi mbaʼeve avavéndi nopensáiramo hína omenda. w24.05 26, 27 párr. 3, 4

Sapyʼánte umi imitãva okyhyje omombeʼu hag̃ua umi mbaʼe ogueroviáva. Por ehémplo koléhiope oñeñeʼẽ jave pe evolusión rehe ikatu haʼekuéra otĩ heʼi hag̃ua la opensáva pe témare. Amo ipahápe oĩ heta profesór ndodudáiva voi heʼi hag̃ua siertoha pe evolusión. Upéicharõ, ¿mbaʼéichapa ikatu peipytyvõ pene famíliape ipyʼaguasu hag̃ua ha péicha omombeʼu hag̃ua umi mbaʼe ogueroviáva? Peasegura pene famíliape natekotevẽiha otĩ oguerovia haguére jarekoha ñande Apohare. Oĩ heta sientífiko opensáva umi mbaʼe oikovéva ndaikatúi hague oexisti ijehegui reíntema. Amáske ostudia hikuái pe naturalésa, haʼekuéra ohechakuaa oĩmante vaʼerãha álgien iñarandúva ojapo porãitereíva koʼã mbaʼe. Upévare haʼekuéra ndoapojái pe enseñánsa oñeʼẽva pe evolusión rehe. Pene família ikatu oĩve segúro la ogueroviávare oikuaáramo mbaʼépa la oipytyvõ vaʼekue ótro ermánope oguerovia hag̃ua oĩha peteĩ Apohare. w24.12 18 párr. 14, 15

Jesús siémpre opensa vaʼekue ojehupytytaha heta mbaʼe porã predikasiónpe, opensa rupi upéicha osegi vaʼekue opredika kyreʼỹme. Por ehémplo un áñorupi oñepyrũ riréma opredika, haʼe ohechakuaa oĩha hetaiterei persóna omombaʼéva pe mensáhe, ha okompara la héntepe umi kokue morotĩmbávare oĩmava oñemonoʼõ hag̃uáicha (Juan 4:35). Un áñorupi upe rire Jesús heʼi vaʼekue idisipulokuérape: “Hetaiterei oĩ la oñemonoʼõ vaʼerã” (Mat. 9:​37, 38). Upe rire haʼe heʼi jey idisipulokuérape: ‘Hetaiterei oĩ la oñemonoʼõ vaʼerã, pejerurékena pe kokue Járape tombou hetave travahadór omonoʼõ vaʼerã’ (Luc. 10:2). Jesús núnka ndoperdéi vaʼekue la esperánsa ha oĩ segúro oĩtaha persóna ojeroviáva pe notísia porãre. Haʼe ohechárõ guare upéva oikoha, ovyʼaiterei vaʼekue. Jesús omboʼe vaʼekue idisipulokuérape pe mensáhe haʼekuéra opredikáva rupive ojehupytytaha hetaiterei mbaʼe. Upéicha Jesús oipytyvõ vaʼekue idisipulokuérape opredika hag̃ua kyreʼỹme. w25.03 18, 19 párr. 15, 16

Jehová ñandeprotehe. Ikatuháicha jaike peteĩ itakuápe jajeprotehe hag̃ua peteĩ torménta vaígui, Jehová ikatu avei ñandeprotehe jahasa jave peteĩ situasión ijetuʼúva. Haʼe ikatu avei ñandeprotehe ani hag̃ua japerde pe amista jarekóva hendive ha pono ojehu ñandéve mbaʼeve ñandeperhudikátava pára siémpre. Haʼe opromete voi ñandéve koʼẽrõitéma oipeʼapaitetaha entéro mbaʼe ñandepyʼapýva térã ikatúva ñanembosufri (Ezeq. 34:​25, 26). ¿Mbaʼépa jajapo vaʼerã Jehová ñandeprotehe hag̃ua? Ñañemboʼe vaʼerã chupe. Upéicha haʼe ikatúta omeʼẽ ñandéve pe pyʼaguapy ‘oñangarekóva ñane korasõre ha umi mbaʼe ñapensávare’ (Filip. 4:​6, 7). Jehová siémpre oĩ ñanendive, haʼe pe ‘Ita Guasu okuidáva ñanderehe opa ára g̃uarã’ (Is. 26:​3, 4). Haʼe siémpre oexistíta, upévare ikatúta okumpli ipromesakuéra, ohendu ñane ñemboʼe ha ñanepytyvõ ñaikotevẽ jave. Ñande ikatu avei ñadependete Jehováre pórke haʼe núnka ndohejareíri umi oservívape chupe (2 Sam. 22:26). Haʼe ndahesaráiri umi mbaʼe jajapo vaʼekuégui ha katuete ñanepremiáta (Heb. 6:10; 11:6). w24.06 27 párr. 4-6

Ñamboyke vaʼerã umi vyʼarã naiporãiva térã umi amígo ñanemokyreʼỹtava ñandeplatarayhu hag̃ua. Koʼã mbaʼe ikatu ñanemomombyry Jehovágui ha ndajahayhuvéima chupe yma guaréicha. Japilláramo upéva oikoha hína ñanderehe, pyaʼe jakuʼe vaʼerã ha ñakambia (Mat. 5:​29, 30). Jasegi hag̃ua jahayhu Jehovápe ñande pyʼaite guive, ñañatende vaʼerã ani hag̃ua ñandepyʼamokõi, pórke nañañatendéiramo ikatu ñapensa: “Che ningo heta voi cherembiapo Jehová servísiope ha ndaipóri mbaʼeve chegueraha vai vaʼerã”. ¿Siérto piko upéva? Epensamíntena ko ehémplore. Peteĩ persóna orekóramo presión álta, hoʼu vaʼerã pohã ikatu hag̃uáicha oĩ porã. ¿Péro ojapo porãtapa hese la ipohã ndokuidáiramo umi tembiʼu hoʼúva? Upéicha avei, ñañemoag̃ui hag̃ua Jehováre jastudia vaʼerã la Biblia, ¿péro ñaĩ porãtapa henondépe ndajajekuidáiramo ko múndogui? Nañañatendéiramo ñandejehe, ko múndo káusare ikatu hína ndajahayhuguasuvéi Jehovápe ha ñandepyʼamokõi (Efes. 2:2). w24.07 21 párr. 6, 7

Ndaikatúi ni ñañeimahina mbaʼeichaitépa Jesús ohasa asy vaʼekue. Jesús ndohejái vaʼekue umi mbaʼe vai ohasáva ipuʼaka hese. Haʼe ojerure rangue Itúape okastiga hag̃ua umi soldádo oklava vaʼekuépe chupe pe yvyráre, Jesús oñemboʼe hesehapekuéra ha heʼi: “Che Ru, eperdonána chupekuéra, haʼekuéra ningo ndoikuaái la ojapóva” (Luc. 23:34). Ñande avei ikatu ñañemboʼe Jehovápe ha jajerure chupe toipytyvõ umi ñandetrata vaívape. Upéicha ñaĩta trankílo ha ndajapytamoʼãi ñandepyʼaro ni ñandepochy. Avei ñañemboʼéramo ikatu ñakambia la ñapensáva umi ñandetrata vaívare. Jaiko aja ko múndo añáme ikatu ñahaʼarõ ojejapotaha gueteri ñanderehe heta inhustísia. Péro toiko la oikóva jasegíkena ñañemboʼe Jehovápe ñanepytyvõ hag̃ua. Jahasa jave umi inhustísia ñañehaʼãmbaite vaʼerã jasegi Jesús ehémplo ha umi konsého porãite oĩva la Bíbliape. Péicha jajapóramo ikatu ñaĩ segúro Jehová ñanevendesitaha (1 Ped. 3:​8, 9). w24.11 6 párr. 16; 7 párr. 17, 19

Jehová ndohejái isiervokuérape ojapo ojaposévante, pórke haʼe ndochaʼeiete pe pekádore (Sal. 5:​4-6). Upévare haʼe oipota ñande jajapo imandamientokuéra heʼíva, oĩva Ñandejára Ñeʼẽme. Péro Jehová nohaʼarõi ñande ñandeperfektotaha entéro mbaʼépe, pórke oikuaa ñaneimperfektoha (Sal. 130:​3, 4). Upéicharõ jepe, haʼe nopermitíri ipuévlo apytépe oĩ umi ‘kuimbaʼe aña oipurúva Ñandejára mbaʼeporã ojapo hag̃ua umi mbaʼe ohechaukáva notĩriha hembiapo vai hag̃ua’ (Jud. 4). La Biblia heʼi voi ‘oñehunditaha umichagua hénte añáme’ Ñandejára gérra héravape Armagedón (2 Ped. 3:7; Apoc. 16:16). Péro Jehová ndoipotái avave oñehundi. La Biblia heʼi porã Jehová ‘oipotaha enterove oñarrepenti’ (2 Ped. 3:9). Umi ansiáno osegi avei Jehová ehémplo. Upévare ipasiénsia ha oñehaʼãmbaite oipytyvõ pe opeka vaʼekuépe okambia hag̃ua la ojapóva oĩ porã jey hag̃ua Ñandejárandi. w24.08 26 párr. 1, 2

Ikatu jasegi Jehová ehémplo ñameʼẽvõ mborayhúpe ótrope la oikotevẽva. Por ehémplo, ¿reikuaápa peteĩ ermáno oikotevẽvape hína ao térã hoʼumi vaʼerã? Jehová ikatu ojevale nderehe eipytyvõ hag̃ua chupe. Jehová puévlo ikonosído voi pyaʼe oporopytyvõ haguére oiko jave umi desástre. Por ehémplo pe pandémia de COVID-19 aja, umi ermáno omeʼẽ ao, provísta ha hetave mbaʼe umi oikotevẽvape. Heta ermáno avei omeʼẽ ikontrivusión pe óvra mundiálpe g̃uarã. Péicha oñepytyvõ umi ermáno oĩvape ko yvy tuichakuére oikohápe umi desástre. Koʼã ermáno imbaʼeporãitéva oreko enkuénta la heʼíva Hebreos 13:16: “Ani penderesarái pejapo vaʼerãha iporãva ha pekomparti vaʼerãha la peguerekóva pende rapichakuérandi. Koʼã mbaʼe ningo peteĩ ofrénda Ñandejárape g̃uarã ha ombovyʼaiterei chupe”. w24.09 27 párr. 6, 7

Epensamína ko kásore. Ñamoĩ chupe ehekaha nde travahorã emantene hag̃ua ne famíliape. Peichaháguinte osẽ ndéve mokõi lugár ikatutahápe embaʼapo. Upémarõ nde eñepyrũ ehecha mbaʼe traváhopa la rejapótava, mboy órapa rembaʼapóta, mboýpa nderaháta eho ha eju hag̃ua nde traváhogui ha umícha. Avei umi mokõi traváho osẽva ndéve oikoite peteĩ Testígope g̃uarã. Péro ikatu oime peteĩva ndestirave ndegustágui pe traváho rejapótava térã ojepaga porãvétagui ndéve. Upéicharõ jepe oĩ hína hetave mbaʼe ereko vaʼerã enkuénta edesidi porã hag̃ua. Por ehémplo, ¿eñepyrũtapa efalta mimi rreunionhápe peteĩva umi traváho káusare? ¿Oipeʼátapa ndehegui tiémpo eñangareko hag̃ua ne famíliare ha eipytyvõ hag̃ua chupekuéra oñemoag̃ui hag̃ua Jehováre? Reñeporandúramo koʼã mbaʼe ikatúta remotenonde “umi mbaʼe iñimportantevéva”, por ehémplo nde servísio Jehovápe ha umi mbaʼe ne família oikotevẽva. Avei ndereikomoʼãi emotenonde umi mbaʼerepy. Péicha redesidi porãramo Jehová katuete nevendesíta. w25.01 17, 18 párr. 11-13

Oĩramo jepe umi ndetrata vaietereíva, nde ikatu reĩ segúro Jehová nderayhuetereiha ha nemombaʼeha. Oiméramo nde ‘reñekevranta ha reñeñandu yvýre’, nemanduʼákena Jehová ohecha hague nderehe heta mbaʼe porã ha haʼe voi nemoag̃ui ijehe (Juan 6:44). Haʼe siémpre oĩ nepytyvõ hag̃uáicha nderayhueterei rupi. Ikatu ñantende porãve umi mbaʼe Jehová oñandúva ñaanalisáramo Jesús ehémplo. Haʼe oĩrõ guare ko yvy ape ári otrata porãiterei umi persóna ojeapoʼívape, ha umi oñandúvape ndovaleiha mbaʼeverã (Mat. 9:​9-12). Por ehémplo oĩ vaʼekue peteĩ kuña orekóva peteĩ mbaʼasy igravetereíva. Haʼe oho vaʼekue opoko Jesús aóre ogueroviágui péicha okuerataha. Upérõ Jesús okonsola ha oguerohory chupe ojerovia haguére (Mar. 5:​25-34). Jesús ojoguaiterei Itúape entéro mbaʼépe (Juan 14:9). Upévare ikatu reĩ segúro Jehová nemombaʼeha ha ohechaha entéro umi mbaʼe porã reguerekóva. Haʼe ohecha mbaʼeichaitépa rejerovia hese ha rehayhu chupe. w24.10 7 párr. 4, 5

David oikove aja pukukue ohasa vaʼekue heta situasión ijetuʼúva, ha sapyʼánte hasẽ vaʼekue voi. Oĩ vaʼekue heta ndochaʼéiva hese, avei ihénte ha iñamígo apytégui oĩ vaʼekue otraisionáva chupe ha oñehaʼãva operhudika Davídpe (1 Sam. 19:​10, 11; 2 Sam. 15:​10-14, 30). Haʼe ohasa asyetereírõ guare oskrivi: “Chekaneʼõma asuspira hague. Tódo el pyhare ningo ajaheʼo, ha che resay omboykuepáma la che rupa” (Sal. 6:6). David situasión ijetuʼueterei vaʼekue, upéicharamo jepe haʼe ndodudái Jehová ohayhuetereiha chupe. Haʼe heʼi vaʼekue: “Jehová ohendúta mbaʼeichaitépa che añembyasy ha añelamenta” (Sal. 6:8). La heʼíva pe téxto koestediagua ohechauka porã Jehová ñanderayhuetereiha ha ojepyʼapyha umi mbaʼe ñañandúvare. David heʼi haʼetévaicha ku Jehová ombyatýva hesay imbaʼyrúpe, térã oskrivíva ilívrope la oikóva hese. David ndodudái Jehová oikuaaha ha imanduʼaha umi mbaʼe ombosufrívare chupe. Haʼe oĩ vaʼekue segúro Jehová orekoha enkuénta entéro umi iprovléma, ha avei mbaʼéichapa haʼe ohasa asy umi provléma káusare. w24.12 22 párr. 11, 12