Mayo

Jehová olivera rire ipuévlope Egíptogui, oasigna vaʼekue unos kuántope oservi hag̃ua de saserdóte pe tavernákulope. Oñeasigna vaʼekue avei umi levítape ojapo hag̃ua umi tembiapo oñekotevẽva pe tavernákulope. Péro ñapensamíntena, ¿Jehovápa okuida porãve rakaʼe umi saserdóte ha umi levítare oiko haguérente ag̃ui pe tavernákulogui? ¡Nahániri! Jehová peteĩchapa okuida vaʼekue enterovévare. Jehová omeʼẽ vaʼekue enterove israelítape pe oportunida oñamiga hag̃ua hese. Por ehémplo, Jehová ojasegura vaʼekue enterove umi israelita ikatutaha ohecha pe arai ha pe tatarendy oĩva pe tavernákulo ári (Éx. 40:38). Ha ohecháre hikuái pe arai okuʼeha haʼekuéra ikatúma vaʼekue ombyaty la ikosakuéra, odesarma pe hóga kárpa ha oñepyrũma oviaha pe puévlondi. Umi oiko mombyryvéva jepe pe tavernákulogui ikatu vaʼekue ohecha pe arai okuʼeha (Núm. 9:​15-23). Upeichaite avei koʼág̃arupi, tahaʼe haʼéva la lugár jaikoha, Jehová lomímonte ikatu ohechauka ñanderayhuha ha okuidaha ñanderehe. w24.06 4 párr. 10-12

David raʼy hérava Absalón ojukase vaʼekue itúape oiko hag̃ua chugui rréi (2 Sam. 15:​12, 13). David upepete okañy vaʼerã Jerusaléngui. Osẽ riréma hikuái upégui, David ohechakuaa tekotevẽha álgien opyta oñentera hag̃ua mbaʼépa Absalón ojapóta. Upévare David omondo jey pe siudápe Sadoc ha hetave saserdótepe ikatu hag̃uáicha oavisa chupe la oikóva upépe (2 Sam. 15:​27-29). Koʼã kuimbaʼe oñatende porã vaʼerã la ojapóvare. David oplanea vaʼekue álgo ha upearã oikotevẽta kuri Sadoc ha Husái rehe, haʼéva David amigoite (2 Sam. 15:​32-37). Omanda haguéicha David, Husái oho ha oroviaka Absalónpe haʼe oĩha iládo. Upéi oakonseha chupe mbaʼéichapa oataka vaʼerã Davídpe. Upéva omeʼẽta kuri tiémpo Davídpe ojeprepara hag̃ua pe atakerã. Upéi Husái omombeʼu Sadoc ha Abiatárpe upe plan (2 Sam. 17:​8-16). Ha haʼekuéra oavisaka Davídpe la oikóva. Upéva tuichaiterei oipytyvõ ani hag̃ua ojejuka Davídpe (2 Sam. 17:​21, 22). w24.07 5 párr. 9, 10

Oĩ ermáno ojepyʼapyetereíva umi mbaʼe vai ojapo vaʼekuére ymave, tahaʼe ojevautisa mboyve térã upe rire. Péro ñanemanduʼa vaʼerã Jehová ñanderayhuetereígui omeʼẽ hague pe rreskáte operdona hag̃ua ñande pekadokuéra. Jehová oipota jaasepta upe rregálo, upévare haʼe oasegura ‘jaiko porã jey rire hendive’ ñaneperdonambaitemaha. Javyʼaite Jehová siémpre imanduʼa haguére umi mbaʼe porã jajapóvare, ha hesaráima haguére ñande pekadokuéragui (Sal. 103:​9, 12; Heb. 6:10). Oimérõ reñeñandu vai gueteri umi mbaʼe vai rejapo vaʼekuére yma, eñehaʼãmbaitékena epensa umi mbaʼe porã ikatúvare rejapo koʼág̃a ha amo gotyove. Nde ndaikatuvéima rekambia umi mbaʼe vai rejapo vaʼekue yma, péro si ikatu rembovyʼa ha remombaʼeguasu Jehovápe koʼág̃a. Avei ikatu rejesareko meme umi promésa porãite oñekumplítavare amo gotyove. w24.10 8 párr. 8, 9

Relee jave la Biblia, sapyʼánte ikatu reñedesanima pórke rehechakuaa hetaiterei mbaʼépe tekotevẽha emehora. Por ehémplo, ñamoĩ chupe peteĩ día releeha jatrata vaʼerãha enterovévape peteĩchante (Sant. 2:​1-8). Ikatu rehechakuaa tekotevẽha etrata porãve ótrope, upévare edesidi ekambiaʼimitaha algúna kósape. Upéi koʼẽrõ g̃uarã elee ótro versíkulo heʼíva tekotevẽha ñañatende la jaʼévare (Sant. 3:​1-12). Upépe nemanduʼa sapyʼánte ereha umi mbaʼe ikatúva omoñeñandu vai nde rapichápe. Upémarõ edesidi eñehaʼãtaha eporomokyreʼỹve eñeʼẽ jave. Upéi al día sigiénte otoka ndéve relee ndovaleiha jajeheʼa ko múndore (Sant. 4:​4-12). Upépe katu rehechakuaa tekotevẽha eiporavo porãve ne diversionrã. Pe cuarto díape g̃uarã eñandúma ijetuʼuetereitaha ekambiapaite hag̃ua koʼã mbaʼépe. Péro ani eñedesanima. Tekotevẽ nemanduʼa kontinuadoite ñamonde vaʼerãha peteĩ aóicha pe “kondúkta pyahu”. w24.09 5, 6 párr. 11, 12

Jesús oikuaa porã vaʼekue Itúa ohechapaiteha mbaʼéichapa ojetrata vai chupe, ha okonfia vaʼekue Jehová ojapotaha hustísia itiempoitépe. Oĩ jave ñandetrata vaíva ikatu jasegi Jesús ehémplo ñañatende porãrõ la jaʼévare. Sapyʼánte ikatu ñambohasa reínte la ojejapóva ñanderehe, pórke ndahaʼéi la igravetereíva térã jadesidi ñakirirĩnte pono ñambyaive rei la situasión (Ecl. 3:7; Sant. 1:​19, 20). Avése katu tekotevẽta ñañeʼẽ oimérõ jahecha ojetrata vaiha algúnope térã tekotevẽrõ ñadefende umi mbaʼe jagueroviáva (Hech. 6:​1, 2). Péro siémpre ñañeʼẽ vaʼerã pyʼaguapýpe ha jahechauka vaʼerã japororrespetaha. Avei jasegi Jesús ehémplo jahejánterõ oñangareko ñanderehe “pe Hués oporohusgáva hustísiape” (1 Ped. 2:23). w24.11 5, 6 párr. 10-12

Javyʼaiterei ningo peteĩ opekáva oñarrepenti jave (Luc. 15:7). Oiko jave upéva, ¿mávapepa oñemombaʼeguasu vaʼerã? ¿Umi ansiánope? Nahániri. Apóstol Pablo heʼi vaʼekue umi opekávare: “Ikatu hína Ñandejára opermiti chupekuéra oñarrepenti” (2 Tim. 2:25). Upéicharõ ndahaʼéi hína peteĩ persóna, síno Jehová la oipytyvõva pe opeka vaʼekuépe okambia hag̃ua opensa lája. Pablo oexplika vaʼekue umi mbaʼe porã oikóva peteĩ opekáva oñarrepenti rire: Pe persóna oikuaa porãve pe añetegua, opensa porã jey ‘ha osẽ pe Diablo ñuhãgui’ (2 Tim. 2:26). Peteĩ persóna oñarrepentíramo, umi ansiáno osegíta ojapo chupe visíta de pastoréo. ¿Maʼerãpa? Omombarete hag̃ua chupe ikatu hag̃uáicha haʼe osegi ipuʼaka Satanás ñuhãre, ha ‘osegi hag̃ua oguata derechoite pe tape porãre’ (Heb. 12:​12, 13). w24.08 23 párr. 14, 15

Umi hénte okaru vaʼekue pe milágro rupive opensa ijehénte ha oipotánte oñemeʼẽ chupekuéra la oikotevẽva. Jahechamína la ojapo vaʼekue hikuái. Al día sigiénte haʼekuéra oho pe lugár Jesús omongaru haguépe chupekuéra, péro Jesús ha ijapostolkuéra ndaiporivéima upépe. Upémarõ umi hénte ojupi unos kuánto varkoʼi oúvape Tiberíadesgui ha oho hikuái Capernaúmpe oheka hag̃ua Jesúspe (Juan 6:​22-24). ¿Ojapópa rakaʼe hikuái upéva ohenduségui umi notísia oñeʼẽva Ñandejára Rréinore? Nahániri, haʼekuéra oipotánte Jesús omeʼẽ jey chupekuéra pan. ¿Mbaʼéicha jaikuaa upéva? Jahechamína la oiko vaʼekue umi hénte otopárõ guare Jesúspe Capernaúm ypýrupi. Haʼe derechoite heʼi haʼekuéra ohekaha chupe sólamente oipotágui oñemeʼẽ chupekuéra hoʼu vaʼerã. Jesús heʼi haʼekuéra hoʼu hague ‘pan hyg̃uatãha meve’, péro heʼi avei pe ‘tembiʼu oñehundiha’. Upévare omokyreʼỹ chupekuéra ombaʼapo hag̃ua “pe tembiʼu núnka noñehundimoʼãivare” ha “omeʼẽva jeikove opaveʼỹva” (Juan 6:​26, 27). Jesús oexplika chupekuéra pe tembiʼu omeʼẽtaha Itúa. w24.12 5 párr. 8, 9

Ermanokuéra, pesegi hag̃ua pendekatupyryve peipuru vaʼerã la Biblia peporomboʼe jave ha pemeʼẽ jave konsého. Upearã pestudia porã vaʼerã la Biblia ha umi puvlikasionkuéra (Prov. 15:28). Pestudia jave, peñatende porã vaʼerã mbaʼéichapa umi puvlikasión omyesakã peteĩ téxto, upéi peipuru hag̃ua hendápe porã. Avei pemboʼe jave iñimportanteterei pepoko umi penerendúva korasõre. Ikatu hína pesegi pendekatupyryve peporomboʼe jave pejeruréramo konsého umi ansiáno iñexperiénsiavape (1 Tim. 5:17). Umi ansiáno avei omokyreʼỹ vaʼerã umi ermánope, péro sapyʼánte tekotevẽta avei oporokorrehi. Tahaʼe haʼeháicha, haʼekuéra siémpre oporotrata porã vaʼerã. Penembaʼeporãramo, peporohayhúramo ha peipurúramo la Biblia peporomboʼe hag̃ua katuete pemehoráta. Péicha pesegíta Jesús ehémplo, haʼe hína pe Mboʼehára Ikatupyryvéva (Mat. 11:​28-30; 2 Tim. 2:24). w24.11 24 párr. 16

Ikatu ñamombaʼeguasu Jehovápe umi mbaʼe jaʼéva rupive. Pe Salmo heʼi ñandéve ‘japurahéi vaʼerãha Jehovápe’, ‘ñambotuicha vaʼerãha héra’, ‘ñamombeʼu vaʼerãha haʼe osalvaha ipuévlope’ ha ‘ñamombeʼu vaʼerãha umi tetãrupi haʼe ipoderosoha’ (Sal. 96:​1-3). Entéro koʼã mbaʼe rupive ikatu hína ñamombaʼeguasu ñande Ru yvagapeguápe (Hech. 4:29). Avei ikatu ñamombaʼeguasu Jehovápe ñane mbaʼerepy rupive. Ymaite guive umi ifiélva Jehovápe omombaʼeguasu chupe umi mbaʼerepy rupive (Prov. 3:9). Por ehémplo yma umi israelita omeʼẽ vaʼekue ikontrivusión oñemopuʼã ha oñemantene hag̃ua pe témplo (2 Rey. 12:​4, 5; 1 Crón. 29:​3-9). Avei Jesús disipulokuéra ‘oipuru vaʼekue ipláta ha umi mbaʼe orekóva oñatende hag̃ua hese ha umi apóstol rehe’ (Luc. 8:​1-3). La Biblia avei omombeʼu síglo primérope oĩ hague kristiáno ohasa asýva pe ñembyahýi káusare. Upévare umi ermáno ha ermána oikóva ótro lugárpe omeʼẽ pláta oipytyvõ hag̃ua iñermanokuérape (Hech. 11:​27-29). Koʼág̃a avei ñande ikatu ñamombaʼeguasu Jehovápe umi ñane kontrivusión rupive. w25.01 4 párr. 8; 5 párr. 11

¿Mbaʼépa oipytyvõ vaʼekue Cornéliope ojevautisa hag̃ua? La Biblia heʼi Cornelio haʼe hague “peteĩ kuimbaʼe okyhyjéva Ñandejáragui ha oadoráva chupe enterove umi hogayguándi”. Avei pyʼỹi oñemboʼe ojerure asy hag̃ua Ñandejárape (Hech. 10:2). Pedro omombeʼúrõ guare umi notísia porã Cornéliope, haʼe ha ifamília oñepyrũma ojerovia Jesúsre ha pyaʼe voi ojevautisa (Hech. 10:​47, 48). Ni michĩmi voi ndajadudái Cornelio ojapo hague umi kámbio tekotevẽva oservi hag̃ua Jehovápe ifamília ndive (Jos. 24:15; Hech. 10:​24, 33). Cornelio haʼe vaʼekue peteĩ kuimbaʼe iñimportánteva. Péro haʼe ndohejái upéva ojoko chupe oiko hag̃ua chugui kristiáno. Epensamína nde kásore, ¿tekotevẽpa avei rejapo peteĩ kámbio tuicháva rejevautisa hag̃ua? Oimérõ upéicha, nemanduʼákena Jehová nepytyvõtaha. Haʼe nevendesíta redesidíramo rejapotaha la Biblia heʼíva reservi hag̃ua chupe. w25.03 5 párr. 12, 13

Sapyʼánte ikatu ñahendu oĩha omosarambíva álgo Jehová organisasión kóntrape térã umi ermanokuéra ñandedirihíva kóntrape. Upéicha jave, ñanemanduʼákena mbaʼéichapa Ñandejára enemigokuéra otrata vaʼekue Jesús ha idisipulokuérape. La Bíbliape heʼiháicha, koʼág̃arupi ojepersegi umi oservívape Jehovápe ha oñemosarambi heta japu ikontrapekuéra (Mat. 5:​11, 12). Umi ñane enemigokuéra ndaikatumoʼãi ñanembotavy, ñanemanduʼáramo mávaguipa ou umi japu ha pyaʼe jajeprotehéramo. Jarrechasaitékena umi japu jajeprotehe hag̃ua. Apóstol Pablo heʼi porã vaʼekue mbaʼépa jajapo vaʼerã ñahendúramo umi japu oñemosarambíva hína. Haʼe heʼi vaʼekue Timotéope ‘oñemoñeʼẽ mbarete hag̃ua unos kuántope anivéma hag̃ua oiko opena hikuái umi kuénto reíre’ ha ‘ani hag̃ua ohendu umi kuénto japu oheja vaíva Ñandejárape’ (1 Tim. 1:​3, 4). Ñande jarrechasa umi kuénto rei oñemosarambíva pórke jaikuaa mávaguipa ou, ha ñahendu sólamente “umi enseñánsa iporãva” (2 Tim. 1:13). w24.04 11 párr. 16; 13 párr. 17

Ñañemoag̃ui memékena umi ifiélvare Jehovápe. Ñandejára oipota jaservi chupe ñane ermanokuérandi en unida. Jajegiáramo umi enseñánsa verdadérare ikatúta jasegi unído ermanokuérandi. Oĩramo álgien omosarambíva umi informasión ndasiértoiva, ikatu oseparapa umi ermáno kongregasionpegua. Upévare Jehová heʼi ‘ndovaleiha jajeheʼa’ umichaguáre. Pórke ñañemoag̃uíramo hesekuéra, ikatu ñañepyrũ jarovia umi japu ha jajei pe añetegua rapégui (Rom. 16:17). Jahechakuaávo mbaʼépa hína la verda ha jajegiáramo upévare, ñande jerovia siémpre imbaretéta ha jasegíta ñaĩ Jehová ykére (Efes. 4:​15, 16). Avei ndajagueroviamoʼãi umi enseñánsa ha japu Satanás omosarambíva ha ñaĩta segúro pórke Jehová okuidáta ñanderehe pe jehasa asy guasu aja. Upévare, jasegíkena ñaneñeʼẽrendu pe añeteguápe, ‘péicha Ñandejára omeʼẽva pyʼaguapy ñanevendesíta’ (Filip. 4:​8, 9). w24.07 13 párr. 16, 17

Jesús oipytyvõseterei vaʼekue umi hénte oñeñandúvape yvýre opeka haguére, haʼe oinvita koʼã héntepe oiko hag̃ua chuguikuéra idisípulo. Jesús oikuaa porã vaʼekue pe pekádo káusare la hénte osufrietereiha, upévare oñehaʼã vaʼekue oñemoag̃ui umi hénte hembiapo vaívare. Jesús omoĩ vaʼekue peteĩ ehémplo ha heʼi: ‘Umi hesãiva noikotevẽi doktór, péro umi hasýva si oikotevẽ. Che ndajúi ajerure umi ihústovape oñarrepenti hag̃ua, síno aju ajerure umi pekadórpe toñarrepenti’ (Mat. 9:​12, 13). Ha upevaite la Jesús ojapo vaʼekue. Por ehémplo peteĩ kuña ombojepyhéirõ guare chupe hesaýpe, haʼe oñeʼẽ chupe mborayhúpe ha operdona ipekadokuéra (Luc. 7:​37-50). Avei Jesús omboʼe vaʼekue peteĩ kuña samaritánape heta mbaʼe iñimportantetereíva oikuaáramo jepe haʼe hekovaiha (Juan 4:​7, 17-19, 25, 26). Ha Ñandejára omeʼẽ vaʼekue Jesúspe podér ipuʼaka hag̃ua pe ñemanóre jepe, haʼéva hína pe provléma ivaivéva oguerúva pe pekádo. ¿Mbaʼéichapa oiko vaʼekue upéva? Jesús omoingove jeýrõ guare umi héntepe, tahaʼe kuña, kuimbaʼe, mitã ha kakuaa (Mat. 11:5). w24.08 4 párr. 9, 10

¿Mbaʼépa Jehová koʼẽrõitéma ojapóta omombaʼeguasu hag̃ua héra? Haʼe ojapóta hustísia. Koʼẽrõitéma ohundíta Babilonia Guasúpe omongyʼa haguére héra porãite (Apoc. 17:​5, 16; 19:​1, 2). Algúno ohecha vove mbaʼéichapa oñehundi Babilonia Guasúpe ikatu hína odesidi oñemoĩ ñande ykére oservi hag̃ua Jehovápe. Upéi Armagedónpe Jehová ohundietéta Satanás múndo, ha ohundíta avei entéro umi oñemoĩvape ikóntrape ha umi omongyʼávape héra. Péro haʼe osalváta umi ohayhúvape chupe, umi iñeʼẽrendúvape ha umi omombaʼeguasusévape héra (Mar. 8:38; 2 Tes. 1:​6-10). Jesús goviérno de 1.000 áño ha pe pruéva finál rire, Jehová ohechaukátama omereseha entéro persóna oadora chupe añoiténte (Apoc. 20:​7-10). Upe tiémpope g̃uarã “opárupi ojekuaáta Jehová podér tuichaha, upe ojekuaáva omyenyhẽta ko yvy, pe y omyenyhẽháicha pe mar” (Hab. 2:14). Igustoitéta ningo enterove persóna omombaʼeguasu vove Jehová réra porãite. w25.01 7 párr. 15, 16

¿Mbaʼépa ikatu vaʼekue oipytyvõ umi kristiánope oĩrõ guare opersegi mbaretéva chupekuéra? Apóstol Pablo oipota vaʼekue umi ermáno ontende koʼã pruéva ijetuʼúva ikatuha ideprovécho chupekuéra. Upévare haʼe oexplika Ñandejára ikatuha oipuru umi situasión ñaneentrena hag̃ua. Peichagua entrenamiénto ikatu ñanepytyvõ jaguereko hag̃ua hetave kualida Jehovápe ogustáva. Umi kristiáno hebreo ohecha vaʼerã kuri mbaʼéichapa ideprovécho oaguanta umi pruéva, péicha ifasilvéta chupekuéra ogueropuʼaka umi mbaʼe ijetuʼúva (Heb. 12:11). Pablo omokyreʼỹ vaʼekue umi kristiáno hebréope taipyʼaguasu ha ani hag̃ua oñentrega ohasa jave umi pruéva ijetuʼúvare. Haʼe ikatu vaʼekue omeʼẽ peichagua konsého pórke ymave haʼe voi opersegi vaʼekue umi kristiánope, ha ohecha mbaʼeichaitépa ojetrata vai chupekuéra. Pablo oikuaa vaʼekue avei mbaʼéichapa ikatu ñaaguanta pe persekusión, pórke oiko rire chugui kristiáno ojepersegi mbarete vaʼekue chupe heta hendáicha (2 Cor. 11:​23-25). w24.09 12, 13 párr. 16, 17

Káda día ohasáva iñimportanteve ha tekotevẽvéntema japredika. ¿Mbaʼérepa? Pórke saʼipaitéma la tiémpo hembýva ñandéve. Ñañatendemína la Jesús heʼi vaʼekuére pe predikasiónre oñeʼẽvo umi ára paháre, upéva ikatu jatopa Marcos 13:​10-pe. Avei pe lívro de Matéope oñemombeʼu Jesús heʼi hague umi notísia porã oñemombeʼu vaʼerãha oparupiete ko yvy ape ári og̃uahẽ mboyve “pe fin” (Mat. 24:14). Oñeñeʼẽvo pe fin rehe heʼise hína Satanás múndo iñañaitéva opataha pára siémpre. Jehová ningo omoĩma ‘pe óra ha pe día’ oikotahápe entéro umi mbaʼe haʼe oprofetisáva (Mat. 24:36; Hech. 1:7). Ha káda día ohasáva ñañemoag̃uive hína upe féchare (Rom. 13:11). Péro ndoúi aja pe fin, jasegi vaʼerã japredika. Oĩ álgo tekotevẽtereíva enterove ñañeporandu: ¿Mbaʼérepa japredika ha ñamombeʼu umi notísia porã? Japorohayhúgui ningo jajapo upéva. Ñapensamíntena: Japredika jave jahechauka ñamombaʼetereiha umi notísia porã, jahayhuha umi héntepe ha iñimportanteveha jahayhuha Jehovápe ha héra porãite. w24.05 14 párr. 2, 3

Tuakuéra, pemokyreʼỹ pene famíliape ojepyʼamongeta hag̃ua pe naturalésare. Peho jave pekorre kokuére térã pembaʼapo jave pene hardínre, pehechauka pene famíliape umi mbaʼe oĩva pe naturalésape orekoha la idiséño térã fórma. Oĩ umi diséño ojojoguáva ha oĩva diferénte mbaʼépe pe naturalésape. Peipytyvõkena chupekuéra ontende hag̃ua oĩmante vaʼerãha peteĩ Apohare iñarandúva ojapo vaʼekue entéro mbaʼe. Por ehémplo, umi sientífiko hetáma ostudia pe diséño oĩva en fórma de espirál. Pe sientífiko Nicola Fameli heʼi ñakontáramo mboy espirálpa oreko peteĩ mbaʼe oĩva pe naturalésape, jatopataha peteĩ lísta de número. Upe lístape oñehenói susesión de Fibonacci. Koʼã diséño oĩva en fórma de espirál ojetopa heta mbaʼépe, por ehémplo pe galáxiape, umi karakól oĩvape márpe, umi plánta roguépe ha umi hirasólpe. w24.12 16 párr. 7

Ñane tiémpo idiferenteterei pe tiémpo oiko haguégui Moisés, David ha Juan. Péro lomímonte ikatu jaʼe jajoguaha chupekuéra heta mbaʼépe. Haʼekuéra oservi vaʼekue pe Dios verdadérope, ha ñande avei. Haʼekuéraicha ñande ñañemboʼe Jehovápe, jajerovia hese ha jajerure chupe tañandegia. Umi mbohapy kuimbaʼe ifiélva ojapo haguéicha, ñande ñaĩ segúro Jehová ovendesiha entéro umi iñeʼẽrendúvape chupe. Jasegíkena umi konsého omeʼẽ vaʼekue ipahaitépe umi kuimbaʼe ifiélva ha ñaneñeʼẽrendu Jehovápe. Upéicha katuete ñasẽ porãta entéro mbaʼe jajapóvape ha ‘ikatúta jaikove heta tiémpore’, upéva heʼise jaikotaha pára siémpre. Avei javyʼaitereíta jaikuaágui Jehová ñande Ru ñandeguerohoryha. Haʼe okumpli entéro umi ipromésa ha ikatu ojapo hetaitereive mbaʼe ñande ikatúvagui ñañeimahina (Efes. 3:20). w24.11 13 párr. 20, 21

Síglo primérope, unos kuánto ermánope oñenombra vaʼekue siérvo ministeriál (1 Tim. 3:8). Ikatu oime apóstol Pablo oñeʼẽ raʼe hesekuéra heʼívo oĩha “umi oipytyvõva ótrope”. Péicha jahecha umi siérvo ministeriál oñenkarga hague unos kuánto traváhore, ikatu hag̃uáicha umi ansiáno oporomboʼe ha oñangareko porã umi ovecha mimíre. Por ehémplo, yma umi siérvo ministeriál oipytyvõne raʼe ojekopia hag̃ua umi eskritúra, térã ikatu oime ojogua hikuái umi materiál oñekotevẽva upearã. Ñapensamína umi traváho iñimportántevare orekóva ikárgope umi siérvo ministeriál (1 Ped. 4:10). Ikatu oime oñeasigna chupekuéra ojapo hag̃ua pe kontavilida kongregasionpegua, oñatende hag̃ua umi territóriore, ojerure hag̃ua umi puvlikasión ermanokuérape g̃uarã, oñatende áudio ha vidéore, oservi de akomodadór ha oipytyvõ ojejapo hag̃ua mantenimiénto Salón del Rréinope. Entéro koʼã traváho iñimportánte pe kongregasión oho porã hag̃ua hese (1 Cor. 14:40). w24.10 19 párr. 4, 5

Ikatúta ñaaguanta oimeraẽ mbaʼe ijetuʼúva, tahaʼe michĩ térã tuicháva, ñanemanduʼa memérõ Jehová oikoveha ha siémpre oĩha ñanepytyvõ hag̃ua. Haʼe ningo pe Todopoderóso ha ikatu omeʼẽ ñandéve la fuérsa ñaaguanta hag̃ua. Jaikuaa rupi upéva ñandepyʼaguasuve ñaaguanta hag̃ua umi provléma oñepresentáva ñandéve. Jahecha jave Jehová ñanepytyvõha jahasa jave umi provléma michĩvéva, ñaĩve segúro haʼe ñanepytyvõtaha jahasa jave umi provléma tuichavéva. Rréi David ohasa vaʼekue mokõi mbaʼe ijetuʼúva oipytyvõ vaʼekue chupe ojeroviave hag̃ua Jehováre. Haʼe imitãrõ guare okuida vaʼekue itúa ovechakuérare. Peteĩ díape ou peteĩ león ogueraha peteĩ ovecha. Ótra vuéltape katu peteĩ óso ogueraha la ovecha. Péro David pyʼaguasúpe omuña vaʼekue umi animálpe ha osalva umi ovechápe. David ndeʼíri vaʼekue ojapo hague koʼã mbaʼe ijehegui reínte, pórke haʼe oikuaa porã vaʼekue Jehová oipytyvõ hague chupe (1 Sam. 17:​34-37). Ojepyʼamongeta rupi umi mbaʼe ohasa vaʼekuére haʼe oĩ vaʼekue segúro “Ñandejára oikovéva” omombarete jeytaha chupe amo gotyove. w24.06 21 párr. 5, 6

Eñeimahinamína reñeinvitaha peteĩ fiestarã, péro nde ndereikuaaporãi pe persóna oorganisávape ni mbaʼépa ojejapóta hína upe fiéstape. Rejasegura hag̃ua ikatu eporandu pe persónape: “¿Moõpa ha arakaʼépa ojejapóta pe fiésta? ¿Mboy persónapa oĩta upépe? ¿Mávapa hína la oñerresponsavilisáva pe fiéstare? ¿Máva mávapa hína la ohótava? ¿Mbaʼeichagua aktividápa oñeplanea umi invitádope g̃uarã? ¿Ojeservítapa vevída alkoólika?”. Reikuaa porã rire entéro koʼã mbaʼe ikatútama redesidi porã. Reikuaa porã rire entéro umi mbaʼe reikotevẽva, epensa porãkena pe situasiónre. Por ehémplo, ¿mbaʼépa oikóta reikuaáramo pe fiéstape ohotaha umi persóna ndoikóiva Jehová oipotaháicha? ¿Térã ojeservitaha vevída alkoólika avave okontrolaʼỹre? ¿Rehechakuaápa pe fiéstape sapyʼaitépe ikatuha oiko sarambi? (1 Ped. 4:3). Jahechaháicha, jareko rire enkuénta heta mbaʼe peteĩ situasiónpe, ifasilvéma jadesidi porã hag̃ua. w25.01 15 párr. 4, 5

Jesús sakrifísio rupive, Jehová ikatu operdona umi pekadór oñarrepentívape. Peteĩ máncha pytãitéva ijetuʼueterei jaipeʼa hag̃ua peteĩ ao morotĩgui. Péro ko ehémplo rupive, Jehová oaseguraite ñandéve ñanemopotĩeteha, ha upéicha ni umi máncha rapykuere ndopytái ñanderehe. Umi ñande pekadokuéra ojogua umi déudape (Mat. 18:​32-35). Upévare, káda ves ke japeka haʼete la ñane kuénta ojupi ha ojupíva, ha amo ipahápe la jadevéva Jehovápe hetaitereíntema. Péro Jehová ñaneperdona jave, haʼete okanseláva la ñane kuénta. Haʼe ñaneperdonáma guive, ndoikói ñanderrekeri. Ñapensamína mbaʼeichaitépa ovyʼa peteĩ persóna oñekanselávape chupe la ikuénta, péicha avei ñande javyʼaiterei Jehová ñaneperdona jave. w25.02 10 párr. 9, 10

Jaikuaa ningo umi tuakuéra amáske ijeda oikotevẽtaha ifamília oipytyvõ chupekuéra heta hendáicha. Ha oĩ voi la ovyʼaitereíva oipytyvõvo upéicha ituakuérape (1 Tim. 5:4). Péro umi túa ojeroviáva Jehováre oikuaa ovyʼaitereivetaha oipytyvõramo ifamíliape oservi hag̃ua Jehovápe. Haʼekuéra oikuaa la iñimportantevéva ndahaʼeiha omongakuaa ifamíliape orresivínte hag̃ua pláta ijeda rire (3 Juan 4). Ne ehémplo rupive emboʼe vaʼerã ne famíliape ojerovia hag̃ua Jehováre ha avei eprepara chupe oñemantene hag̃ua ijupe amo gotyove. Imitã aja emboʼékena chupe iñimportanteha ñambaʼapo jejopy (Prov. 29:21; Efes. 4:28). Okakuaávo ohóvo eipytyvõ chupe oñehaʼãmbaite hag̃ua eskuéla térã koléhiope. Primerorã tuakuéra oanalisa vaʼerã umi konsého oĩva la Bíbliape ha upéi oipytyvõ vaʼerã ifamíliape odesidi hag̃ua mbaʼépa la ostudiátava. Tuakuéra oprepara vaʼerã ifamíliape oñemantene hag̃ua ijupe, ikatu hag̃uáicha avei ifamília itiémpo opredikave hag̃ua térã ojapo hag̃ua iprekursorádo. w25.03 31 párr. 15, 16

Isaías kapítulo 65-pe, Jehová omombeʼúma vaʼekue mbaʼéichapa oikóta umi oĩva pe paraíso espirituálpe. Primerorã, umi mbaʼe heʼíva ko kapítulope oñekumpli vaʼekue áño 537-pe a.C. Upe tiémpope, Babilonia opoi vaʼekue umi judíogui ha opermiti chupekuéra oho jey Jerusalénpe. Jehová ovendesi vaʼekue koʼã judío oñarrepentívape. Haʼe oipytyvõ chupekuéra omoporã jey hag̃ua Jerusalén ha omopuʼã jey hag̃ua pe témplo, ikatu hag̃uáicha ojeadora jey Ñandejárape haʼe oipotaháicha (Is. 51:11; Zac. 8:3). Áño 1919 guive oñekumpli jey ko profesía. Upe áñope Jehová siervokuéra osẽ vaʼekue Babilonia Guasu poguýgui. Upe tiémpo guive, ñande paraíso espirituál oñepyrũ okakuaa ko múndo tuichakuére. ¿Mbaʼéichapa? Kyreʼỹme hetaiterei ermáno oñepyrũ opredika ha upéicha rupi oĩma avei heta kongregasión ápe ha pépe. Ha umi oñepyrũva oservi Jehovápe katu ndoikovéima hekovai ni iviolénto, upéva rangue omonde “peteĩ aóicha pe kondúkta pyahu, ojejapo vaʼekue Ñandejára oipotahaichaite”. w24.04 20, 21 párr. 3, 4

Oĩ umi país umi kariaʼy ha kuñataĩ oikuaámava voi ituakuéra térã ótro ipariénte oelehitaha chupe mávarepa omendáta. Ótro paíspe katu umi pariénte ha amigokuéra oheka la kandidáto térã la kandidáta, opresenta chupekuéra ha upéi haʼekuérama ohecha vaʼerã ojogueraha porãtapa. Oimérõ ojejerure ñandéve jajapo hag̃ua peteĩva koʼã mbaʼe, jarekókena enkuénta mbaʼépa oikotevẽ ha ogusta mokõivévape. Oimérõ epensa etopamaha ne pariénte térã ne amígo irũrã, eñehaʼãmbaitéke eikuaa porã mbaʼeichagua persónapa hína, mbaʼe kualidápa oreko ha iñimportanteveha oĩ porãpa hína Jehovándi. Eheka aja ne pariénte térã ne amígo rembiayhurã, aníkena nderesarái iñimportanteveha mbaʼéichapa oĩ Jehovándi ha ani reiko reheka umi ijestúdio porãva térã iplátavante. Amo ipahápe pe soltéro ha pe soltéra la odesidítava omendátapa ojuehe térãpa nahániri. w24.05 23 párr. 11

Ikatu jaapoja umi oĩvape de nóvio, ñañatendévo la jaʼétavare. Ha sapyʼánte tekotevẽta voi jajejokokuaa ha ndajaʼéi mbaʼevete (Prov. 12:18). Por ehémplo ikatu ñandetavyete voi ñamombeʼuse ótrope álgien oñemoĩ hague de nóvio, péro ikatu hína haʼekueraite voi omombeʼuse la notísia. Aníkena jaiko pérupi ñañeʼẽ rei hesekuéra ni jakritika umi mbaʼe odesidívare hikuái (Prov. 20:19; Rom. 14:10; 1 Tes. 4:11). Ani ñahenduka umi oĩvape de nóvio omendáma vaʼerãha hikuái ni ñaporandu chupekuéra: “¿Arakaʼépa jaʼúta la sópa?”. ¿Mbaʼéichapa ñarreaksiona vaʼerã opáramo la noviásgo? Aníkena jaiko jaikuaase mbaʼérepa ojedeha hikuái ni ñasẽ avave ládope (1 Ped. 4:15). Umi oĩva de nóvio ojuejáramo ndeʼiséi upe noviásgo opa vai hague. Upéva rangue heʼise pe noviásgo oipytyvõ hague chupekuéra odesidi hag̃ua la iporãvéva mokõivévape g̃uarã. Péro upéva ndeʼiséi hína ndahasymoʼãiha chupekuéra la oikóva. Péicha jave jahecha vaʼerã mbaʼéichapa ikatu jaapoja chupekuéra. w24.05 31 párr. 15, 16

Peteĩ ñane hénte térã ñane amigoite ohejáramo Jehovápe, ikatu hasyeterei ñandéve. Péva ningo peteĩ pruéva ijetuʼuetereíva ikatúva jahasa (Sal. 78:40). Jahayhuetereíramo upe persónape, ijetuʼuetereíta ñandéve ñaaguanta hag̃ua upe situasión. Oimérõ nde rehasa hína peichagua provlémare, katuete nemombaretéta Sadoc ehémplo. Haʼe osegi vaʼekue ifiél, iñamigoite Abiatar ohejáramo jepe Jehovápe. Upéva oiko vaʼekue David ijedaitereírõ guare ha omano mbotápema. Upémarõ itaʼýra Adonías opytase vaʼekue rréiramo, péro Jehová oipota kuri Salomóngui oiko pe sigiénte rréi (1 Crón. 22:​9, 10). Abiatar katu oapoja Adoníaspe (1 Rey. 1:​5-8). Ojapóvo upéicha, Abiatar otraisiona Davídpe ha Sadócpe, péro ndahaʼéi chupekuérante, síno Jehovápe avei. Sadoc ningo hetaiterei áñore ombaʼapo vaʼekue Abiatar ndive de saserdóte (2 Sam. 8:17; 15:29; 19:​11-14). w24.07 6 párr. 14, 15

¿Jahupytýta piko álgo iporãva jasegíramo ñañatende pono jajapo ivaíva? Kláro ke si. Jajapóramo umi mbaʼe vai ñandestiráva, javyʼáta sapyʼamínte, péro jajapóramo umi mbaʼe Jehovápe ogustáva, siémpre javyʼaitereivéta (Heb. 11:25; Sal. 19:8). Ñandejára ñandeapo vaʼekue voi jajapo hag̃ua ivolunta (Gén. 1:27). Jajapóramo la ombovyʼáva Jehovápe, ñane konsiénsia ipotĩta ha jarekóta la oportunida jaikóvo pára siémpre (1 Tim. 6:12; 2 Tim. 1:3; Jud. 20, 21). Ñande rete ningo ikangy (Mat. 26:41). Péro upéva ndeʼiséi ndaikatumoʼãiha ñandepuʼaka ñande devilidáre ha jajapotaha katuete ivaíva. Jehová ningo oĩ ñande ykére ñanepytyvõ hag̃ua (2 Cor. 4:7). Ñande jarresivíta “pe podér umi ótra hénte ndorekóiva”. Ko podér ou Ñandejáragui. Péro upéva ndeʼiséi ñande ndajajapomoʼãveimaha mbaʼeve, síno jasegi vaʼerã ñamoĩ ñande párte ha káda día jalucha pono jajapo umi mbaʼe vai. Ikatu ñaĩ segúro Jehová ohendutaha ñane ñemboʼe ha omeʼẽtaha ñandéve pe podér ñaikotevẽva ijetuʼueterei jave peteĩ tentasión (1 Cor. 10:13). Upéicharõ, aníke jaduda Jehová ñanepytyvõ rupi jasegitaha ñañatende porã ani hag̃ua jajapo mbaʼeve ivaíva. w24.07 19 párr. 19-21

Apóstol Pablo heʼi vaʼekue Timotéope, haʼéva avei ansiáno, ‘okorrehi hag̃ua pe kongregasión renondépe umi opeka memévape’. Upe téxtope oĩ peteĩ nóta oexplikáva pe palávra “kongregasión” koʼápe heʼiseha ‘umi oĩva kongregasiónpe ha ohecháva upe pekádo’. Upéicharõ Pablo noñeʼẽi vaʼekue pe kongregasión kompletoitére voi, síno haʼe oñeʼẽ umi ohecha vaʼekuére pe pekadór ojapo vaʼekue, térã umi oikuaáva la oikóva pórke pe opekáva voi omombeʼu chupekuéra. Péicha jave umi ansiáno oñeʼẽ sólamente umi oikuaávandi la oiko vaʼekue. Ha oavisa chupekuéra oñeñatendéma hague la kásore ha ojekorrehíma hague pe opeka vaʼekuépe. Sapyʼánte hetáma oĩ oikuaáva kongregasiónpe peteĩ ermáno opeka hague, térã upéi ojekuaátante voi hína. Péicha jave pe kongregasión kompletoite ohecha upe pekádo. Upévare umi ansiáno ojapóta peteĩ anúnsio kongregasiónpe, ha heʼíta pe ermáno térã pe ermánape oñesensura hague. ¿Mbaʼérepa? Apóstol Pablo heʼi vaʼekue: “Péicha umi ótro okyhyjéta avei opeka hag̃ua”. w24.08 23, 24 párr. 16, 17

Jasegi vaʼerã ñambaʼapo jejopy Jehová servísiope og̃uahẽ meve pe fin. Umi unhído tekotevẽ osegi oñatende porã ikatu hag̃uáicha ‘Ñandejára oasepta’ chupekuéra ha orresivi iprémio Jesucristo ndive yvágape (Mat. 24:40). Haʼekuéra oipotaitereíma oñembyatypa chupekuéra yvágape Jesús ndive. Pe Armagedón rire umi unhído oñepresentáta peteĩ nóviaicha Jesúspe g̃uarã “pe Ovecha Raʼy kasamientorã” (2 Tes. 2:1). Pe tiémpo Jesús oporohusga hag̃ua hiʼag̃uimbaitéma ohóvo, péro natekotevẽi jakyhyje. Jasegíramo ñandefiél, ñande Ru yvagapegua omeʼẽta ñandéve “pe podér umi ótra hénte ndorekóiva” ikatu hag̃uáicha ñaime “pe Yvypóra Raʼy renondépe” (2 Cor. 4:7; Luc. 21:36). Tahaʼe jarekóramo esperánsa jaikóvo yvágape térã ko yvy ape ári tuicha ñambovyʼáta Jehovápe ñañatendérõ la Jesús ñanemboʼe vaʼekuére umi ehémplo rupive. Jehová imbaʼeporãiterei rupi, ñande réra oĩta ‘pe lívro de la vídape’ (Dan. 12:1; Apoc. 3:5). w24.09 24, 25 párr. 19, 20

Ñandejára Ñeʼẽ ikatu tuicha nembopyʼaguapy. Epensamíntena umi mbaʼe porã rehupytývare, umíva apytépe umi tesóro rembyatýmava yvágape, ha epensa la ohaʼarõvare umi hénte ko mundopeguápe. Haʼekuéra ningo oreko umi mbaʼe ko múndopente ikatúva jahupyty. Upévare oñehaʼã hikuái oiko porã koʼág̃a pórke ndorekói voi esperánsa amo gotyove g̃uarã. Péro ndéve g̃uarã Jehová orekóma heta mbaʼe, umi mbaʼe ndaikatúiva ni eñeimahina jepe (Sal. 145:16). Ha ekalkulamíntena avei: ¿Ikatu piko legálmente reikuaa mbaʼéicha vaʼerãmoʼã nde rekove redesidírire ótra kósa? Péro oĩ peteĩ mbaʼe si ikatúva reaseguraite: Umi odesidíva entéro mbaʼe ohayhu rupi Ñandejárape ha hapichápe, ndojavymoʼãi mbaʼeve iporãva. w24.10 27 párr. 12, 13