Abril

Tekotevẽ jajerovia Jesús sakrifísiore jaikove hag̃ua pára siémpre (Efes. 1:7). Jesús heʼi vaʼekue orekoha “ótro ovechakuéra”. Umíva ndoʼúi pe pan ni pe víno ojegueromanduʼa jave káda áño pe Séna del Señór (Juan 10:16). Péro lomímonte tuicha ovenefisia chupekuéra Jesús rete ha huguy. Upearã ohechauka vaʼerã hikuái ojeroviaha Jesús sakrifísiore (Juan 6:53). Péro umi hoʼúva pe pan ha pe víno ohechauka oĩha pe kompromíso pyahúpe ha ogovernataha hikuái Ñandejára Rréinope. Péicha jahecha iñimportanteha umi unhídope g̃uarã ha avei umi ‘ótro ovechakuérape’ ojerovia ikatu hag̃uáicha oikove pára siémpre. w24.12 12, 13 párr. 14, 16

Pe Séna del Señórpe Jesús ombohasa vaʼekue pan ilevaduraʼỹva ijapostolkuérape, ha heʼi chupekuéra upéva orrepresentaha hete. Upéi ombohasa chupekuéra víno peteĩ kópape ha heʼi chupekuéra upéva orrepresentaha huguy, ha ‘huguy rupive ojejapoha peteĩ kompromíso’ (Mar. 14:​22-25; Luc. 22:20; 1 Cor. 11:24). Ko kompromíso pyahu ojapo Jehová pe “Israel rogaygua ndive” añoite. Umíva hína umi ogovernátava Jesús ndive “Ñandejára Rréinope” (Heb. 8:​6, 10; 9:15). Pe Séna del Señórpe Jesús oñeʼẽ vaʼekue umi ‘ovecha mbovymívapente’. Ko grúpo michĩvape oike raẽ Jesús apostolkuéra ifiélva. Haʼekuéra oĩ vaʼekue Jesús ndive pe pyhare haʼe omoñepyrũrõ guare pe Séna del Señór. Umi oĩva ko grúpo michĩvape orekóta hendag̃ua Jesús ndive yvágape. w24.12 11 párr. 9, 10

Jesúspe otraisiona vaʼekue peteĩva iñamígo, upéi umi ndochaʼéiva hese ojagarra chupe, omaltrata ha oakusa reiete chupe ojapo hague heta mbaʼe vai. Haʼekuéra okondena Jesúspe omano hag̃ua ha heta otortura chupe. Upéi umi soldádo oraha Jesúspe pe omanotahápe ha oklava chupe peteĩ yvyráre omano hag̃ua. Jesús heta ohasa asy ha osufri, péro Jehová ohasa asyvéntema kuri ohechávo umi mbaʼe vaiete ojejapóva Itaʼýrare. Ñande jaikuaa Jehová ohayhuetereiha Jesúspe ha orekoha kuri pe podér osalva hag̃ua Itaʼýrape. ¿Mbaʼére piko upéicharõ ojejoko ha ndosalvái chupe? Jesús sakrifísio ohechauka mbaʼeichaitépa Jehová nderayhu, haʼe heta ohasa asy ikatu hag̃uáicha nde rejei pe pekádo ha ñemano poguýgui. Jehová ojapo la oñekotevẽva guive ikatu hag̃uáicha nde rejesalva (1 Juan 4:​9, 10). Jehová ñanepytyvõse káda únope jagerrea hag̃ua pe pekádo kóntrape, ha amo ipahápe ñagana hag̃ua. w24.08 6 párr. 13, 14

Ikatu jahecha Jehová ñanderayhuetereiha ñantende porãvo mbaʼeichaitépa oiméne ombyasy ohechárõ guare Itaʼýra osufriha. Satanás heʼi vaʼekue ni peteĩ Ñandejára siérvo ndosegimoʼãiha ifiél ijetuʼúramo hendive. Upévare Jehová oheja vaʼekue Itaʼýra osufri ha omano ohechauka hag̃ua Satanás ijapuha (Job 2:​1-5). Jehová ohecha vaʼekue umi líder rrelihióso oñembohoryha Jesúsre, umi soldádo ombyepotiha chupe ha upéi ojeklavaha chupe peteĩ yvyráre. Upéi ohecha mbaʼeichaitépa Itaʼyrami osufri omano meve (Mat. 27:​28-31, 39). Jehová ikatu kuri osalva Jesúspe (Mat. 27:​42, 43). Péro Jehová osalvárire chupe, ndojepagamoʼãi kuri pe rreskáte ha ñande japytáta esperansaʼỹre. Upévare Jehová opermiti Itaʼýra osufri ha omano. w25.01 22 párr. 7

Jesús disipulokuéra oñembyasyeterei ha okyhyje. Pe 16 de Nisán áño 33-pe, mokõi idisípulo oho hína Emaúspe. Umi mokõi disípulo oguata aja ohóvo, ohupyty chupekuéra peteĩ kuimbaʼe ha oguata avei ohóvo hendivekuéra. Péro haʼekuéra ndoikuaái chupe. Umi disípulo omombeʼu pe kuimbaʼépe umi mbaʼe vai oiko vaʼekue Jesús rehe. Upéi pe kuimbaʼe oñepyrũ heʼi chupekuéra heta mbaʼe opytátava ikorasõmekuéra pára siémpre. Haʼe oipuru ‘Moisés ha umi Proféta oskrivi vaʼekue’ oexplika hag̃ua umi disípulope mbaʼérepa pe Mesías osufri ha omano vaʼerã. Upéi og̃uahẽma hikuái Emaúspe ha upépe ae umi mokõi disípulo opilla sapyʼa pe kuimbaʼe haʼeha Jesús (Luc. 24:​13-35). Jesús orresusita rire, ohasa vaʼekue 40 día aja ko yvy ape ári oho mboyve yvágape. Upe aja haʼe ojechauka idisipulokuérape heta vése. Jesús oaprovecha omokyreʼỹ hag̃ua idisipulokuérape pórke haʼekuéra opyta vaʼekue oñembyasy ha okyhyje. Péro upéi ovyʼa ha ipyʼaguasúma hikuái opredika ha omboʼe hag̃ua umi notísia porã oñeʼẽva Ñandejára Rréinore. w24.10 12 párr. 1-3

Umi mitã okakuaa ohóvo ohasa haguérente la tiémpo, péro jakakuaa hag̃ua Ñandejára servísiope ñañehaʼãmante vaʼerã ñandejehe. Por ehémplo umi ermáno ha ermána Corintogua ojerovia vaʼekue umi notísia porãre, ojevautisa, orresivi espíritu sánto ha oaprende heta mbaʼe apóstol Páblogui (Hech. 18:​8-11). Péro ohasáramo jepe heta áño, haʼekuéra osegi vaʼekue opensa mitãicha Ñandejára servísiope (1 Cor. 3:2). Oiko hag̃ua ñandehegui kristiáno okakuaapámava, primeroite voi jaipota vaʼerã oiko ñandehegui peichagua kristiáno. Umi ‘ndorekóiva experiénsia ha nokambiaséiva’ voi, ndaikatumoʼãi oprogresa ha opytáta péicha (Prov. 1:22). Oĩ umi persóna okakuaapámava, péro ndojagarraséiva rresponsavilida ha oipota ituakuérante odesidi ivése. Ñande ndajajoguaséi peichagua persónape, síno jasegise ñañehaʼã ñandejehe ñamombarete hag̃ua ñane amista Jehovándi. Oimérõ epensa ofaltaha gueteri ndéve emombareteve nde jerovia, ejerurékena Jehovápe tomeʼẽ ndéve ‘pe deséo ha pe podér rejapo hag̃ua entéro mbaʼe chupe ogustáva’ (Filip. 2:13). w24.04 4 párr. 9, 10

Jehová omombeʼu ñandéve mbaʼéichapa haʼe oñeñandu oporohusga jave (Ezeq. 33:11). Jaikuaa Jehová ndojagarramoʼãiha ohundi reíntema peteĩ persónape pára siémpre. Haʼe ningo oiporiahuverekoiterei la héntepe ha ohechaukáta upeichaha ikatúma guive. La Biblia si heʼi ñandéve oĩha unos kuánto ndorresusitamoʼãiva. Por ehémplo Jesús ontendeka vaʼekue Judas Iscariote ndorresusitamoʼãiha (Mar. 14:21; Juan 17:12). Judas oikuaa porã vaʼekue la ojapóva rupive oñemoĩtaha direktoite Jehováre ha Itaʼýrare, péro lomímonte ojapo (Mar. 3:29). Péicha avei, Jesús heʼi vaʼekue oĩha unos kuánto líder rrelihióso oñemoĩ vaʼekue hese ndorresusitamoʼãiva (Mat. 23:33; Juan 19:11). Ha apóstol Pablo oavisa vaʼekue umi apóstata noñarrepentíriva ndorresusitamoʼãiha (Heb. 6:​4-8; 10:29). w24.05 4 párr. 10, 11

Japytáramo Jehová ykére, Satanás ndaikatumoʼãi ojapo mbaʼeve ñandeperhudikátava pára siémpre (1 Juan 3:8). Pe múndo pyahúpe Jehová osegíta okuida iñamigokuérare, osegi hag̃ua oiko iñamígoramo ha ani hag̃ua omano (Apoc. 21:4). Jaʼéma haguéicha Jehová ñaneinvita hógape pórke ñanderekose iñamígoramo (Ezeq. 37:27). Upéva ningo peteĩ invitasión ndaijojaháiva. ¿Péro mbaʼépa jajapo vaʼerã jasegi hag̃ua japyta Jehová rógape? Epensamíntena, peteĩ persóna neinvitáramo hógape, katuete reikuaaséta mbaʼépa ogusta térã ndogustái chupe. Upéicha avei, iñimportánte jaikuaa mbaʼéichapa Jehová oipota ñañekomporta. Jahayhúramo Jehovápe jajaposéta opa ikatúva haʼe ‘ñandeguerohory hag̃ua entéro mbaʼépe’ (Col. 1:10). Siémpre jarrespetáta chupe ñande pyʼaite guive. Avei ndajajaposemoʼãi mbaʼeve omoñeñandu vaítava chupe. Upéva rangue siémpre ‘ñaneumíldeta jaguatávo Ñandejára ndive’ (Miq. 6:8). w24.06 4 párr. 8, 9

Peteĩ vuéltape Jehová ojerure Abrahánpe omeʼẽ hag̃ua itaʼýra Isaácpe sakrifísioramo. Ndaikatúi ningo ni ñañeimahina mbaʼeichaitépa oiméne hasy asy upéva Abrahánpe, upéicharõ jepe haʼe odesidi vaʼekue iñeʼẽrendutaha Ñandejárape. Upéi Abrahán ojuka potaitéma kuri itaʼýrape péro Jehová upepete ojoko chupe. Upe oiko vaʼekue ñanemboʼe álgo iñimportánteva, pórke ohechauka la Jehová ojapo vaʼekue. Haʼe omeʼẽ Itaʼýra ohayhuetévape sakrifísioramo ohayhuetereígui la héntepe (Gén. 22:​1-18). Hetaiterei tiémpo upe rire, Moisés léipe oñemanda vaʼekue umi israelítape osakrifika hag̃ua animál ikatu hag̃uáicha oñeperdona ipekadokuéra (Lev. 4:​27-29; 17:11). Umi sakrifísio ohechauka kuri Jehová upe rire ojapotaha peteĩ sakrifísio iporãitevéntemava, pórke upe sakrifísio rupive umi hénte ojeietéta pe pekádo poguýgui. Ñandejára ojevale vaʼekue iprofetakuérare oexplika hag̃ua pe kuña familiare, haʼétava hína Ñandejára Raʼy osufri ha omano vaʼerãha. Aníkena nderesarái avei haʼe ojapo hague upéva nderehehápe (Is. 53:​1-12). w24.08 4 párr. 7, 8

Releévo umi versíkulo oĩva la Bíbliape iñimportánte avei repensa mbaʼéichapa ikatu rejapo la releéva. Por ehémplo, eñeporandumína: “¿Mbaʼéichapa ko aleéva ideprovéchota chéve koʼág̃a térã amo gotyomie?”. Ñamoĩ chupe nde lektúra bíblicape releeha 1 Tesalonicenses 5:​17, 18. Upe rire ikatu epytaʼimi ha eñeporandu: “¿Mboy vésepa añemboʼe jepi? ¿Añeʼẽpa Jehovápe che pyʼaite guive? ¿Oĩpa álgo aagradesesévare chupe?”. Upéi ikatu ou ne akãme mbohapy mbaʼe eagradese hag̃ua chupe. Péicha unos kuánto minútopente epensáma la releévare. Ha upéva nepytyvõta rentende porãve hag̃ua Ñandejára Ñeʼẽ ha ejapo hag̃ua pe reaprendéva. Upéi káda día reñehaʼãramo rejapo la releéva la Bíbliape, kon el tiémpo reservi porãvétantema Jehovápe. w24.09 4, 5 párr. 9, 10

Jehová ñandeapo vaʼekue javyʼave hag̃ua ñameʼẽvo, ñandéve oñemeʼẽ rangue. Ñañeñandu porã ningo ikatu jave ñaipytyvõ ñane ermanokuérape, ha ñanembopyʼarory haʼekuéra ohechauka jave oagradeseha la jajapo vaʼekue. Péro oĩramo jepe ndohechaukáiva ijagradesidoha, lomímonte jasegi javyʼa jaikuaágui jajapo hague la oĩ porãva. Siémprekena ñanemanduʼa ‘Jehová ikatuha omeʼẽve ñandéve hetaitereive’ pe ñande ñameʼẽ vaʼekuégui ótrope (2 Crón. 25:9). Ndaipóri ótro imbaʼeporãvéva ha ipojeravéva Jehovágui. Ha javyʼaiterei haʼe omyengovia jave ñandéve la jajapo vaʼekuére. Upévare jasegíkena pe ehémplo omoĩva ñandéve ñande Ru yvagapegua imbaʼeporãitéva. w24.09 31 párr. 20, 21

Jehová ñandeporiahuvereko ha ñanembyasy (Sal. 103:13; Is. 49:15). Jehová ontende porãiterei la ñañandúva, por ehémplo ñañembyasy jave haʼe oñembyasy avei (Zac. 2:8). Haʼe ningo ombohapepa voi ñandéve ñañemoag̃ui hag̃ua hese jaiko hag̃ua iñamígoramo (Sal. 25:14; Hech. 17:27). Jehová “iñumílde rupi, ojayvy omaña hag̃ua yvágare ha ko yvy ape ári. Haʼe omopuʼã umi iñumíldevape pe yvýgui” (Sal. 113:​6, 7). Ñapensávo entéro koʼã mbaʼére, ¿mbaʼéicha voi piko nañamombaʼeguasusemoʼãi Ñandejára ndaijojaháivape? Ñamombaʼeguasu Jehovápe jaipotaitereígui umi hénte oikuaa porã chupe. Oĩ hetaiterei persóna ndoikuaaporãiva Jehovápe pórke Satanás omohesatũ la héntepe heʼívo hetaiterei japu Jehováre (2 Cor. 4:4). Satanás káusare la hénte oimoʼã Jehová haʼeha peteĩ Dios iñañáva, noimportaiha chupe avave ha ikáusare jasufriha. Péro ñande jaikuaa porãiterei Jehovápe, ha jareko oportunida ñaipytyvõ hag̃ua la héntepe oikuaa hag̃ua mbaʼeichagua Dióspa hína haʼe. Upéicha haʼekuéra avei ikatúta omombaʼeguasu Jehovápe (Is. 43:10). w25.01 3 párr. 6, 7

Jesús ningo Ñandejára Raʼy perfékto, ha ojapo vaʼekue heta milágro ko yvy ape ári. Upéicharõ jepe, Satanás ojevale unas kuánta persónare omosarambi hag̃ua heta japu ikóntrape. Por ehémplo umi líder rrelihióso heʼi la héntepe Jesús omosẽha umi demóniope, pórke omeʼẽ chupe podér “umi demónio ruvicha” (Mar. 3:22). Upéi Jesúspe ojehusgárõ guare, umi líder rrelihióso heʼi hese oñeʼẽ vai hague Ñandejárare, ha omboliga umi héntepe ojerure hag̃ua tojejuka chupe (Mat. 27:20). Tiémpo rire, Cristo segidorkuéra opredika umi notísia porã, ha umi oñemoĩva ikontrapekuéra ‘omboliga umi héntepe ndaijaʼéi’ ha opersegi hag̃ua koʼã kristianokuérape (Hech. 14:​2, 19). Rrevísta La Atalaya del 1 de diciembre de 1998 oñeʼẽ Hechos 14:2 rehe, ha heʼi: “Umi judío oñemoĩ vaʼekue umi kristianokuéra kóntrape, ndahaʼéi vaʼekue orrechasánteva umi notísia porã, síno oñepyrũ voi omosarambi heta japu ikatu hag̃uáicha umi hénte ótro paisgua oñemoĩ avei umi kristianokuéra kóntrape”. Satanás koʼág̃a peve “ombotavy ko múndo kompletoitépe”. w24.04 11 párr. 15, 16

Peteĩ persóna oreko hag̃ua la oportunida oikovévo pára siémpre, nodependéi mbaʼe tiémpopepa omano. Ani avei ñanderesarái Jehová haʼeha pe Hués ijojahaʼỹva, haʼe ningo ihústo ha núnka ndodesidimoʼãi peteĩ mbaʼe noĩporãiva (Sal. 33:​4, 5). Ikatu jajerovia “pe Hués ohusgáva ko yvy kompletoite” katuete ojapotaha iporãva. Ikatu avei jaʼe peteĩ persóna oreko hag̃ua la oportunida oikove hag̃ua pára siémpre nodependeiha moõpa haʼe oiko. Jehová ningo núnka ndeʼimoʼãi hetaiterei héntere ojoguaha ‘kavarápe’ oiko haguérente peteĩ lugár ndaikatuihápe ojepredika chupekuéra (Mat. 25:46). Ñande jepe ñambyasýramo koʼã héntepe, koʼytevéntema pe Hués ijojahaʼỹva ojapóta upéva. Ndajaikuaái ningo entéro mbaʼe Jehová ojapótava pe jehasa asy guasu aja, ¿péro mbaʼépa ikatu oiko ág̃a Jehová oñesantifika vove enterove renondépe? Ikatu hína oĩ umi hénte apytégui orekóva la oportunida oikuaávo Jehovápe ha ojerovia hese (Ezeq. 38:16). w24.05 12 párr. 14, 15

Ñande Jehová siervokuéra javyʼaiterei ikatu jave ñañopytyvõmba (2 Cor. 8:4). Péro sapyʼánte tekotevẽmante ñandepyʼaguasu upearã. Por ehémplo, peteĩ lugárpe oñepyrũramo oĩ gérra, umi ansiáno oikuaa omokyreʼỹ ha oipytyvõ vaʼerãha umi ermánope okonsegi hag̃ua la hemikotevẽ ha umi puvlikasión bíblica. Umi ansiáno ohayhueterei umi ermána ha ermanokuérape, upévare ipeligrósoramo jepe, haʼekuéra omeʼẽ ermanokuérape la oikotevẽva. Oiko jave álgo ipeligrósova, tekotevẽterei ñaneñeʼẽrendu jasegi hag̃ua unído. Upévare, jajapókena umi mbaʼe heʼíva ñandéve pe sukursál ñande paispegua (Heb. 13:17). Umi ansiáno pyʼỹi olee jey vaʼerã umi instruksión heʼíva mbaʼéichapa jajeprepara vaʼerã oikóramo g̃uarã peteĩ desástre ha mbaʼépa jajapo vaʼerã oiko aja (1 Cor. 14:​33, 40). Ñandepyʼaguasúkena péro ñañatende porã (Prov. 22:3). Tekotevẽ ñapensa porã jajapo mboyve álgo ha ndovaléi avei jajapeligra rei. Ñakonfiákena Jehováre, haʼe ñandeapojáta ñaipytyvõ hag̃ua umi ermánope ojehuʼỹre ñandéve mbaʼeve. w24.07 4 párr. 8; 5 párr. 11

Rréi David oikuaa porã vaʼekue Jehovápe ha okonfia hese. Rréi Saúl ha hetave hénte opersegírõ guare Davídpe, haʼe oñemboʼe vaʼekue Jehovápe ojerure hag̃ua chupe ajúda. Ñandejára okontesta vaʼekue Davídpe ha osalva chupe. Upérõ David heʼi vaʼekue: “Jehová ningo peteĩ Dios oikovéva” (Sal. 18:46). David heʼírõ guare upéva, ndeʼiséi vaʼekue Ñandejára oexistinteha. Peteĩ lívro oexplika, David heʼírõ guare upéva, ohechauka hague mbaʼeichaite pevépa ojerovia Jehováre, haʼe ndodudái vaʼekue Ñandejára oikoveha ha siémpre oĩha oipytyvõ hag̃uáicha isiervokuérape. Jahechaháicha, David oikuaa vaʼekue Jehová haʼeha peteĩ Dios oikovéva ha upéva oipytyvõ vaʼekue chupe ojedesidiete hag̃ua osegitaha oservi ha omombaʼeguasu Jehovápe (Sal. 18:​28, 29, 49). Ñaiméramo segúro Jehová haʼeha “Ñandejára oikovéva” jasegíta jaservi chupe kyreʼỹme, ñanembaretéta ñaaguanta hag̃ua tou la oúva ha jasegiséta ñambaʼapo Ñandejára servísiope. Avei ñanepytyvõta jajedesidiete hag̃ua jasegitaha ñañemoag̃ui Jehováre. w24.06 20, 21 párr. 3, 4

¿Mbaʼépa ikatu ñaaprende la apóstol Pablo heʼi vaʼekuégui umi kristiáno Tesalonicaguápe? Ikatu sapyʼánte ñahendu álgo okontradesíva la ñaaprende vaʼekue la Bíbliape, térã oñemombeʼu peteĩ istória osorprendetereíva enterovépente. Péicha jave tekotevẽterei ñanearandu ha ñapensa porã. Por ehémplo, oĩrõ guare pe Unión Soviética, umi oñemoĩva Jehová puévlo kóntrape omog̃uahẽ umi ermánope peteĩ kárta oúva guaʼu pe sentrál mundiálgui. Upe kártape oñemokyreʼỹ umi ermánope omoñepyrũ hag̃ua peteĩ organisasión apartete. Haʼetévaicha voi la siértova upe kárta heʼíva, péro nombotavýi hikuái umi ermáno ijerovia mbaretévape. Umi ermáno ohechakuaa upe kárta heʼíva okontradesiha la omboʼéva la Biblia. Koʼág̃arupi avei umi oñemoĩva pe añetegua kóntrape, sapyʼánte ikatu oipuru Internet térã umi rred sosiál ñanekonfundi ha ñandedividi hag̃ua. Ani hag̃ua pyaʼete ‘oñekambia ñandehegui ñapensa lája’, tekotevẽ ñaanalisa porã la ñahendúva térã la jaleéva. Upearã jajasegura vaʼerã nokontradesíripa hína umi enseñánsa porãite Jehová ñanemboʼe vaʼekue (2 Tes. 2:2; 1 Juan 4:1). w24.07 12 párr. 14, 15

¿Mbaʼépa hína pe iñimportantevéva ikatúva jadesidi? Upéva hína ñañemeʼẽtapa Jehovápe ha ñaĩtapa ifamília apytépe jaadora hag̃ua chupe. Jehová oipota enterovéva jajapo upéva. ¿Mbaʼérepa? Pórke haʼe oipota oiko ñandehegui iñamígo ha jaikove pára siémpre (Deut. 30:​19, 20; Gál. 6:​7, 8). Jehová oheja káda persóna odesidi oservítapa chupe, haʼe ni mbaʼevéicharõ nañandeovligamoʼãi jadesidi hag̃ua upéva. ¿Péro mbaʼépa oiko peteĩ kristiáno vautisádo oúramo naiñeʼẽrendúi Ñandejárape ha opeka vai? Noñarrepentíriramo oñenohẽmante vaʼerã chupe kongregasióngui (1 Cor. 5:13). Péro pe persónape oñenohẽramo jepe kongregasióngui, Jehová ipyʼaite guive oipota haʼe oñarrepenti oiko jey hag̃ua chugui iñamígo. Upévare voi Jehová omeʼẽ Itaʼýrape sakrifísioramo, ikatu hag̃uáicha operdona umi pekadór oñarrepentívape. Ñandejára ñanderayhueterei, upévare oipytyvõseterei umi opeka vaʼekuépe oñarrepenti hag̃ua (Zac. 1:3; Rom. 2:4; Sant. 4:8). w24.08 14 párr. 1, 2

Juan oskrivírõ guare itercéra kárta oĩ vaʼekue umi omboʼéva enseñánsa japu ha upevakuére oñepyrũma oĩ provléma kongregasiónpe. Péro oĩ vaʼekue avei umi “osegíva pe añetegua rapére”. Haʼekuéra iñeʼẽrendu ha oiko “Ñandejára mandamientokuéra heʼiháicha” (2 Juan 4, 6). Koʼã kristiáno ifiélva ndahaʼéi Juánpe añónte la ombovyʼáva, síno ombovyʼaiterei avei Jehovápe (Prov. 27:11). ¿Mbaʼépa ñaaprende? Jasegíramo ñandefiél Jehovápe, ñande voi javyʼáta ha ñambovyʼáta ótrope (1 Juan 5:3). Por ehémplo javyʼaiterei jaikuaávo ñambopyʼaroryha Jehovápe, haʼe ovyʼaiterei ñamboyke jave umi mbaʼe ivaíva oĩva ko múndope, ha ñaneñeʼẽrendu jave imandamientokuérape. Umi ánhel ovyʼa avei péicha jave (Luc. 15:10). Ñande avei javyʼaiterei jahechávo ñane ermáno ha ermanakuéra osegiha ifiél (2 Tes. 1:4). Ha mbaʼeichaitépa javyʼáta oñehundi rire ko múndo aña, ha jahechakuaáta jasegi hague ñandefiél Jehovápe Satanás ogovernáramo jepe ko múndope. w24.11 12 párr. 17, 18

¿Mboy tiémporepa restudiaʼi vaʼerã pe persónape ere mboyve chupe la reñandúva? Pyaʼeterei reñeʼẽrõ hendive ikatu oñepensa nderehe ndepyʼa apuradoha (Prov. 29:20). Péro ikatu hína pe persóna opilláma eñeinteresaha hese, ha nde eheja ohasaiterei la tiémpo eñeʼẽ hag̃ua. Upéicharõ ikatu oñepensa nandedesididoiha (Ecl. 11:4). Nemanduʼákena reñeʼẽta haguére peteĩ persónandi, ndeʼiseiha remendataha katuete hese. Péro reĩ vaʼerã segúro nde reimemaha remenda hag̃uáicha ha upe persóna ikatuha nemoirũ porã. ¿Ha oimérõ álgien oñeinteresa hína nderehe? ¿Mbaʼépa ikatu rejapo? Nde nereñandúirõ hese mbaʼeve, entendeka porãkena chupe upéva la rejapóva rupive. Ivaietereíta ningo eikóramo embojuruheʼẽ nde rapichápe oimérõ nde nereñepyrũséi hendive mbaʼeve (Efes. 4:25). w24.05 22, 23 párr. 9, 10

Ñandejára sólamente oaseptáta umi kristiáno unhído añetehápe ojeporavo vaʼekuépe ha ifiélvape. Haʼekuéra añoite ikatúta omoirũ Jesúspe pe Rréino yvagapeguápe. Oimeraẽ kristiáno unhído ndosegíriva oñatende porã, ndaikatumoʼãi oĩ umi ojeporavo vaʼekue apytépe oñembyaty vove chupekuéra (Mat. 24:31). Avei umi oikótava ko yvy ape ári pára siémpre, oreko vaʼerã enkuénta la Jesús heʼi vaʼekue ikatu hag̃uáicha oñatende porã ha osegi ifiél. Jaikuaa porãgui Jehovápe ñaĩ segúro entéro mbaʼe haʼe ojapóva oĩ porãha. Upévare ndajaikomoʼãi jajepyʼapy oimérõ Jehová odesidi oiporavo umi unhído pyahúpe ko ñane tiémpope. Ikatu ñanemanduʼa pe ehémplo Jesús oipuru vaʼekuére oñeʼẽva umi oñepyrũvare ombaʼapo la 5 rupi pe parraltýpe (Mat. 20:​1-16). Upe ehémplope oñemombeʼu oĩ hague oñepyrũva ombaʼapo tárdema pe parraltýpe. Avei oĩ umi oñepyrũva ombaʼapo voi guive, péro enterovévape ojepaga vaʼekue elmimoite. Upéicha avei koʼág̃a, noimportái arakaʼépa ojeporavo umi unhídope, enterovéva orresivíta iprémio yvágape ojeʼérõ hesekuéra ifielha. w24.09 24 párr. 15-17

Jesús oheja ñandéve peteĩ ehémplo iporãitereíva. Heta hénte otrata vai vaʼekue chupe, umíva apytépe ifamiliakuéra jepe. Por ehémplo ihentekuéra ndojeroviáiva hese heʼi vaʼekue Jesús rehe itavyraimaha. Umi líder rrelihióso katu heʼi vaʼekue umi demónio omeʼẽha Jesúspe podér. Ha umi soldádo rrománo oñembohory hese, otortura chupe ha amo ipahápe ojuka hikuái Jesúspe (Mar. 3:​21, 22; 14:55; 15:​16-20, 35-37). Jesús oaguanta entéro koʼã mbaʼe oñevengaʼỹre (1 Ped. 2:​21-23). Jesús ehémplo porãite ohechauka ñandéve mbaʼéichapa ñarreaksiona vaʼerã oiko jave peteĩ inhustísia. Jesús oikuaa porã vaʼekue mbaʼe moméntopepa okirirĩnte vaʼerã ha mbaʼe moméntopepa oñeʼẽ vaʼerã (Mat. 26:​62-64). Por ehémplo ojeʼérõ guare hese japu, sapyʼánte haʼe ndeʼírinte mbaʼeve (Mat. 11:19). Ha odesidírõ guare oñeʼẽ, haʼe ndotratavaíri ni noamenasái avavépe. w24.11 4, 5 párr. 9, 10

Eñeimahinamína remeʼẽha peteĩ persóna rehayhuetereívape peteĩ rregálo iporãva ha ideprovechoitereítava chupe. Péro upéi pe persóna oñongatu pe rregálo ha ni nopenái hese. ¡Ajépa rembyasyeténe upéva! Péro ñamoĩ chupe pe persóna oipuruha pe rregálo ha ohechauka voi oagradesetereiha ndéve. Katuete ningo revyʼáta. ¿Mbaʼépa ñaaprende ko ehémplogui? Jehová omeʼẽ vaʼekue Itaʼýra omano hag̃ua ñanderehehápe. Upévare mbaʼeichaitépa oiméne haʼe ovyʼa jahechauka jave jaagradeseha chupe pe rregálo haʼe omeʼẽ vaʼekuére ñanderayhuetereígui (Juan 3:16; Rom. 5:​7, 8). Ohasávo pe tiémpo ikatu hína nañamombaʼevéi Jesús sakrifísio ymave guaréicha. Oikórõ upéva ñanderehe haʼetéta ku jajagarráva Ñandejára rregálo ñañongatu hag̃ua peteĩ lugár ndajahechaihápe, ha ni nañanemanduʼavéima hese. Ani hag̃ua upéva oiko ñanderehe jasegi vaʼerã ñapensa meme Ñandejára ha Jesús ojapo vaʼekuére ñanderehehápe. w25.01 26 párr. 1, 2

Peteĩ ermáno oservítava ansiánoramo ndahaʼéi vaʼerã peteĩ disípulo pyahu. Reservi hag̃ua de ansiáno natekotevẽi ojapo hetaiterei áñoma rejevautisa hague, péro si tekotevẽ ohasa pe tiémpo oiko hag̃ua ndehegui peteĩ kristiáno ojerovia mbaretéva. Reñenombra mboyve ansiáno, rehechauka vaʼerã rejoguaha Jesúspe neumíldevo ha rehaʼarõkuaávo Jehová omeʼẽ peve ndéve hetave asignasión (Mat. 20:23; Filip. 2:​5-8). Ikatu rehechauka ndefielha rejepytaso mbaretévo Jehová ykére, reikóramo haʼe oipotaháicha ha resegíramo umi instruksión haʼe omeʼẽva iñorganisasión rupive. La Biblia heʼi porãiterei umi oservíva de ansiáno ivale vaʼerãha oporomboʼe hag̃ua. ¿Heʼisépa upéva umi idiskursokuéra katuete iñimpresionánte vaʼerãha? Nahániri. Oĩ hetaiterei ansiáno okumplipaitéva umi rrekisíto, péro noĩri hikuái umi ivalevéva apytépe ojapo jave la diskúrso. Upéicharamo jepe, haʼekuéra ojapo porãiterei la itraváho oporomboʼe jave predikasiónpe ha ojapo jave umi visíta de pastoréo. w24.11 23, 24 párr. 14, 15

Elee jave álgo nerentendepáiva la Bíbliape, eñehaʼã estudia upéva. Upéi ejepyʼamongeta la relee vaʼekuére ha epensa mbaʼéichapa upéva ohechauka Jehová ha Jesús nderayhuha, ha mbaʼépa ikatu reaprendeve chuguikuéra (Sal. 119:​97, nóta). Ani reñedesanima nderetopáirõ álgo ipyahúva térã nesorprendéva káda ke relee térã restudia la Biblia. Ikatu ñapensa la ojapóvare umi ohekáva óro kuʼi. Koʼã persóna ndotopái jepi la ohekáva sapyʼaitépe, síno ohasa jepi heta óra ha día upearã. Upéicharõ jepe noñentregái hikuái ha osegi oheka pórke ovaloraiterei pe óro kuʼi michĩvéva jepe ikatúva otopa. Péro umi óro kuʼi ikatúva jatopa la Bíbliape tuichaiterei ivaliosove (Prov. 8:10). Upévare nepasiénsiakena ha esegi elee la Biblia eaprende hag̃ua umi mbaʼe ipyahúva (Sal. 1:2). w25.01 24, 25 párr. 14, 15

Jehová oipota ñaĩ ñaperdona hag̃uáicha oiméramo oĩ álgien ojapóva álgo ñanemoñeñandu vaíva (Sal. 86:5; Luc. 17:4; Efes. 4:32). Ikatu ningo oĩ ojapóva térã heʼíva álgo hasyetereíva ñandéve. Haʼete voi pe persóna ñandekutu rasýva. Ha ni ndajaʼeséi oimérõ pe persóna haʼe peteĩ ñane amigoite térã ñane hénte (Sal. 55:​12-14; Prov. 12:18). Primerorã ikatu ñañehaʼã nañapenáinte la ñañandúvare. Péro jajapóramo upéicha haʼete ku álgien ñandekutúva ha jahejáva pe kyse ñande erídare. Péicha avei, jaikóramo nañapenáinte la ñañandúvare ndaikatúi ñahaʼarõ ñaĩ porã jeytaha. Oĩramo ñaneofendéva, primerorã ikatu ñarrenegaiterei. La Biblia heʼi voi sapyʼánte ikatuha ñandepochy, péro ñandeavisa avei ndovaleiha jaheja ñanedomina la ñañandúva (Sal. 4:4; Efes. 4:26). ¿Mbaʼérepa? Pórke la jajapóramo álgo pochykue reheve, ndahaʼemoʼãi katuete iporãva (Sant. 1:20). Nemanduʼákena: Sapyʼánte ndepochýtante voi, péro nderehéma odepende resegítapa upéicha. w25.02 15 párr. 4-6

Jesús omombeʼu vaʼekue peteĩ istória ohechaukáva ivyroha peteĩ persóna oikónteva oñongatu pláta, “péro imboriahúva Ñandejára renondépe” (Luc. 12:​16-21). Legálmente avave ndoikuaái la henonderã (Prov. 23:​4, 5; Sant. 4:​13-15). Avei Jesús heʼi vaʼekue umi osegiséva chupe oĩ vaʼerãha preparádo oheja hag̃uáicha opa mbaʼe orekóva (Luc. 14:33). Umi apóstol tiémpope umi kristiáno oikóva Judéape oĩ vaʼekue oheja hag̃uáicha entéro mbaʼe orekóva ha ojapo upéva vyʼápe (Heb. 10:34). Koʼág̃a avei heta ñane ermáno operde umi mbaʼe orekóva noñentremetéi haguére polítikare (Apoc. 13:​16, 17). ¿Mbaʼépa oipytyvõ chupekuéra ojapo hag̃ua upéva? Haʼekuéra ojerovia la Jehová promésare. Haʼe heʼi ñandéve: “Núnka ndorohejamoʼãi ha núnka nderepytamoʼãi neaño” (Heb. 13:5). Ñande avei ñañehaʼãmbaite jajapo la ikatumíva jakalkula hag̃ua umi mbaʼe ñaikotevẽtava amo gotyove. Péro oiko sapyʼárõ peteĩ mbaʼe nañahaʼarõiva, ndajadudái Jehová oĩtaha ñande ykére. w25.03 29, 30 párr. 13, 14

Jehová oipota oiko ñandehegui kristiáno okakuaapámava iservísiope. Péro ndohejái jajecha ñaneaño upearã, haʼe ñanepytyvõse guei. Por ehémplo, kongregasiónpe omeʼẽ ñandéve “pastór ha mboʼehára” ikatúva ñanepytyvõ ‘oiko hag̃ua ñandehegui peteĩ kristiáno okakuaapámava ha ohupytýva Crístope entéro mbaʼépe’ (Efes. 4:​11-13). Jehová omeʼẽ avei ñandéve ijespíritu sánto ikatu hag̃uáicha “ñapensa Cristo opensaháicha” (1 Cor. 2:​14-16). Avei oskrivika umi lívro de Mateo, Marcos, Lucas ha Juan ikatu hag̃uáicha jaikuaa porã la ojapo vaʼekue Jesús ko yvy ape ári. Jasegíkena Jesús ehémplo, ñapensa ha ñañekomporta haʼe ojapo haguéicha, péicha oikóta ñandehegui kristiáno ijerovia mbaretéva. Péro ndaikatúi jastudia sólamente umi “enseñánsa primeroite oñemboʼéva Crístogui”, umíva hína umi enseñánsa primeroite ñaaprendéva. w24.04 4, 5 párr. 11, 12

Káda día tekotevẽ jadesidi hetaiterei mbaʼe. Oĩ umi mbaʼe ndahasýiva jadesidi hag̃ua, por ehémplo mbaʼépa ñarambosáta térã mbaʼe órapa ñañenóta jake. Péro oĩ hína umi mbaʼe ijetuʼuvéva jadesidi hag̃ua. Por ehémplo oĩ umi mbaʼe ikatúva oafekta ñande salu, ñane héntepe térã mbaʼéichapa jaservíta Jehovápe. Umi mbaʼe jadesidíva ikatu ñanembovyʼa térã nahániri. Ñande jaipota entéro mbaʼe jadesidíva ideprovécho ñandéve ha ñane hentekuérape. Péro iñimportanteveha, jaipota umi mbaʼe jadesidíva ombovyʼa Jehovápe (Rom. 12:​1, 2). Redesidi porã hag̃ua iñimportánte ereko raẽ enkuénta heta mbaʼe. ¿Mbaʼérepa? Epensamína peteĩ persóna ohóvare okonsulta doktórpe orekógui peteĩ mbaʼasy ivaietereíva. ¿Iporãtapa pe doktór heʼíramo chupe mbaʼe tratamiéntopa osegi vaʼerã oporanduʼỹre mbaʼeve térã ojapoʼỹre algún estúdio? Nahániri. Nde avei redesidi mboyve peteĩ mbaʼe, ereko raẽ vaʼerã enkuénta la reikuaáva pe situasióngui. w25.01 14 párr. 1-3

Jehová oiporiahuverekoiterei la héntepe ha “ndoipotái avave oñehundi” (2 Ped. 3:9). ¿Mbaʼéichapa Jehová ohechaukáma oiporiahuvereko hague umi opeka vaietereívape? Por ehémplo, rréi David ou vaʼekue tuicha opeka. Haʼe oñentremete tembireko ahénore ha oporojuka, péro upéi David oñarrepenti ha Jehová operdona chupe (2 Sam. 12:​1-12). Avei rréi Manasés ojapo vaʼekue heta mbaʼe vai hetaiterei tiémpore. Ivaietereíramo jepe la ikáso, Jehová oiporiahuvereko ha operdona vaʼekue Manaséspe, pórke haʼe oñarrepenti ipyʼaite guive (2 Crón. 33:​9-16). Koʼã ehémplo ñanemomanduʼa Jehová ohecháma guive ikatuha oiporiahuvereko ha operdona peteĩ persónape, haʼe ojapoha upéicha. Jehová omoingove jeýta umi persóna ohechakuaávape hembiapo vai hague ha oñarrepentívape. w24.05 4 párr. 12