32 ELISEO
“Señor, ábrelle os ollos”
NUN outeiro situado nun val en Israel levantábase a cidade amurallada de Dotán. Un día, cedo pola mañá, o servo de Eliseo levantouse, saíu da casa e viu algo aterrador. A cidade estaba rodeada de cabalos, carros e un poderoso exército sirio que chegara pola noite. Viñeran buscar un home en particular: o profeta Eliseo. Morto de medo, o servo saíu correndo para contarlle ó seu amo do grave perigo que se lles viña enriba.
As ameazas e o perigo non eran nada novo para Eliseo. Anos atrás, Xehová enviara a Elías onda Eliseo para que o nomease sucesor e o capacitase. Xuntos enfrontáronse ó malvado rei Acab, á raíña Iezabel e ó seu fillo Ocozías, que querían matalos. Un día, mentres ían camiñando, un carro de guerra de lume baixou do ceo, separounos e o vello profeta foi levado ó ceo no medio de fortes ventos. É posible que Eliseo nunca volvese ver o seu amigo, pero continuou co labor que comezara Elías, liderando “os fillos dos profetas” na guerra de Xehová contra a adoración de Baal (2 Reis 2:15).
Xehová deulle a Eliseo poder para facer moitos milagres. Por exemplo, curou a Naamán, un importante xefe do exército de Siria e un servo a quen o seu rei Benhadad valoraba moito. Pero en vez de estar agradecido, ese rei seguiu atacando Israel. Aínda así, Xehová seguiu frustrando os seus plans revelándolle a Eliseo onde sería o seguinte ataque. Moi enfadado, o rei sirio preguntoulles ós seus servos cal deles lle estaba filtrando os seus plans ó inimigo. Un deles díxolle: “É Eliseo, un profeta que hai en Israel, quen informa ó rei de Israel das palabras que ti dis mesmo na túa alcoba”. Cando Benhadad soubo que Eliseo estaba en Dotán, mandou os seus homes para capturalo.
Eliseo e o seu axudante estaban rodeados por un exército enorme e parecía que non tiñan escapatoria. Pero o profeta sabía algo que o seu axudante descoñecía.
O servo de Eliseo foi o primeiro en ver o exército sirio. Así que correu onda o profeta berrando: “Ai, meu señor, ¿como faremos?”. Vendo o terror nos seus ollos, Eliseo tranquilizouno con estas coñecidas palabras: “Non teñas medo, pois hai máis connosco ca con eles”. É posible que o servo mirase a Eliseo con cara de asombro. Como ían ser dous homes máis ca un exército enorme? Entón Eliseo oroulle a Xehová: “Señor, ábrelle os ollos para que vexa”.
Xehová respondeu de inmediato permitíndolle ó servo ver o que estaba pasando na rexión espiritual. De súpeto, “viu o monte cuberto de cabalos e de carros de lume, que cercaban a Eliseo”. Este era un exército infinitamente máis grande que calquera exército humano!
Os sirios non viron o exército de anxos de Xehová, polo que seguiron avanzando cara á cidade para capturar a Eliseo. Así que o profeta pediulle a Xehová que os cegase. Pero en vez de quitarlles ós sirios a súa capacidade de ver, parece que Xehová impediu que entendesen o que vían. Entón, Eliseo díxolles que el podía guialos ata a cidade e o home que buscaban. Eles aceptaron, pero en realidade Eliseo levounos a Samaria, que estaba a uns 16 quilómetros. Cando chegaron, pediulle a Xehová que lles abrise os ollos. Nese momento entenderon onde estaban: atrapados no medio e medio da capital inimiga. O rei de Israel quería executalos, pero Eliseo dixo que lles desen de comer e os mandasen de volta á súa casa. O relato remata dicindo: “As bandas arameas non volveron entrar no territorio de Israel”.
O profeta sabía que os anxos de Xehová estaban alí porque os “viu” cos ollos da fe. Os seus anos de servizo a Deus ensináronlle que Xehová e os seus anxos nunca están lonxe, e que sempre están dispostos a axudar ós servos fieis de Deus. Saber iso seguro que lle deu moito valor a Eliseo e tamén nolo pode dar a nós.
Le o relato da Biblia:
2 Reis 6:8-23
Pensa nisto:
De que formas demostrou valor Eliseo?
Afonda máis
1. Por que sabemos que Eliseo estaba moi agradecido de que Xehová o escollese como profeta? (1 Reis 19:19-21; it “Eliseo” par. 2-wcgr). A
Imaxe A
Imaxe A
2. Por que lle pediu Eliseo a Elías “dúas partes” do seu espírito? (2 Reis 2:9; w03 1/11 páx. 31).
3. Por que é razoable pensar que Xehová lles provocou ós sirios unha cegueira mental e non física? (it “Cegueira” par. 6-wcgr).
4. Describe as diferentes funcións que cumpriu Eliseo como profeta (it “Eliseo” pars. 27, 28-wcgr).
Medita no que aprendiches
En que situacións pode fortalecernos “ver” os anxos cos ollos da fe? B
Imaxe B
Como poden os anciáns e tódolos demais imitar a forma na que Eliseo animou o seu axudante?
De que formas podes imitar o valor de Eliseo na túa vida?
Analiza o cadro completo
Que me ensina este relato sobre Xehová?
Como se relaciona este relato co propósito de Xehová?
Que me gustaría preguntarlle a Eliseo cando resucite?
Aprende máis
Que poden aprender de Eliseo os irmáns que reciben unha nova responsabilidade?
Aprende máis leccións da vida de Eliseo.
“Eliseo viu os carros de lume. Velos ti?” (w13 15/8 páxs. 28-30)