Taian Aro ao te Buaka i Ukraine—Tera ae E Taekinna te Baibara?

Iangoi ribooti aikai ibukia mataniwin Aaro ao te buaka i Ukraine:

• “Akea te bwai ae e a tia n taekinna mataniwin te Aro ae te Russian Orthodox ae Patriarch Kirill ni kabuakakaa ana waaki n iowawa Rutia . . . . Ana rongorongo aika aki koaua ake e aki toki n taekin ibukin Ukraine, e a [kabongana] Putin bwa aonana ni kauekea te buaka.”—EUobserver, Maati 7, 2022.

• “E a tia Patriarch Kirill . . . n anga ana taeka ae e boutokaa iai riain abana n rinnakoa Ukraine ngke e taekinna bwa e riki te itabarara aei ibukini kaitaraan te bure.”—AP News, Maati 8, 2022.

• “Mataniwin te Aro ae te Ukrainian Orthodox ae arana Metropolitan Epiphanius I mai Kyiv, e kakabwaiaia ana aomata n te Moanibong ae nako ngke a na ‘buakania ana taanga ni buaka Rutia’ . . . [E] taekinna naba bwa e aki bure tiringaia ana tautia Rutia.”—Jerusalem Post, Maati 16, 2022.

• “Ngaira aika kaain te Botaki n Aro i Ukraine (te UCCRO) ti boutokaa Ana Taanga ni Buaka Ukraine ma te koraki ake a tei ni kamanoira. Ti kakabwaiaia ngkai a kamanoa Ukraine mairoun te tia iowawa ao ti tataro ibukia.”—UCCROa Statement, Beberuare 24, 2022.

Tera am iango? A riai Aaro ake a taku bwa a kakairi iroun Iesu Kristo ni kaungaia aia aomata bwa a na buaka? Tera ae e taekinna te Baibara?

Rongorongo rimoa ibukin irekerekeia Aaro ma te buaka

E oti n rongorongon rimoa bwa a aki toki Aaro ni kariaia ke ni kaungaa te buaka ke n taekinna bwa e riai ni buaka te aba ibukini karekean te raoi. I nanon ririki aika bati ao a a tia Ana Tia Kakoaua Iehova ni kaotaraea aroia Aaro aikai ni mwamwanaa te aba. Iangoi tabeua katoto ake a oti n ara boki aika boreetiaki.

• E kaotaki n te kaongora ae “The Crusades—A ‘Tragic Illusion’” bwa te Aro ni Katorika i Rom boni ngaia are e tiringia aomata n aran te Atua ao Kristo.

• E kaotaki n te kaongora ae “The Catholic Church in Africa” te katoto teuana ni kaineti ma kabwakan te Aro n totokoa rikin te buaka ke te tiritiri i marenaia baronga aika kakaokoro.

• E kabwarabwaraaki ni kaongora aika “Is Religion to Blame?,” “Religion’s Role in Man’s Wars,” ao “Religion Takes Sides” aroia mataniwin Aaro n te Katorika, te Orthodox ao te Boretetanti ni boutokai buaka aika bati, ike a a manga boni buakania iai kaain aia Aaro.

A riai Aaro ni Kristian ni boutokaa te buaka?

Ana reirei Iesu: “Ko riai n tangira raom n aomata n aron tangiram i bon iroum.” (Mataio 22:39) “Teimatoa n tangiriia aomata aika kairiribai nakoimi.”—Mataio 5:44-47.

Ana taeka Iesu: “Tiaki ana bwai te aba au Tautaeka n Uea. Ngke arona bwa ana bwai te aba au Tautaeka n Uea, ao a na buaka au aomata bwa N na aki kabureaki.” (Ioane 18:36) “A na mauna nako n te kabaang aomata ni kabane ake a kabongana te kabaang.”—Mataio 26:47-52.

Iangoia: Ngkana ngaia bwa a aki riai ni buaka Kristian ibukini kamanoan Iesu, a riai ngkanne ni buaka i aani bukina riki tabeua? Wareka te kaongora ae “E Boraoi te Buaka ma te Aroaro ni Kristian?” n nora aroia Kristian rimoa ni kakaonimaki n tou mwin ana katoto Iesu ao ana angareirei.

Tera ae e na riki nakoia Aaro ake a kaungaa te buaka?

E reireinira te Baibara bwa e aki butimwaei Aaro te Atua ake a taku bwa a tei ibukin Iesu ma a aki kakairi n ana angareirei.—Mataio 7:21-23; Tito 1:16.

• E kaotaki n te boki ae Te Kaotioti bwa e na katuuaaeia Aaro te Atua, ake a karika mateia “te koraki nako ake a a tia ni kamateaki i aon te aba.” (Te Kaotioti 18:21, 24) Ibukin reiakinan riki anne, wareka te kaongora ae “What Is Babylon the Great?”

• E kaotia Iesu bwa Aaro ake a aki butimwaeaki iroun te Atua, a na kamaunaaki ibukin aia mwakuri aika bubuaka, kaanga ai aroni kaai aika bubuaka aika karikii uaa aika bubuaka, ao “a koreaki ma n tewenakoaki n te ai.” (Mataio 7:15-20) Wareka te kaongora ae “E A Kaan Tokiia Aaro Aika Kewe!” n noria bwa e na kangaa n riki aei.

Photo credits, left to right: Photo by Sefa Karacan/Anadolu Agency/Getty Images; Maxym Marusenko/NurPhoto via Getty Images