E a Riao Korakoran te Kabuebue n Taabo Nako—Tera ae E Taekinna te Baibara?

E ribootinaki bwa e a riao korakoran te kabuebue n taabo nako, n Turai 2022:

• “E kanakoa ana kauring Tiaina ibukin biriraken te kabuebue nakoia kaawa aika e kaania 70 mwaitiia, ngke e a manga rotaki naba te aba aei n te kabuebue ae riao n te kauatai n te namwakaina aei.”—Turai 25, 2022, man ana karekerongorongo te CNN Wire Service.

• “E taonaki nako aonon Eurobe n uraraken taiani buakonikai, n tain korakoran te kabuebue are e a rotii aaba aika bati.”—Turai 17, 2022, te nuutibeeba ae The Guardian.

• “A mwaiti kaawa n te United States ake a taonaki nako n te kabuebue ae riao, are e a rotii aonon taabo n iterana are i mainiku (East Coast), ma aono naba ake mai maiaki (South) ao i nukan aono ake mai maeao (Midwest).”—Turai 24, 2022, te nuutibeeba ae The New York Times.

Tera nanon aei? E nang aki tau ni maekanaki te aonnaba? Tera ae e taekinna te Baibara?

E a kaman taetae ni burabetina korakoran te kabuebue te Baibara?

Eng. Korakoran te kabuebue n taabo nako, e a kaota raoi te tai are e taetae ni burabetinna te Baibara bwa e na riki ni boong aikai. N te katoto, e taetae ni burabetinna Iesu bwa ti na nori “baika kakamaaku” ke “baika a kamiia te nano ao ni karina te maaku i nanora.” (Ruka 21:11; Good News Translation) Biriraken te kabuebue n taabo nako, e a karina te maaku i nanoia aomata aika bati, ao n iangoia bwa e nang tabe n uruaki maiuraoin te aonnaba irouia aomata.

E nang aki tau ni maekanaki te aonnaba?

Tiaki ngaia anne. E karika te aonnaba te Atua bwa mwengaia aomata n aki toki. (Taian Areru 115:16; Te Minita 1:4) E na aki kariaia aomata te Atua bwa a na urua toronibwain te aonnaba ibukina bwa e na ‘kamaunaia ake a urua te aonnaba’ n aron are e beritanna.—Te Kaotioti 11:18.

Iangoi taetae ni burabeti aika uoua ake e beritan te Atua bwa e na karaoi:

• “E na kakatonga te rereua ma te aba ae mwauteretere, ao e na kimwareirei te rereua ae aoraoi ao e na onrake n te uee ae te taberon.” (Itaia 35:1) E na aki kariaia te Atua bwa e na riki te aonnaba bwa ai aron te rereua ae e aki kona ni maekanaki, ma e na kaoka aron maiuraoin taabo aika a a tia n uruakaki.

• “Ko tabeakina te aonnaba, ko karikia bwa e na karikii uaa aika bati ao e na mari.” (Taian Areru 65:9) E na manga riki ni bwaretaiti te aonnaba aei, n ana kakabwaia te Atua.

Ngkana ko kan reiakinna riki bwa e aera ngkai e riki bibitakin kanoan te bong bwa teuana kakororaoan ana taetae ni burabeti te Baibara, wareka te kaongora ae “Climate Change and Our Future—What the Bible Says.”

Ngkana ko kan reiakin riki ana berita nako te Baibara ibukini manga kaokan marin te otabwanin, nora te kaongora ae “Who Will Save the Earth?”