A Taekinna Taan Tautaeka Bwa E a Kaan Rikin Aremaketon—Tera ae E Taekinna te Baibara?

N ingabongin te Moanibong ae 10 n Okitobwa 2022, e a urubekei kaawan Ukraine Rutia n ana mitiaera ni kabooa iai mwin te urubwai are e riki imwin te rebwetau ae korakora uabong n nako, ike e a uruaki iai te buriiti are e tomaa Crimea ao Rutia. A riki baikai teutana te tai imwin aia kauring tabeman taan tautaeka, are a taekinna iai bwa e nang riki Aremaketon.

• “Ti a rangi ni kaan riki ngkai ma Aremaketon ni kabotauaki ma ana tai ngkoa ni Beretitenti Kennedy ao te itabarara ngkoa naba i marenan Amerika ma Rutia are e ataaki n arana ae te Cuban Missile Crisis . . . Irou kaanga ai bon akea riki te anga teuana are e na kona ni kabonganaaki iai te bwai ni buaka ae mwaakaroiroi n aki karika Aremaketon.”—Te Beretitenti mai Amerika ae Joe Biden, Okitobwa 6, 2022.

• “I kakoauaa ae e nang riki Aremaketon, e a bon ruanikai maiuraoin ara buraneti aei.”—Ana taeka te Beretitenti mai Ukraine, ae Volodymyr Zelensky, ngke e titirakinaki taekan aia urubwai bwaai ni buaka aika mwaakaroiroi, man te BBC News, Okitobwa 8, 2022.

E na riki Aremaketon mani kabonganaan bwaai ni buaka aika mwaakaroiroi? Tera ae e taekinna te Baibara?

A na karika Aremaketon bwaai ni buaka aika mwaakaroiroi?

A na aki. Te taeka ae “Aremaketon” e tii oti teuana te tai n te Baibara n Te Kaotioti 16:16. E aki kaineti ma te buaka ae riki i marenaia natannaomata, ma e kaineti nakon ana buaka te Atua ma “ueea n te aonnaba ni kabutaa.” (Te Kaotioti 16:14) E na kabongana te buaka ae Aremaketon te Atua, ni kamaunaia iai tautaekan nako te aonnaba.—Taniera 2:44.

Ngkana ko kan ataa te bwai ae e na riki nakon te aonnaba n rokon Aremaketon, wareka te kaongora ae Tera te Buaka ae Aremaketon?

E na mauna te aonnaba ma kaaina n te bwai ni buaka ae mwaakaroiroi?

A na aki. E ngae ngke a na bae ni kabonganai bwaai ni buaka aika mwaakaroiroi taan tautaeka, ma e na aki kariaia te Atua bwa e na kamaunaaki iai te aonnaba. E taku te Baibara:

• “E teimatoa n aki toki te aonnaba.”—Te Minita 1:4.

• “A na abana te aonnaba akana raoiroi, ao a na maeka i aona n aki toki.”—Taian Areru 37:29.

Ma a kaotaki man ana taetae ni burabeti te Baibara ao baika a tabe ngkai n riiriki, bwa e nang riki te bitaki ae korakora nakon te aonnaba ma aomata. (Mataio 24:3-7; 2 Timoteo 3:1-5) Karekea ongoraam n ana taeka te Baibara ibukin taai aika imwaira rinanon te reirei n te Baibara ae e aki kabooaki.