Baikara Baika Ko Kainnanoi Bwa Ko Aonga n Ota n te Baibara?

Ana kaeka te Baibara

E kabwarabwaraa te Baibara te bwai ae ko riai ni karaoia bwa ko aonga n ota iai. N aki ongeia bwa tera arom ma “e aki rangi ni kangaanga iroumi [ana rongorongo te Atua ae n te Baibara] ao e aki naba riaon ami konaa.”—Te Tua-Kaua 30:11.

Baika Ko Kainnanoi Bwa Ko aonga n ota n te Baibara

1. Bwaina te iango ae riai. Kakoauaa ae te Baibara bon ana Taeka te Atua. Bwabwaina te nanorinano kioina ngkai e riribaa te kamoamoa te Atua. (1 I-Tetaronike 2:13; Iakobo 4:6) Tai kakakoauai taeka ni kabane imwain ae ko nori raoi koauaia bwa e tangiringkami te Atua bwa kam na kabongana “wanawanami.”—I-Rom 12:1, 2.

2. Tataro ibukin te wanawana. E taku te Baibara n Taeka N Rabakau 3:5: “Tai onimakina oin am ataibwai.” Ma “teimatoa ni butiia te Atua” te wanawana bwa kam aonga n ota n te Baibara.—Iakobo 1:5.

3. Katoatai n ukeuke n reirei. Ko na kakabwaiaaki riki man te reirei n te Baibara ngkana ko katoatai ni karaoia nakon ae e bwakabwaka taina.—Iotua 1:8.

4. Ukeuke i aon te atu n reirei. Te ukeuke i aon te atu teuana imwin teuana, ike ko a rinanon iai ana taeka te Baibara ni kaineti ma te atu ke te reirei teuana, bon te anga ae uaana ibukin reiakinan ana reirei te Baibara. Moanna man “reirei ake moan reirei,” ao imwina “naako nakon reirei ake a a nano riki.” (Ebera 6:1, 2, Easy-to-Read Version) Ko na noria bwa ko a kona ni kabotaua te kibu teuana ma teuana ao n ataa ae mwakoron te Baibara aika kakaokoro a bon irekereke, ao riki mwakorona ake e “kangaanga te ota iai.”—2 Betero 3:16.

5. Karekea te ibuobuoki mairouia tabeman riki. E kaungaira te Baibara bwa ti na butimwaei ibuobuoki mairouia tabeman riki ake a ota n te Baibara. (Mwakuri 8:30, 31) A tauraoi Ana Tia Kakoaua Iehova ni karaoa te reirei n te Baibara ae akea boona. A katotongia Kristian rimoa ni kabongana te Baibara ni buokiia iai aomata bwa a na ataa ana reirei ni koaua te Baibara.—Mwakuri 17:2, 3.

Baika ko aki kainnanoi

1. Te wanawana ke te reirei ae bubura. A ota n te Baibara ana abotoro Iesu ake 12 ao a reireinia iai temwangina, e ngae ngke a iangoaki abotoro irouia tabemwaang bwa “e uarereke aia reirei ao a aki kakannato.”—Mwakuri 4:13.

2. Te mwane. Ko kona n reiakina ana reirei te Baibara n akea boona. E tuangia taan rimwina Iesu ni kangai: “Kam anganaki n akea boona, aanga naba n aki kabooaki.”—Mataio 10:8.