Arom ni Kona n Ota Raoi ni Kanoan te Baibara

1. Butiia Te Tia Korea Te Baibara Ana Ibuobuoki

E taekina ae kangai Ninfa ae maeka i Itare: “Iai ngkoa taai ake I riai ni wareka iai te Baibara imwaini matu. I karaoa aei kioina ngkai I ataia ae bon Ana Taeka te Atua, ao e ngae ngke I aki rangi n unga ni wawareki booki, ma I rangi ni kan atai raoi baike e a tia ni korei te Atua n te Baibara. I a tia ni motika nanou ngkoa bwa N na warekia ni kabane. E taraa ni bebete n te moantai, ma ngke I a roko ni mwakoro aika kangaanga ao I a katoka naba warekana.”

KO A tia n namakina naba aron are riki nakon Ninfa? A bati aomata aika a kona naba n namakinna. Ma n aron ae ti noria n te kaongora ae imwain aei, e bon tangiriko Iehova ae te Atua are ngaia te tia Korea te Baibara, bwa ko na ota raoi n ana Taeka. Ko na kanga ngkanne ni karekea te aeka n ota anne? Te moani mwaneka boni mani butiian te tia Korea te Baibara ana ibuobuoki.

A aki kaei kuura n reirei ibukia rabi ana abotoro Iesu ibukini kataneiaakiia taekan te Aro, ai ngaia are a a iangoaki bwa aomata aika “aki reireiaki aika aki ataibwai.” (Mwakuri 4:13) Ma e ngae n anne, ao e karau nanoia Iesu bwa a boni kona n ota n Ana Taeka te Atua. N te aro raa? E kabwarabwaraa Iesu ni kangai: “Te tia Buobuoki, are te Tamnei are Raoiroi, are E na kanakomaia te Tama n arau, E na reireingkami bwaai ni kabane.” (Ioane 14:26) E kabongana taamneina ae raoiroi aei te Atua ke mwaakana ae korakora ni karika iai te aonnaba ao baika maiu iai. (Karikani Bwaai 1:2) E kabongana naba te mwaaka anne ni kairiia iai taani korea te Baibara ake 40 bwa a na korei ana iango i nanon te Baibara. (2 Betero 1:20, 21) E tauraoi te taamnei ae raoiroi anne ni buokiia te koraki ake a ukera otaia raoi ni kanoan te Baibara.

E na kanga n reke iroum te taamnei ae raoiroi are mairoun te Atua? Ko riai ni bubutii ma te nano n onimaki. Ni koauana, ko riai ni kaokioka am bubutii. E kangai Iesu: Teimatoa ni “Bubuti, ao kam na anganaki; . . . ngkai kam ata te angania natimi baika raraoi, ngkami akana kam buakaka, ao tiaki e maiti riki iroun Tamami are i karawa te kan anga te Tamnei are Raoiroi nakoia akana butiia?” (Ruka 11:9, 13) E na tituaraoi Iehova n anga taamneina ae raoiroi nakoia ake a bubutii ma nanoia ni koaua. Anne te mwaaka ae mwamwakuri are e kona ni buokiko n ota raoi ni baika a nanonaki n te Baibara, ake a kairaki koreaia rinanon te Taamnei nga ma nga te ririki n nako. E kona naba taamnein te Atua n anganiko te wanawana ae kainnanoaki ibukini maiuakinan te rongorongo ae mwaaka man te Baibara.​—Ebera 4:12; Iakobo 1:5, 6.

Tataro nakon te Atua ni katoai taai ake ko wareware iai man te Baibara ao butiia taamneina ae raoiroi bwa e na buokiko n ota raoi n ana Taeka.