Tera ae E Taekinna te Baibara Ibukin te Karinraraa?
Ana kaeka te Baibara
E tua te Baibara bwa ti na aki karina te raraa i rabwatara. Ngaia are ti aki riai ni butimwaea te raraa ke mwakorona nako, ae tao e na kanaki ke e na karinaki. Nori kiibu aikai:
Karikani Bwaai 9:4. E kariaia te Atua bwa a na kana irikon te man imwin te Ieka Noa ma ana utu, ma e tua nakoia bwa a na aki kana te raraa. E kangai te Atua nakon Noa: “Ma kam na tai kana irikon te man ma raraana are maiuna.” E kaineti te tua aei nakoia aomata nako man te tai anne, ibukina bwa ngaira ni kabane boni kanoan Noa.
Nakoaia Ibonga 17:14. “Kam na tai kang raraani baika maiu ni kabane, bwa boni maiuni baika maiu ni kabane raraaia. E na kamateaki ane e kanna.” E taraia te Atua bwa te maiu are n te raraa bon ana bwai. E ngae ngke e tii anganaki te natannaomata are Iteraera te tua aei, ma e oti iai bwa e kakawaki iroun te Atua te tua ae aki kanakin te raraa.
Mwakuri 15:20. ‘Raawa nakon te raraa.’ E angania Kristian te Atua te tua are e angan naba Noa. E oti n rongorongon rimoa bwa a rawa naba Kristian ake ngkoa ni kana te raraa ke ni kabongana naba ibukin te bwainnaoraki.
E aera te Atua ngkai e tua bwa ti na rawa nakon te raraa?
Iai bukina aika raraoi man te tabo ni kuakua aika ti na rawa iai nakon te karinraraa. Ma ae kakawaki riki, e tua te Atua bwa ti na rawa nakon te raraa ibukina bwa te baere e tei ibukin te raraa, e bon tabu irouna.—Nakoaia Ibonga 17:11; I-Korote 1:20.