E a Tabe n Rin n te Kauoua n Ririki te Buaka Are i Ukraine—Tera te Kantaninga ae E Anganira te Baibara?

Te Kanimabong ae 24 ni Beberuare 2023, e a kanikinaea kanuringan te bong ae karawawata—ai teuana te ririki ngkai imwini moanakin te buaka are i Ukraine. E oti n ribooti tabeua bwa e kaania 300,000 mwaitiia tautian Ukraine ma Rutia ake a a tia ni mate iai ke n ikoaki ao e kaania 30,000 mwaitiia kaain te aba, ake a kakoauaaki bwa a mate n te buaka aei. Ma e na boni bae ni birirake riki te ware nakon akanne.

E kananokawaki bwa taraan ae e na aki waekoa n toki te buaka aei.

• “E a kaania teuana te ririki imwin te tai are a rinnakoa iai Ukraine ana taanga ni buaka Rutia, ao taraan ae e na aki waekoa n toki te buaka aio. Akea i buakoia aaba aika uoua aikai ae e taraa n tokanikai ao taraan ae e na kangaanga irouia karekean te boonnano ibukin katokan aia itabarara.”—NPR (National Public Radio), Beberuare 19, 2023.

A mwaiti aomata aika a nanokawaki n noran te maraki ma te karawawata are e riki man te buaka aei n ikotaki ma itabarara riki tabeua, ake a rotabuaka maiuia aomata aika akea irekerekeia ma mwakuri n iowawa, ni katobibia te aonnaba. Tera te kantaninga ae e anganira te Baibara? E na iai katokan te buaka?

Te buaka are e na katoki buaka nako

N te Baibara ao iai taekan te buaka teuana are e na kamaiuia aomata ma e na aki kamaunaia. E ataaki te buaka anne bwa Aremaketon, ao e kabwarabwaraaki bwa “te buaka n te bong ae kakannato ae ana bong te Atua ae Moan te Mwaaka.” (Te Kaotioti 16:14, 16) Te buaka aei, e na kamaunai aia tautaeka aomata nako, ake ngaiia oin rikin buaka aika urubwai. Ngkana ko kan ota bwa e na kangaa Aremaketon n uotii kakabwaia aika teimaan, wareki kaongora aika imwina aikai:

• “Tera te Buaka ae Aremaketon?”

• “Aremaketon Te Rongorongo ae Raoiroi!”