E Aera Ngkai E a Riki te Bwenaua n Aia Tautaeka Aomata?—Tera ae E Taekinna te Baibara?

A rotakibuaka botannaomata nako n aroia taan tautaeka n aki inanoi. Ni kaineti ma te 2022 Pew Research Center, ao e oti iai bwa “65 te katebubua mwaitiia aomata man aaba aika 19, ake a taekinna bwa e korakora ke n riao te aki boonnano i marenaia aomata ake a boutokai waaki n tautaeka n aaba ake a mena iai.”

Ko a tia n nora rikiraken te bwenaua irouia taan tautaeka n te tabo ane ko mena iai? E aera bwa e riki anne? Iai katokana? Iangoa ae e taekinna te Baibara.

Anua Aika Karika te Bwenaua

E a kaman taekinna te Baibara bwa ni boong aikai, ae nanona “kabaneani boong”, a na mwaiti aomata aika a na karekea te bwenaua man anuaia.

• Bwa ane a nang riki aomata bwa taan tangiriia i bon irouia, . . . taani kakanneti.”—2 Timoteo 3:1-3.

A aki kona ni butiraoi tautaeka n aomata, e ngae ngke a bati aika a kakorakoraia ni kanakoraoia. Ibukini kakaokoron iango ao e a kangaanga ke e a bon aki kona n reke ae a na kaai n ikotaki ni mwakuri ni buoka tokin te kangaanga teuana. Anne are e a oti iai koauan are e a kaman taekinna te Baibara mangkoa.

Ma, e kaotia te Baibara bwa tokin te kangaanga aei bon-te tautaeka ae e kairaki iroun ae e kona ni katoki kangaanga ake a rotakibuaka iai aomata nako ni boong aikai.

Te tia kairiri ae taubobonga ao ni mwamwannano

E katereaki raoi n te Baibara taekan te tia kairiri ae taubobonga aei: Iesu Kristo. Iai mwaakan Iesu, riaina n tautaeka ao e kani karekea te katiteuanaaki ma te rau nakoia aomata nako.

Bon te tia kairiri ae tau Iesu ibukina bwa e mwamwannanoia aomata ao e kani buokiia, e a moamoa riki te koraki ake a karaoaki mwakuri ni bangaomata nakoia.

• E na nanoangaiia akana mangori ma akana maiu ni kainnano, ao e na kamaiuia akana maiu ni kainnano. E na kamaiuia man te karawawataaki ao man te iowawa.”—Taian Areru 72:12-14.

Reiakina riki taekan ana Tautaeka n Uea te Atua, ae e tei i karawa ae e kairiri iai Iesu. Ukeria bwa ko na kangaa ni kakabwaiaaki man te waaki ni kairiri aei ngkana ko boutokaia.