Tera ae E Taekinna te Baibara Ibukin Taren Amwarake ni Boong Aikai?

“Akea manga te baki.” A oti n taeka aikai, te tia ae a uaiakinna taani kairiri n te aonnaba ibukin aia kangaanga teuana naba aomata ae moan te korakora ae karekean te amwarake nakoia aomata nako.a Ma te koaua bwa e nang akea manga te baki? Tera ae e taekinna te Baibara?

E a kaman taekinaki n te Baibara taren amwarake ni boong aikai

E a kaman taekinaki n te Baibara bwa a na tare amwarake n taai aikai, ae taai aika aranaki bwa “kabaneani boong.” (2 Timoteo 3:1) E aki kariki taren amwarake aikai te Atua, ma e a kamani kauringira taekaia. (Iakobo 1:13) Iangoi taetae ni burabeti aika uoua man te Baibara.

“A na roko roongo . . . n te tabo teuana ma teuana.” (Mataio 24:7) E a kaman taetae ni burabetinaki aio n te Baibara, bwa e na butanako taren te amwarake. E taku te ribooti ae ai tibwa ngkai mairouia naake a kamatebwaia aroni karekean ma tibwatibwaan te amwarake: “E tabe ni kerikaaki aron aia kakorakora aomata ibukini katokan te baki, aki taun te amwarake ao te aoraki ae te bakitaia.”b Bubua tabun te mirion mwaitiia aomata n aaba aika bati, ae a aikoa kona ni karekea te amwarake ae a kainnanoia. E kananokawaki bwa a mwaiti aika bua maiuia iai.

“Akea bwa I a nora te aoti ae roroo, ao iai te kainikatine i bain teuare toka i aona.” (Te Kaotioti 6:5) N te taetae ni burabeti aei, a tei ibukin te rongo ni kabaneani boong, te aoti ni kaikonaki ma te tia toka i aona.c Te kainikatine are i bain te tia toka i aon te aoti, bon ibukini katinean amwarake aika karako mwaitiia, bwa a aonga n toa baia aomata iai. Ngke e tabe ni biri te aoti aio ma te tia toka i aona, ao e ongo te aba te bwanaa ae katanoataa taekani bobuakan amwarake ao e kauringia aomata bwa a na aki bakataei kanaia. (Te Kaotioti 6:6) E kabwarabwaraaki n aei etin te kangaanga n taren te amwarake ae kabutaa te aonnaba ni boong aikai, ike a aikoa kona birion mwaitiia aomata, ni karekei ke ni kabooi amwarake aika kamarurung.

Aron tokin taren amwarake

A taekinna taan rabakau bwa e katauraoi amwarake aika rangi n tau ibukini marikeia aomata nako ara buraneti aio. Mangaia are, baikara kangaanga aika kariki taren amwarake? Ao tera ae e taekinna te Baibara ibukin te bwai ae e na karaoia ara tia Karikiriki ae Iehova,d ni katoki kangaanga aikai?

Te Kangaanga: A aki kona tautaeka ni katoka te maiu ni kainnano ma mooti aika aki raraoi ake a karika bakiia aomata.

Katokana: A na oneaki mwin aia tautaeka aomata aika aki kororaoi n te tautaeka ae kororaoi—Ana Tautaeka n Uea te Atua. (Taniera 2:44; Mataio 6:10) Ni boong aikai ao a mwaiti aomata aika maiu ni kainnano ake a korakai ibukini karekeani kanaia, ma e nangi bitaki anne i aan ana Tautaeka n Uea te Atua. E taku te Baibara ibukin Iesu Kristo, ae te Uea n Ana Tautaeka n Uea te Atua: “E na kamaiuia akana maiu ni kainnano aika tang ni kani buokaki, ao ane e mangori naba ma ane akea te tia buokia. . . . E na bati te uita n te aonnaba, ao e na taonako i aon taubukini maunga.”—Taian Areru 72:12, 16.

Te Kangaanga: A karika te urubwai taiani buaka ao a rota kaubwain te aba, ike e a tiatiana ke ni katoka tibwatibwaan te amwarake.

Katokana: “E katoki buaka [Iehova] ni kabutaa te aonnaba. E ototea te kainikatebe ma ni kamaeinikuna te kainiwai, e kabueki kaa ni buaka n te ai.” (Taian Areru 46:9) E na kamaunai bwaai ni buaka Iehova n ikotaki ma naake a kauekei rikini buaka. Ibukin anne, a nang kona aomata ni kai karekei kanaia n akea te kangaanga. E berita te Baibara: “A na maiureirei akana raoiroi n ana bong, ao e na bati te raoi.”—Taian Areru 72:7.

Te Kangaanga: A urui aroka n amwarake ao n tiringia maan, buakakani kanoan te bong ma kabuanibwai aika karina.

Katokana: E na taui aroni baika riiriki n te aonnaba te Atua, ni kanakoraoi kanoani boong ibukin unikan aroka n amwarake. E taku te Baibara: “E karaua te angibuaka [Iehova], ao e a raoi naoni marawa. . . . E onika te rereua nakon taian nei ni maunei, ao te aba ae mwau nakon taiani koburake n ran. E kamaekaia iai akana baki . . . A ununiki n taian tawaana ao a uniki kureebe ni nne ni kureebe, ake a karikiuaa.”—Taian Areru 107:29, 35-37.

Te Kangaanga: A karaoi amwarake aika aki kamarurung ke n tuka rokon te amwarake nakoia ake a boni kainnanoia, aomata aika mwangainrang ao ni babakanikawai.

Katokana: E na kamaunaia aomata aika aki bwabwaina te koaua ao ni babakanikawai, Ana Tautaeka n Uea te Atua. (Taian Areru 37:10, 11; Itaia 61:8) E kabwarabwaraa te Baibara bwa Iehova ae te Atua bon “Teuare kawakina te kaetitaeka ae riai ibukia akana babakanikawaiaki, ao Teuare anga te amwarake nakoia akana baki.”—Taian Areru 146:7.

Te Kangaanga: E bakataeaki ke e kabuaaki ni katoa ririki, katenimwakoroni mwaitin amwarake aika katauraoaki n te aonnaba.

Katokana: E nang tararuaaki raoi aroni karerekean te amwarake, i aan Ana Tautaeka n Uea te Atua. Ni menan Iesu i aon te aba, ao e taraia raoi bwa e na aki bakataeaki te amwarake. N te katoto, e karaoa te kakai n te taina ao ni kaamwarakeia aomata aika e raka mwaitiia i aon 5,000. Imwina ao e anga ana kaetieti nakoia taan rimwina n taku: “Ikotii nikiran amwarake bwa a aonga n aki taonaba.”—Ioane 6:5-13.

Ibukina bwa e nang kamauna nibwan te baki Ana Tautaeka n Uea te Atua, a nangi bane aomata nako ngkanne ni kukurei n taonakon amwarake aika raraoi ao aika kamarurung. (Itaia 25:6) Ngkana ko kan ataia bwa n ningai ae e na kakororaoa iai aei Ana Tautaeka n Uea te Atua, nora te kaongora ae “N Ningai ae E na Tautaekana Iai te Aonnaba Ana Tautaeka n Uea te Atua?”