E Nang Katoka te Buaka Iesu

Ni menan Iesu i aon te aba ao e kaota korakoran tangiraia aomata n arona naba ni kareana maiuna ibukia. (Mataio 20:28; Ioane 15:13) E nangi waekoa ni manga kaota riki koauan ana tangira ibukia aomata n arona ni kabongana mwaakana n Uea n Ana Tautaeka n Uea te Atua, ni “katoki buaka ni kabutaa te aonnaba.”​—Taian Areru 46:9.

Nora aron te Baibara ni kabwarabwaraa te bwai ae e na karaoia Iesu:

• “E na kamaiuia akana maiu ni kainnano aika tang ni kani buokaki, ao ane e mangori naba ma ane akea te tia buokia. E na nanoangaiia akana mangori ma akana maiu ni kainnano, ao e na kamaiuia akana maiu ni kainnano. E na kamaiuia man te karawawataaki ao man te iowawa.”​—Taian Areru 72:​12-14.

Ti na kangaa ni kaota ara kakaitau ibukini baike e a tia ni karaoi Iesu ma baika e nang karaoi ibukira? Te anga teuana, boni man reiakinan riki taekan “te rongorongo ae raoiroi ae taekan ana Tautaeka n Uea te Atua,” are e tataekinna. (Ruka 4:43) Wareka te kaongora ae “Tera Ana Tautaeka n Uea te Atua?”