Te Kangaanga n Taren te Amwarake n te Aonnaba Man te Buaka ao Bibitakini Kanoan te Bong​—Tera ae E Taekinna te Baibara?

Te buaka are i Ukraine n ikotaki ma baika a riki ni bibitakini kanoan te bong, a a karika te kangaanga ae taabangaki ni kaineti ma birirakeni boon amwarake n te aonnaba. Ma a rotaki riki iai aaba aika e aki tau mwaitini kaubwaia, ibukina bwa a mwaiti aomata iai aika e kangaanga irouia karekeani kanaia ae tau ibukia ma aia utu.

• “E a tiatianaki karaoan ao katauraoan amwarake ibukin rikin te itabarara, bibitakini kanoan te bong, rikirakeni boon te bwaa ma te iti ao a a bati riki.”​—António Guterres, ae te tia koroboki n te UN, Turai 17, 2023.

• “A katautaua taan rabakau bwa ngkai e a tia ni buubai Rutia mani karorokoan amwarake mai Ukraine, ao e nang rikirake riki ngkanne taabangakin te kangaanga ma taren te amwarake, ao aei are e a kabirirakei boon amwarake n aaba aika e aki tau mwaitini kaubwaia, ai moarara riki n aonon Aberika Meang ao n te Middle East.”​—Atalayar.com, Turai 23, 2023.

Iangoa ae e taekinna te Baibara ibukin te kangaanga ma taren te amwarake ao kanoan taai aika imwaira.

E a kaman taekina te kangaanga ma taren te amwarake te Baibara

• E taetae ni burabetina aei Iesu: “E na teirake te natannaomata teuana ni buakana te natannaomata teuana, ao te tautaeka n uea teuana ni buakana te tautaeka n uea teuana, ao a na roko roongo.”​—Mataio 24:7.

• E kaikonakaki taekaia taan toka i aoia aoti aika aman, ni bokin te Baibara ae Te Kaotioti. E tei ibukin te buaka temanna irouia taan toka i aoia aoti aikai. E rimwiaki iroun temanna ae tei ibukin te rongo, ae taekan te tai ike e a tiatianaki iai te amwarake ao ni birirake bobuakani booia. “I a nora te aoti ae roroo, ao iai te kainikatine i bain teuare toka i aona. I ongo te bwanaa . . . ae kangai: ‘Boon teuana te kuate ni uita teuana te tenariati,a ao boon tenua te kuate ni baare teuana te tenariati.’”​—Te Kaotioti 6:​5, 6.

A a tabe ngkai ni kakoroaki bukin taetae ni burabeti aikai ni kaineti ma taren te amwarake, n taai aika e aranna te Baibara bwa “kabaneani boong.” (2 Timoteo 3:1) Ngkana ko kan reiakina riki taekani “kabaneani boong” ao taan toka i aoia aoti aika aman ake n Te Kaotioti, mataku n te taamnei ae E a Bitaki te Waaki n te Aonnaba Man 1914 ao wareka te kaongora ae “Taan Toka i Aoia Aoti Aika Aman​—Antai Ngaiia?”

Aron te Baibara ni buokiko

• E anga taeka n reirei aika manena te Baibara ake a kona ni buokiko ngkana ko kaaitara ma kangaangan te maiu, n ikotaki ma birirakeni boon amwarake ke taren te amwarake. Nori katoto tabeua n te kaongora ae “How to Live on Less.”

• E anga te kantaninga te Baibara n taekinna ae e na boni manga nakoraoi riki aron te waaki n taai aika imwaira. E beritanna bwa “e na bati te uita n te aonnaba” ao e nang toa bain temanna ma temanna n amwarake aika bati. (Taian Areru 72:16) Ngkana ko kan reiakina riki te kantaninga aei ibukin taai aika imwaira ao bukina ngkai ti kona n onimakina te berita aei, wareka te kaongora ae “A Real Hope for a Better Tomorrow.”