E a Korakora te Tiritiri ma te Katii n Taabo Nako—Tera ae E Taekinna te Baibara?

A kakubanako rikini mwakuri n tiritiri ma te katii n taabo nako, n Turai 2022:

• “Tiringakin te [Buraim Minitita ngkoa ae Shinzo Abe] mai Tiaban, e a karawawatai nanoia kaain te aba anne ao e kubanako iai te aonnaba ae bwanin, e a moamoa riki ngkai e ataaki Tiaban bwa te aba ae e karako iai te mwakuri n iowawa ao e rangi n tuamatoa ibukini kabonganaakin te katii.”—Turai 10, 2022, man te nuutibeeba ae The Japan Times.

• “A kubanako kaain Denmark n tiringaia teniman aomata iroun te tia kakatii n te tabo ni boobwai ae bubura i aon Copenhagen.”—Turai 4, 2022, man ana kanakobwanaa Reuters.

• “Aberika Maiaki: 15 aika a mate iroun te tia kakatii are e katiia aomata n te bwaa teuana ni kaawan Soweto.”—Turai 10, 2022, man te nuutibeeba ae The Guardian.

• “E raka i aon 220 mwaitiia ake a katiiaki ao n tiringaki n te U.S. n tain te bukamaru are e karaoaki n te wikeen ibukini kauringaan bongin te aba n Turai 4.”—Turai 5, 2022, man ana kanakobwanaa te CBS News.

Ti kona ni kakoauaa ae a na katokaki mwakuri n iowawa aikai? Tera ae e taekinna te Baibara?

Tokini Mwakuri n Iowawa

E kabwarabwaraa ara bong aikai te Baibara bwa “kabaneani boong,” ike a nang karaoi iai mwakuri n iowawa aika tiritiri aomata, n akea aia nanoanga. (2 Timoteo 3:1, 3) Anne bukina ngkai a a maeka ma te maaku aomata. (Ruka 21:11) Ma e beritana te tai teuana te Baibara, ike a nang toki iai mwakuri n iowawa aikai ao a nang maeka “aomata n te tabo ni maeka ae rau, n taabo ni maeka aika mweraoi ao n taabo ni motirawa aika rau.” (Itaia 32:18) A na kangaa n toki mwakuri n iowawa aikai?

E na tewenakoia ni kabane aika buakaka te Atua ao ni kamaunai bwaai ni buaka nako.

• “A na boni koreakinako akana buakaka man te aonnaba.”—Taeka N Rabakau 2:22.

• “E katoki buaka ni kabutaa te aonnaba [te Atua]. E ototea te kainikatebe ma ni kamaeinikuna te kainiwai, e kabueki kaa ni buaka n te ai.”—Taian Areru 46:9.

E na kamaunai baika karikii mwakuri n iowawa te Atua, n arona n reireinia aomata bwa a na maeka n rau.

• “A na aki manga kaikoaki ke ni karaoi baika karuanikai, i aon au maunga ae tabu ni kabutaa, ibukina bwa e na boni buta te aonnaba n ataakin Iehova, n aron taari ngkai e kabutaa marawa.”—Itaia 11:9.

• N taai aikai, e reireinia aomata nako te Atua bwa a na rawa nakoni mwakuri n iowawa ao nakoni kabonganaakin bwaai ni buaka, ma a na “ororei aia kabaang ni bitii bwa bwaai ni kamarautano, ao aia kainiwai naba bwa bwaai ni koromwaanga.”—Mika 4:3.

Ngkana ko kan reiakina riki taekan ana berita te Baibara ni kaineti ma te tai are a nang kona ni maeka iai aomata n aki maaku, wareka te kaongora ae “Freedom From Fear—Is It Possible?”

Ngkana ko kan reiakina riki taekan te anga are a nang toki iai mwakuri n iowawa, wareka te kaongora “Peace on Earth at Last!”