E a Tabe n Uruaki Maiuraoin te Aonnaba—Tera ae E Taekinna te Baibara?

“A mwaiti bwaai aika a karaoi aomata, aika a rotakibuaka iai baika a riki n te aonnaba. A taonakinako kaawa aika bubura n rietatan te ran. E a rikirake korakoran te kabuebue, ae te bwai ae tuai n riiriki mai imwaina. Angibuaka aika kakamaaku. Uarerekeni mwaitin te ran n taabo nako. Mirion ma mirion mwaitin aroka ma maan aika a bua. Bon tiaki aei te karaki ae karioaki ke te rongorongo ae betanaki. Boni baike a taku taan rabakau bwa a na riki n te aonnaba ngkana a aki bita aia babaire taian tautaeka ni kaineti ma kabonganaan te iti, te bwaa, ao te kaeti.”—Ana taeka António Guterres, ae te tia koroboki n te Aia Botaki te Botannaomata, ni kaineti ma ana ribooti te rabwata ae te Intergovernmental Panel on Climate Change, are e otinako n Eberi 4, 2022.

“A anga aia kauring taan rabakau ni bwain te aonnaba bwa n ririki aika imwaira, urubwai ake a a irekereke ma bibitakini kanoan te bong, a na rotii taabo ni kaneweaba n te United States, ake a kai rotakibuaka n rikiraken te kabuebue. Baika a bubuaka ake a na riki, kaanga bon titeboo ma kangaanga ake ti a bae n tia ni wareki taekaia n te Baibara: te ai ao te ieka, aiti aika totoakaei ake a a ran ibukin te kabuebue, rikiraken rietan taari ao teimatoan rikin te kabuebue ae korakora.”—“Flooding Chaos in Yellowstone, a Sign of Crises to Come,” kanoan te nuutibeeba ae te New York Times, Tun 15, 2022.

A kona ni kanakoraoaki kangaanga aika irekereke ma te otabwanin? Ngkana ngaia anne ao antai ae e na kanakoraoi? Iangoi baika e taekin te Baibara.

E a kaman taekinaki bwa e na rotakibuaka te otabwanin

E taku te Baibara bwa e na “kamaunaia … te koraki ake a urua te aonnaba” te Atua. (Te Kaotioti 11:18) A reke tenua reireiara man te kibu aei:

1. 1. E na bon ruanikai maiuraoin te aonnaba n aia mwakuri aomata.

2. 2. A na katokaki mwakuri ake a urua te aonnaba.

3. 3. Bon te Atua ae e na kanakoraoi kangaanga aika irekereke ma te otabwanin, ao tiaki aomata.

E na bon aki mauna te aonnaba

E taekinna te Baibara bwa e na “teimatoa n aki toki te aonnaba.” (Te Minita 1:4) E na bon teimatoa ni maekanaki.

• “A na abana te aonnaba akana raoiroi, ao a na maeka i aona n aki toki.”—Taian Areru 37:29.

E na manga kaokaki nakon arona are ngkoa maiuraoin ara buraneti.

• “E na kakatonga te rereua ma te aba ae mwauteretere, ao e na kimwareirei te rereua ae aoraoi ao e na onrake n te uee ae te taberon.”—Itaia 35:1.