Antai Maria te I-Maketara?
Ana kaeka te Baibara
Maria te I-Maketara bon te tia rimwin Iesu Kristo ae kakaonimaki. Aran neiei ae te I-Maketara, e katautauaki bwa e nako man te kaawa ae Maketara (tao Makatan), ae uakaan ma Namani Kariraia. Tao e maeka ngkoa ikanne Maria.
Maria te I-Maketara bon temanna naba mai buakoia aine tabeman ake a mwamwananga ma Iesu ao taan rimwina, ao ni buobuokiia ni bwaai tabeua. (Ruka 8:1-3) E nora kamateakin Iesu, ao boni ngaia naba ae moani kaitiboo ma Iesu imwini kautakina man te mate.—Mareko 15:40; Ioane 20:11-18.
Te koaua bwa te aine ae kakabooaki Maria te I-Maketara?
E aki taekinaki n te Baibara bwa Maria te I-Maketara bon te aine ae kakabooaki. E tii taekinaki rongorongona bwa a kaotinakoaki taimonio aika itiman mairoun neiei iroun Iesu.—Ruka 8:2.
E aera ngkai a mwaiti aika iangoa Maria bwa te aine ae kakabooaki imwain rikina bwa te tia rimwin Iesu? Irabubua te ririki imwini maten neiei, ao a bukina Maria tabeman bwa ngaia te aine are aki atongaki arana (are tao te aine ae kakabooaki) are kamwaimwa waen Iesu n rannimatana ao e kamwaua n irannatuna. (Ruka 7:36-38) Ma e ngae n anne, akea koauan aei n te Baibara.
Te koaua bwa “te abotoro nakoia abotoro” Maria te I-Maketara?
Tiaki. E aranaki Maria n te Aro ni Katorika bwa “Santa Maria te I-Maketara” n ikotaki naba ma “te abotoro nakoia abotoro” ibukina bwa ngaia naba temanna are e moani kaota taekani mangautin Iesu man te mate nakoia abotoro. (Ioane 20:18) Ma tiaki n ae e a aranaki ngkanne iai bwa ai te abotoro neiei. Ao akea n te Baibara ae koreaki iai bwa ngaia te abotoro.—Ruka 6:12-16.
E bane korean te Baibara n raabanen te moan tienture C.E. Ma n te kaonoua n tienture ao a a baireia taani kairiri n te Aro bwa a nang karikirakea Maria te I-Maketara nakoni mwiokoana ae rine. Ni koroboki ake a koreaki n te kauoua ao n te katenua n tienture—ake tiaki kanoan te Baibara—e kabwarabwaraaki iai bwa iai tabeman ana abotoro Iesu ake a a manga bakantang irouni Maria. A bon oteaki karaki aikai ao akea koauaia n te Baibara.
Te koaua bwa Maria te I-Maketara buun Iesu Kristo?
Tiaki. E boni kamataataa te Baibara bwa akea buun Iesu.a
a Nora te kaongora ae “Was Jesus Married? Did Jesus Have Siblings?”